2020–2024
Yog tus Tswv lub Tswv Yim uas Peb Yuav Tsum Muaj Phau Ntawv Maumoos
Plaub Hlis Ntuj xyoo 2024 lub tuam rooj sab laj
11:13

Yog tus Tswv lub Tswv Yim uas Peb Yuav Tsum Muaj Phau Ntawv Maumoos

Los ntawm Thawj Tswj Hwm Mark L. Pace

Tus Tuam Thawj Tswj Hwm rau Hnub Caiv Kev Kawm Vaj Lug Kub

Kuv thov Vajtswv hais tias xyoo no kev nyeem Phau Ntawv Maumoos yuav ua rau peb txhua leej txhua tus muaj kev zoo siab thiab yuav ua ib txoj koob hmoov uas pab peb txhua tus.

Cov kwv tij thiab cov muam, peb ua nej tsaug vim nej sim nyeem cov vaj lug kub nrog phau Los, Nrog Kuv Mus. Ua nej tsaug rau txhua yam nej tab tom ua. Nej txoj kev nrog Vajtswv thiab Nws txoj lus siv raug zoo txhua txhua hnub yeej pab tau ntau. “Nej tab tom teeb lub hauv paus ntawm ib txoj hauj lwm tseem ceeb. Thiab los ntawm tej yam me yuav muaj tej yam uas loj tawm los.”1

Txoj kev nyeem tus Cawm Seej cov lus qhia hauv cov vaj lug kub pab peb pauv peb lub tsev ua chaw muaj kev ntseeg thiab ua lub hauv paus rau txoj kev kawm txoj moo zoo.2 Nws caw tus Ntsuj Plig los rau hauv peb vaj peb tsev. Tus Vaj Ntsuj Plig Dawb Huv puv peb siab peb ntsws muaj kev zoo siab3 thiab pab peb rais los mus ua Yexus Khetos cov pab coj rau tag nrho peb lub neej.

Hauv ob peb xyoos tas los no, thaum nyeem cov ntawv vaj lug kub, peb pom tag nrho Vajtswv tej lus qhia rau Nws cov me nyuam hauv txoj moo zoo txhua tiam neeg.4

Hauv txhua tiam neeg, peb yeej pom ib tug txheej txheem. Vajtswv qhia los sis muab Yexus Khetos txoj moo zoo txum tim rov qab los dhau ntawm Nws cov yaj saub. Cov neeg ua raws li tus yaj saub hais thiab tau koob hmoov nplua mias. Tiam sis, nyob nyob ces, ib txhia pib tsis ua raws li tus yaj saub cov lus thiab khiav mus deb ntawm tus Tswv thiab Nws txoj moo zoo. Peb hu qhov no ua txoj kev tso qhov tseeb tseg. Tau xub qhia txoj moo zoo rau Adas, tiam sis Adas thiab Evas ib co me nyuam tau tig ntawm tus Tswv mus thiab tau tso qhov tseeb tseg.5 Peb pom ib tug txheej txheem ntawm txoj kev muab txum tim rov qab los thiab rov qab tso qhov tseeb tseg hauv Enauj, Nau-as, Anplaham, Mauxes, thiab lwm cov neeg tej lub caij nyoog tso txoj cai.

Niaj hnub no, peb nyob hauv lub caij nyoog tso txoj cai uas muaj txhij txhua.6 Nov yog tib lub caij nyoog uas yuav tsis muaj kev tso qhov tseeb tseg.7 Nws yog lub caij nyoog tso txoj cai uas yuav qhib tus Cawm Seej Yexus Khetos txoj Kev Los Zaum Ob thiab Nws yuav kav ib txhiab xyoos.

Ces muaj dab tsi uas txawv rau lub caij nyoog no? Tus Tswv tau muab dab tsi rau peb niaj hnub nim no, tej yam tseem ceeb rau peb lub caij nyoog, uas yuav pab peb txav los ze tus Tswv thiab txhob tso Nws tseg?

Kuv xav txog ib lo lus teb hais tias cov vaj lug kub—tiag tiag mas Phau Ntawv Maumoos: Ib Zaj Lus Tim Khawv Ntxiv txog Yexus Khetos.

Txawm hais tias Vajtswv tau cog lus hais tias yuav tsis muaj dua ib zaug uas sawv daws tso qhov tseeb tseg, peb yuav tsum xyuam xim thiab ceev faj kom peb ib leeg twg yuav tsis tso qhov tseeb tseg—nco qab ntsoov, yam li Thawj Tswj Hwm Russell M. Nelson qhia hais tias, “Peb sawb daws nyias yuav tsum lav ris nyias txoj kev loj hlob ntawm sab ntsuj plig.”8 Txoj kev kawm Phau Ntawv Maumoos, li peb tab tom kawm xyoo no, yeej pab peb txav los ze tus Cawm Seej—thiab pab peb nyob ze Nws tas mus li.

Peb hu ua “kev kawm,” thiab li ntawd zoo vim qhov ntawd txhais tau tias yuav tsum sib zog ua. Tab sis mas peb tsis tas yuav kawm ib yam dab tsi tshiab txhua txhua zaus. Tej thaum kev nyeem Phau Ntawv Maumoos yog qhov uas peb niaj hnub nrog Vajtswv sib raug zoo—tu sab ntsuj plig, txais dag zog ntawm sab ntsuj plig ua ntej peb tawm mus ntsib neeg ntiaj teb, los sis nrhiav tau kev nplij siab tom qab yus muaj ib hnub tsis zoo hauv ntiaj teb no.

Peb kawm cov vaj lug kub xwv kom tus Vaj Ntsuj Plig Dawb Huv, uas yog tus qhia zoo, yuav pab tau peb haj yam hloov siab los ntseeg Leej Txiv Saum Ntuj Ceeb Tsheej thiab Yexus Khetos thiab pab peb rais los mus ua neeg zoo li Nkawd.9

Thaum muaj tej kev xav li no, tej zaum peb yuav xav nug hais tias, “Lub lim piam no tus Vaj Ntsuj Plig Dawb Huv qhia peb dab tsi thaum peb kawm Phau Ntawv Maumoos?” thiab “Qhov ntawd pab peb txav mus ze tus Cawm Seej li cas?”

Nov yog ob lo lus nug zoo thaum peb kawm cov vaj lug kub hauv tsev. Thiab yog lus nug zoo thaum pib ib hoob kawm vaj lug kub tom lub koom txoos. Peb haj yam txawj qhia hauv lub koom txoos hnub Sunday thaum uas peb haj yam ua tib zoo kawm tom tsev lub lim piam ua ntej ntawd. Yog li ntawd, peb tej hoob kawm rau Hnub Caiv, “tus uas tshaj tawm thiab tus uas txais, ib leeg to taub ib leeg, thiab puav leej txais kev txhawb nqa thiab xyiv fab ua ke.”10

Nov yog ob peb nqes uas tus Ntsuj Plig tau tshoov kuv lub siab thaum kuv kawm Phau Ntawv Maumoos lub lim piam no:

  • Nifais qhia Yakhauj kom “yuav tsum tsom kwm thiab muab cov phiaj no cev mus … ib tiam neeg mus rau ib tiam. Thiab yog tias muaj kev qhuab qhia uas dawb ceev, los sis kev tshwm sim … los sis kev qhia tej yuav muaj los yav tom ntej,” ces Yakhauj yuav tsum “sau … tej ntawd sau rau saum cov phiaj no … kom pab tau [lawv] cov neeg.”11

  • Yav tom qab ntawd Yakhauj hais lus tim khawv tias, “peb tau kawm [cov vaj lug kub], … thiab vim peb muaj tag nrho tej pov thawj no peb thiaj tau txais kev cia siab, thiab peb txoj kev ntseeg hloov kom ua khov kho.”12

Nim no, tej nqes no ua rau kuv nco qab txog cov lus uas Nifais tau hais txog cov phiaj tooj dag hais tias:

“Peb twb nqa tau cov ceev xwm txheej … thiab tau muab tshawb xyuas thiab pom tias cov ceev xwm txheej no yeej … muaj nuj nqis heev rau peb, peb thiaj tseem tshwj tau tus Tswv tej lus txib tseg cia rau peb tej me nyuam thiab.

“Yog li ntawd, yog tus Tswv lub tswv yim uas peb yuav tsum coj cov ceev xwm txheej no nrog peb, thaum peb tsiv nyob hauv roob moj sab qhua mus rau tim thaj av uas cog lus cia.”13

Ua nim no, yog tias tsim nyog rau Lihais thiab nws tsev neeg muaj cov vaj lug kub, ces yeej tsim nyog niaj hnub no peb muaj thiab. Niaj hnub no cov vaj lug kub muaj nuj nqi rau peb lub neej thiab muab hwj chim rau peb sab ntsuj plig.

Tsis tau muaj dua lwm haiv neeg hauv tib neeg ntiaj teb zaj liv xwm uas tau Phau Ntawv Maumoos thiab lwm cov vaj lug kub npaum li peb muaj.14 Lihais thiab nws tsev muaj hmoov nqa cov phiaj tooj dag nrog lawv mus, tiam sis lawv tsis muaj ib phau hauv lawv txhua lub tsev pheeb suab ntaub! Phau Ntawv Maumoos tseem ceeb tshaj plaws twb yog yus ib phau. Yog phau uas peb niaj hnub nyeem.

Nyob hauv Lihais zaj ua yog toog pom tsob ntoo cawm neeg txoj sia, Lihais qhia tias qhov uas yus ib leeg to taub Vajtswv txoj kev hlub tseem ceeb npaum li cas. Tom qab nws noj lub txiv, Lihais pom nws tus poj niam, Xaliyas, thiab nws ob tug tub Nifais thiab Xam nyob tsis deb ntawd.

“Lawv sawv ntsug zoo li lawv tsis paub xyov lawv yuav mus qhov twg.

Lihais hais tias, “… kuv co tes rau lawv, thiab kuv kuj tau tsa suab hais nrov nrov rau lawv kom lawv yuav los cuag kuv, thiab los noj cov txiv, uas yog cov qab tshaj txhua yam txiv.

“Thiab … lawv tau los cuag kuv thiab tau noj cov txiv ntawd.”15

Kuv nyiam qhov uas Lihais uas tib zoo ua txiv tsev zoo. Xaliyas, Nifais, thiab Xam tab tom ua neeg zoo thiab ua ncaj ncees. Tiam sis tus Tswv muaj ib yam uas zoo tshaj, ib yam uas yuav qab tshaj plaws rau lawv. Lawv tsis paub yuav mus nrhiav qhov twg, tiam sis Lihais yeej paub. Ces nws thiaj hu lawv, “siv ib lub suab nrov nrov,” kom los rau tsob ntoo uas cawm txoj sia thiab noj lub txiv rau lawv tus kheej. Nws qhia meej meej rau lawv. Lawv to taub yuam kev tsis tau.

Kuv niam txiv ua tib zoo qhia kuv li ntawd.16 Thaum kuv yog ib tug tub hluas, muaj li 11-12 xyoos, kuv niam nug kuv hais tias, “Mark, koj puas paub koj tus kheej, los ntawm tus Vaj Ntsuj Plig Dawb Huv, hais tias txoj moo zoo no muaj tseeb?”

Kuv xav tsis thoob txog nws lo lus nug no. Kuv ib txwm sim ua ib tug “tub zoo,” thiab xav tias ua li ntawd los kuj txaus lawm. Tiam sis, kuv niam, zoo li Lihais, paub tias yuav tsum muaj ib yam dab tsi ntxiv. Kuv yuav tsum ua dab tsi thiab paub rau kuv tus kheej kiag.

Kuv teb hais tias kuv tseem tsis tau paub tseeb li ntawd. Nws tsis xav li cas txog kuv lo lus teb.

Ces nws thiaj hais ib yam uas kuv tseem nco qab ntsoov. Hnub no kuv tseem nco nws cov lus uas hais tias: “Leej Txiv Saum Ntuj Ceeb Tsheej xav kom koj yuav paub rau koj tus kheej. Tiam sis koj yuav tsum ua hauj lwm kom thiaj paub. Koj yuav tsum nyeem Phau Ntawv Maumoos thiab thov Vajtswv kom tus Vaj Ntsuj Plig Dawb Huv yuav qhia koj. Leej Txiv Saum Ntuj Ceeb Tsheej yeej yuav teb koj tej lus thov.”

Kuv kuj tsis tau nyeem Phau Ntawv Maumoos dua ib zaug. Kuv tsis tau xav tias kuv laus txaus ua li ntawd. Tab sis mas kuv niam paub zoo dua.

Nws lo lus nug ntawd ua rau kuv muaj lub siab xav paub rau kuv tus kheej.

Ces, txhua txhua hmos, hauv kuv chav pw nrog kuv ob tug kwv tij, kuv tau taw teeb ntawm kuv lub txaj thiab tau nyeem ib tshooj hauv Phau Ntawv Maumoos. Ces, tau tua teeb, tawm ntawm txaj thiab txhos caug thov Vajtswv. Kuv tau mob siab thov Vajtswv ntau tshaj txhua lub sij hawm ua ntej ntawd. Kuv tau nug Leej Txiv Saum Ntuj Ceeb Tsheej seb Phau Ntawv Maumoos puas muaj tseeb.

Txij thaum kuv pib nyeem Phau Ntawv Maumoos, kuv tau hnov tias Leej Txiv Saum Ntuj Ceeb Tsheej yeej pom kuv tej hauj lwm nyeem ntawv no. Thiab kuv paub tias Nws nyiam qhov uas kuv ua. Thaum kuv nyeem thiab thov Vajtswv, kuv txawm muaj kev thaj yeeb nyab xeeb heev. Ib tshooj dhau ib tshooj, txoj kev ntseeg hauv kuv nruab siab tau loj hlob tuaj. Nyob nyob ces, kuv txawm to taub hais tias tej kev xav ntawd twb yog tus Vaj Ntsuj Plig Dawb Huv tab tom qhia kuv tias tej ntawd muaj tseeb.17 Kuv txawm paub rau kuv tus kheej tias Phau Ntawv Maumoos muaj tseeb thiab tias Yexus Khetos yog tus Cawm Seej rau lub ntiaj teb no. Kuv ris kuv niam txiaj heev vim nws hais tej lus ntawd.

Qhov uas kuv pib nyeem Phau Ntawv Maumoos thaum tseem ua tub hluas tau pib tus qauv rau kuv txoj kev kawm vaj lug kub uas kuv tseem niaj hnub txais koob hmoov vim kuv tseem ua li ntawd. Kuv tseem nyeem Phau Ntawv Maumoos thiab txhos caug thov Vajtswv. Thiab tus Vaj Ntsuj Plig Dawb Huv yeej ua tim khawv txog tej yam tseeb no.

Nifais hais qhov yog lawm. Yog tus Tswv lub tswv yim uas peb yuav tsum nqa cov vaj lug kub nrog peb mus hauv tag nrho peb lub neej. Phau Ntawv Maumoos yog lub “plawv zeb” uas ua rau tiam neeg no txawv tej tiam neeg yav nram ntej. Thaum peb kawm Phau Ntawv Maumoos thiab ua raws li tus yaj saub uas muaj sia nyob cov lus qhia, peb yuav tsis tso qhov tseeb tseg hauv peb lub neej.18

Txoj kev caw kom los rau tsob ntoo uas cawm txoj sia thaum tuav raws Vajtswv txoj lus tsis yog Lihais caw nws tsev neeg xwb, thiab tsis yog ib qho uas kuv niam caw kuv los nyeem thiab thov Vajtswv txog Phau Ntawv Maumoos xwb. Nws kuj yog ib lo lus caw uas peb tus yaj saub, Thawj Tswj Hwm Russell M. Nelson, tau caw peb txhua tus los ua.

Nws hais tias “Kuv cog lus hais tias thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnub. Kuv cog lus hais tias thaum nej xav txog tej yam uas nej kawm, lub rooj ntug yuav qhib plho, thiab nej yuav txais lus teb rau nej cov lus nug thiab tau kev coj qhia rau nej lub neej.”19

Kuv thov Vajtswv hais tias xyoo no kev nyeem Phau Ntawv Maumoos yuav ua rau peb txhua leej txhua tus muaj kev zoo siab thiab yuav tau txoj koob hmoov uas pab peb txav los nyob ze dua tus Cawm Seej.

Leej Txiv Saum Ntuj Ceeb Tsheej muaj sia nyob. Yexus Khetos yog peb tus Cawm Seej thiab tus Txhiv Dim. Phau Ntawv Maumoos muaj Nws cov lus thiab qhia txog Nws txoj kev hlub. Niaj hnub no Thawj Tswj Hwm Russell M. Nelson yog tus Tswv tus yaj saub uas muaj sia nyob hauv ntiaj teb no. Kuv paub tias tej no muaj tseeb vim tus Vaj Ntsuj Plig Dawb Huv tau ua tim khawv rau kuv paub, uas yog tib zaj lus tim khawv uas kuv tau txais thaum kuv nyeem Phau Ntawv Maumoos thaum kuv tseem ua tub hluas. Los ntawm Yexus Khetos lub npe, amees.

Lus Cim

  1. Lus Qhuab Qhia thiab Kev Khi Lus 64:33.

  2. “Tus txheej txheem kawm hauv tsev uas lub Koom Txoos txhawb nqa yuav ua rau txhua yim neeg haj yam muaj hwj chim, thaum uas txhua yim neeg ua tib zoo ua raws li tej lus qhia no thiab pauv lawv lub tsev los ua ib qho chaw cawm sia vim muaj kev ntseeg. Kuv cog lus hais tias thaum nej rau siab ntso kho nej lub tsev kom ua lub hauv paus rau txoj kev kawm txoj moo zoo, nyob nyob ces nej tej Hnub Caiv yuav ua rau nej zoo siab kawg. Nej cov me nyuam yuav zoo siab hlo kawm thiab ua raws li tus Cawm Seej tej kev qhia, thiab dab ntxwg nyoog lub hwj chim hauv nej lub neej thiab nej lub tsev yuav tsawg zuj zus mus. Yuav muaj tej kev pauv loj uas kav ntev mus hauv nej tsev neeg” (Russell M. Nelson “Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liyahaunas, Kaum Ib Hlis Ntuj 2018, 113).

  3. “Nws hais rau nej tias, Nws yuav muab kuv tus Ntsuj Plig rau nej, uas yuav qhib nej lub paj hlwb, uas yuav ua rau nej tus ntsuj plig muaj kev zoo siab” (Lus Qhuab Qhia thiab Kev Khi Lus 11:13).

  4. “Ib lub caij nyoog tso txoj cai yog ib lub caij nyoog uas tus Tswv muaj ib tug tub qhe hauv ntiaj teb no uas muaj txoj cai thiab tuav cov yawm sij ntawm lub pov thawj hwj dawb huv, thiab tau lus txib kom khiav tej hauv lwm hauv txoj moo zoo lub caij nyoog ntawd rau noob neej ntiaj teb” (Tej Ntsiab Lus thiab tej Lus Nug, “Caij Nyoog Tso txoj Cai,” Txoj Moo Zoo cov Ntawv).

  5. Saib Mauxes 5:12–16.

  6. Tus yaj saub Daniyees tau pom peb lub caij nyoog, peb tiam neeg, thaum Nws txhais Nenpukajnexales zaj npau suav. Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog lub pob zeb hauv zaj npau suav ntawd, uas ntais rhe saum pob tsuas los uas tsis yog neeg txhais tes ua loj tuaj mus thoob lub ntiaj teb (saib Daniyees 2:34–35, 44–45; Lus Qhuab Qhia thiab Kev Khi Lus 65:2).

  7. “Vajtswv Leej Txiv thiab Yexus Khetos tau hu tus Yaj Saub Joseph Smith los ua tus yaj saub hauv lub caij nyoog tso txoj cai no. Twb tau muab txhua lub hwj chim ntawm tej lub caij nyoog thaum ub txum tim rov qab los los ntawm nws. Lub caij nyoog tso txoj cai uas muaj txhij txhua yuav nyob tas mus li thiab nyob hauv txhua qhov chaw. Yuav tsis xaus vim muaj kev tso qhov tseeb tseg, thiab yeej yuav puv lub ntiaj teb” (Russell M. Nelson, “Kev Muab Ixayees Sau Los Ua Ke,” Liahona, Kaum Ib Hlis Ntuj 2006, 79–80).

  8. Russell M. Nelson, “Tej Lus Qhib Rooj Sab Laj,” Liahona, Kaum Ib Hlis Ntuj 2018, 8.

  9. Saib “Kev Hloov Siab Los Ntseeg Yog Peb lub Hom Phiaj,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoo 2024, v.

  10. Lus Qhuab Qhia thiab Kev Khi Lus 50:22; kuj saib nqes 17–21.

  11. Yakhauj 1:3–4.

  12. Yakhauj 4:6.

  13. 1 Nifais 5:21–22.

  14. Tsis ntev tas los no twb tshaj tawm hais tias tau faib 200 plhom Phau Ntawv Maumoos hauv tiam neeg no. Qhov ntawd zoo kawg nkaus li. Tsam no twb muab Phau Ntawv Maumoos txhais uas 113 yam lus, es tab tom muab txhais ua 17 yam lus tshiab. Muaj hmoov kawg vim peb muaj Phau Ntawv Maumoos hauv ntawv, hluav taws xob, kaw hauv kab xev, hauv vis di aus, thiab ua lwm yam. (Saib Ryan Jensen, “Church Distributes 200 Millionth Copy of the Book of Mormon,” Church News, Kaum Ob Hlis Ntuj hnub tim 29, 2023, thechurchnews.com.)

  15. 1 Nifais 8:14–16; ntxiv qhov uas ntawv qaij.

  16. “Lub hwj huam ntawm sab ntsuj plig uas muaj zog tshaj hauv ib tug me nyuam lub neej yog nws niam nws txiv, nws pog yawg, niam tais yawm txiv txoj kev coj yam ntxwv ncaj ncees thaum lawv coj raws nraim li lawv tej kev khi lus. Cov niam tsev txiv tsev txhob txwm qhia lawv cov me nyuam kom ntseeg tus Tswv Yexus Khetos lawv thiaj li “yuav paub cia siab rau lub hauv paus twg kom txais kev zam txim rau lawv tej kev txhaum’ [2 Nifais 25:26]. Kev lam ua raws li peb tej kev khi lus tej lub sij hawm xwb ua rau peb sab ntsuj plig qaug zog tas. Sab ntsuj plig qhov puas tsuaj loj tshaj feem ntau nyob ntawm peb cov me nyuam thiab cov xeeb ntxwv” (Kevin W. Pearson, “Nej Puas Tseem Txaus Siab?,” Liahona, Kaum Ib Hlis Ntuj 2022, 69).

  17. Saib Lus Qhuab Qhia thiab Kev Khi Lus 6:22–24.

  18. Tus Yaj Saub Joseph Smith hais tias, “Kuv tau hais rau cov kwv tij tias Phau Ntawv Maumoos yog phau uas raug tshaj txhua phau ntawv nyob hauv ntiaj teb no, thiab yog lub plawv zeb ntawm peb txoj kev teev ntuj, thiab tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv” (nyob hauv zaj lus piav txog Phau Ntawv Maumoos).

  19. Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?,” Liahona, Kaum Ib Hlis Ntuj 2017, 62–63.