Kev Kov Yeej los ntawm Khetos txoj Kev Xyiv Fab

Nyob hauv Phau Tshiab peb kawm txog ib tug txiv neej dig muag hu ua Npatimes uas qw rau Yexus vim xav tau ib qhov txuj ci tseem ceeb. “Thiab Yexus hais rau tus ntawd hais tias, Koj cia li sawv mus tsev; koj txoj kev ntseeg twb ua rau koj tej ruas zoo lawm. Tam sim ntawd nws txawm pom kev.”¹

Lwm lub sij hawm, ib tug txiv neej ntawm Npexaidas xav tau kev kho nws tus mob. Tsis zoo li zaj ib, qhov txuj ci tseem ceeb no tsis tshwm sim tam sim ntawd. Tiam sis, Yexus tau foom koob hmoov rau nws ob zaug ua ntej nws “pom kev lawm.”²

Hauv zaj peb, Tus Thwj Tim Povlauj“thov Vajtswv” kho nws qhov mob ntawd peb zaug,³ thiab raws li peb paub, Vajtswv tsis ua li nws tej lus thov.

Peb tug neeg. Peb qhov uas sib txawv.

Yog li ntawd yuav tsum nug li no: Vim li cas ib txhia txais lawv qhov txuj ci tseem ceeb sai thiab lwm cov yuav tsum ua siab ntev nyob tos tus Tswv?⁴ Thiab tej zaum txawm peb tsis paub vim li cas tiam sis ua tsaug tias, peb yeej paub leej twg “hlub [peb]”⁵ thiab “[ua] txhua yam kom [peb] noj qab nyob zoo thiab muaj kev zoo siab mus ib txhis.”⁶

Vajtswv, tus uas pom tom kawg ntawm qhov pib,⁷ nplij peb lub siab tias “koj tej kev nyuaj siab thiab koj tej kev txom nyem yuav muaj nyob ib nyuag ntus xwb”⁸ thiab yuav fij nej tej kev txom nyem “los ua tej yam uas pab tau.”⁹

Hais txog kev pab peb nrhiav tej yam uas muaj nqis los ntawm peb tej kev sim siab, Txwj Laug Orson F. Whitney hais tias, “Tsis muaj ib yam kev nyuaj siab uas peb raug, los sis ib yam kev cov nyom uas peb raug uas yog ib qho uas lam tau lam raug xwb. Tej no txhawb nqa peb txoj kev kawm. … Txhua yam … uas peb [ua ncaj ncees ua siab ntev] nyiaj mus … , yuav pab kho peb tus cwj pwm, ntxuav peb lub siab kom dawb huv, pab peb sab ntsuj plig loj hlob tuaj, thiab ua rau peb haj yam muaj siab mos siab muag thiab muaj kev hlub tshua. … kev tu siab thiab nyuaj siab, kev cov nyom thiab kev txom nyem, tej ntawd puav leej pab peb kawm tej yam uas peb tuaj nyob hauv ntiaj teb no kom thiaj kawm tau ntag thiab yuav ua rau peb zoo li peb [leej niam leej txiv saum ntuj ceeb tsheej.”¹⁰

Tus Thwj Tim Povlauj to taub hais tias “Yexus Khetos lub hwj chim yuav tsom kwm [nws]” thaum nws raug txom nyem, nws thiaj li txo hwj chim hais tias, “Rau qhov kuv qaug zog thaum ntawd kuv yuav muaj zog.”¹¹

Tej yam nyuaj hauv lub neej no sim peb lub siab.¹² Tus Cawm Seej kuj “kawm … mloog lus los ntawm txoj kev uas tiv kev txom nyem.”¹³

Muaj ib hnub nws yuav muaj siab dawb hais tias, “Saib seb, kuv tau muab nej nchuav hauv yeej vub, kuv tau xaiv nej hauv lub cub tawg ntawm kev txom nyem los.”¹⁴

Kev ntseeg Vajtswv tej lub hom phiaj yuav pab tej neeg uas nkees muaj kev cia siab thiab pab lawv ruaj nrees hauv lawv lub neej thaum muaj kev ntxhov siab txhawj xeeb.¹⁵

Ntau xyoo tas los, Thawj Tswj Hwm Russell M. Nelson tau qhia ib zaj uas muaj nqis heev: “Thaum peb ntsia txhua yam nrog lub zeem muag mus ib txhis li, yuav ua rau peb lub nra sib.”¹⁶

Kuv tus poj niam Jill, thiab kuv tau pom qhov tseeb no hauv Holly thiab Rick Porter lub neej, thaum nkawd tus tub uas muaj 12 xyoo, Trey, tau tam sim neej hauv hluav taws. Holly sawv hauv ib pawg ntseeg txoj kev sib ntsib txais lub cim nco txog ua ib tug tim khawv txog Vajtswv nrog nws ob txhais tes thiab ko taw uas raug hluav taws kub hnyiab thiab ua tim khawv txog tus Tswv txoj kev kaj siab lug thiab kev xyiv fab uas Vajtswv muab rau lawv tsev neeg hauv lawv kev ntxhov siab, thiab nws siv tej lus zoo li ib qho txuj ci tseem ceeb, zoo kawg nkaus, thiab zoo heev.

Tus niam tsev uas muaj nqis no txoj kev tu siab tau pauv los ua kev kaj siab lug thaum kev xav no los rau nws: “Kuv ob txhais tes tsis yog ob txhais tes uas cawm neeg. Tus Cawm Seej yog tus muaj ob txhais tes ntawd! Thaum kuv ntsia kuv cov caws pliav, kuv yuav tsis xav txog tej yam uas kuv tau ua tsis tau, tiam sis kuv yuav nco ntsoov txog kuv tus Cawm Seej cov caws pliav.”

Holly txoj kev tim khawv tau ua li peb tus yaj saub tej lus cog tseg: “Thaum nej xav txog tej yam xilethi-aus, nej yuav saib tej kev sim siab thiab kev tawm tsam txawv li qub.”¹⁷

Txwj Laug D. Todd Christofferson tau hais tias: “kuv ntseeg tias thaum Vajtswv qhia peb txog Nws txoj hau kev txhiv neeg dim hauv lub neej ua ntej lub neej no thiab qhia txog txoj kev nyuaj kov yeej thiab loj hlob los ntawm kev cov nyom uas rau peb zoo siab. Peb yuav tsum saib qhov cov nyom no paub tias peb Leej Txiv Saum Ntuj Ceeb Tsheej yuav txhawb nqa peb. Tiam sis tseem ceeb heev tias peb yuav tsum tig mus rau Nws. Yog tsis muaj Vajtswv nrog peb, tej kev txom nyem tsaus ntuj thiab cov nyom no ua rau peb nyuaj siab, poob siab, thiab npau taws.”¹⁸

Kuv xav qhia peb tej lub ntsiab cai uas caw peb kom peb yuav nrhiav tau kev kaj siab lug, kev cia siab, thiab kev xyiv fab thaum peb raug tej yam nyuaj hauv lub neej no.

Qhov thib ib—kev ntseeg uas muaj zog ntxiv los ntawm kev tsom ntsoov rau Yexus Khetos ua ntej txhua yam.¹⁹ Nws hais tias, “Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai.”²⁰ Thawj Tswj Hwm Nelson qhia tias:

“[Peb] txoj sia nyob mus ib txhis nyob ntawm [peb] txoj kev ntseeg [Khetos] thiab Nws txoj Kev Theej Txhoj”²¹

“Thaum kuv raug mob sab heev, ua rau kuv ris Yexus Khetos txiaj thiab zoo siab vim muaj lub txiaj ntsim uas yog Nws txoj Kev Theej Txhoj. Cia li xav txog qhov no! Tus Cawm Seej tau raug ‘tej kev mob thiab tej kev txom nyem’ Nws thiaj li muaj peev xwm nplij peb lub siab, kho peb zoo, [thiab] cawm peb dim thaum peb xav tau.”²²

Nws hais ntxiv tias, “Kuv txoj kev raug mob ua rau kuv xav mus xav los txog ‘Ixayees tus Dawb Huv tej kev tshav ntuj.’ Thaum kuv tseem rov zoo tuaj, tus Tswv tau qhia rau kuv txog Nws lub hwj chim los ntawm kev kaj siab lug thiab tej yam uas ua rau kuv paub tias yog Nws ua.”²³

Peb tus Cawm Seej qhia tias “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”²⁴

Qhov thib ob—kev cia siab uas muaj zog ntxiv los ntawm peb txoj kev pom tau peb txoj hmoov nyob mus ib txhis li.²⁵ Hais txog lub hwj chim uas los ntawm “lub hom phiaj ntawm peb Leej Txiv tej koob hmoov uas tau cog lus tseg nyob nraim hauv peb lub siab txhua hnub,” Muam Linda S. Reeves ua tim khawv tias: “Kuv yeej tsis to taub hais tias yog vim li cas peb thiaj li muaj ntau yam kev nyuaj siab, tab sis, cov viv ncaus, kuv xav hais tias lub nqi zog zoo heev nyob mus ib txhis, yeej zoo tshaj qhov uas peb pom tau ces hnub uas yuav muaj nqi zog, ntshe peb yuav hais rau peb Leej Txiv uas muaj lub siab mos siab muag thiab hlub peb heev hais tias, ‘Es peb yuav tsum ua li ntawd xwb?’ … Yeej yuav tsis ua li cas yog hais tias thaum kawg, es tej kev nyuaj siab ntawd yuav yog tej uas ua rau peb muaj sia nyob mus ib txhis … rau hauv Vajtswv lub nceeg vaj?”²⁶

Thawj Tswj Hwm Nelson tau qhia li no: “Cia li xav txog tus Tswv tej lus teb Joseph Smith thaum nws thov kom txais kev pab hauv lub Tsev Kaw Liberty. Tus Tswv tau qhia tus Yaj Saub tias qhov uas nws raug kev tsim txom yuav muab kev kawm rau nws, thiab yuav zoo rau nws. Tus Tswv tau cog lus tias, ‘Yog koj ua tib zoo nyiaj mus, Vajtswv yuav tsa koj mus nto ntuj.’ Tus Tswv qhia Joseph kom xav txog tej yam xilethi-aus thiab ntsia ntsoov ib lub nqi zog mus ib txhis li tsis txhob tsom ntsoov rau tej yam nyuaj kawg nkaus hnub no.”²⁷

Txoj kev pom txawv li no ua rau Joseph hloov ua dawb huv, thiab peb paub li no los ntawm nws tsab ntawv rau ib tug phooj ywg: “Tom qab tau nyob hauv cov phab ntsa ntawm lub tsev kaw rau tsib hlis lawm zoo nkaus kuv tau muaj siab mos siab muag dua lwm lub sij hawm tas los. … Tam li kuv xav mas, kuv xav tias kuv yeej yuav tsis muaj tej kev xav zoo li kuv muaj tam sim no, yog hais tias kuv tsis tau raug tej yam phem uas kuv twb raug lawm.”²⁸

Qhov thib peb—yuav muaj hwj chim ntxiv thaum tsom ntsoov rau kev xyiv fab.²⁹ Thaum peb tus Cawm Seej raug kev txom nyem nyuaj tshaj plaws, Nws tsis tau thim tiam sis Nws haus lub khob dej iab.³⁰ Nws ua li cas kom ua li ntawd? Peb kawm tias “nws yuav zoo siab kawg li … [Khetos] ua siab ntev nyiaj tej kev txom nyem ntawd”³¹ ua rau Nws lub siab nyiam “raug [kov yeej] rau ntawm Leej Txiv lub siab nyiam.”³²

Zaj lus “kov yeej” tshoov kuv siab heev. Ua rau kuv xav paub ntxiv thaum kuv kawm tias hauv lus Mev zaj lus, “kov yeej” txhais tias “siv tas”; hauv lus German, yog “noj tas,” thiab hauv lus Suav, yog “nyob ib puag ncig.” Yog li ntawd thaum kuv xav tias lub neej no nyuaj dhau thiab ua rau kuv mob siab, kuv nco qab zaj lus cog tseg no, uas hais tias peb “yuav tsis tau nyiaj ib yam kev txom nyem dab tsi, tsuas yog muaj [raug kov yeej ntawm, siv tas ntawm, noj tas ntawm, nyob ib puag ncig ntawm} kev xyiv fab ntawm Khetos xwb.”³³

Kuv pom kev xyiv fab nyob hauv nej feem coob, uas “[yeej yog qhov fab ntxeev] … ntawm tej yam uas tib neeg to taub,”³⁴ txawm yog tsis tau tshem nej tej khob dej iab. Ua tsaug vim nej ua raws li nej tej kev khi lus thiab sawv ua tim khawv txog Vajtswv.³⁵ Ua tsaug rau nej txoj kev foom koob hmoov rau peb txhua tus, thaum “qhov muag ntsia tsis tau kev txom nyem uas muaj nyob hauv neeg lub siab.”³⁶ Thawj Tswj Hwm Camille Johnson tau qhia tias, thaum peb coj tus Cawm Seej txoj kev nplij siab rau lwm tus, peb nrhiav tau rau peb tus kheej.³⁷

Ces, kuv xav rov qab hais txog kev sib ntsib txais lub cim nco txog thaum peb pom qhov txuj ci tseem ceeb uas Holly Porter tsev neeg txais tus Tswv txoj kev pab.³⁸ Thaum kuv zaum thiab xav txog seb kuv yuav hais dab tsi nplij tsev neeg zoo kawg no lub siab, ua rau kuv xav li no: “Siv tus Cawm Seej tej lus.”³⁹ Ces, kuv xav kaw hnub no ib yam li kuv kaw hnub caiv ntawd, nrog Nws tej lus, “uas kho tau tej ntsuj plig uas raug mob kom zoo.”⁴⁰

“Nej cov uas sab sab vim nej ris nra hnyav, nej cia li los cuag kuv, thiab kuv yuav cia nej so.”⁴¹}

“Thiab kuv kuj yuav ua rau tej nra uas nyob saum nej tej xub pwg kom yooj yim, xwv kom nej yuav tsis hnov tias lawv nyob saum nej nraub qaum, thaum uas nej tseem poob cev qhev; … xwv kom nej yuav paub tseeb tias kuv, tus Tswv uas yog Vajtswv, yeej los saib xyuas kuv cov neeg thaum lawv muaj kev txom nyem.”⁴²

“Kuv yuav tsis tso nej ua ntsuag ib zaug li; kuv yuav rov qab los cuag nej.”⁴³

Los ntawm kev hawm uas zoo siab, kuv ua tim khawv tias tus Cawm Seej muaj txoj siab nyob thiab Nws tej lus cog tseg yeej muaj tiag.⁴⁴ Rau nej cov uas ntxhov siab los sis “raug txom nyem ib yam dab tsi,”⁴⁵ kuv ua tim khawv rau nej tias Leej Txiv Saum Ntuj Ceeb Tsheej hnov nej txoj kev tu siab thov⁴⁶ thiab yeej yuav muaj tswv yim teb nej.⁴⁷ “Thov kom Nws yuav ntxiv dag zog rau nej,” ib yam li nws tau pab kuv tsev neeg thaum peb xav tau heev, “kom nej tej nra yuav sib,”⁴⁸ “tsuas yog muaj kev xyiv fab ntawm Khetos xwb.”⁴⁹ Los ntawm Yexus Khetos lub npe dawb huv, amees.