Khetos cov Lus Qhuab Qhia tus Txheej Txheem Muaj Hwj Chim

Ntau xyoo tas los, kuv tus poj niam, Ruth; wb tus ntxhais, Ashley; thiab kuv peb koom lwm tus neeg mus nquam nkoj kayak nyob hauv Hawaii nyob rau hauv lub Teb Chaws Amelikas. Ib lub kayak yog ib lub nkoj ntev uas nyob ze rau ntawm nplaim dej es tus uas nquam nkoj zaum saib tom ntej thiab siv tus pas nquam nkoj rau ib sab ces nquam nkoj rau lwm sab. Peb tau npaj nquam nkoj mus rau ob lub pov txwv me me nyob ze ntug dej Oahu ces rov qab los. Kuv ua siab loj lawm vim thaum kuv yog ib tug tub hluas, kuv tau nquam nkoj hauv cov kayak hla tej pas dej saum roob. Kev muab hlob yeej tsis muaj hmoov zoo yom?

Tus uas coj peb mus tau qhia peb kom paub siv cov kayak hauv dej hiav txwv. Cov nkoj no yeej tsis zoo li cov uas kuv tau siv dhau los. Kuv yuav tsum zaum saum lub kayak no, tsis yog zaum haud. Thaum kuv nce saum kuv lub kayak, ntshe kuv zaum siab dua li kuv ib txwm zaum, kuv thiaj li nyob tsis khov.

Thaum peb pib mus, kuv nquam nkoj sai dua Ruth thiab Ashley. Ib me ntsis ces kuv nyob deb tom ntej nkawd. Txawm yog kuv khav tias kuv mus tau sai npaum li no los, kuv tau nres tsis nquam nkoj ntxiv thiab tos nkawd tuaj txog kuv. Ib nthw dej loj—siab npaum li 13 centimeters¹—tshoob kuv lub kayak ib sab thiab muab kuv ntxeev poob dej. Thaum txog lub sij hawm uas kuv muab lub kayak ntxeev raws li qhov yog thiab siv zog nce saud, Ruth thiab Ashley tau hla dhau kuv, tiam sis kuv ua tsis tau pa txaus kom rov qab nquam nkoj. Ua ntej kuv ua tau pa, ib nthw dej ntxiv, zaum no loj kawg li—siab npaum li 20 centimeter²—tshoob kuv lub kayak thiab muab kuv rov qab ntxeev. Txog lub sij hawm kuv twb muab kuv lub kayak ntxeev kom yog lawm, kuv txog txog siav kuv ntshai tias kuv tsis muaj zog nce saud.

Tus coj peb pom kuv raug xwm txheej nws thiaj li los tuav kuv lub nkoj kom ruaj khov, thiaj ua yooj yim rau kuv nce saud. Thaum nws pom tias kuv tseem txog siav kuv thiaj li tsis muaj zog txaus nquam kuv lub nkoj, nws muab hlua khi rau kuv lub kayak thiab pib nquam nkoj, rub kuv lub nkoj mus. Tsis ntev ces kuv ua tau pa thiab kuv pib nquam nkoj tau kuv tus kheej. Nws daws txoj hlua mus, thiab kuv twb nquam nkoj mus txog thawj lub pov txwv tsis tas muaj kev pab ntxiv. Thaum kuv tuaj txog, kuv sab tas kuv thiaj li pw hauv cov xuab zeb.

Tom qab peb pawg tau so me ntsis, tus coj hais rau kuv tias, “Yawg Renlund yog koj yuav nquam nkoj tas mus li, cia li mus zuj zus txhua lub sij hawm, kuv xav tias koj yeej yuav tsis ua li cas.” Kuv twb ua raws li nws qhia kuv thaum peb nquam nkoj mus rau lub pov txwv thib ob ces rov qab mus rau qhov chaw uas peb pib. Ob zaug tus coj nquam nkoj dhau kuv mus thiab qhia kuv tias kuv ua “zoo heev!” Tej nthwv dej loj zog tau raug kuv lub kayak ib sab, tiam sis tsis ua rau kuv ntxeev hlo li.

Vim kuv nquam nkoj mus txhua lub sij hawm, kuv thiaj li mus zuj zus rau tom hauv ntej, ua rau tej nthwv dej tsis ua li cas rau kuv. Lub ntsiab cai no kuj muaj nqis rau peb hauv peb lub neej ntawm sab ntsuj plig. Peb yuav raug xwm txheej thaum peb maj mam mus thiab qhov tseem ceeb yog thaum peb nres.³ Yog tias peb ua kom peb sab ntsuj plig muaj zog zuj zus tuaj thaum peb “nquam nkoj” mus rau tus Cawm Seej, ces peb nyob nyab xeeb thiab ruaj khov vim peb txoj sia nyob mus ib txhis nyob ntawm peb txoj kev ntseeg Nws.⁴

Kev ua kom peb sab ntsuj plig muaj zog zuj zus los “Yuav tsum siv ib sim neej thaum peb muab siab npuab Khetos cov lus qhuab qhia.”⁵ Thawj Tswj Hwm Russell M. Nelson qhia tias thaum peb ua li ntawd ces peb tsim ib tug “txheej txheem uas muaj hwj chim hloov peb lub siab.”⁶ Muaj tseeb tiag, Yexus Khetos cov lus qhuab qhia—xws li kev ntseeg tus Tswv Yexus Khetos, kev hloov siab lees txim, khi lus nrog tus Tswv thaum ua kev cai raus dej, txais lub txiaj ntsim Vaj Ntsuj Plig Dawb Huv, thiab kev nyiaj kom mus txog thaum kawg⁷—tsis yog tej yam uas yuav ua ib zaug xwb, ces khij lub npov thaum ua tas lawm. “Txoj kev nyiaj kom mus txog thaum kawg” tsis yog ib qho uas nyob nrug ntawm Khetos cov lus qhuab qhia—tsis yog hais tias peb ua kom thawj plaub kauj ruam tiav ces nyob twj ywm, tom hniav qees, thiab tos kom tuag xwb. Kev nyiaj kom mus txog thaum kawg yog txoj kev ib sij pheej rov qab ua raws li Yexus Khetos cov lus qhuab qhia, thiaj li tsim tau “tus txheej txheem uas muaj hwj chim hloov peb lub siab” uas Thawj Tswj Hwm Nelson piav txog.⁸

Ib sij txhais tias peb ua raws li Khetos cov lus qhuab qhia kom mus tas peb lub neej. Pheej rov qab ua txhais tias txhua zaus peb ua ces peb ua tau zoo dua. Txawm yog peb rov qab ua tej yam no, tsis yog peb ncig mus hauv tib qho chaw xwb. Peb cia li mus nyob ze Yexus Khetos dua ntxiv txhua zaus peb ua raws li tej yam no.

Yuav tsum mus tom ntej kom thiaj li mus zuj zus.⁹ Yog tias kuv tau rau siab nquam nkoj mus rau qhov chaw tsis yog, ces kuv yeej yuav ua zog mus tom ntej, tiam sis kuv mus tsis txog qhov chaw uas kuv xav mus. Ib yam li ntawd, nyob hauv peb lub neej peb yuav tsum “nquam nkoj” mus rau tus Cawm Seej kom los cuag Nws.¹⁰

Peb yuav tsum tu peb txoj kev ntseeg Yexus Khetos txhua hnub.¹¹ Peb tu peb txoj kev ntseeg thaum peb thov Vajtswv txhua hnub, kawm cov vaj lug kub txhua hnub, xav txog Vajtswv txoj kev zoo txhua hnub, hloov siab lees txim txhua hnub, thiab ua raws li tus Vaj Ntsuj Plig Dawb Huv tej kev tshoov siab txhua hnub. Ib yam li tsis zoo rau peb sab cev nqaij daim tawv yog peb tsis noj zaub mov mus txog hnub Sunday ces noj ntau npaum li yuav noj tas ib lub lim tiam, yeej tsis zoo rau peb sab ntsuj plig yog peb tsis ua dab tsi kom txhawb nqa peb zaj lus tim khawv tsuas yog ib zaug ib lub lim tiam xwb.¹²

Thaum peb lav ris peb zaj lus tim khawv,¹³ peb muaj zog ntawm sab ntsuj plig zuj zus thiab txhawb nqa txoj kev ntseeg Yexus Khetos ruaj khov, thiab peb tsom ntsoov Yexus Khetos cov lus qhuab qhia ua lub hom phiaj hauv peb lub neej.¹⁴ Peb kuj muaj zog zuj zus thaum peb siv zog ua raws li Vajtswv tej kev cai thiab hloov siab lees txim. Kev hloov siab lees txim yeej yog ib txoj kev xyiv fab thiab cia peb kawm los ntawm tej yam uas peb ua yuam kev, ua li no peb vam meej mus ib txhis li. Yeej yuav muaj sij hawm thaum peb lub kayak ntxeev tiaj thiab peb nyob hauv cov dej tob heev. Los ntawm kev hloov siab lees txim, peb muaj peev xwm rov qab nce, txawm yog peb tau poob pes tsawg zaus los yog.¹⁵ Qhov tseem ceeb peb yuav tsum tsis txhob tso tseg xwb.

Yam thib peb ntawm Khetos cov lus qhuab qhia yog kev cai raus dej, uas yog kev cai raus dej thiab kev pom zoo, los yog kev raus dej ntawm tus Vaj Ntsuj Plig Dawb Huv.¹⁶ Txawm yog peb ua kev cai raus dej ib zaug xwb, peb rov qab khi lus thaum peb txais lub cim nco txog. Lub cim nco txog yeej tsis pauv kev cai raus dej, tiam sis lub cim nco txog muab lub ntsiab cai thib ib thiab thib ob ntawm Khetos lub ntsiab cai—kev ntseeg thiab kev hloov siab lees txim—txuas rau kev txais tus Vaj Ntsuj Plig Dawb Huv.¹⁷ Thaum peb mob siab txais lub cim nco txog, peb caw tus Vaj Ntsuj Plig Dawb Huv los koom peb lub neej,¹⁸ ib yam li thaum peb ua kev cai raus dej thiab ua kev pom zoo.¹⁹ Thaum peb ua raws li peb tau khi lus zoo li hais nyob hauv ob zaj lus thov Vajtswv foom koob hmoov rau lub cim nco txog, tus Vaj Ntsuj Plig Dawb Huv thiaj los ua peb tus khub.

Thaum tus Vaj Ntsuj Plig Dawb Huv muaj hwj huam hloov peb lub neej ntxiv, peb ib sij pheej rov qab muaj Khetos tej lub cwj pwm. Peb lub siab hloov. Peb txoj kev xav ua phem ploj zuj zus. Peb txoj kev xav ua zoo yeej loj zuj zus mus txog thaum peb “xav ua zoo tsis tu ncua mus li.”²⁰ Peb thiaj li txais tau Vajtswv lub hwj chim uas yuav tsum muaj kom nyiaj mus txog thaum kawg.²¹ Peb txoj kev ntseeg loj zuj zus, thiab peb npaj siab rov qab ua raws li tus txheej txheem muaj hwj chim.

Kev muaj zog ntawm sab ntsuj plig kom mus tom ntej kuj ua rau peb xav khi lus ntxiv nrog Vajtswv nyob hauv tus Tswv lub tsev. Peb tej kev khi lus pab peb nyob ze Khetos thiab pab peb nrog Nws sib raug zoo ntxiv. Dhau los ntawm tej kev khi lus no, peb txais tau Nws lub hwj chim ntxiv. Kuv xav qhia meej hais tias, tej kev khi lus thaum ua kev cai raus dej thiab ua hauv lub tuam tsev tsis yog lub hauv paus ntawm lub hwj chim. Lub hauv paus ntawm lub hwj chim yog tus Tswv Yexus Khetos thiab peb Leej Txiv Saum Ntuj Ceeb Tsheej. Qhov uas peb ua raws li peb tej kev khi lus yeej qhib ib txoj kev rau peb siv Nkawd lub hwj chim hauv peb lub neej. Yog peb ua raws li tej kev khi lus no, ces thaum kawg peb yuav txais tag nrho Leej Txiv Saum Ntuj Ceeb Tsheej muaj los ua peb tug.²² Lub dag zog uas los ntawm kev ua raws li Khetos cov lus qhuab qhia yeej ua rau peb muaj hwj chim hloov peb tus cwj pwm kom thiaj li tau hmoov zoo mus ib txhis li thiab kuj ua rau peb xav pab lwm tus raws li kev tsim nyog.

Cia li xav txog qhov uas tus coj kev tau pab kuv thaum kuv ua rau kuv lub kayak ntxeev tiaj. Nws tsis tau nyob deb qw ib lo lus nug uas tsis pab li, xws li, “Yawg Renlund, vim li cas koj nyob hauv dej?” Nws tsis tau nquam nkoj los thuam kuv hais tias, “Yawg Renlund, yeej yuav tsis zoo li no yog tias koj sab cev muaj zog.” Nws tsis tau pib rub kuv lub kayak thaum kuv tab tom sim nce saud. Nws tsis tau qhia kuv kom hloov tab meeg sawv daws. Tiam sis, nws tau pab kuv thaum lub sij hawm uas kuv xav tau kev pab. Nws tau hais lus ntuas thaum kuv yuav mloog nws. Thiab nws tau ua tib zoo txhawb nqa kuv.

Thaum peb txhawb pab lwm tus, peb tsis tas nug tej yam uas yuav tsis pab los yog hais tej yam uas txhua tus paub lawm. Tib neeg coob uas muaj teeb meem yeej paub tias lawv muaj teeb meem. Peb yuav tsum tsis txhob txiav txim rau lawv; peb txoj kev txiav txim yeej yuav tsis pab thiab ntshe peb tsis paub txhua yam.

Qhov uas peb muab peb tus kheej piv rau lwm tus ntshe yuav ua rau peb ua txhaum loj heev, qhov tseem ceeb yog thaum peb xav tias peb ua ncaj ncees dua li cov uas raug teeb meem. Yeej zoo li yus poob dej tob li 3 meter,²³ pom ib tug neeg poob dej tob li 4 meter,²⁴ es yus txiav txim siab nws yog tus uas ua txhaum loj dua, es yus xav zoo txog yus tus kheej. Peb sawv daws nyias muaj nyias tej yam uas nyuaj rau peb. Tsis muaj leej twg uas cawm tau lawv tus kheej.²⁵ Peb yeej ua tsis taus. Yakhauj, nyob hauv Phau Ntawv Maumoos, qhia hais tias, “Nco ntsoov tias, tom qab [peb] rov los sib raug zoo nrog Vajtswv, twb yog los ntawm Vajtswv txoj kev tshav ntuj xwb [peb] thiaj txais tau kev cawm seej.”²⁶ Peb txhua tus xav tau tus Cawm Seej txoj Kev Theej Txhoj, tsis yog peb xav tau ib feem xwb.

Peb txhua tus xav muaj kev khuv leej, kev ua siab zoo, thiab kev hlub thaum peb nrog cov neeg tham ib puag ncig peb.²⁷ Cov uas raug teeb meem “yuav tsum hnov Yexus Khetos txoj kev hlub nyob hauv [peb] tej lus thiab tej yam [peb] ua.”²⁸ Thaum peb txhawb pab lwm tus, peb hais lus txhawb nqa lwm tus ntau zaus thiab qhia lawv tias peb xav pab. Txawm yog ib tug neeg tsis kam peb pab los, peb tseem txhawb pab lawv. Tus Cawm Seej tau qhia tias “Nej yuav tsum txhawb pab cov uas zoo li no tsis tu ncua; vim nej twb tsis paub tiam sis muaj ib hnub lawv yuav rov los thiab hloov siab lees txim, thiab los cuag kuv kawg siab kawg ntsws, thiab kuv yuav kho kom lawv zoo; thiab nej yog txoj kev uas coj lawv mus rau txoj kev cawm seej.”²⁹ Tus Cawm Seej txoj hauj lwm yog kev kho mob. Peb txoj hauj lwm yog kev hlub—hlub thiab txhawb pab kom lwm tus xav mus cuag Yexus Khetos. Nov yog ib yam uas los ntawm Khetos cov lus qhuab qhia tus txheej txheem muaj hwj chim.

Kuv caw nej ib sij txhob txwm ua raws li Khetos cov lus qhuab qhia txhua lub sij hawm thiab pab lwm tus taug txoj kev no. Kuv ua tim khawv tias Khetos cov lus qhuab qhia yeej yog ib qho tseem ceeb rau Leej Txiv Saum Ntuj Ceeb Tsheej txoj hau kev; vim yeej yog Nws txoj lus qhuab qhia. Thaum peb muab siab rau ntseeg Yexus Khetos thiab Nws txoj Kev Theej Txhoj, peb taug txoj kev ua raws li tej kev khi lus thiab xav pab lwm tus hloov los ua Yexus Khetos cov thwj tim uas rau siab ntseeg. Peb yuav los txais Leej Txiv Saum Ntuj Ceeb Tsheej lub nceeg vaj los ua peb tug, uas yog qhov kawg ntawm txoj kev rau siab ua raws li Yexus Khetos cov lus qhuab qhia. Los ntawm Yexus Khetos lub npe, amees.