Cia li Muab tus Tswv Yexus Khetos Los Hnav

Thaum kuv ob tug me nyuam yau loj hlob tuaj, kuv nrhiav tau tej phau ntawv lom zem thiab ntxim nyeem thiab siv tej lub cim hauv zaj dab neeg. Thaum peb nyeem ua ke thaum yav tsaus ntuj, kuv nyiam pab kuv cov me nyuam to taub tej lub cim uas tus sau siv kom qhia cov ntsiab cai tseem ceeb, tsis hais txoj moo zoo tej ntsiab cai los yog.

Kuv paub tias kuv cov me nyuam pib to taub qhov no thaum ib hnub kuv tus tub yau yog ib tug tub hluas. Nws nyuam qhuav pib nyeem ib phau ntawv tshiab thiab xav mloog zaj dab neeg no xwb, tiam sis nws lub siab pheej sim nrhiav lub ntsiab lus tob ntawm txhua yam nws nyeem. Nws ntxhov siab, tiam sis ua rau kuv zoo siab heev.

Yexus qhia los ntawm dab neeg thiab tej lub cim¹—Nws hais txog ib lub noob kom qhia txog lub hwj chim ntawm txoj kev ntseeg,² Nws siv ib tug yaj uas poob zoo kom qhia tias tej ntsuj plig muaj nqis,³ ib tug tub ua txhaum kom qhia txog Vajtswv tus cwj pwm.⁴ Nws zaj lus piv txwv yog cov cim uas Nws siv kom qhia tej yam tob rau cov uas “xav mloog.”⁵ Tiam sis cov uas tsis nrhiav lub ntsiab tob tsis to taub,⁶ ib yam li cov uas nyeem tib phau ntawv kuv nyeem rau kuv cov me nyuam tsis paub tias nyob hauv tej zaj dab neeg ntawd los muaj lub ntsiab tob ntxiv thiab muaj tej yam uas lawv kawm tau ntxiv.

Thaum Vajtswv Leej Txiv muab Nws Tib Leeg Tub txi rau peb, Yexus Khetos Nws tus Kheej tau los ua lub cim siab tshaj plaws txog peb Leej Txiv Saum Ntuj Ceeb Tsheej txoj kev hlub rau peb txhua tus.⁷ Yexus Khetos tau los ua Vajtswv tus Me Nyuam Yaj.⁸

Peb muaj cib fim thiab txoj koob hmoov vim Vajtswv caw peb nrog Nws khi lus, peb lub neej thiaj li yuav los ua ib lub cim txog txoj kev khi lus ntawd. Tej kev khi lus ua rau peb sib raug zoo nrog Vajtswv thiaj li cia Nws muab peb hloov thiab txhawb nqa peb los ua neeg zoo li tus Cawm Seej, coj peb los ze zuj ze zus rau Nws thiab peb Leej Txiv⁹ thiab thaum kawg npaj peb mus rau hauv Nkawd lub xub ntiag.

Txhua tus neeg uas nyob saum ntiaj teb yog Vajtswv ib tug tub los yog tus ntxhais.¹⁰ Thaum peb xaiv los nrog Vajtswv khi lus, yeej ua rau peb txoj kev nrog Nws sib raug zoo muaj zog zuj zus. Thawj Tswj Hwm Russell M. Nelson tau qhia tias thaum peb xaiv los nrog Vajtswv khi lus, peb haj yam nrog Nws sib raug zoo ntau tshaj ua ntej peb tau khi lus, thiab muab txoj cai rau Nws foom koob hmoov nrog kev ntsuas ntxiv ntawm Nws txoj kev hlub thiab siab zoo, txoj kev sib hlub ntawm kev khi lus hu ua hesed hauv lus Henplais.¹¹ Txoj kev ua raws li peb tej kev khi lus yeej hais txog peb txoj kev sib raug zoo nrog Vajtswv—yog kev sib raug zoo nrog Nws uas muaj hesed.¹²

Peb Leej Txiv Saum Ntuj Ceeb Tsheej xav kom muaj kev sib raug zoo nrog tag nrho nws cov tub thiab cov ntxhais,¹³ tiam sis nyob ntawm peb txoj kev xaiv. Thaum peb xaiv kom los nyob ze Nws los ntawm peb tej kev khi lus, ces ua rau Nws yuav los ze peb¹⁴ thiab foom koob hmoov rau peb.

Vajtswv tsa tej kev cai rau peb txoj kev khi lus.¹⁵ Thaum peb xaiv nrog Vajtswv sib raug zoo li ntawd, peb ua tim khawv rau Nws, los ntawm lub cim ntawm kev khi lus, tias peb txaus siab ua raws li tej kev cai uas Nws tau tsa.¹⁶ Thaum peb ua raws li peb tej kev khi lus, peb cia Vajtswv foom koob hmoov ntau nplua mias raws li Nws tau cog lus tias peb yuav txais thaum peb ua raws li tej kev khi lus ntawd,¹⁷ tsis hais lub zog ntxiv kom hloov thiab ua zoo li peb tus Cawm Seej los yog. Yexus Khetos yog lub hauv paus ntawm tag nrho tej kev khi lus uas peb khi, thiab peb txais tau cov koob hmoov los ntawm tej kev khi lus vim muaj Nws txoj kev theej txhoj.¹⁸

Kev cai raus dej yog lub rooj vag uas peb nkag mus haud kom nrog Vajtswv khi lus. Txoj kev raus lawm hauv qab thu dej thiab rov qab los yog lub cim txog tus Cawj Seej txoj kev tuag thiab Kev Sawv Rov Los kom muaj ib lub neej tshiab.¹⁹ Thaum peb ua kev cai raus dej, yog ib lub cim txog qhov uas peb tuag thiab rov qab yug los rau Khetos tsev neeg thiab qhia tias peb txaus siab ris Nws lub npe.²⁰ Peb yeej yog lub cim txog kev khi lus ntawd. Nyob hauv Phau Tshiab peb nyeem, “Nej twb ua kev cai raus dej rau sawv daws pom lawm hais tias, nej yog cov uas nrog Yexus Khetos koom ib txoj sia, nej thiaj coj tau nej tus yam ntxwv zoo ib yam li Yexus Khetos tus.”²¹ Peb txoj kev cai raus dej yeej zoo li peb muab Khetos los hnav.

Lub cim nco txog kuj yog lub cim txog tus Cawm Seej. Cov mov mog thiab cov dej yog lub cim txog Khetos lub cev thiab cov ntshav uas los rau peb.²² Lub txiaj ntsim uas yog Nws txoj Kev Theej Txhoj yog ib lub cim uas pub rau peb txhua lub lim tiam thaum ib tug uas tuav lub pov thawj hwj, uas sawv cev rau tus Cawm Seej, muab cov mov mog thiab cov dej rau peb. Thaum peb noj thiab haus ob lub cim txog Nws lub cev thiab cov ntshav, ces yog ib lub cim uas qhia tias peb txais Khetos hauv peb lub siab.²³ Zoo li peb rov qab muab Khetos los hnav thaum peb ua kev khi lus tshiab txhua lub lim tiam.²⁴

Thaum peb khi lus nrog Vajtswv hauv tus Tswv lub tsev, peb haj yam nrog Nws sib raug zoo.²⁵ Txhua yam uas peb ua nyob hauv lub tuam tsev ua rau peb xav txog peb Leej Txiv txoj hau kev rau peb, lub ntsiab ntawm qhov no yog tus Cawm Seej thiab Nws txoj kev theej txhoj.²⁶ Tus Tswv yuav qhia peb ib nqe lus ntxiv rau ib nqe lus²⁷ los ntawm tej lub cim ntawm cov kab ke thiab kev khi lus thaum peb qhib peb lub siab thiab thov Vajtswv kom to taub lub ntsiab tob dua.

Ua ib feem ntawm kev txais lub vaj txiaj ntsim hauv lub tuam tsev, peb muaj cai hnav cev tsoos tsho ntawm lub pov thawj hwj dawb huv. Yog ib yam uas yuav tsum ua thiab ib lub cib fim dawb ceev.

Nyob rau hauv ntau txoj kev teev ntuj, neeg yeej hnav khaub ncaws tshwj xeeb uas yog lub cim ntawm ib tug neeg txoj kev ntseeg thiab kev rau siab ua raws nraim li Vajtswv hais,²⁸ thiab cov uas coj kev pe hawm yeej hnav khaub ncaws tshwj xeeb. Cov khaub ncaws dawb huv ntawd yeej muaj lub ntsiab tseem ceeb rau cov uas hnav. Peb nyeem hauv lus vaj lug kub tias puag thaum ub, neeg hnav khaub ncaws tshwj xeeb thaum ua kab lig kev cai hauv lub tuam tsev.²⁹

Vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb cov uas tau xaiv los ua kev khi lus nrog Vajtswv hauv tus Tswv lub tsev hnav cov khaub ncaws tshwj xeeb thaum peb pe hawm Vajtswv hauv lub tuam tsev, yog ib lub cim txog cov khaub ncaws uas neeg hnav thaum ua kab lig kev cai hauv lub tuam tsev thaum ub. Peb kuj hnav cev tsoos tsho ntawm lub pov thawj hwj dawb huv, hauv lub tuam tsev thiab txhua hnub hauv peb lub neej.³⁰

Cev tsoos tsho ntawm lub pov thawj hwj dawb huv yog lub cim thiab kuj ua rau peb nco txog tus Cawm Seej. Thaum Adas thiab Evas noj cov txiv thiab yuav tsum tawm ntawm lub Vaj Edees mus, Vajtswv tau muab cov tawv tsiaj rau nkawd kom npog nkawd cev.³¹ Nyaj tau muab ib tug tsiaj txi kom ua cov tawv tsiaj no—yog ib lub cim txog tus Cawm Seej txoj kev txi rau peb. Kaphar yog lus Henplais rau lo lus theej txhoj, thiab ib lub ntsiab yog “los npog.”³² Peb cev tsoos tsho ntawm lub tuam tsev pab peb nco ntsoov txog tus Cawm Seej thiab tej koob hmoov los ntawm Nws txoj Kev Theej Txhoj uas npog peb lub cev hauv lub neej no. Thaum peb hnav cev tsoos tsho ntawm lub pov thawj hwj dawb huv txhua hnub, lub cim zoo nkauj ntawd hloov los ua ib feem ntawm peb.

Nyob hauv Phau Tshiab hauv phau Loos, peb nyeem hais tias: “Nim no yog ib tag hmo dua lawm, twb yuav kaj ntug. Peb yuav tsum tsis txhob ua li cov neeg uas nyob qhov tsaus ntuj ua, thiab peb yuav tsum muab tej cuab yeej uas Vajtswv muab rau peb los tuav. … Cia li muab tus Tswv Yexus Khetos los hnav.”³³

Kuv zoo siab uas kuv muaj cib fim hnav cev tsoos tsho ntawm lub pov thawj hwj dawb huv kuv thiaj li nco qab hais tias tus Cawm Seej thiab cov koob hmoov ntawm Nws txoj Kev Theej Txhoj mus ib txhis li yuav npog kuv hauv kuv lub neej hauv lub ntiaj teb no. Qhov no kuj ua rau kuv nco qab tias thaum kuv ua raws li tej kev khi lus uas kuv tau khi nrog Vajtswv hauv tus Tswv lub tsev, kuv tau muab Khetos los hnav, uas yog cuab yeej uas yuav tiv thaiv kuv. Nws yuav tiv thaiv kuv kom txhob raug kev phem,³⁴ yuav muab lub hwj chim ntxiv rau kuv thiab pab kuv muaj peev xwm ntxiv,³⁵ thiab ua kuv txoj kev kaj thiab tus uas coj kuv mus³⁶ kom dhau kev tsaus ntuj thiab tej yam nyuaj hauv lub ntiaj teb no.

Muaj ib lub ntsiab zoo nkauj ntawm cev tsoos tsho ntawm lub pov thawj hwj dawb huv thiab nws txoj kev ua lub cim txog Yexus Khetos. Kuv ntseeg tias kuv txoj kev txaus siab³⁷ hnav cev tsoos tsho dawb huv yog kuv lub cim rau Nws.³⁸ Yog ib lub cim uas kuv muab rau Vajtswv, thiab tsis yog muab rau lwm tus.³⁹

Kuv ua Vajtswv tsaug rau kuv tus Cawm Seej, Yexus Khetos.⁴⁰ Nws txoj kev theej txhoj rau peb yog lub cim tseem ceeb tshaj plaws txog Nws thiab peb Leej Txiv Saum Ntuj Ceeb Tsheej txoj kev hlub rau peb txhua tus,⁴¹ thiab muaj tej lub cim ntawm kev hlub thiab kev txi ntawd—tej lub cim hauv nws txhais tes, txhais ko taw, thiab phab tav—tseem tshuav tom qab Nws Sawv Rov Los.⁴²

Thaum kuv ua raws li kuv tej kev khi lus thiab tej yam kuv yuav tsum ua, tsis hais kev hnav cev tsoos tsho ntawm lub pov thawj hwj dawb huv, ces kuv lub neej yog ib lub cim txog kuv txoj kev hlub thiab kev ris Vajtswv txiaj rau kuv tus Cawm Seej, Yexus Khetos, thiab qhov uas kuv xav kom Nws nrog kuv nyob tas mus li.

Yog tias koj tsis tau ua, kuv caw nej xaiv kom sib raug zoo nrog Vajtswv los ntawm txoj kev khi lus nrog Nws hauv tus Tswv lub tsev. Cia li kawm peb tus yaj saub cov lus (suav nrog tej lus qhia nyob hauv cov lus cim hauv qab, uas feem ntau zaj lus hauv lub rooj sab laj muaj). Nws tau hais ntau zaus txog kev khi lus rau ntau xyoo thiab txij thaum nws los uas tus Thawj Tswj Hwm ntawm lub Koom Txoos. Kawm los ntawm nws tej lus qhia txog tej koob hmoov thiab lub hwj chim thiab kev txaus ntim uas yog koj li los ntawm kev ua raws li tej kev khi lus nrog Vajtswv.⁴³

Phau Qhia Kev Coj lub Koom Txoos qhia tias tsis tas mus ua tub txib los sis sib yuav kom mus khi lus hauv lub tuam tsev.⁴⁴ Ib tug neeg yuav tsum muaj 18 xyoo, tsis kawm ntawv high school los sis theem kawm ntawv ib yam li ntawd lawm, thiab yog ib tug mej zeej ntawm lub Koom Txoos tsawg kawg ib xyoos. Kuj muaj tej kev cai txog kev ua neeg dawb huv uas yuav tsum ua.⁴⁵ Yog nej muaj lub siab xav ua kom nrog Leej Txiv Saum Ntuj Ceeb Tsheej thiab Yexus Khetos sib raug zoo ntxiv los ntawm kev khi lus dawb huv hauv tus Tswv lub tsev, kuv caw kom nej nrog nej tus npisov tham thiab qhia nws txog nej tej kev xav. Nws yuav paub pab nej kom npaj txais thiab hwm tej kev khi lus ntawd.

Los ntawm kev khi lus nrog Vajtswv, peb lub neej yuav los ua ib lub cim txog peb txoj kev rau siab thiab txoj kev hlub rau peb Leej Txiv Saum Ntuj Ceeb Tsheej, peb txoj kev hesed rau Nws,⁴⁶ thiab peb txoj kev xav ua tau zoo dua thiab ua raws li peb tus Cawm Seej, npaj rau ib hnub uas peb yuav mus nyob hauv Nkawv lub xub ntiag. Kuv ua tim khawv tias cov koob hmoov zoo kawg los ntawm kev khi lus ntawd yeej tsim nyog uas yus them tus nqi ntawd. Los ntawm Yexus Khetos lub npe, amees.