Tej Txuj Ci Tseem Ceeb, cov Tim Tswv, thiab lub Hwj Chim Pov Thawj Hwj

Neeg coob heev niaj hnub nim no hais tias tej txuj ci tseem ceeb tsis muaj lawm, cov tim tswv tsis muaj, thiab lub qhov rooj ntug kaw lawm. Kuv ua tim khawv tias tej txuj ci tseem ceeb tseem muaj, cov tim tswv nyob xyaw peb, thiab lub qhov rooj ntug tseem qhib.

Thaum peb tus Cawm Seej, Yexus Khetos, nyob hauv lub ntiaj teb, Nws muab tej yawm sij pov thawj hwj rau Nws thawj tug Thwj Tim Petus¹. Siv tej yawm sij no, Petus thiab lwm cov Thwj Tim coj tus Cawm Seej lub Koom Txoos. Tiam sis thaum cov Thwj Tim ntawd tas sim neej, cov yawm sij ntawm lub pov thawj hwj yog tshem tawm ntawm lub ntiaj teb no mus.

Kuv ua tim khawv tias cov yawm sij qub ntawm lub pov thawj no tau txum txim rov qab los lawm. Petus, Yakaunpaus, thiab Yauhas thiab lwm cov yaj saub thaum ub tau tshwm sim los rau tus Yaj Saub Joseph Smith thiab tau foom pub rau nws qhov uas tus Tswv hais tias yog “cov yawm sij ntawm kuv lub nceeg vaj, thiab ib lub caij nyoog tso txoj cai tshiab ntawm txoj moo zoo.”²

Tib co yawm sij ntawd tau los ib tug yaj saub dhau ib tug yaj saub los mus txog niaj hnub nim no. 15 tug txiv neej uas peb txhawb nqa ua yaj saub, neeg pom tau, thiab neeg txais kev tshwm sim siv tej yawm sij no coj tus Cawm Seej lub Koom Txoos. Ib yam li yav thaum ub, muaj ib tug Thwj Tim hlob uas tuav thiab tau cai kom siv tag nrho cov yawm sij. Nws yog Thawj Tswj Hwm Russell M. Nelson, tus yaj saub thiab tus Thawj Tswj Hwm ntawm Khetos lub Koom Txoos uas txum tim rov qab los hauv peb lub caij nyoog: Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Dhau ntawm tus Cawm Seej lub Koom Txoos, peb txais tej koob hmoov ntawm lub pov thawj hwj—suav Vajtswv lub hwj chim kom pab peb hauv peb lub neej. Dhau ntawm tej yawm sij pov thawj hwj uas tso cai, peb cog lus yam dawb ceev rau Vajtswv thiab txais tej kab ke dawb ceev uas npaj peb nyob hauv Nws lub xub ntiag. Pib nrog txoj kev cai raus dej thiab txoj kev pom zoo, thiab tom qab ntawd tej kab ke hauv lub tuam tsev, peb taug txoj kev khi lus uas coj peb rov qab mus cuag Nws.

Dhau ntawm kev tso tes saum taub hau, peb kuj txais tej koob hmoov ntawm lub pov thawj hwj, suav kev coj kev, kev nplij siab, kev ntuas, kev kho mob nkeeg, thiab lub hwj chim ua raws li Yexus Khetos ua. Kuv tau koob hmoov los ntawm lub hwj chim loj kawg no txhua lub sij hawm hauv kuv lub neej. Ib yam li hais hauv cov vaj lug kub, peb hu lub hwj chim no ua lub hwj chim ntawm lub Pov Thawj Hwj Mekhixedes dawb huv.³

Thaum kuv tseem yau kuv saib lub hwj chim no rau nqi, twb yog thaum kuv pom tej yam muaj los los ntawm lub pov thawj hwj tej kev foom koob hmoov. Thaum kuv ua tub txib hauv teb chaws Chile, kuv tus khub thiab kuv raug ntes thiab raug sib ncaim. Lawb yeej tsis qhia wb yog vim li cas. Yog ib lub sij hawm thaum teb chaws kub ntxhov. Txhiab txhiab leej neeg raug cov tub ceev xwm ntes thiab cia li ploj mus tsis hnov ntab ntws li.

Tom qab uas cov tub ceev xwm ntxig nug kuv, kuv nyob kuv ib leeg hauv chav kaw, es kuv tsis paub xyov kuv puas yuav pom cov neeg uas kuv hlub dua ib zaug ntxiv. Kuv tig mus rau kuv Leej Txiv Saum Ntuj Ceeb Tsheej, kuv taij thov hais tias: “Leej Txiv, kuv yeej los kawm tias koj saib xyuas koj cov tub txib. Leej Txiv, thov lauj, kuv kuj tsis tseem ceeb pes tsawg, tiam sis kuv tau mloog lus thiab kuv xav tau koj pab kuv hmo no.”

Tej noob ntawm Nws txoj kev pab twb tau cog ntau xyoo ua ntej ntawd. Tom qab kuv ua kev cai raus dej, kuv txais kev pom zoo los ua ib tug mej zeej hauv lub Koom Txoos thiab tau txais lub txiaj ntsim ntawm tus Vaj Ntsuj Plig Dawb Huv. Thaum kuv thov Vajtswv, kuv ib leeg xwb, hauv chav kaw, tus Vaj Ntsuj Plig Dawb Huv los rau kuv thiab nplij kuv lub siab. Tus Vaj Ntsuj Plig Dawb Huv pab kuv nco qab txog ib nqe los ntawm kuv yawg suab txoj koob hmoov, uas yog dua ib txoj koob hmoov los ntawm lub pov thawj hwj. Nyob hauv txoj koob hmoov ntawd, Vajtswv cog lus rau kuv hais tias dhau ntawm kuv txoj kev coj ruaj nrees kuv yuav muaj lub cib fim nrog kuv tus poj niam sib yuav sib khi hauv lub tuam tsev rau lub neej no thiab lub neej nyob mus ib txhis li, hais tias wb yuav ua niam txiv rau tub thiab ntxhais, thiab hais tias kuv yuav tau koob hmoov ua ib leej txiv hauv Ixayees.

Cov lus ntawd hais txog tej yam uas yuav muaj los yav tom ntej ua rau kuv nyob kaj siab lug. Kuv paub tias cov lus ntawd los ntawm Leej Txiv Saum Ntuj Ceeb Tsheej uas hlub kuv, thiab uas yeej los ceev Nws tej kev cog lus.⁴ Thaum lub sij hawm ntawd kiag, kub tso siab tias lawv yuav tso kuv tawm thiab kuv yuav ua neej mus pom tej kev cog lus muaj los.

Yuav luag ib xyoos tom qab ntawd, Leej Txiv Saum Ntuj Ceeb Tsheej foom koob hmoov rau kuv yuav ib tug poj niam uas zoo nkauj, tsim txiaj, thiab muaj siab hlub rau txhua tus. Lynette thiab kuv sib khi hauv lub tuam tsev. Wb tau koob hmoov es muaj peb tug tub thiab plaub tug ntxhais. Kuv rais los mus ua ib leej txiv, tag nrho yog raws li Vajtswv cov lus cog tseg hauv kuv zaj yawg koob txoj koob hmoov uas kuv txais thaum tseem muaj 17 xyoo.

“Yog li ntawd, kuv cov kwv tij [thiab cov muam] uas kuv hlub es, tej txuj ci tseem ceeb puas tau tsum vim Khetos tau nce mus rau saum ntuj ceeb tsheej? …

“… Tsis tau; thiab cov tim tswv los kuj tsis tau tsum los txhawb pab noob neej.”⁵

Kuv ua tim khawv hais tias tej txuj ci tseem ceeb thiab tej kev pab yeej muaj hauv peb lub neej, feem ntau twb yog vim lub hwj chim ntawm lub pov thawj hwj. Ib txhia koob hmoov ntawm lub pov thawj hwj muaj los tam sid, es peb pom tau thiab to taub tau muaj li ntawd. Hos lwm txoj koob hmoov maj mam nthuav los thiab tej zaum yuav tsis paub txog tag nrho hauv lub neej no. Tiam sis Vajtswv ua raws li tag nrho Nws tej lus cog tseg, txhua lub sij hawm, es ib zaj liv xwm los ntawm kuv tsev neeg lub keeb kwm ua tau piv txwv rau qhov tseeb no:

Kuv yawg, Grant Reese Bowen, yog ib tug neeg uas muaj siab ntseeg heev. Kuv nco tau tias nws hais txog thaum nws txais nws yawg suab txoj koob hmoov. Nyob hauv nws phau ceev xwm txheej, nws sau hais tias: “Tus yawg suab cog lus tias kuv yuav muaj lub txiaj ntsim kho neeg mob. Tus yawg suab hais tias, ‘Cov neeg mob yuav zoo mob zoo nkeeg. Muaj tseeb tiag, cov tuag yuav sawv rov los thaum koj tso tes rau.’”

Ntau xyoo tom qab ntawd, kuv Yawg sau quav nyab tom teb thaum dab tsi tshoov nws lub siab hais tias nws yuav tsum rov qab mus tom tsev. Thaum nws tab tom los mus tsev, ces nws txawm los ntsib nws txiv. Nws txiv hais tias, “Grant, koj niam twb tso peb tseg lawm.”

Kuv Yawg sau ntxiv hais tias: “Kuv txawm tsuag tsuag mus hauv tsev thiab tawm ntawm qhov rooj tag mus nrhiav kuv niam. Kuv pom nws es zoo li nws tsis muaj sia lawm. Kuv nco qab txog kuv zaj yawg suab txoj koob hmoov thiab cov lus cog tseg hais tias yog tias kuv muaj siab ntseeg, cov neeg mob yuav zoo mob; thiab cov tuag yuav sawv rov los. Kuv tso kuv ob txhais tes saum kuv niam lub taub hau, thiab kuv thov tus Tswv hais tias yog tias cov lus cog tseg uas Nws cog rau kuv ntawd muaj tseeb tiag, ces thov kom Nws pab kuv tam sim ntawd thiab tsa kuv niam sawv rov los. Kuv cog lus rau Nws yog tias Nws yuav ua li no, kuv yuav ua txhua tsav txhia yam raws li kuv lub hwj chim kom txhim tsa Nws lub nceeg vaj. Kuv twb tsis tau xaus kuv cov lus thov Vajtswv, tiam sis kuv niam txawm qhib qhov muag thiab hais tias, ‘Grant, tsa kuv sawv. Kuv twb nyob hauv lub Ntuj Ntsuj Plig, tiam sis koj hu kuv rov qab los. Cia qhov uas muaj no ua tim khawv rau koj thiab kuv tsev neeg tag nrho tej no muaj tseeb tiag.’”

Thawj Tswj Hwm Russell M. Nelson tau qhia peb kom nrhiav kom tau tau thiab txais yuav tej txuj ci tseem ceeb.⁶ Kuv ua tim khawv hais tias vim lub pov thawj hwj txum tim rov qab los, Vajtswv lub hwj chim thiab txoj cai yeej nyob hauv lub ntiaj teb. Dhau ntawm tej kev hu thiab tej kev sib sab laj, txiv neej thiab poj niam, cov hluas cov laus, koom tau ua ke ua tej hauj lwm ntawm lub pov thawj hwj. Yog ib txoj hauj lwm muaj txuj ci tseem ceeb ntau, thiab cov tim tswv yeej pab. Yog lub ntuj ceeb tsheej tej hauj lwm, thiab nws pab foom koob hmoov rau tag nrho Vajtswv cov me nyuam.

Thaum xyoo 1989, peb tsev neeg muaj xya leej tau nrog peb pawg ntseeg mus ua si thiab tab tom rov qab los mus tsev. Twb lig lawm. Lynette tseem muaj wb tus me nyuam thib rau hauv plab. Muaj dab tsi tshoov nws lub siab kom sia siv, vim nws tsis nco qab sia siv. Tsis ntev tom qab peb los rau ntug kev uas nkhaus; ces lub tsheb uas los tog tom ub los txawm noj kab los rau peb lees. Kuv khiav ceev li 70 [mais (112 km) tauj ib teev], thiab kuv lem kiag kom zam tau lub tsheb uas los ntawd. Peb lub tsheb ntxeev thiab swb los nres rau kuv poj niam sab ntawm ntug kev loj.

Ces thaum kuv hnov los kuv hnov Lynette hais tias: “Shayne, peb yuav tsum tawm ntawm koj lub qhov rooj.” Vim kuv sia kuv txoj siv kuv pom tias kuv dai ncuv. Siv ob peb vib nas this kom kuv feeb meej. Ces wb txawm pab cov me nyuam ib tug zuj zus tawm ntawm kuv lub qhov rais. Cov me nyuam quaj ntsuag qees hais tias yog ua li cas.

Ces wb mam li paub hais tias tsis pom wb tus me nyuam ntxhais, Emily, uas muaj 10 xyoo. Wb hu nws, tiam sis tsis hnov nws teb li. Lwm cov ntseeg hauv peb pawg ntseeg, uas tab tom los mus tsev thaum lub sij hawm ntawd, tau pab nrhiav wb tus ntxhais thiab. Tsaus ntuj nti. Ces kuv mam li tsom ib lub teeb nrhiav hauv lub tsheb dua ib zaug ntxiv thiab ua rau kuv ib ce tuag tas thaum kuv pom tias lub tsheb tais Emily lawm. Kuv cia li hu nrov nrov hais tias, “Peb yuav tsum tsa lub tsheb kom peb thiaj li tshem tau Emily tawm.” Kuv tuaj sab tod rub lub tsheb. Hos muaj ob peb tug neeg tuaj sab haud thawb, ces muaj hmoov kawg uas peb thiaj li rub tau lub tsheb ntxeev, es peb pom Emily nyob ntawd zoo li tsis muaj sia lawm.

Emily tsis ua pa li. Nws lub ntsej muag xiav tag. Kuv hais tias, “Peb yuav tsum foom koob hmoov rau nws.” Muaj ib tug phooj ywg uas nyob hauv peb pawg ntseeg nrog kuv txhos caug nyob ntawd thiab los ntawm txoj cai ntawm lub Pov Thawj Hwj Mekhixedes, los ntawm Yexus Khetos lub npe, wb txib kom Emily cia li muaj sia. Ces, Emily cia li ua pa.

Zoo li peb tos ntawd ntev kawg nkaus li, ces lub tsheb thauj neeg mob mam li tuaj txog. Ces lawv mam li thauj Emily ceev ceev mus tom lub tsev kho mob. Kuaj tau tias nws lub ntsws to qhov thiab ib txoj leeg ntawm nws lub hauv caug tu lawm. Peb yeej txhawj tias tsam muaj teeb meem rau nws lub paj hlwb vim tias nws tsis ua pa lawm tau ib pliag. Emily yeej looj hlias lawm tau ib hnub ntau. Peb sawv daws yeej rau siab ntso thov Vajtswv thiab yoo mov kom pab nws. Muaj hmoov kawg uas nws zoo rov qab los. Hnub no, Emily thiab nws tus txiv, Kevin, muaj rau tus ntxhais.

Muaj hmoov, lwm tus neeg hauv peb tsev neeg tsis ua li cas. Tus me nyuam mos liab uas Lynette muaj hauv plab thaum ntawd yog Tyson. Tsis ua li cas rau nws thiab lub Ob Hlis Ntuj tom qab ntawd nws yug los. Yim lub hli tom qab ntawd, tom qab uas nws txais nws lub cev tawv nqaij, Tyson rov qab mus rau peb Leej Txiv Saum Ntuj Ceeb Tsheej. Nws yog peb tus tub tim tswv uas zov peb tsev. Peb paub tias nws pab peb tsev neeg thiab peb tos ntsoov hnub uas peb yuav ntsib nws dua.⁷

Cov ntseeg uas pab nqa lub tsheb van kom Emily dim pom tias zoo li lub tsheb van tsis hnyav hlo li. Kuv paub tias tej tim tswv saum ntuj tau koom ua ke nrog cov tim tswv ntiaj teb no pab tshem lub tsheb ntawm Emily lub cev. Kuv paub hais tias Emily rov qab los rau peb dhau ntawm lub hwj chim ntawm lub pov thawj hwj dawb huv.

Tus Tswv tau qhia qhov tseeb no rau Nws cov tub qhe hais tias: “Kuv yuav mus ua nej ntej. Kuv yuav nyob ntawm nej sab xis thiab nyob ntawm nej sab laug, thiab kuv Leej Ntsuj Plig yuav nyob hauv nej tej siab, thiab kuv cov tim tswv nyob ib puag ncig nej, los txhawb nqa nej.”⁸

Kuv ua tim khawv hais tias “lub Pov Thawj Hwj Dawb Huv, raws li tus Txheej Txheem ntawm Vajtswv Leej Tub”⁹—lub Pov Thawj Hwj Mekhixedes—ua ke nrog nws cov yawm sij, txoj cai, thiab lub hwj chim tau txum txim rov qab los rau lub ntiaj teb hauv peb lub caij nyoog kawg no. Kuv paub hais tias txawm tias qee zaum tsis muaj raws li peb lub siab xav thiab cia siab rau los, Vajtswv tej txuj ci tseem ceeb yeej muaj raws li Nws lub siab xav, Nws lub sij hawm, thiab Nws txoj hau kev rau peb.

Yog tias nej xav tau tej koob hmoov ntawm lub pov thawj hwj, suav tej txuj ci tseem ceeb thiab tej kev pab los ntawm cov tim tswv, cia li los taug txoj kev khi lus uas Vajtswv npaj tseg rau peb txhua tus. Cov ntseeg thiab cov thawj coj ntawm lub Koom Txoos uas hlub nej yuav pab nej tshais kauj ruam tom ntej mus.

Kuv ua tim khawv hais tias Yexus Khetos, Vajtswv Leej Tub, muaj txoj sia nyob thiab coj Nws lub Koom Txoos dhau ntawm cov yaj saub uas tuav thiab siv tej yawm sij ntawm lub pov thawj hwj. Tus Vaj Ntsuj Plig Dawb Huv muaj tseeb tiag. Tus Cawm Seej txo Nws txoj sia kom thiaj kho tau peb, txhiv peb, thiab coj peb rov qab mus tsev.

Kuv ua tim khawv hais tias tej txuj ci tseem ceeb tsis tau tsum, yeej muaj tim tswv nrog peb nyob, thiab lub qhov rooj ntug yeej qhib lug. Qhib lug tiag tiag li! Los ntawm Yexus Khetos lub npe, amees.