Tso Siab rau tus Tswv

Nyob hauv peb tsev neeg, tej lub sij hawm peb ua si “Kev Tso Siab rau Lwm Tus.” Tej zaum nej tau ua si qhov no thiab. Ob tug neeg sawv nyob deb li ob peb feet xwb, ib tug tig nws nraub qaum rau tus neeg thib ob. Thaum tus neeg nyob rau qab hais, tus nyob tom hauv ntej vau rau qab rau nws tus phooj ywg txais.

Kev tso siab yog lub hauv paus ntawm txhua txoj kev sib raug zoo. Ib lo lus nug tseem ceeb rau ob tug neeg uas sib paub yog “Kuv puas tso siab rau tus neeg ntawd?” Tsuas muaj kev sib raug zoo thaum ib leeg kam tso siab rau ib leeg. Yeej yuav tsis sib raug zoo yog tias tus no tso siab rau tus tod tiam sis tus tod tsis tau tso siab rau tus no.

Peb sawv daws yog ib tug ntsuj plig tub los sis ntxhais ntawm ib khub niam txiv saum ntuj ceeb tsheej.¹ Tiam sis peb caj ceg ntawm sab ntsuj plig yog ib lub hauv paus xwb, tsis yog qhov uas tsim ib txoj kev sib raug zoo nrog Vajtswv. Peb yuav nrog Nws sib raug zoo tsuas yog thaum peb xaiv tso siab rau Nws xwb.

Leej Txiv Saum Ntuj Ceeb Tsheej xav nrog txhua tus ntawm Nws cov me nyuam ntsuj plig sib raug zoo.² Yexus tau qhia txog qhov no thaum Nws tau thov Vajtswv, “Kom lawv koom ib lub siab; Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab.”³ Kev sib raug zoo uas Vajtswv xav kom txhua tus me nyuam ntsuj plig muaj yeej yog ib yam zoo txaus kom Nws muab txhua yam uas Nws muaj rau peb txhua tus.⁴ Txoj kev sib raug zoo uas kav ntev li ntawd los tsuas muaj thaum yus tso siab plhuav rau ib tug neeg zoo li ntawd.

Peb Leej Txiv Saum Ntuj Ceeb Tsheej tau ua Nws txoj hauj lwm txij thaum chiv keeb los kom qhia tias Nws yeej tso siab rau qhov uas Nws cov me nyuam txhua leej txhua tus muaj peev xwm hloov los ua neeg zoo li Nws. Nws txoj hau kev kom peb loj hlob tuaj thiab vam meej mus ntxiv uas Nws qhia ua ntej peb los rau hauv lub ntiaj teb no qhia tias Nws tau tso siab rau peb. Nws tau hais tias Nws yuav qhia peb txog tej kev cai mus ib txhis li, tsim ib lub ntiaj teb, muab cev nqaij daim tawv rau peb, muab lub txiaj ntsim xaiv ntawm peb tus kheej rau peb, thiab cia peb kawm thiab loj hlob tuaj thaum peb xaiv ua tej yam ntawm peb tus kheej. Nws xav kom peb xaiv coj raws li Nws tej kev cai thiab rov qab mus nrog Nws thiab Nws Leej Tub nyob mus ib txhis li.

Vim nws paub tias peb yuav tsis xaiv ua tej yam zoo txhua lub sij hawm, Nws twb tau npaj ib txoj kev rau peb dim lub txim ntawm tej yam uas peb xaiv tsis zoo. Nws tau muab ib tug Cawm Seej rau peb—Nws Leej Tub, Yexus Khetos, los theej peb lub txhoj thiab ua rau peb rov qab ua neeg huv yog peb hloov siab lees txim.⁵ Nws caw peb siv lub txiaj ntsim hloov siab lees txim tsis tu tsis tseg.⁶

Txhua tus niam tsev txiv tsev paub tias nyuaj npaum li cas tso siab rau ib tug me nyuam txaus kom cia lawv xaiv ua tej yam, qhov tseem ceeb yog thaum tus niam tsev txiv tsev paub tus me nyuam yuav ua yuam kev thiab raug txim vim nws ua li ntawd. Tiam sis Leej Txiv Saum Ntuj Ceeb Tsheej cia peb xaiv tej yam uas yuav pab peb muaj peev xwm hloov los ua neeg zoo li Nws! Ib yam li Txwj Laug Dale G. Renlund qhia, “[Nws] lub hom phiaj tsis yog kom Nws cov me nyuam ua qhov yog; Nws lub hom phiaj yog kom Nws cov me nyuam xaiv tej yam uas yog thiab thaum kawg hloov los ua neeg zoo li Nws.”⁷

Txawm yog Vajtswv tso siab rau peb los, peb txoj kev nrog Nws sib raug zoo yuav zoo zuj zus yog peb kam tso siab rau Nws xwb. Qhov teeb meem yog qhov uas peb nyob hauv ib lub ntiaj teb uas tau poob lawm thiab peb txhua tus tau poob txoj kev tso siab rau lwm tus vim lawv tsis ncaj, ntxeev siab, lawv xav yuam peb, los sis muaj tej yam xwm txheej ntxiv. Thaum twg ib tug neeg ntxeev siab rau peb, nyuaj rau peb rov qab tso siab rau tus ntawd. Thaum tib neeg tsis zoo tag nrho ntxeev siab li ntawd ces tej lub sij hawm ua rau peb tsis txawj thiab tsis kam tso siab rau Leej Txiv Saum Ntuj Ceeb Tsheej.

Ob peb xyoos tas los, ob tug phooj ywg, Leonid thiab Valentina, tshaj tawm tias nkawd xav los ua mej zeej ntawm lub Koom Txoos. Thaum Leonid pib kawm txog txoj moo zoo, nyuaj rau nws thov Vajtswv. Thaum nws tseem hluas, Leonid tau raug tej yam phem vim nws cov thawj coj tau yuam thiab tswj kav tsis yog es ua rau nws tsis ntseeg tib neeg uas muaj txoj cai. Tej yam no ua nyuaj rau nws qhib nws lub siab thiab qhia nws Leej Txiv Saum Ntuj Ceeb Tsheej nws xav li cas. Thaum sij hawm dhau mus thiab thaum nws kawm ntxiv, Leonid pib to taub zoo dua txog Vajtswv tus cwj pwm thiab nws paub txog Vajtswv txoj kev hlub. Thaum kawg, ces yooj yim rau nws thov Vajtswv kom ua Vajtswv tsaug thiab qhia tias nws hlub Vajtswv. Qhov uas nws tso siab zuj zus rau Vajtswv ua rau nws thiab Valentina khi lus thiab nrog Vajtswv sib raug zoo thiab nkawd ob leeg kuj sib raug zoo ntxiv thiab.

Yog tias qhov uas nej txoj kev tso siab rau lwm tus ploj mus ua rau nej tsis xav tso siab rau Vajtswv, thov ua raws li Leonid tus yam ntxwv. Ua siab ntev kawm ntxiv txog Vajtswv, Nws zoo li cas, Nws tej cwj pwm, thiab Nws tej lub hom phiaj. Nrhiav thiab sau ntawv txog tej lub sij hawm uas nej hnov Nws txoj kev hlub thiab lub hwj chim hauv nej lub neej. Peb tus yaj saub, Thawj Tswj Hwm Russell M. Nelson, tau qhia tias peb yim kawm txog Vajtswv, peb yim yuav tso siab rau Nws.⁸

Tej lub sij hawm txoj kev zoo tshaj plaws rau peb kawm kom tso siab rau Vajtswv yog kev tso siab rau Nws xwb. Ib yam li qhov ua si “Kev Tso Siab rau Lwm Tus,” tej lub sij hawm peb yuav tsum txaus siab vau rau qab thiab cia Nws txais peb. Peb lub neej hauv lub ntiaj teb no yog ib txoj kev sim siab. Tej teeb meem uas ua rau peb yuav tsum siv rab peev xwm uas peb tsis muaj yeej los yuav muaj ntau. Thaum peb tsis muaj kev txawj ntse thiab tsis to taub zoo txaus, peb yeej nrhiav kev pab. Nyob hauv ib lub ntiaj teb uas tshaj xov xwm ntau tshaj plaws, yeej muaj neeg coob uas ntxias kom peb siv lawv tej kev kho teeb meem. Tiam sis, cov lus ntuas nyob hauv phau Paj Lug ua rau peb muaj txoj kev kho teeb meem zoo tshaj plaws: “Tso siab rau tus Tswv kom kawg [nej] lub siab.”⁹ Peb qhia tias peb tso siab rau Vajtswv yog peb tig mus rau Nws thaum peb raug tej teeb meem.

Tom qab kuv kawm ntawv kev cai lij choj tiav nyob hauv Utah, peb tsev neeg yuav tsum txiav txim siab seb peb mam li yuav tsev thiab ua hauj lwm nyob qhov twg. Tom qab wb sib tham thiab thov tus Tswv, wb xav tias tus Tswv xav coj peb mus rau Teb Chaws Amelikas sab hnub tuaj, deb ntawm cov niam tsev txiv tsev thiab cov kwv tij cov muam. Thaum xub thawj, txhua yam zoo, thiab peb xav tias Vajtswv tau pom zoo rau txoj kev txiav txim ntawd. Ces txhua yam hloov. Kuv poob hauj lwm nyob hauv lub koom haum lij choj, thiaj li tsis muaj nyiaj thiab tsis muaj insurance thaum lub sij hawm uas kuv tus ntxhais Dora raug tej teeb meem kho mob loj heev thiab muaj tej kev xav tau tshwj xeeb uas kav ntev. Thaum peb raug tej teeb meem no, kuv tau txais ib txoj kev hu uas yuav ua rau kuv yuav tsum siv sij hawm thiab kuv lub zog ntau.

Kuv yeej ib txwm tsis tau raug ib qho teeb meem li no thiab kuv txhawj xeeb dhau. Kuv pib xav seb txoj kev txiav txim uas wb txiav thiab kev pom zoo uas wb hnov puas yog tiag. Wb twb tso siab rau tus Tswv, thiab kuv xav tias txhua yam yuav tsum mus zoo. Kuv twb vau rau qab, thiab ntshe zoo li tsis muaj leej twg txais tau kuv.

Muaj ib hnub tej lus no nkag hauv kuv lub siab “Tsis txhob nug vim li cas; nug seb kuv xav kom koj kawm dab tsi.” Ua rau kuv haj yam tsis to taub. Thaum lub sij hawm uas kuv ua xyem xyav txog kuv txoj kev txiav txim dhau los, Vajtswv caw kuv kom tso siab rau Nws ntxiv. Thaum kuv xav txog yav tas los, nov yog ib lub sij hawm tseem ceeb kawg hauv kuv lub neej—yog lub sij hawm uas kuv kawm tias txoj kev zoo tshaj plaws kom kawm kev tso siab rau Vajtswv yeej yog kev tso siab rau Nws xwb. Tom qab ntawd, ua rau kuv xav tsis thoob thaum tus Tswv tau ua tej txuj ci tseem ceeb nthuav Nws txoj hau kev kom foom koob hmoov rau peb tsev neeg.

Cov xib hwb zoo paub tias yus txoj kev txawj ntse thiab txoj kev muaj dag zog yuav loj tuaj tsuas yog thaum yus xav thiab siv zog dhau qhov yus muaj. Ib yam li ntawd, Vajtswv caw peb kom loj hlob tuaj thaum peb tso siab rau Nws txoj kev qhia uas ua rau peb sab ntsuj plig raug tej yam nyuaj dhau qhov peb tiv tau. Yog li ntawd, peb yeej paub tias txawm peb tau raug dab tsi yav tas los uas ua nyuaj rau peb tso siab rau Vajtswv los, thaum yav tom ntej yeej yuav muaj ib lub sij hawm zoo li ntawd. Vajtswv tsom ntsoov rau peb txoj kev loj hlob tuaj thiab txoj kev vam meej. Nws yog tus Xib Hwb Zoo Tshaj Plaws, tus uas ua hauj lwm pab peb txhua lub sij hawm kom to taub txog qhov uas peb muaj peev xwm hloov los ua neeg zoo li Vajtswv. Thiab thaum yav tom ntej Nws yeej yuav caw nej los tso siab rau Nws me ntsis ntxiv.

Phau Ntawv Maumoos qhia txog tus txheej txheem uas Vajtswv siv kom pab peb nrog Nws sib raug zoo. Nyob hauv Los, Nrog kuv Mus, peb tau kawm txog qhov uas tau sim Nifais txoj kev tso siab rau Vajtswv thaum nws thiab nws cov kwv tij txais kev txib rov qab mus rau Yeluxalees kom nqa cov phiaj toog. Tom qab twb sim ua ob zaug lawm, nws cov tij laug xav tso tseg thiab npaj rov qab mus txawm tseem tsis tau cov phiaj. Tiam sis Nifais xaiv kom tso siab plhuav rau tus Tswv thiab nqa tau cov phiaj lawm.¹⁰ Nyaj lub sij hawm ntawd ua rau Nifais tso siab rau Vajtswv thaum nws rab hneev dam thiab nws tsev neeg yuav tuag tshaib nyob hauv roob moj sab qhua. Tsis tas li ntawd, Nifais tau xaiv kom tso siab rau Vajtswv, thiab tau cawm nws tsev neeg dim.¹¹ Tej lub sij hawm no ua rau Nifais ntseeg Vajtswv ntxiv thaum muaj ib lub cib fim loj heev kom nws yuav tsum tso siab loj ntxiv ua ib lub nkoj.¹²

Los ntawm tej yam no, Nifais nrog Vajtswv sib raug zoo ntxiv vim nws tso siab rau Vajtswv tsis tu tsis tseg. Vajtswv siv tus txheej txheem no pab peb thiab. Nws caw peb kom txhawb nqa thiab pab peb tso siab rau Nws ntxiv.¹³ Txhua lub sij hawm peb txais thiab ua raws li Nws caw peb, peb txoj kev tso siab rau Vajtswv loj tuaj. Yog peb tsis ua raws li Nws caw peb ua, ces peb txoj kev vam meej tu lawm mus txog thaum peb ua raws li Nws caw lawm.

Tiam sis txawm yog peb tau xaiv kom tso siab npaum li cas rau Vajtswv dhau los, peb muaj peev xwm xaiv kom tso siab rau Vajtswv hnub no thiab txhua hnub tom ntej mus. Kuv cog lus tias txhua zaus peb ua li ntawd, Vajtswv yuav cawm peb dim, thiab peb txoj kev tso siab rau Nws yuav muaj zog zuj zus mus txog hnub uas peb nrog Nws thiab Nws Leej Tub koom siab koom ntsws. Ces peb yuav hais zoo ib yam li Nifais, “Auj tus Tswv es, kuv tau tso siab rau koj, thiab kuv yuav tso siab rau koj mus ib txhis li.”¹⁴ Los ntawm Yexus Khetos lub npe, amees.