Ib Zaj Lus Ua Tim Khawv txog tej Yam uas Kuv Twb Pom thiab Hnov Lawm

Tom qab kuv kawm ntawv kev cai lij choj tiav tas, kuv poj niam, Marcia, thiab kuv txiav txim siab ua hauj lwm rau ib lub tsev kws lij choj uas xyaum hais plaub tom tsev hais plaub. Thaum kuv pib ua hauj lwm, kuv siv sij hawm ntau kom npaj cov tim khawv ua tim khawv tom tsev hais plaub. Tsis ntev kuv kawm hais tias nyob hauv lub tsev plaub sawv daws kawm tau qhov tseeb thaum cov tim khawv, lav lawv cov lus, thiab hais lus pov thawj txog qhov tseeb uas lawv tau pom thiab tau hnov. Thaum cov tim khawv hais lawv cov lus pov thawj, lawv cov lus ntawd yog sau tseg thiab ceev tseg. Qhov uas muaj cov tim khawv uas hais lus tseeb yeej tseem ceeb heev rau kuv txoj kev npaj hais plaub.

Tsis ntev kuv pom tias tib co lus uas kuv siv txhua txhua hnub ua ib tug kws lij choj yog cov lus uas kuv siv thaum kuv tham txog txoj moo zoo. “Tim khawv” thiab “pov thawj” yog ob lo lus uas peb siv thaum peb qhia qhov tseeb txog Yexus Khetos txoj moo zoo uas peb paub thiab hnov hauv nruab siab.

Thaum kuv txais kev txhawb nqa pom zoo ua ib tug Xya Caum Coj Cheeb Tsam, kuv qhib cov vaj lug kub kom thiaj kawm tau saib kuv yuav tsum ua li cas thiab kuv nyeem Lus Qhuab Qhia thiab Kev Khi Lus 107:25, uas hais tias, “Hu cov Xya Caum … ua cov tim khawv tshwj xeeb rau Lwm Haiv Neeg thiab rau tag nrho neeg ntiaj teb.” Tej zaum nej paub lawm, kuv tsom ntsoov cov lus hais tias “tim khawv tshwj xeeb.” Nws hais meej meej rau kuv hais tias kuv muaj lub luag hauj lwm kom ua tim khawv—kom hais lus pov thawj txog Yexus Khetos lub npe—txawm kuv mus qhov twg hauv lub ntiaj teb no.

Yeej muaj ntau zaj hauv cov vaj lug kub hais txog lawv cov uas ua tim khawv thiab ua pov thawj txog tej yam lawv pom thiab lawv hnov.

Ib yam li tus yaj saub Maumoos pib nws zaj lus ceev tseg yav thaum ub, nws sau hais tias, “Thiab nim no kuv, Maumoos, ua ib phau ceev xwm txheej txog tej uas kuv tau pom thiab tau hnov, thiab muab hu ua Phau Ntawv Maumoos.”

Tus Cawm Seej ob tug Thwj Tim Petus thiab Yauhas kho ib tug neeg tuav Yexus Khetos tuaj Naxales tuaj lub npe. Thaum lwm tus neeg txib kom nkawd tsis txhob hais lus tuav Yexus lub npe, nkawd teb hais tias:

“Wb mloog nej lus zoo dua li wb mloog Vajtswv lus los? Nej sim xav saib, ob qho no qhov twg yuav haum Vajtswv siab dua?

“Tej uas wb hnov thiab wb pom lawm, wb yeej yuav qhia, wb tsis npog li.”

Muaj dua ib co lus pov thawj uas los ntawm cov Ntseeg hauv Phau Ntawv Maumoos thaum lawv ua tim khawv pom tus Cawm Seej Yexus. Cia li mloog lawv cov lus tim khawv hais tias: “Thiab lawv ua tim khawv raws li no hais tias: Yav tas los, lub qhov muag yeej ib txwm tsis tau pom, thiab lub pob ntseg los ib txwm tsis tau hnov, tej yam tseem ceeb thiab zoo kawg nkaus ib yam li peb pom thiab hnov Yexus hais rau Leej Txiv.”

Cov kwv tij thiab cov muam, hnub no kuv ceev cia tseg thiab ua tim khawv txog tej yam uas kuv tau pom thiab hnov thaum kuv ua hauj lwm ua ib tug Xya Caum ntawm tus Tswv Yexus Khetos. Ua li no, kuv hais lus pov thawj rau nej txog ib Leej Txiv Saum Ntuj Ceeb Tsheej uas hlub peb thiab Nws Leej Tub, Yexus Khetos, uas tau raug txom nyem, tuag, thiab sawv rov los kom thiaj muab lub neej nyob mus ib txhis li pub rau Vajtswv cov me nyuam. Kuv hais lus pov thawj txog “ib txoj hauj lwm zoo kawg nkaus thiab ib qho txuj ci xav tsis thoob” thiab hais tias tus Tswv tau tsa Nws txhais tes ib zaug ntxiv kom Nws cov yaj saub thiab cov thwj tim txum tim Nws txoj moo zoo rov qab los. Kuv ua tim khawv hais tias vim yog tej yam kuv tau pom thiab tau hnov, tsis muaj dua ib lub sij hawm uas zoo dua lub sij hawm no kom ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kuv paub li no vim yog tej yam kuv paub, tsis vam khom lwm yam hlo li, vim yog tej yam kuv tau pom thiab tau hnov.

Thaum kuv tseem kawm ntawv qib kaum ob, kom thiaj kawm tiav kev kawm vaj lug kub seminary, kuv yuav tsum hais tawm 15 lub tuam tsev ntawm lub Koom Txoos. Nyob hauv hoob kawm ntawv vaj lug kub ntawd muaj ib daim duab txog txhua lub tuam tsev, thiab kuv yuav tsum qhia tawm saib txhua lub tuam tsev nyob qhov twg. Nim no, ntau xyoo tom qab ntawd, yeej yuav nyuaj heev hais tawm txhua lub tuam tsev—vim muaj 335 lub tuam tsev uas twb ua hauj lwm lawm los sis tseem tab tom ua. Kuv twb pom tus Tswv cov tuam tsev no ntau thiab kuv hais lus pov thawj hais tias tus Tswv foom koob hmoov thiab muab Nws tej kab ke pub rau Nws cov me nyuam thoob plaws lub ntiaj teb ntau zuj zus tuaj.

Kuv cov phooj ywg nyob ntawm FamilySearch tau qhia kuv hais tias lawv ntxiv ntau tshaj ib lab lub npe tshiab rau FamilySearch txhua hnub. Yog tias koj nrhiav tsis tau koj tus poj koob yawm txwv nag hmo, kuv caw nej rov qab saib dua ib zaug ntxiv tag kis. Thaum hais txog qhov uas sau tsev neeg Ixayees nyob ntawm daim ntaub thaiv sab nraud, ces yeej tsis muaj ib lub sij hawm zoo dua niaj hnub nim no ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Thaum wb tu wb cov me nyuam loj hlob tuaj hauv Twin Falls, Idaho, kuv tsis tshua paub ntau txog lub Koom Txoos thoob ntiaj teb. Thaum kuv raug hu ua ib tug Tuam Thawj Coj, Marcia thiab kuv yog hu mus ua hauj lwm pab hauv Cheeb Tsam Pacific, ib qho chaw uas wb tsis tau mus txog. Wb zoo siab pom tias muaj tej ceg txheem ntseeg txij ntawm lub teb chaws New Zealand sab pem qaum teb mus rau nram qab teb, thiab lawv muaj ib lub tuam tsev uas tau muab fij tseg thaum xyoo 1958. Yog ib lub ntawm 15 lub tuam tsev uas kuv yuav tsum cim ntsoov hauv seminary. Wb nrhiav tau tuam tsev hauv txhua lub nroog loj hauv teb chaws Australia, muaj ntau ceg txheem ntseeg thoob plaws lub teb chaws ntawd. Wb muaj hauj lwm ua hauv Samoa, es nyob ntawd yog 25 ceg txheem ntseeg, thiab nyob Tonga, es nyob ntawd ib nrab ntawm cov pej xeem yog mej zeej ntawm lub Koom Txoos. Wb muaj hauj lwm ua nyob lub pov txwv dej Kiribati, es nyob ntawd yog ob ceg txheem ntseeg. Wb muaj hauj lwm mus xyuas tej ceg txheem ntseeg nyob hauv Ebeye hauv tej pov txwv dej Marshall Islands thiab Daru nyob Papua New Guinea.

Tom qab wb ua hauj lwm hauv tej Pov Txwv Dej Pacific, wb raug hu mus ua hauj lwm pab teb chaws Philippines. Ua rau kuv xav tsis thoob, Yexus Khetos lub Koom Txoos hauv teb chaws Philippines loj hlob tuaj sai dua kuv tau xav. Nim no muaj 125 ceg txheem ntseeg, 23 qhov chaw tshaj tawm txoj moo zoo, thiab 13 lub tuam tsev uas tseem yuav ua. Kuv ua tim khawv pom tias lub koom txoos muaj 850,000 tus mej zeej nyob ntawd. Yog vim li cas kuv tsis paub txog txoj kev txhim tsa Khetos lub Koom Txoos thoob plaws lub ntiaj teb?

Tom qab peb xyoos hauv teb chaws Philippines, kuv ua hauj lwm hauv lub Rooj Tsav Xwm Saib Xyuas cov Tub Txib. Kuv txoj hauj lwm ntawd coj wb mus xyuas tej qhov chaw tshaj tawm txoj moo zoo thoob plaws lub ntiaj teb. Kuv pom tau tias tus Cawm Seej lub Koom Txoos yeej nyob thoob ntiaj teb. Marcia thiab kuv tau txoj hauj lwm mus xyuas tej qhov chaw tshaj tawm txoj moo zoo hauv Asia. Wb nrhiav tau ib lub tsev ceg txheem ntseeg zoo nkauj heev hauv Singapore, thiab muaj cov mej zeej zoo kawg nkaus. Wb mus xyuas cov mej zeej thiab cov tub txib hauv ib lub tsev teev ntuj hauv Kota Kinabalu, Malaysia. Wb ntsib ib co tub txib hauv Hong Kong thiab koom ib ceg txheem ntseeg txoj kev sib ntsib ua ke nrog cov Ntseeg.

Qhov uas muaj los no yeej muaj ntau zaus thaum wb ntsib cov tub txib thiab cov mej zeej nyob thoob plaws Europe, nyob hauv Latin America, teb chaws Caribbean, thiab teb chaws Afikas. Yexus Khetos lub Koom Txoos loj hlob tuaj ntau heev hauv teb chaws Afikas.

Kuv ua tim khawv pom Yexus Khetos txoj moo zoo txoj Kev Txum Tim Rov Qab Los uas tseem muaj los niaj hnub nim no thiab qhov uas tus Tswv tus yaj saub hais tias yuav muaj los uas yog “tiam sis Vajtswv txoj lus tseeb tseem yuav tawm mus nrog kev ua siab loj, kev hwm, thiab nyob nws tus kheej, mus txog thaum qhov tseeb tau nkag mus hauv txhua thaj av, tau xyuas txhua txhia qhov chaw, tau mus thoob plaws txhua lub teb chaws, thiab txhua tus neeg tau hnov.”

Peb cov tub txib nyob thoob ntiaj teb nim no muaj 74,000 tus. Ua hauj lwm ua ke nrog cov mej zeej, lawv muab 20,000 tus neeg ua kev cai raus dej txhua lub hli. Twb yog cov tub hluas ntxhais hluas muaj 18, 19, thiab 20 xyoo uas, ua ke nrog tus Tswv txoj kev pab, tau ua qhov txuj ci tseem ceeb no. Peb nrhiav tau cov tub hluas ntxhais hluas no hauv tej me nyuam zos ntawm Vanuatu thiab nyob hauv tej nroog loj ntawm New York, Paris, thiab London. Kuv tau pom lawv qhia txog tus Cawm Seej hauv tej pawg ntseeg hauv Fiji thiab hauv tej pawg ntseeg loj dua hauv tej qhov chaw zoo li Texas, California, thiab Florida.

Nej yuav nrhiav tau tub txib nyob txhua qhov txhia chaw hauv qab ntuj khwb hais 60 yam lus sib txawv thiab ua raws li tus Cawm Seej txoj lus txib hauv Matthew 28 hais tias: “Nej cia li tawm mus qhia txhua haiv neeg hauv qab ntuj no … nej yuav tsum tuav Vaj Leej Txiv, Vaj Leej Tub thiab Vaj Ntsuj Plig tus Dawb Huv lub npe, muab lawv ua kev cai raus dej.” Kuv hawm lub Koom Txoos cov tub txib yav nram ntej thiab cov niaj hnub nim no thiab thov kom cov hluas nco qab txog Thawj Tswj Hwm Russell M. Nelson txoj lus caw kom los sau Ixayees.

Kuv ua tim khawv hnub no hais tias kuv tau pom thiab tau hnov txoj Kev Txum Tim Yexus Khetos txoj moo zoo rov qab los. Kuv ua tim khawv pom Vajtswv tej hauj lwm thoob plaws lub ntiaj teb. Yeej tsis tau muaj dua ib lub sij hawm uas zoo dua niaj hnub nim no kom ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Tej zaum qhov txuj ci tseem ceeb ntawm txoj Kev Txum Tim Rov Qab Los uas kuv tau pom yog nej, cov ntseeg ntawm lub Koom Txoos hauv txhua lub teb chaws. Nej, cov Ntseeg hauv Hnub Nyoog Kawg, los Nifais sau txog nej hauv Phau Ntawv Maumoos, thaum nws pom peb lub caij nyoog thiab ua tim khawv hais tias, “Thiab tau muaj tias kuv, Nifais, pom Vajtswv tus Me Nyuam Yaj lub hwj chim, pom tias lub hwj chim ntawd tau nqis los rau cov ntseeg ntawm tus Me Nyuam Yaj lub koom txoos, thiab rau tus Tswv cov neeg khi lus, cov uas tau tawg khiav ri niab mus thoob plaws hauv lub ntiaj teb; thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”

Kuv hais lus pov thawj hais tias kuv tau pom qhov uas Nifais pom—nej, cov Ntseeg hauv txhua lub teb chaws, coj ncaj ncees thiab muaj Vajtswv lub hwj chim. Muaj ib zaug thaum kuv hais lus pub rau ib co ntseeg hauv ib lub teb chaws, tus Tswv tshoov kuv lub siab kom hais ib yam uas Vaj Ntxwv Npeyamis qhia hauv Mauxiyas 2 hauv Phau Ntawv Maumoos. Brent, “kuv thov kom [koj] xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig.”

Kuv ua tim khawv rau nej hais tias kuv tau pom tej no thaum kuv tau ntsib nej, nej cov Ntseeg nyob thoob plaws lub ntiaj teb uas ua raws li tej lus txib. Nej yog Leej Txiv cov me nyuam khi lus. Nej yog Yexus Khetos cov thwj tim. Nej kuj paub qhov uas kuv paub thiab vim nej tau txais lus pov thawj hais tias Yexus Khetos txoj moo zoo txum tim rov qab los muaj tseeb tiag. Tus Cawm Seej hais tias, “Tiam sis nej yog cov uas muaj hmoo, nej qhov muag thiaj pom thiab nej pob ntseg thiaj hnov.”

Raws li tus Tswv thiab Nws cov yaj saub thiab thwj tim coj kev, peb yuav npaj tub txib, khi thiab ceev tej kev khi lus, txhim tsa Khetos lub Koom Txoos nyob thoob plaws lub ntiaj teb, thiab txais tej koob hmoov uas los thaum peb ceev Vajtswv cov lus txib. Peb koom siab. Peb yog Vajtswv cov me nyuam. Peb paub Nws thiab peb hlub Nws.

Kuv nrog nej, kuv cov phooj ywg, koom ua ke hais lus pov thawj hais tias tej no muaj tseeb tiag. Peb ceev tseg cia tej yam uas peb tau pom thiab tau hnov. Nej thiab kuv yog tim khawv uas hais lus pov thawj. Twb yog vim lub hwj chim uas los ntawm peb txoj kev koom siab ua tim khawv no peb thiaj mus lawm tom ntej muaj siab ntseeg tus Tswv Yexus Khetos thiab Nws txoj moo zoo. Kuv ua tim khawv tias Yexus Khetos muaj sia nyob. Nws yog peb tus Cawm Seej thiab peb tus Txhiv Dim. Los ntawm Yexus Khetos lub npe, amees.