Txhua Yam Yuav Mus Zoo Vim Yog tej Kev Khi Lus hauv Tuam Tsev
Tsis muaj lwm yam tseem ceeb npaum li qhov uas nej ua raws li tej kev khi lus uas nej tau khi los sis yuav khi tseg hauv lub tuam tsev.
Kuv cov kwv tij thiab cov muam, tuas tuam rooj sab laj no tau ua ib lub sij hawm dawb ceev rau kuv. Qhov uas kuv muaj lub cib fim hais lus rau ntau plhom Neeg Ntseeg hauv Hnub Nyoog Kawg thiab peb cov phooj ywg nyob thoob plaws lub ntiaj teb no ua rau kuv ua Vajtswv tsaug. Kuv hlub nej, thiab kuv paub tias tus Tswv hlub nej.
50 xyoos tas los no, kuv muaj lub cib fim ua tus thawj tswj hwm ntawm Ricks College hauv Rexburg, Idaho. Thaum yav sawv ntxov lub Rau Hli Ntuj 5, 1976, kuv poj niam, Kathy, thiab kuv tsav tsheb los ntawm Rexburg mus pem lub Tuam Tsev Idaho Falls mus koom wb ib tug phooj ywg zoo txoj kev sib khi. Ham tsis, vim muaj plaub tug tub yau nyob tom tsev thaum lub sij hawm ntawd, wb mus xyuas lub tuam tsev tsuas yog vim wb ntiav ib tug ntxhais hluas zov me nyuam uas muaj siab loj xwb! Wb tso wb cov me nyuam rau nws zov thiab tsav tsheb mus 30-feeb.
Qhov uas muaj los rau wb hauv lub tuam tsev hnub ntawd yeej zoo kawg, li txhua zaus. Txawm yog li ntawd, tom qab txoj kev sib khi hauv lub tuam tsev—thiab thaum wb yuav npaj rov qab mus tsev—wb pom tias muaj cov neeg ua hauj lwm hauv lub tuam tsev thiab cov tuaj xyuas sib tham zom zaws hauv hoob txais qhua hauv lub tuam tsev. Tsis ntev, muaj ib tug neeg ua hauj lwm hauv lub tuam tsev qhia wb hais tias qhov Chaw Tauv Dej Teton hauv lub xeev Idaho sab hnub tuaj tau tawg lawm! Ntau tshaj 80 npis yoos nkasloos (300 lab cubic mev) dej tab tom ntws mus nyab 300 mais xwm fab xwm meem (775 km xwm fab xwm meem) ntawm cov hav nyob ze. Dej nyab lub nroog Rexburg, es muaj tej tsev thiab tej tsheb tshoob mus vim yog cov dej nyab. Tib pliag xwb ob feem peb ntawm 9,000 tus pej xeem tsis muaj tsev nyob li.1
Wb txawm txhawj heev txog wb cov me nyuam, cov tub ntxhais kawm ntawv thiab cov xib hwb, thiab ib koog zej zog uas wb hlub. Wb nyob tsis deb 30 mais (50 km), thiab txawm yog li ntawd, lub sij hawm ntawd tsis muaj xov tooj nqa ntawm tes thiab text, wb hu xov tooj mus ntsib wb cov me nyuam tsis tau, thiab wb tsav tsheb rov qab mus tsev tsis tau vim tag nrho cov kev kaw lawm.
Kawg tias wb yuav tsum pw ib hmo hauv ib lub tsev so hauv Idaho Falls. Kathy thiab kuv txhos caug ua ke hauv wb hoob pw thiab taij thov nrog rau Leej Txiv Saum Ntuj Ceeb Tsheej kom pov hwm wb cov me nyuam thiab foom koob hmoov pab lwm cov neeg uas raug txom nyem vim yog dej nyab no. Kuv nco tau Kathy txhawj xeeb heev tsaug zog tsis tau hlo li. Txawm tias kuv txhawj xeeb heev thiab los, kuv tso siab thiab thaum kawg tsaug zog tau.
Nyob nyob kuv tus poj niam tsa kuv sawv thiab hais tias, “Hal, koj ua li cas tsaug zog tau thaum zoo li no?”
Ces kuv txawm hais cov lus uas los meej meej rau kuv lub siab lub ntsws. Kuv hais tias: “Kathy, txawm tias muaj li cas los, txhua yam yuav mus zoo vim yog lub tuam tsev. Wb tau nrog Vajtswv sib khi lus thiab peb tsev neeg tau sib khi ua ke nyob mus ib txhis li.”
Thaum lub sij hawm ntawd, zoo li tus Tswv tus Ntsuj Plig pom zoo rau qhov uas wb twb paub hais tias muaj tseeb tiag: tej kab ke sib khi, uas nrhiav tau hauv tus Tswv lub tsev xwb thiab yog lub hwj chim pov thawj hwj tswj hwm, tau muab wb khi ua ke ua txij ua nkawm, thiab wb cov me nyuam yog muab khi rau wb thiab. Yeej tsis tas ntshai pes tsawg, thiab tom qab ntawd wb ua Vajtswv tsaug uas wb cov me nyuam tub puav leej nyab xeeb tsis ua li cas.
Tej zaum cov lus los ntawm Thawj Tswj Hwm Thomas S. Monson qhia zoo tshaj plaws saib Kathy thiab kuv xav li cas hmo ntawd. “Thaum peb nyob hauv lub tuam tsev, peb sab ntsuj plig yuav hloov hlo thiab yuav hnov kev kaj siab lug. … Peb yuav pib to taub tias tus Cawm Seej hais li cas tiag thaum Nws hais tias: ‘Kuv muab kuv txoj kev kaj siab tso rau nej; txoj kev kaj siab uas kuv muab pub rau nej. … Nej tsis txhob txhawj, tsis txhob nyuaj siab thiab tsis txhob ntshai [Yauhas 14:27].’”2
Kuv tau koob hmoov hnov txoj kev kaj siab lug ntawd txhua lub sij hawm kuv nkag lub tuam tsev dawb ceev. Kuv nco tau thawj hnub uas kuv nkag lub Tuam Tsev Salt Lake. Kuv yog ib tug tub hluas.
Kuv ntsia saud rau qab nthab siab siab uas ua rau lub chav ntawd ci ci heev zoo li twb qhib plho pom tau lub ntuj. Thaum lub sij hawm ntawd, ua rau kuv xav hauv kuv lub siab txog tej lus meej no: “Kuv twb nyob hauv qhov chaw ci ntsa iab yav tas los lawm.” Tiam sis tom qab ntawd tej lus no tau los kiag rau hauv kuv lub siab, tsis yog los ntawm kuv lub suab, hais tias: “Tsis yog, koj tsis tau tuaj rau qhov chaw no dua. Koj nco txog ib lub sij hawm ua ntej koj yug los. Koj twb nyob hauv ib qho chaw dawb huv zoo li no, ib qho chaw uas tus Tswv los xyuas tau.”
Cov kwv tij thiab cov muam, kuv ua tim khawv hais tias thaum peb mus xyuas lub tuam tsev, peb yuav nco tau txog qhov uas peb cov ntsuj plig nyob mus ib txhis li, peb sib raug zoo nrog Leej Txiv Saum Ntuj Ceeb Tsheej thiab Nws Leej Tub, thiab peb yeej xav rov qab mus nyob peb lub ntuj ceeb tsheej.
Ob peb lub tuam rooj sab laj no, Thawj Tswj Hwm Russell M. Nelson tau qhia:
“Qhov chaw nyab xeeb tshaj rau nej sab ntsuj plig yog kev ua raws nraim li lub tuam tsev tej kev khi lus.”
“Txhua yam uas peb ntseeg thiab txhua yam uas Vajtswv tau cog lus tseg rau Nws cov neeg khi lus yeej koom ua ke hauv lub tuam tsev.”3
“Txhua tus uas khi lus thaum lawv ua kev cai raus dej thiab nyob hauv lub tuam tsev—thiab ua raws li tej kev khi lus ntawd—txais tau Yexus Khetos lub hwj chim ntxiv.”4
Nws kuj qhia hais tias “thaum peb khi lus nrog Vajtswv, peb tso qhov nruab nrab tseg tas mus li. Vajtswv yeej yuav tsis tso cov uas tau nrog Nws khi lus tseg ib zaug li. Muaj tseeb tiag, tag nrho cov uas tau khi lus nrog Vajtswv lawv txais tau ib txoj kev hlub thiab lub siab hlub tshuab yam tshwj xeeb.”5
Raws li Thawj Tswj Hwm Nelson txoj kev coj, tus Tswv tau txib kom ua tuam tsev thoob plaws ntiaj teb ceev dua. Ua li no yuav cia tag nrho Vajtswv cov me nyuam muaj lub cib fim txais tej kab ke cawm seej thiab kev tsa nto thiab khi thiab ua raws li tej kev khi lus dawb ceev. Ua neej kom tsim nyog khi tej kev khi lus dawb ceev tsis yog ib zaug xwb tiam sis yog ib tug qauv uas ua raws li tas yus sim neej. Tus Tswv hais tias peb yuav tsum kawg siab kawg ntsws kawg plab kawg plawv.6
Thaum ua tej kab ke hauv lub tuam tsev ntshawv ntshis yuav qhia tias yus muab siab npuab tus Tswv. Thaum yus ua raws li yus tej kev khi lus tuam tsev thiab nco qab ntsoov, yus caw tau tus Vaj Ntsuj Plig Dawb Huv los ntxiv dag zog rau yus thiab ua kom yus dawb huv.
Ces yus mam li hnov tau qhov kaj thiab qhov kev cia siab ua tim khawv hais tias tej kev cog lus muaj tseeb. Yus yuav paub zuj zus hais tias txhua txoj kev khi lus nrog Vajtswv yog ib lub cib fim nyob ze dua Vajtswv, uas yuav ua rau yus xav ceev tej kev khi lus tuam tsev.
Vajtswv tau cog lus rau peb hais tias, “Vim peb tau khi lus nrog Vajtswv, Nws yeej yuav siv zog pab peb tsis tu tsis tseg, thiab peb yeej yuav tsis ua rau Nws txoj kev hlub tshua peb tas lawm.”7
Yog nyob hauv lub tuam tsev uas peb txais tau kev nplij siab vim peb paub tias peb yuav nrog peb tsev neeg nyob tom qab kev tuag thiab mus ib txhis li. Kev hawm tej kev khi lus ua txij ua nkawm thiab ntawm tsev neeg uas khi hauv Vajtswv tej tuam tsev yuav pov hwm peb los ntawm kev qia dub thiab kev muab hlob.
Tsuas yog coj yus tsev neeg raws li tus Tswv hais xwb thiaj yuav pab cov tub thiab cov ntxhais ib leeg saib xyuas thiab hlub ib leeg hauv yus tsev neeg. Muab cib fim rau nej cov me nyuam ib tug thov Vajtswv pab ib tug. Cia li paub sai sai thaum twg pib muaj kev sib cav thiab qhia lawv thaum nej pom ib leeg ua siab dawb pab ib leeg, qhov tseem ceeb yog thaum lawv sib pab. Thaum lawv thov Vajtswv thiab ib leeg pab ib leeg, ua rau lawv tej siab mos muag thiab ib tug lub siab yuav tig rau lwm tus thiab lawv niam lawv txiv.
Qhov no yog qhov uas Malakis piav txog thaum nws hais txog qhov uas tus yaj saub Eliyas yuav los: “Thiab nws yuav muab tej lus cog tseg uas cov me tub me nyuam tau cog rau lawv cov poj koob yawm txwv cog rau hauv cov me tub me nyuam lub siab, thiab cov me tub me nyuam tej siab tej ntsws yuav tig mus nrhiav lawv cov poj koob yawm txwv. Yog hais tias tsis muaj li ntawd, ces tag nrho cov neeg ntiaj teb yuav raug puas tsuaj huv tib si mus thaum nws los.”8
Peb txhua tus yeej yuav muaj kev sim siab, kev cov nyom, thiab kev mob siab. Peb txhua tus yeej yuav muaj “tej pos chob tawv nqaij.”9 Txawm yog li ntawd, thaum peb mus tom lub tuam tsev thiab nco qab txog peb tej kev khi lus, peb npaj tau kom txais tus Tswv coj kev rau peb.
Thaum Kathy thiab kuv sib khi ua txij ua nkawm hauv lub Tuam Tsev Logan Utah, Txwj Laug Spencer W. Kimball tau coj kab ke ntawd. Nws tsis hais lus ntau, tiam sis nws tau ntuas wb li no: “Hal thiab Kathy, cia li ua neej xwv kom thaum tus Tswv hu neb, ces yuav yooj yim rau nej mus.”
Thaum xub thawj, wb tsis to taub saib cov lus ntawd txhais li cas rau wb tiag, tiam sis wb sim ua neej kom wb thiaj npaj mus ua hauj lwm pab tus Tswv thaum txog sij hawm. Tom qab uas wb sib yuav tau 10 xyoo lawm, tus Thawj Coj Kev Kawm Ntawv hauv lub Koom Txoos hu kuv, Neal A. Maxwell.
Tam sim ntawd twb muaj raws li Thawj Tswj Hwm Kimball txoj kev ntuas kom wb txawj “yooj yim mus.” Kathy thiab kuv txais txoj kev hu kom kuv tawm mus rau ib qho chaw zoo kawg nkaus ua hauj lwm hauv ib qho chaw uas kuv tsis paub txog hlo li. Tsis kav, wb tsev neeg twb npaj mus thaum lub sij hawm ntawd vim muaj ib tug yaj saub, nyob hauv ib lub tsev dawb huv, ib qho chaw uas txais kev tshwm sim, pom ib lub sij hawm yav tom ntej wb thiaj li tau npaj zoo lawm.
Kuv cov kwv tij thiab cov muam, kuv ua tim khawv hais tias tsis muaj lwm yam tseem ceeb npaum li qhov uas nej ua raws li tej kev khi lus uas nej tau khi los sis yuav khi tseg hauv lub tuam tsev. Txawm hais tias nej nyob qhov twg ntawm txoj kev khi lus, kuv yaum kom nej ua kom tsim nyog mus tom lub tuam tsev. Mus xyuas lub tuam tsev ntau zaus raws li nej mus tau. Khi thiab ua raws li tej kev khi lus dawb ceev nrog Vajtswv. Kuv ua tau tim khawv txog tib qho tseeb kuv hais rau Kathy 50 xyoo tas los hauv hoob pw tsev so hauv Idaho Falls: “Txawm tias muaj li cas los, txhua yam yuav mus zoo vim yog lub tuam tsev tej kev khi lus.”
Kuv ua tim khawv hais tias Yexus yog tus Khetos. Nws tau sawv rov los los coj Nws lub Koom Txoos. Tej tuam tsev yog tus Tswv tej tsev. Thawj Tswj Hwm Russell M. Nelson yog Vajtswv tus yam saub hauv ntiaj teb no. Kuv hlub nws, thiab kuv hlub nej txhua tus. Los ntawm Yexus Khetos lub npe dawb ceev, amees.