Tej Nplaim Taws uas Pom Tsis Tau

Cov kwv tij thiab cov muam, kuv kawm tau ib yam txij thaum kuv hais lus pub rau nej thaum lub Kaum Hli Ntuj ntawm xyoo 2022. Qhov kuv kawm yog: Yog tias yus tsis hais lus zoo, ces lawv tsis pub yus hais lus rau ob peb lub tuam rooj sab laj. Nej pom tau tias kuv yog ib tug hais lus ntxov hauv thawj tuas tag kis no. Qhov uas nej pom tsis tau yog kuv sawv saum ib lub me nyuam qhov rooj uas muaj ib tug liaj tsis tshua khov. Yog tias kuv hais lus tsis zoo, kuv yuav tsis pom nej rau ob peb lub tuam rooj sab laj ntxiv.

Ua tsaug rau pawg hu nkauj uas lawv hu zaj nkauj zoo kawg ntawd es xav txog zaj nkauj ntawd, kuv tau kawm ob peb yam tsis ntev tas los no uas, thov kom tus Tswv pab kuv, kuv xav qhia rau nej hnub no. Ua li no ces kuv zaj no yuav hais txog kuv feem ntau.

Qhov uas mob tshaj plaws ntawm tej yam uas tau muaj los rau kuv tsis ntev tas los no yog kuv poj niam, Pat, tas sim neej. Nws yog tus poj niam zoo tshaj plaws uas kuv tau paub—ib tug poj niam thiab leej niam zoo tshaj plaws, thiab nws yog neeg dawb huv, txawj hais, thiab muaj zog ntawm sab ntsuj plig. Muaj ib zaug nws hais ib zaj lus hu ua “Ua Raws Li Qhov Vajtswv Tsim Peb Ua.” Raws li kuv xav, kuv poj niam ua raws li qhov uas Vajtswv tsim nws kom ua zoo dua ntais. Nws yog Vajtswv ib tug ntxhais zoo tag nrho, Khetos ib tug thwj tim uas coj yam ntxwv zoo. Kuv muaj hmoov kawg uas kuv siv sij hawm li 60 xyoo nrog nws ua neej ua ke. Cia siab kuv yuav tsim nyog, vim qhov uas wb sib khi ua ke txhais tau tias kuv yuav nrog nws nyob ua ke mus ib txhis li.

Muaj dua ib yam uas muaj los rau kuv 48 teev tom qab kuv poj niam lub ntees tuag. Thaum lub sij hawm ntawd, kuv muaj mob heev es mus pw tsev kho mob. Ces kuv siv sij hawm li plaub lim tiam pw chav ICU hauv lub tsev kho mob thiab thaum ntawd kuv feeb tsis meej, ib sij looj hlias ib sij xeev los.

Yuav luag tag nrho tej yam uas muaj los rau kuv hauv lub tsev kho mob thaum lub sij hawm ntawd kuv tsis nco qab li. Qhov uas kuv nco qab ntsoov yog kuv txoj kev mus sab nraud lub tsev kho mob, mus rau qhov chaw zoo li ntug lub ntuj nyob mus ib txhis li. Kuv hais tias tau ntau txog qhov uas muaj los rau kuv ntawd nyob no, tiam sis kuv hais tau hais tias kuv txais ib txoj lus txib kom rov qab mus rau siab ua hauj lwm pab khiav tus Tswv tes dej tes num, tsom ntsoov tus Cawj Seej, thiab muaj siab ntseeg rau ntawm Nws txoj lus.

Kuv yeej xav hais tias kuv txais kuv ib qho kev tshwm sim uas zoo li qhov kev tshwm sim muab rau pawg Kaum Ob Tug yuav luag 200 xyoo tas los hais tias:

“Koj yuav tsum ua pov thawj rau kuv lub npe … [thiab] muab kuv txoj lus xa mus kom thoob plaws lub ntiaj teb. …

“… Ib tag kis rau ib tag kis; thiab cia koj lub suab ceeb toom tawm mus rau neeg ib hnub dhau ib hnub; thiab thaum tsaus ntuj tsis txhob cia cov neeg nyob hauv lub ntiaj teb pw, vim yog koj tej lus hais. …

“Sawv[,] … kwv koj tus ntoo khaub lig, [thiab] los nrog kuv mus.”¹

Kuv cov muam thiab cov kwv tij, txij thaum qhov ntawd muaj los rau kuv, kuv rau rau siab kwv kuv tus ntoo khaub lig, kom tsa kuv lub suab ua thwj tim hlub thiab ceeb toom lwm tus neeg txawm yog yav sawv ntxov, yav tav su, los sis yav tsaus ntuj.

Tseem tshuav ib qho thib peb uas muaj los rau kuv thaum tej lub hli muaj mob nkeeg, kev nyuaj siab, thiab kev txom nyem. Qhov ntawd yog kuv ua tim khawv pom thiab ua Vajtswv tsaug rau tej koob hmoov ntawm tej kev thov Vajtswv pab kuv—nej cov lus thov—uas nej thov kom pab kuv. Kuv ua txhiab txhiab tug neeg tsaug rau lawv tej kev thov Vajtswv pab kuv, uas zoo li tus poj ntsuam uas thov tas li,² lawv thov Vajtswv pab kuv tsis tu tsis tseg li. Kuv tau txais lub pov thawj hwj tej kev foom koob hmoov thiab kuv cov khub kawm ntawv qib nrab high school yoo mov pab kuv, thiab ob peb pawg ntseeg hauv lub Koom Txoos. Thiab zoo li lub npe nyob hauv txhua daim ntawv thov Vajtswv hauv txhua lub tuam tsev hauv lub Koom Txoos.

Rau tag nrho tej no kuv ris Vajtswv txiaj, thiab kuv nrog G. K. Chesterton hais tias “kev ua lwm tus neeg tsaug yog tej kev xav uas siab tshaj plaws; thiab … kev ris txiaj yog kev zoo siab ob npaug.”³ Los ntawm kuv txoj “kev zoo siab ob npaug,” kuv ua nej txhua tus tsaug thiab ua kuv Leej Txiv Saum Ntuj tsaug, uas hnov nej cov lus thov txog Nws thiab foom koob hmoov rau kuv txoj sia.

Cov kwv tij thiab cov muam, kuv ua tim khawv hais tias Vajtswv hnov txhua zaj lus thov Vajtswv thiab teb rau txhua zaj raws li Nws lub siab xav kom peb zoo tag nrho zuj zus mus. Kuv paub hais tias yuav luag tib lub sij hawm uas neeg coob heev thov Vajtswv pab kuv zoo mob zoo nkeeg, neeg coob heev ib yam—suav kuv thiab—thov Vajtswv pab kuv poj niam zoo mob thiab. Kuv ua tim khawv hais tias Vajtswv hnov thiab teb ob zaj lus thov Vajtswv ntawd, txawm hais tias Vajtswv tsis teb tej zaj lus thov Vajtswv pab Pat raws li kuv lub siab xav. Tsuas yog Vajtswv thiaj paub yog vim li cas tej zaj lus thov txog Nws yog teb txawv qhov uas peb cia siab rau—tiam sis Vajtswv hnov thiab teb tej zaj ntawd raws li Nws txoj kev hlub thiab lub sij hawm.

Yog tias peb “tsis txhob lam tau lam thov,”⁴ tsis muaj dab tsi txwv peb thov Vajtswv txawm yog thaum twg, qhov twg, los sis saib peb yuav thov txog dab tsi. Raws li tej kev tshwm sim, peb yuav tsum “thov Vajtswv tsis tu tsis tseg li.”⁵ Thiab peb yuav tsum thov Vajtswv, ib yam li Amulej hais, rau “cov neeg ib ncig ntawm nej,”⁶ muaj siab ntseeg hais tias “tej lus uas ib haiv neeg ncaj ncees thov Vajtswv, tej lus ntawd muaj hwj chim heev.”⁷ Peb yuav tsum hais lus thov txog Vajtswv thaum peb nyob peb ib leeg thiab thov tau li ntawd.⁸ Yog tias thov Vajtswv nrov tsis tau, peb tej lus thov Vajtswv yuav tsum yog tej lus thov hauv peb lub nruab siab.⁹ Peb hu nkauj hais tias peb tej kev thov Vajtswv yog “tej nplaim taws uas pom tsis tau,”¹⁰ es yuav tsum thov, raws li tus Cawm Seej hais, kom txog Vajtswv Leej Txiv, tuav Nws Leej Tub, Yexus Khetos, lub npe.¹¹

Kuv cov phooj ywg, kev thov Vajtswv yog lub sij hawm zoo tshaj plaws,¹² sab ntsuj plig “lub siab xav tiag,”¹³ qhov kev teev tiam yooj yim tshaj plaws.¹⁴ Peb yuav tsum thov Vajtswv peb ib leeg xwb, ua ke nrog peb tej tsev neeg, thiab ua ke nrog tej pawg ntseeg txawm loj los me.¹⁵ Peb yuav tsum thov Vajtswv kom tiv thaiv peb tus kheej tawm tsam kev haub ntxias,¹⁶ thiab yog tias muaj ib lub sij hawm uas peb tsis xav thov Vajtswv, peb paub tseeb hais tias qhov uas tsis xav Vajtswv no tsis los ntawm Vajtswv los, uas xav nrog Nws cov me nyuam sib tham thaum twg los tau. Muaj tseeb tiag, tej yam uas ua rau peb tsis xav thov Vajtswv los ntawm tus yeeb ncuab los.¹⁷ Thaum peb tsis paub saib yuav thov Vajtswv li cas los sis thov Vajtswv kom tau dab tsi, peb yuav tsum pib, thiab thov mus, mus txog thaum tus Vaj Ntsuj Plig Dawb Huv coj peb thov txog Vajtswv li cas.¹⁸ Tej zaum yuav tsum thov Vajtswv li no thaum peb thov Vajtswv foom koob hmoov rau peb cov yeeb ncuab thiab lawv cov uas txhob txwm siv peb.¹⁹

Thaum kawg, peb saib tau tus Cawm Seej tus yam ntxwv, vim Nws thov Vajtswv ntau. Tiam sis feem ntau kuv yeej xav paub saib yog vim li cas Yexus xav tias Nws yuav tsum thov Vajtswv. Puas yog Nws zoo tag nrho? Nws yuav thov Vajtswv txog dab tsi? Kuv tau kawm tias Yexus, nrog peb, xav “nrhiav kom tau [Leej Txiv], ntseeg nws txoj lus, thiab tso siab rau nws kev tshav ntuj.”²⁰ Tiam sis txhua txhua hnub, Yexus nrhiav sij hawm mus thov txog Nws Leej Txiv Saum Ntuj Ceeb Tsheej.²¹ Lwm zaum, Nws thov Vajtswv ua ke nrog ob peb tug kwv luag. Ces Yexus yuav thov Vajtswv ua ke nrog Nws cov thwj tim coob coob. Qee zaum kev thov Vajtswv ua rau Nws cev ris tsho ci ci,²² Hos qee zaum kev thov Vajtswv ua rau Nws lub ntsej muag ci ci.²³ Qee zaum Yexus sawv kom thov Vajtswv, qee zaum Nws txhos caug thov Vajtswv, thiab muaj ib zaug Nws pw khwb rwg thov Vajtswv.²⁴

Lukas piav txog thaum Yexus raug txom nyem hauv lub vaj Nws yuav tsum “rau rau siab” thov Vajtswv.²⁵ Tiam sis ib tug neeg uas zoo tag nrho yuav ua li cas rau siab ntau dua? Peb ntseeg tias tag nrho Yexus cov lus thov Vajtswv yeej rau rau siab thov, tiam sis thaum Nws theej txhoj rau peb, thiab Nws raug txom nyem hnyav heev kom thiaj ua tau li ntawd kom tiav, Nws rau rau siab thov, thiab lub nra ua rau Nws txhua lub qhov hws los ntshav.

Hais txog qhov uas Khetos kov yeej kev tuag thiab Nws lub txiaj ntsim rau kuv muaj sia nyob ob peb hnub los sis lim tiam los sis hli ntxiv, kuv ua tim khawv hais tias lub neej nyob mus ib txhis muaj tiag tiag thiab tsim nyob peb npaj rau lub neej ntawd.

Kuv ua tim khawv tias thaum Yexus Khetos los, Nws yuav tsum paub peb—tsis yog vim peb yog cov mej zeej uas muaj npe rau hauv cov ntaub ntawv ua kev cai raus dej xwb, tiam sis vim peb mob siab, rau siab ntseeg, ua cov thwj tim uas coj yam ntxwv zoo. Qhov no tseem ceeb heev rau peb txhua tus, tsam peb khuv xim thaum peb hnov cov lus hais tias: “Kuv tsis paub nej,”²⁶ los sis, ib yam li Joseph Smith txhais cov lus ntawd hais tias, “[Nej] yeej tsis tau paub kuv.”²⁷

Zoo siab, muaj tej kev pab rau peb tes hauj lwm no—ntau yam kev pab. Peb yuav tsum ntseeg cov tim tswv thiab cov txuj ci tseem ceeb thiab tej kev cog lus yuav muaj lub pov thawj hwj dawb huv. Peb yuav tsum ntseeg lub txiaj ntsim Vaj Ntsuj Plig Dawb Huv thiab lub hwj chiim ntawm Yexus Khetos txoj kev hlub dawb paug. Peb yuav tsum ntseeg txoj kev tshwm sim thiab cov yaj saub, cov pom tau, thiab cov neeg qhia kev tshwm sim thiab Thawj Tswj Hwm Russell M. Nelson. Peb yuav tsum ntseeg hais tias dhau ntawm peb tej kev thov Vajtswv thiab txoj kev ncaj ncees, cov tim tswv ntawd yuav coj peb mus rau “lub Roob Xi-oos, … qhov chaw uas yog ceeb tsheej, qhov chaw uas dawb huv tshaj txhua qhov.”²⁸

Cov kwv tij thiab cov muam, thaum peb hloov siab lees txim thiab ua siab loj mus kom cuag “lub theej kiab ntawm kev tshav ntuj,”²⁹ muab peb tej lus thov tiag tiag rau Nws, ces peb yuav txais kev hlub tshua thiab kev zam txim los ntawm peb Leej Txiv uas nyob mus ib txhis li thiab Nws Leej Tub uas mloog lus thiab zoo tag nrho. Ces, zoo li Yauj thiab cov neeg rau siab ntseeg, peb yuav pom ib lub ntuj uas “zoo kawg nkaus”³⁰ Los ntawm Yexus Khetos lub npe, amees.