Yus cov Lus Yeej Tseem Ceeb

Cov kwv tij, cov muam, thiab cov phooj ywg nyob thoob plaws ntiaj teb no, kuv txo hwj chim los hais lus rau neeg coob npaum li no, muaj coob leej uas yog mej zeej hauv peb lub Koom Txoos thiab muaj coob tus phooj ywg thiab cov neeg uas tuaj tshiab kom mloog tau lub rooj sab laj no. Zoo siab tos txais nej!

Cov neeg uas hais lawv tej zaj ntawm lub sam thiaj no lawv siv tej lus ua li ntawd. Peb hais ua lus Askiv tiam sis yeej muab txhais ua 100 yam lus. Lub hauv paus zoo tib yam nkaus. Yog tej lus. Thiab yus tej lus yeej tseem ceeb. Cia kuv hais ib zaug ntxiv tias. Yus tej lus yeej tseem ceeb!

Yus tej lus yog peb txoj kev sib txuas lus, tej no qhia txog peb txoj kev ntseeg, tej kev cai, thiab tej kev xav. Tej thaum peb hais lus; ho tej thaum peb mloog lus. Tej lus ua lub hauv paus hauv ntsis. Tej lus qhia txog peb tej kev xav, tej yam hauv peb paj hlwb, thiab tej yam peb ua lawm, txawm zoo los phem los xij peem.

Tu siab vim tej thaum, yus hais lus ceev ceev, mob siab, thiab tsis txawj xav. Thaum hais tau lawm, yus tshem tsis tau yus cov lus. Tej lus ua rau neeg muaj lub siab mob, tsim txom, ntxub, thiab ua kom tib neeg puas tsuaj. Muaj tej lus uas ua rau peb nyuaj siab heev.

Qhov fab ntxeev, cov lus pab tau peb zoo siab, muaj kev cia siab, thiab txhawb pab tib neeg. Tej lus txawj ua rau peb rov qab xav, ua dua tshiab thiab pauv peb txoj hau kev. Tej lus qhib tau peb lub siab rau qhov tseeb.

Yog vim li ntawd, qhov xub thawj thiab tseem ceeb tshaj, yeej yog Vajtswv cov lus.

Hauv Phau Ntawv Maumoos, tus yaj saub Amas thiab nws cov neeg hauv Amelikas teb thaum ub yeej muaj tsov muaj rog nrog cov neeg uas tau xyeej Vajtswv txoj lus tseg, tau ua siab tawv qhawv, thiab ua ib haiv neeg phem. Cov neeg rau siab ntseeg yuav sib ntaus siab tua, tiam sis Amas hais tias: “Thiab nim no, vim txoj kev qhia txog txoj lus muaj hwj chim coj tau cov neeg mus ua tej yam uas ncaj ncees—muaj tseeb tiag, txoj kev qhia txog txoj lus muaj hwj chim hloov cov neeg lub siab xav tshaj rab ntaj, los sis tshaj lwm yam huv tib si, uas tau tshwm sim rau lawv—yog li ntawd Amas thiaj xav tias tsim nyog rau lawv sim lub hwj chim ntawm Vajtswv txoj lus.”¹

“Vajtsev txoj lus” yeej kov yeej txhua yam tsav. Twb muaj li ntawd txij thaum Kev Tsim lub ntiaj teb los thaum tus Tswv hais tias: “Cia li muaj qhov kaj: ces txawm cia li kaj.”²

Tus Cawm Seej hais tej lus no hauv Phau Tshiab hais tias: “Lub ntuj thiab lub ntiaj teb yuav ploj mus, tiam sis kuv tej lus yuav tsis muaj ib los poob li.”³

Thiab tias: “Tus uas hlub kuv yeej ua raws li kuv tej lus qhia: thiab kuv Txiv yuav hlub tus ntawd, kuv Txiv thiab kuv yuav los cuag nws thiab nrog nws nyob.⁴

Yexus niam, Maiv Liag, hais tej lus tim khawv no hais tias: “Kuv yog Vajtswv tus ntxhais qhev, thov kom muaj raws li koj hais ko rau kuv.”⁵

Txoj kev ntseeg thiab ua raws li Vajtswv txoj lus yuav pab peb txav mus ze Nws. Thawj Tswj Hwm Russell M. Nelson tau cog lus hais tias, “Yog nej yuav kawm Nws tej lus, nej haj yam yuav muaj peev xwm rais los mus ua neeg zoo li Nws.”⁶

Peb sawv daws puas xav ua li zaj nkauj qhuas Vajtswv hais tias, “txais tau cov koob hmoov ntxiv—ua zoo li koj [uas yog tus Cawm Seej] ntxiv”?⁷

Kuv xav txog tus tub hluas Jopseh Smith thaum nws txhos caug hnov Nws Leej Txiv Saum Ntuj Ceeb Tsheej cov lus hais tias: “[Joseph,] Nov yog Kuv Leej Tub uas Kuv Hlub. Cia li mloog Nws hais!”⁸

Peb “mloog Nws” tej lus hauv phau vaj lug kub, tiam sis peb puas cia cov lus ntawd nyob twj ywm hauv phau ntawv, los sis peb puas nco qab tias Nws tab tom hais lus ncaj qha rau peb? Peb puas hloov?

Peb “mloog Nws” hauv tej kev tshwm sim rau peb lub siab thiab los ntawm tus Vaj Ntsuj Plig Dawb Huv tej kev tshoov siab, thaum teb peb tej lus thov, thiab hauv tej lub sij hawm thaum uas Yexus Khetos ib leeg xwb, dhau ntawm Nws txoj Kev Theej Txhooj, nqa tau peb tej nra, zam tau peb tej kev txhaum thiab muab kev thaj yeeb, thiab puag peb “hauv nws txoj kev hlub.”⁹

Qhov thib ob, cov yaj saub tej lus yeej tseem ceeb.

Cov yaj saub hais lus tim khawv tias Yexus Khetos los saum ntuj los. Lawv qhia Nws txoj moo zoo thiab qhia Nws txoj kev hlub rau sawv daws.¹⁰ Kuv hais lus tim khawv tias peb yus yaj saub uas muaj sia nyob, Thawj Tswj Hwm Russell M. Nelson, hnov thiab hais tus Tswv cov lus.

Thawj Tswj Hwm Nelson yeej paub hais tej lus zoo. Nws tau hais tias, “Taug raws txoj kev ua raws li tej kev khi lus,”¹¹ “Sau haiv neeg Ixayees ua ke,”¹² “Cia Vajtswv yeej,”¹³ “Tuam cov choj uas pab tib neeg sib to taub,”¹⁴ “Muaj kev ris txiaj,”¹⁵ “Haj yam ntseeg Yexus Khetos,”¹⁶ “Saib xyuas nej zaj lus tim khawv,”¹⁷ thiab “Ua ib tug neeg uas tsim kev thaj yeeb.”¹⁸

Tsis ntev tas los no nws thov kom peb yuav “xav txog tej yam xilethi-aus.” Nws hais tias, “Thaum nej raug teeb meem, cia li xav txog tej yam xilethi-aus! Thaum nej raug kev ntxias, cia li xav txog tej yam xilethi-aus! Thaum lub neej no los yog cov neeg uas nej hlub ua rau nej poob siab, cia li xav txog tej yam xilethi-aus! Thaum ib tug neeg tuag ntxov, cia li xav txog tej yam xilethi-aus! …Thaum lub neej no nyuaj rau nej, cia li xav txog tej yam xilethi-aus! … Thaum nej xav txog tej yam xilethi-aus, nej lub siab yuav hloov zuj zus, … nej yuav saib tej kev sim siab thiab kev tawm tsam txawv li qub, … [thiab] nej txoj kev ntseeg yuav loj hlob tuaj.”¹⁹

Thaum peb xav txog tej yam xilethi-aus, peb pom “tej uas yeej muaj tiag, thiab tej uas yeej yuav muaj tiag.”²⁰ Hauv lub ntiaj teb uas muaj kev ntxhov siab thiab kev tsis sib haum xeeb, peb yuav tsum paub li no.

Txwj Laug George Albert Smith, puag ua ntej nws los ua tus Thawj Tswj Hwm rau lub Koom Txoos, tau hais txog kev txhawb nqa tus yaj saub thiab mloog nws tej lus. Nws hais tias: “Qhov uas peb cog lus thaum peb tsa tes … yog ib qho tseem ceeb. … Nws txhais tau tias … peb yuav txhawb nqa nws; peb yuav thov Vajtswv pab nws; … thiab peb yuav rau siab ua raws li nws tej lus qhia raws li tus Tswv hais.”²¹ Los yog hais tias, peb yuav rau siab ntso ua raws li peb tus yaj saub cov lus qhia.

Ua ib tug ntawm 15 tus yaj saub, neeg pom tau, thiab neeg qhia kev tshwm sim uas peb lub Koom Txoos tau tsa tes pom zoo rau nag hmo, kuv xav qhia nej txog tej yam uas kuv pom thaum txhawb nqa tus yaj saub thiab ua raws li nws tej lus. Rau kuv mas zoo ib yam nkaus li tus yaj saub Yakhauj, uas hais tias, “kuv kuj tau hnov kiag tus Tswv lub suab hais lus rau kuv.”²²

Lub Kaum Hlis Ntuj tas los no²³ kuv thiab kuv tus poj niam, Melanie, nyob tim Bangkok, Thaib teb, thaum kuv tab tom npaj yuav muab lub Koom Txoos lub tuam tsev thib 185 fij tseg. Rau kuv mas, kuv xav tsis thoob thiab txo hwj chim heev. Nov yog thawj lub tuam tsev tim Exias sab hnub tuaj nram qab teb.²⁴ Tau ua tib zoo txua lub no—nws muaj rau theem tsev, cuaj tus pej thuam, “tsim nyog”²⁵ ua tus Tswv ib lub tsev. Rau ntau hli no kuv tau xav txog txoj kev muab fij tseg no. Qhov uas tog mus hauv kuv nruab siab thiab paj hlwb yog qhov uas tus yaj saub thiab cov thwj tim twb muab lub tuam tsev thiab teb chaws ntawd puag hauv lawv txhais tes. Thawj Tswj Hwm Thomas S. Monson twb tshaj tawm tias yuav ua lub tuam tsev no²⁶ thiab Thawj Tswj Hwm Nelson tshaj tawm txog kev fij tseg.²⁷

Kuv tau npaj zaj lus fij tseg ob peb hlis ua ntej ntawd. Twb muab cov lus dawb ceev ntawd txhais ua 12 yam lus. Peb twb npaj siab lawm. Los yog kuv xav tias peb tau npaj siab zoo.

Hmo ua ntej yuav muab fij tseg kuv tsim los thaum kuv tsaug zog, muaj kev txhawj xeeb, thiab xav tsis zoo txog zaj lus fij tseg ntawd. Kuv sim muab tso tseg, vim kuv paub tias twb npaj zaj lus fij tseg lawm. Tiam sis tus Ntsuj Plig pheej txob kuv. Kuv xav tias tseem tshuav ib co lus, ces raws li txoj kev tshwm sim kuv tau txais cov lus ntawd, thiab kuv tau ntxiv cov lus ntawd hauv qhov kawg zaj lus thov Vajtswv muab fij tseg hais tias: “Thov kom peb yuav xav txog tej yam xilethi-aus, cia Koj tus Ntsuj Plig yuav kav peb lub neej, thiab cia peb ua cov neeg uas siv zog tsim kev thaj yeeb nyab xeeb txhua lub sij hawm.”²⁸ Tus Tswv tab tom qhia kuv kom mloog peb tus yaj saub uas muaj sia nyob cov lus hais tias: “Cia li xav txog tej yam xilethi-aus,” “cia tus Ntsuj Plig kav peb lub neej,” “siv zog tsim kev thaj yeeb.” Tus yaj saub cov lus yeej tseem ceeb rau tus Tswv thiab rau peb.

Qhov thib peb, thiab tseem ceeb kawg, twb yog peb cov lus. Cia li ntseeg kuv, txawm peb nyob hauv lub ntiaj teb uas muaj ntau lub emoji²⁹, peb tej lus yeej tseem ceeb heev.

Peb tej lus ua tau cov lus txhawb nqa los sis kev chim, kev zoo siab los yog kev ua siab phem, kev khuv leej los sis kev muab xyeej tseg. Thaum muaj kev tsis sib haum, peb tej lus txawj ua rau neeg mob siab thiab tu siab kawg—thiab tej ntawd yuav nyob ruaj nrees. Peb cov lus hauv internet, hauv cov uas peb ntaus ntawv, kev qhauj tawm social media, los sis tej lus tweet txawm rais los mus muaj zog heev. Ces xyuam xim seb koj hais dab tsi thiab koj hais lus zoo li cas. Nyob hauv peb tsev neeg, tiag tiag mas cov khub niam txiv cov lus yus hais rau yus tus txiv, yus tus poj niam, thiab cov me nyuam, yeej pab tau peb sib koom siab los yog ua rau peb tsis muaj kev sib haum xeeb.

Cia kuv hais peb kab lus uas tshem tau kev mob siab tawm ntawm peb tej teeb meem thiab kev tsis sib haum, uas yuav txhawb nqa thiab ib leeg txhawb pab ib leeg:

“Ua koj tsaug.”

“Kuv thov txim.”

Thiab “Kuv hlub koj.”

Peb puas tseg tej lus no rau thaum muaj tej lub sij hawm tshwj xeeb los sis teeb meem loj. Ib sij ua siab zoo hais tej lus no ntau, vim tej lus no qhia luag tej tias peb saib lawv rau nqi. Tham qhia tej lus tsis tshua muaj qab hau; tsis txhob ua li ntawd.

Peb hais tau tias “ua koj tsaug” thaum nyob hauv lub tshuab nqa tib neeg mus theem tsev siab, hauv chaw nres tsheb, tom kiab khw, hauv hoob kas, thaum tos tib neeg, los sis rau cov neeg zej zog los sis phooj ywg. Peb hais tau tias “Kuv thov txim” thaum peb ua yuam kev, tsis tuaj koom ib qho sab laj, tsis nco qab ib tug neeg hnub yug, los sis pom ib tug uas muaj kev nyuaj siab. Peb hais tau tias “Kuv hlub koj” uas qhia tias “Kuv tab tom xav txog koj,” “Kuv nyiam koj,” “Kuv nyob ntawm no xav pab koj,” los yog “Koj tseem ceeb rau kuv.”

Cia kuv qhia nej txog ib zaug hauv kuv lub neej. Cov txiv tsev cia li cuab pob ntseg mloog. Cov niam tsev, qhov no yeej yuav pab nej thiab. Ua ntej kuv raug hu los ua txoj hauj lwm no hauv lub Koom Txoos, kuv yos teb chaws ntau rau kuv lub tsev lag luam. Kuv pheej mus rau ntau lub teb chaws thoob plaws ntiaj teb no. Thaum xaus ib hnub twg, txawm kuv nyob qhov twg los xij, kuv yeej hu xov tooj tom tsev. Thaum kuv tus poj niam, Melanie, txais lub xov tooj thiab kuv qhia nws seb tau muaj dab tsi lawm, peb txoj kev sib tham yeej xaus li no hais tias “Kuv hlub koj.” Txhua hnub, cov lus ntawd tog mus rau hauv kuv lub siab thiab tau coj kav kuv tej hauj lwm; tej lus ntawd tau tiv thaiv kuv ntawm tej kev haub kev ntxias. “Melanie, kuv hlub koj” yeej hais txog qhov uas wb ob leeg sib tso siab rau ib leeg.

Thawj Tswj Hwm Thomas S. Monson tau hais tias, “Muaj tej tus uas muaj ko taw uas qaug zog, yuav tau tuav lawv tes, yuav tau txhawb pab lawv paj hlwb, tau tshoov lawv siab, thiab tau cawm lawv kom dim.”³⁰ Txoj kev hais “ua koj tsaug,” “Kuv thov txim,” “Kuv hlub koj” yeej yuav ua li ntawd.

Cov kwv tij thiab cov muam, yus tej lus yeej tseem ceeb heev.

Kuv cog lus tias yog peb yuav “mloog ntsoov Khetos tej lus”³¹ cov uas coj peb mus rau txoj kev cawm dim, peb tus yaj saub cov lus uas coj peb kev thiab txhawb nqa peb, thiab peb tej lus uas qhia seb peb yog leej twg thiab nyiam tej yam dab tsi, ces lub ntuj ceeb tsheej yuav nchuav hwj chim los rau peb. “Khetos tej lus yuav qhia nej txhua yam uas nej yuav tsum ua.”³² Peb yog Leej Txiv Saum Ntuj Ceeb Tsheej cov me nyuam thiab Nws yog peb tus Vajtswv, thiab Nws xav kom peb yuav hais lus “li cov tim tswv hais”³³ los ntawm tus Vaj Ntsuj Plig Dawg Huv lub hwj chim.³⁴

Kuv hlub tus Tswv Yexus Khetos. Nws yog, li Yaxayas hauv Phau Qub hais, “Zoo Kawg Nkaus, Neeg Tuav Tswv Yim, tus Vajtswv muaj hwj chim loj kawg, Leej Txiv uas kav ib txhis, tus Tub Vaj Ntxwv ntawm Kev Kaj Siab Lug.”³⁵ Thiab li tus Thwj Tim Pov Lauj hais meej meej tias, “Khetos yeej yog Txoj Lus.”³⁶

Vim kuv yog tus Tswv ib tug Thwj Tim uas ua tus Tswv hu los ua Nws txoj hauj lwm—kom kuv tshaj tawm Nws tej lus—thiab hu kuv los hais lus pov thawj tshwj xeeb txog Nws. Los ntawm tus Tswv Yexus Khetos lub npe dawb ceev, amees.