2020–2024
Cov Tuam Tsev, tus Tswv cov Tsev uas Nyob Thoob Plaws lub Ntiaj Teb
Plaub Hlis Ntuj xyoo 2024 lub tuam rooj sab laj
13:56

Cov Tuam Tsev, tus Tswv cov Tsev uas Nyob Thoob Plaws lub Ntiaj Teb

Los ntawm Txwj Laug Neil L. Andersen

Ntawm Pawg Kaum Ob tug Thwj Tim

Thaum nej tsim nyog muaj siab thov Vajtswv nyob hauv Nws lub tsev dawb huv, nej yuav muaj hwj chim ua ntaj riam thaiv nej.

Nej puas nyiam cov lus zoo nkauj uas peb nyuam qhuav hu nkauj? “Kuv pab nej, kuv hlub nej thiab kom nej sawv ntseg, … Kuv txhawb nqa kuv cov ntseeg kom nej muaj lub siab ntev.”1” Tus Tswv txhawb nqa Nws Haiv Neeg Ntseeg tsis hais cov laus cov hluas los yog thaum lawv los rau hauv Nws lub tsev dawb huv. Nyob hauv Kinshasa thiab Zollikofen txij ntawm Fukuoka txog Oakland, cov tub hluas ntxhais hluas yeej mus ua kev cai raus dej hauv lub tuam tsev ntau kawg li. Dhau los, cov uas coj kab ke feem ntau muaj plaub hau dawb—tiam sis tsis yog li ntawd lawm. Muaj cov tub txib, cov tub txib pab lwm tus, thiab cov tub txib uas twb rov qab los tsev lawm nyob hauv txhua lub tuam tsev. Nyob thoob plaws lub ntiaj teb muaj dab tsi hauv tib neeg lub siab uas loj zuj zus kom peb mus rau tus Tswv lub tsev.

Ib xyoos dhau los lawm, ib tug phooj ywg uas muaj 95 xyoos, nyob hauv Teb Chaws Amelikas sab hnub tuaj, ib tug uas cov tub txib tau qhia rau 70 xyoo, hais rau nws tus ntxhais, “Kuv xav nrog koj mus rau lub tuam tsev.”

Nws tus ntxhais teb tias, “Ua li ntawd, niam, koj yuav tsum ua kev cai raus dej ua ntej.”

Ib tug poj laug ua kev cai raus dej.

Nws teb hais tias, “Ua li ntawd, kuv xav ua kev cai raus dej.” Nws tau ua kev cai raus dej. Ob peb hnub tom qab ntawd, nws tau mus hauv lub tuam tsev qhov chaw ua kev cai raus dej. Thiab ib lub hlis tas los xwb, nws tau txais nws qhov vaj txiaj ntsim thiab ua kev cai sib khi. Kev txawj ntse thiab lub hwj chim ntawm Vajtswv tab tom loj tuaj ua rau daim ntaub thaiv lub ntiaj teb pib ntuag rhe.2

Tus poj laug nyob ntawm lub tuam tsev sab nraud.

Nej puas tau xav yog vim li cas tus Tswv yuav coj Nws tus yaj saub tam sim no kom ua Nws cov tuam tsev thoob plaws lub ntiaj teb?3 Yog vim li cas, thaum lub sij hawm tam sim no, Nws muab kev vam meej rau Nws cov neeg khi lus kom los ntawm cov nyiaj ib feem kaum, lawv ua tau tus Tswv lub tsev ntau kawg li?

Tag kis no, Thawj Tswj Hwm Dallin H. Oaks cia peb saib ib daim duab txog kev ua cov tuam tsev nyob thoob plaws lub ntiaj teb. Tsis ntev tas los Kathy thiab kuv wb nyob hauv Philippines. Cia li xav txog qhov txuj ci tseem ceeb no: Twb muab lub Tuam Tsev Manila fij tseg nyob rau xyoo 1984. Yog 26 xyoo ua ntej tau ua lub tuam tsev thib ob nyob hauv Cebu City tiav lawm nyob rau xyoo 2010. Nim no, 14 xyoos tom qab ntawd, muaj 11 lub tuam tsev uas tab tom ua, npaj ua, los sis npaj muab fij tseg. Txij ntawm sab qaum teb txog sab qab teb: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, thiab Davao. Yeej ua rau peb xav tsis thoob pom Vajtswv tej hauj lwm zoo kawg nkaus li!

Cov Tuam Tsev Nyob hauv Philippines

Nyob thoob plaws lub ntiaj teb, tus Tswv cov tsev los nyob ze peb zuj zus. Vim li cas ua li no hauv peb lub caij nyoog?

Lub Caij Nyoog Kawg

Tus Tswv ceeb toom hais tias nyob hauv lub caij nyoog kawg, yuav muaj kev kub ntxhov hauv tej teb chaws,4 tib neeg “nyias yuav xav txog nyias xwb,”5 “txhua yam yuav ntxhov hnyo,”6 yuav tsis paub meej,7 thiab “tib neeg lub siab yuav poob tag.”8 Peb twb pom cov txiv neej thiab cov poj niam lub siab poob tag lawm: neeg ntiaj teb tej kev raug siab, tej lub suab ntxias uas ua rau neeg tsis nco qab, kev tsis quav ntsej txog kev tu yus sab ntsuj plig, nkees ua tej yam uas cov thwj tim yuav tsum ua.9 Tej zaum nej nyuaj siab vim ib tug uas nej hlub, ib tug uas twb mob siab hais txog nws txoj kev ntseeg Yexus Khetos, ua tim khawv txog Phau Ntawv Maumoos, thiab rau siab xav pab txhim tsa Vajtswv lub nceeg vaj, nws twb txav mus zuj zus kom tsis tshua muaj siab ntseeg nyob hauv lub Koom Txoos. Kuv hais lus ntuas nej kom tsis txhob poob siab! All is well. Rau qhov yeej tsis muaj ib yam dab tsi uas Vajtswv yuav ua tsis taus li.10

Vim yuav muaj kev ntxhov hnyo thiab kev tsis ntseeg nyob hauv ntiaj teb no, tus Tswv cog lus tias yuav muaj ib co neeg khi lus, ib co neeg uas mob siab tos txais Nws txoj kev rov los; ib co neeg uas sawv hauv tej qhov chaw dawb huv thiab tsis txav mus li.11 Nws hais txog ib co neeg ncaj ncees uas tiv taus tus yeeb ncuab tej kev ntxias, rau siab ua raws li lawv txoj kev ntseeg, xav txog tej yam xilethi-aus, thiab tso siab plhuav rau tus Cawm Seej, Yexus Khetos.

Vim li cas tus Tswv ua rau peb muaj cov tuam tsev ntau heev nyob ze peb zuj zus? Vim rau qhov thaum muaj kev kub ntxhov thiab kev ntxias hauv lub ntiaj teb no, Nws tau cog lus tias Nws yuav txhawb nqa thiab foom koob hmoov rau Nws Haiv Neeg Ntseeg uas tau khi lus, es twb muaj raws li Nws tej lus cog tseg!

Tej Lus Cog Tseg Los ntawm lub Tuam Tsev Kirtland

Cov tuam tsev dawb huv no ua li cas txhawb nqa peb, nplij peb lub siab, thiab pov hwm peb? Peb nrhiav tau lus teb nyob hauv tus Yaj Saub Joseph Smith tej lus thov thaum muab lub Tuam Tsev Kirtland fij tseg. Yog nyob hauv lub tuam tsev no uas Haiv Neeg Ntseeg tau hu nkauj thawj zaug hais tias, “Peb mam li hu nkauj qhuas Vajtswv nrog nws cov tub txib.”12 Tus Cawm Seej tshwm sim nyob ntawd, thiab cov yaj saub puag thaum ub tau rov qab los, muab cov yawm sij ntawm lub pov thawj hwj ntxiv kom muab txoj moo zoo txum tim rov qab los.13

Thaum lub sij hawm dawb ceev nyob hauv lub Tuam Tsev Kirtland, tus Yaj Saub thov Vajtswv tias nyob hauv tus Tswv lub tsev dawb huv, Haiv Neeg Ntseeg yuav muaj Vajtswv lub hwj chim ua ntaj riam thaiv lawv, lawv yuav muaj Yexus Khetos lub npe nrog lawv, Nws cov tim tswv yuav saib xyuas lawv, thiab lawv yuav loj hlob los ntawm tus Tswv thiab txais tus Vaj Ntsuj Plig Dawb Huv tag nrho.14 Yeej muaj raws li cov lus thov Vajtswv uas muaj hwj chim heev hauv peb lub neej thaum peb rau siab hwm Vajtswv nyob hauv tus Tswv lub tsev.

Muaj Hwj Chim Los Ua Ntaj Riam

Nyob hauv Nws lub tsev, peb txais lub hwj chim saum ntuj ceeb tsheej tiag.15 Ua rau peb txais kev pom zoo thiab kev txhawb nqa rau peb txoj kev ntseeg thiab peb txoj kev hlub Yexus Khetos. Peb los paub ntawm sab ntsuj plig hais tias peb yog leej twg tiag thiab lub hom phiaj ntawm lub neej no yog dab tsi.16 Yog peb rau siab ntseeg, peb tau koob hmoov txais kev tiv thaiv thiaj li tsis raug ntxias kom tsom ntsoov rau tej yam uas tsis muaj nqis. Peb hnov peb tus Cawm Seej txoj kev hlub thaum Nws txhawb nqa peb hauv peb tej teeb meem thiab tej kev nyuaj siab. Peb muaj Vajtswv lub hwj chim ua ntaj riam thaiv peb.

Ris Nws lub Npe

Nyob hauv Nws lub tsev dawb huv, peb ris Nws lub npe ntxiv. Thaum peb ua kev cai raus dej, peb tshaj tawm peb txoj kev ntseeg Nws thiab peb txoj kev txaus siab ua raws li Nws cov lus txib. Nyob hauv lub tuam tsev, peb cog lus tias peb yuav coj raws li Nws tas mus li.

Daim Duab txog lub Tuam Tsev Heber Valley Utah

Cov tub hluas ntxhais hluas ntawm lub Koom Txoos no yeej zoo kawg. Nyob hauv lub ntiaj teb nyuaj no, lawv ris Yexus Khetos lub npe. Nyob hauv Heber City, Utah, twb ua ib txoj kev sib ntsib rau cov pej xeem sib tham txog kev ua ib lub tuam tsev. Peb puas tus tub hluas ntxhais hluas tau koom ua ke hauv ib lub tshav ua si kom qhia tias lawv txhawb nqa lub tuam tsev uas yuav ua. Ib tug tub hluas, uas hais lus rau cov thawj coj tseem fwv hauv chaw sab laj, ua siab loj piav hais tias, “Kuv cia siab tias kuv mam li yuav poj niam nyob hauv lub tuam tsev no. [Lub tuam tsev yuav pab] kuv ua neeg huv.” Lwm tus tau piav tias lub tuam tsev yog ib lub cim txog txoj kev kaj thiab txoj kev cia siab. Cov tub hluas ntxhais hluas ntawm lub Koom Txoos nyob thoob plaws lub ntiaj teb muab siab npuab Yexus Khetos lub npe.17

Cov tub hluas ntxhais hluas puv ib lub tshav ua si nyob hauv Heber City.

Cov Tim Tswv Nrog Peb

Nyob hauv lub Tuam Tsev Kirtland, tus Yaj Saub Joseph thov Vajtswv hais tias “cov tim tswv yuav saib xyuas [Haiv Neeg Ntseeg].”18 Qhov uas peb siv sij hawm hauv lub tuam tsev kom ua kab ke rau peb cov poj koob yawm txwv ua rau peb txais kev nplij siab hais tias muaj ib lub neej ntxiv nyob daim ntaub thaiv sab tod.

Txawm yog muaj ntau yam uas peb kawm hauv tus Tswv lub tsev uas dawb ceev dhau kom qhia tab meeg sawv daws, muaj tej yam uas peb hais tau. Plaub caug xyoo tas los, thaum wb nyob hauv Florida, Kathy thiab kuv wb mus rau lub tuam tsev nyob hauv Atlanta, Georgia. Thaum hnub Wednesday tsaus ntuj, lub Tsib Hlis Ntuj hnub tim 9, xyoo 1984, thaum wb nyuam qhuav ua qhov vaj txiaj ntsim tas hauv lub tuam tsev, ib tug coj kab ke los hais kuv nug seb kuv puas muaj sij hawm ua ib txoj kab ke chiv thawj xwb. Lub npe uas kuv sawv cev tam yeej txawv heev. Nws lub npe hu ua Eleazer Cercy.

Hnub tom qab ntawd, lub tuam tsev muaj Haiv Neeg Ntseeg coob heev. Thaum kuv npaj ua qhov vaj txiaj ntsim zaum thib ob hnub ntawd, kuv tau txais lub npe ntawm tus neeg uas kuv yuav sawv cev rau. Xav tsis thoob uas yog lub npe ntawm tus neeg uas kuv twb txais hmo ua ntej, Eleazer Cercy. Kuv twb hnov tus Tswv tus Ntsuj Plig thaum ua qhov vaj txiaj ntsim ntawd tag lawm. Ces thaum tav su, thaum wb tseem nyob hauv lub tuam tsev, Kathy pom ib tug phooj ywg laus, Muam Dolly Fernandez, uas nyob hauv Atlanta lawm. Vim tsis muaj txiv neej hauv nws tsev neeg uas nrog nws tuaj, nws thov kuv seb kuv puas kam pab muab nws txiv khi rau nws txiv niam thiab txiv. Kuv yeej zoo siab ua li ntawd.

Thaum kuv txhos caug ntawm lub thaj ua txoj kab ke dawb ceev no, kuv rov qab hnov lub npe uas kuv paub zoo lawm, nws txiv, Eleazer Cercy. Kuv ntseeg hais tias tom qab lub neej no, kuv yuav ntsib thiab khawm ib tug txiv neej uas nyob hauv lub neej no lawv hu ua Eleazer Cercy.

Ntau zaus nyob hauv tus Tswv lub tsev peb txais kev nyob kaj siab lug thiab txais kev tshwm sim ntau tshaj peb txais tej kev tshoov siab loj heev. Tiam sis nco ntsoov tias: Nws cov tim tswv saib xyuas peb!

Muaj tus Vaj Ntsuj Plig Dawb Huv Nplua Mias

Peb txais lub txiaj ntsim Vaj Ntsuj Plig Dawb Huv thaum peb txais kev pom zoo ua ib tug mej zeej hauv lub Koom Txoos. Txhua lub lim tiam thaum peb tsim nyog noj cov mov mog thiab haus cov dej kom nco txog tus Cawm Seej, tus Tswv cog lus tias Nws tus Ntsuj Plig yuav nrog nraim peb nyob.19 Thaum peb muaj siab xav los rau tus Tswv lub tsev, uas yog qhov chaw dawb huv tshaj hauv lub ntiaj teb no, peb loj hlob los ntawm tus Tswv thiab “txais tus Vaj Ntsuj Plig Dawb Huv tag nrho.”20 Los ntawm tus Vaj Ntsuj Plig Dawb Huv lub hwj chim, peb muaj kev kaj siab lug thiab kev xyiv fab thiab kev cia siab uas tsis pom qab hais.21 Peb txais dag zog ua Nws cov thwj tim tas li tsis hais thaum tej lub sij hawm uas peb tsis nyob hauv tej qhov chaw dawb huv.

Thawj Tswj Hwm Russell M. Nelson qhia hais tias: “Peb tus Cawm Seej thiab tus Txhiv Dim, Yexus Khetos, yuav ua Nws tej hauj lwm zoo tshaj plaws tam sim no mus rau thaum Nws yuav rov qab los. Peb yuav pom tej txuj ci tseem ceeb uas qhia tias Vajtswv Leej Txiv thiab Nws Tib Leeg Tub, Yexus Khetos, yeej muaj yeeb koob coj kav lub Koom Txoos no.”22 Kev ua tus Tswv cov tsev nyob thoob plaws lub ntiaj teb yog ib txoj hauj lwm zoo kawg nkaus thiab yog ib lub cim txog tej txuj ci tseem ceeb.23

Kuv cov phooj ywg zoo, yog peb ua taus thiab tseem tsis tau mus rau lub tuam tsev ntau ntxiv, cia peb nrhiav sij hawm ntxiv kom hwm Vajtswv hauv tus Tswv lub tsev. Cia peb thov Vajtswv pab ua cov tuam tsev uas tau tshaj tawm thoob plaws lub ntiaj teb, kom yuav tau thaj av, kom tseem fwv yuav pom zoo, kom cov neeg ua hauj lwm yuav txawj siv lawv tej txiaj ntsim, thiab tej kev muab cov tuam tsev fij tseg yuav ua rau Vajtswv pom zoo thiab cov tim tswv saib xyuas.

Cog Lus

Lub tuam tsev yog tus Tswv lub tsev tiag. Kuv cog lus rau nej tias thaum nej tsim nyog muaj siab thov Vajtswv nyob hauv Nws lub tsev dawb huv, nej yuav muaj Nws lub hwj chim ua ntaj riam thaiv nej, nej yuav ris Nws lub npe, Nws cov tim tswv yuav saib xyuas nej, thiab nej yuav loj hlob muaj tus Vaj Ntsuj Plig Dawb Huv cov koob hmoov.

Tus Tswv cog lus hais tias, “Txhua tus neeg uas tso nws tej kev txhaum tseg thiab los cuag kuv, thiab hu txog kuv lub npe, thiab ua raws li kuv lub suab hais, thiab ua raws li kuv tej lus txib, yuav pom kuv lub ntsej muag thiab paub hais tias muaj kuv;.”24 Muaj ntau txoj kev kom pom tau Yexus Khetos lub ntsej muag, thiab tsis muaj ib qho chaw zoo dua li Nws lub tsev dawb huv.25

Nyob hauv lub caij nyoog uas muaj kev ntxhov siab txhawj xeeb, kuv ua tim khawv tias Nws cov tuam tsev yog Nws lub tsev dawb huv thiab yuav pab tshwj peb tseg, pov hwm peb, thiab npaj peb rau hnub zoo kawg nkaus thaum uas nrog Nws cov tim tswv dawb huv, peb tus Cawm Seej los muaj hwj chim, koob meej, thiab lub hwj chim loj tshaj plaws. Los ntawm Yexus Khetos lub npe, amees.

Lus Cim

  1. “Lub Hauv Paus Ruaj Nrees,” Cov Nkauj Qhuas Vajtswv, zaj 85.

  2. “Vajtswv tus Ntsuj Plig,” Cov Nkauj Qhuas Vajtswv, zaj 2.

  3. Tam sim no muaj 182 lub tuam tsev uas qhib lawm. Tseem kho rau lub tuam tsev. Xya lub tuam tsev tos kom muab fij tseg, es tshuav ib lub uas tos kom rov qab fij tseg. Muaj 45 lub uas tab tom ua thiab 94 lub ntxiv los twb tshaj tawm los sis npaj ua.

  4. Saib Lukas 21:10.

  5. 2 Timautes 3:2.

  6. Lus Qhuab Qhia thiab Kev Khi Lus 88:91.

  7. Txwj Laug David A. Bednar hais tias: “Tej ntsiab cai ntawm txoj moo zoo yeej zoo li ib tug duav kiv dej rau ib lub nkoj rau peb. Tej ntsiab cai yog ua rau peb nrhiav peb txoj kev thiab pab peb sawv ruaj khov thiab tsis txav mus li peb thiaj li yuav tsis ntog thaum muaj cua daj cua dub thiab kev ua xyem xyav hauv hnub nyoog kawg no” (“Tej Ntsiab Cai ntawm Kuv txoj Moo Zoo,” Liyahaunas, Tsib Hlis Ntuj 2021, 126).

  8. Lus Qhuab Qhia thiab Kev Khi Lus 45:26.

  9. “Yog leej twg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaub lig nrog kuv mus” (Mathais 16:24).

  10. Saib Lukas 1:37.

  11. Saib Lus Qhuab Qhia thiab Kev Khi Lus 87:8.

  12. Cov Nkauj Qhuas Vajtswv, zaj 2.

  13. Saib Lus Qhuab Qhia thiab Kev Khi Lus 110. Ua ntej lub sij hawm no, tus Yaj Saub Joseph Smith tau txais lub Pov Thawj Hwj Aloos thiab cov yawm sij ntawd los ntawm Yauhas tus uas Muab Neeg Ua Kev Cai Raus Dej, thiab nws tau txais lub Pov Thawj Hwj Mekhixedes thiab cov yawm sij ntawm los ntawm cov Thwj Tim Petus, Yakaunpaus, thiab Yauhas (saib Lus Qhuab Qhia thiab Kev Khi Lus 13:1; 27:12–13).

  14. Lus Qhuab Qhia thiab Kev Khi Lus 109:15; kuj saib nqe 22.

  15. Thawj Tswj Hwm Russell M. Nelson hais tias: “Lub tuam tsev pab tau peb ua li no. Nyob ntawd peb txais vaj txiaj ntsim uas yog Vajtswv lub hwj chim, ua rau peb muaj peev xwm kov yeej Dab Ntxwg Nyoog, tus uas tsim txhua yam kev sib cav sib ceg” (“Xav Tau cov uas Ua rau Neeg Nyob Sib Haum Xeeb,” Liyahaunas, Tsib Hlis Ntuj 2023, 101)

  16. Saib Russell M. Nelson, “Choices for Eternity” (kev hawm Vajtswv uas tshaj tawm rau neeg hluas thoob ntiaj teb, Tsib Hlis Ntuj 15, 2022), Txoj Moo Zoo cov Ntawv.

  17. Txwj Laug Colin Stauffer, tsab ntawv, Ib Hlis Ntuj 30, 2024.

  18. Lus Qhuab Qhia thiab Kev Khi Lus 109:22.

  19. Saib Lus Qhuab Qhia thiab Kev Khi Lus 20:77, 79.

  20. Lus Qhuab Qhia thiab Kev Khi Lus 109:15.

  21. Saib Loos 15:13.

  22. Russell M. Nelson, “Kev Tshwm Sim rau lub Koom Txoos, Kev Tshwm Sim rau Peb lub Neej,” Liyahaunas, Tsib Hlis Ntuj 2018, 96.

  23. Thawj Tswj Hwm Brigham Young hais tias, “Peb yuav muaj ntau pua lub tuam tsev thiab txhiab txhiab tus txiv neej thiab poj niam uas ua hauj lwm haud rau cov uas twb tsaug zog lawm, cov uas tsis tau muaj cib fim hnov thiab mloog txog Txoj Moo Zoo” (Teaching of the Presidents of the Church: Brigham Young [1997], 312). Thiab Thawj Tswj Hwm Ezra Taft Benson hais tias: “Cov yaj saub dhau los tau qhia txog yav tom ntej hais tias yuav muaj ntau lub tuam tsev nyob thoob plaws Amelikas Sab Qaum Teb, Sab Qaum Teb, cov pov txwv hauv Dej Hiav Txwv Pacific, Yulauv, thiab lwm qhov chaw. Yog tias yuav ua txoj hauj lwm loj no, ces yuav tsum muaj ntau pua lub tuam tsev” (The Teachings of Exalas Taft Benson [1988], 247).

  24. Lus Qhuab Qhia thiab Kev Khi Lus 93:1.

  25. Txwj Laug David B. Haight hais tias:

    “Muaj tseeb tiag ib txhia twb pom tus Cawm Seej tiag, tiam sis thaum ib tug neeg saib hauv phau txhais tej lus, nws kawm tias muaj ob peb lub ntsiab rau lo lus see, xws li kev paub Nws, kev txais kev tshoov siab txog Nws, paub tias yog Nws thiab Nws tej hauj lwm, paub tias Nws tseem ceeb npaum li cas, los yog kev to taub Nws.

    “Peb txhua tus txais tau txoj kev kaj thiab cov koob hmoov no” (“Temples and Work Therein,” Ensign, Kaum Ib Hlis Ntuj 1990, 61).