Tsom Ntsoov rau Yexus Khetos hauv Peb lub Neej

Nyob hauv lub neej hauv lub ntiaj teb no, tej lub sij hawm peb raug kev sim siab: kev tu siab thaum ib tug uas peb hlub tas sim neej lawm, kev mob kev nkees, muaj leej twg ua tsis ncaj, muaj neeg tawm tsam los tsim txom, tsis muaj hauj lwm ua, tsev neeg raug kev txom nyem, kev kho siab, los sis tej yam phem los ntawm kev tsov kev rog.¹ Thaum muaj sij hawm zoo li no, peb xav tau ib qho chaw nkaum.² Peb xav paub tiag tiag: Peb yuav nrhiav kev kaj siab nyob qhov twg?³ Peb yuav tso siab rau leej twg kom pab peb ua siab loj thiab muaj dag zog kom kov yeej tej teeb meem no?⁴ Leej twg yuav ua siab ntev, muaj kev hlub puv npo, thiab muaj hwj chim txaus txhawb nqa peb?

Tej lus nug ntawm peb lub siab, tej lus nug no uas muaj thaum tsaus ntuj nti thiab thaum raug kev sim siab loj tshaj plaws los Yexus Khetos txoj kev hlub uas tsis tu tsis tseg yeej yog lus teb.⁵ Los ntawm Nws, thiab dhau los ntawm cov lus cog tseg ntawm Nws txoj moo zoo uas tau muab txum tim rov qab los,⁶ peb nrhiav tau tej lus teb. Yog los ntawm Nws txoj Kev Theej Txhoj uas kav ib txhis peb thiaj li txais tau ib lub txiaj ntsim zoo tshaj—ib lub txiaj ntsim uas yog kev cia siab, kev kho mob, thiab paub tias Nws yuav nrog nraim peb nyob hauv peb lub neej.⁷ Txhua tus uas muaj kev ntseeg thov Vajtswv txais tau lub txiaj ntsim no, txais tau kev kaj siab lug thiab kev txhiv dim uas Nws muab rau peb.

Tus Tswv cev tes rau peb txhua tus; Nws ua li no vim yog los ntawm Nws txoj kev hlub thiab txoj kev ua siab zoo. Nws txoj kev caw peb tsis yog ib txoj kev hu xwb; yog ib txoj kev cog lus, uas Nws txhawb zog los ntawm Nws txoj kev tshav ntuj lub hwj chim. Nyob hauv cov vaj lug kub, Nws muaj siab hlub nplij peb lub siab:

“Nej cov uas sab sab vim nej ris nra hnyav, nej cia li los cuag kuv, kuv yuav cia nej so.

“Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so.

“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”⁸

Nws txoj kev caw peb kom “los cuag kuv” thiab “kwv kuv tus quab” yeej qhia tias Nws cov lus cog tseg tseem ceeb npaum li cas—yog kev cog lus uas zoo tag nrho qhia txog Nws txoj kev hlub, vim Nws lav lus rau peb hais tias: “Nej yuav tau so.”

Thaum peb nrhiav Nws txoj kev coj peb sab ntsuj plig,⁹ peb pib ua raws li tus txheej txheem hloov siab uas txhawb peb zaj lus tim khawv thiab. Thaum peb to taub Leej Txiv Saum Ntuj Ceeb Tsheej thiab Yexus Khetos hlub peb zoo tag nrho,¹⁰ ces ua rau peb ris Vajtswv txiaj, txo hwj chim,¹¹ thiab peb muaj siab xav ua Nws cov thwj tim.¹²

Thawj Tswj Hwm Russell M. Nelson qhia hais tias “thaum peb tsom ntsoov rau Vajtswv txoj kev cawm seej … thiab Yexus Khetos thiab Nws txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej. Kev xyiv fab los vim yog Nws.”¹³

Amas tau hais rau nws tus tub Hilamas hais tias: “Thiab nim no, auj kuv tus me tub Hilamas es, saib seb, koj tseem hluas, thiab yog li ntawd, kuv thov kom koj yuav mloog kuv tej lus thiab kawm ntawm kuv; vim kuv paub tias txhua tus uas yuav tso siab rau Vajtswv yuav tau txais kev pab thaum lawv muaj kev sim siab, thiab thaum lawv muaj teeb meem, thiab thaum lawv raug txom nyem, thiab Vajtswv yuav muab lawv tsa sawv thaum txog hnub kawg.”¹⁴

Hilamas tau hais lus rau nws cov tub qhia lawv txog lub ntsiab cai no txog kev tsom ntsoov rau tus Cawm Seej hauv peb lub neej: “Nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas [nej] yuav tsum cog [nej] lub hauv paus.”¹⁵

Nyob hauv Mathais 14, peb kawm tias tom qab Yexus hnov txog Yauhas tus uas Muab Neeg Ua Kev Cai Raus Dej txoj kev tuag, Yexus xav nyob Nws ib leeg. Tiam sis cov neeg coob raws Nws qab. Vim nws muaj kev khuv leej thiab kev hlub, thiab vim Nws tsis cia kev tu siab ua rau Nws khiav ntawm Nws ntiag tug hauj lwm, Yexus tau tos txais lawv, kho lawv cov neeg mob. Thaum txog tsaus ntuj, cov thwj tim muaj ib qho teeb meem loj heev: cov neeg coob npaum li ntawd tsis muaj zaub mov noj. Lawv hais kom Yexus xa cov neeg no mus kom sawv daws mus nrhiav muas mov, tiam sis Yexus, nrog kev hlub thiab kev xav siab heev, tau thov kom cov thwj tim muab rau lawv noj xwb.

Thaum cov thwj tim xav ntsoov txog qhov teeb meem no, Yexus tau qhia tias Nws tso siab thiab hlub Nws Txiv npaum li cas, nrog ib txoj kev hlub uas tsis tu tsis tseg rau cov neeg ntawd. Nws hais kom cov neeg no zaum ntawm tej nyom, thiab Nws muab tsib lub ncuav thiab ob tus ntses xwb, ua Nws Txiv tsaug, thiab hais tias Vajtswv yeej yog tus uas saib xyuas Nws txoj cai thiab lub hwj chim.

Tom qab Nws ua Vajtswv tsaug, Yexus tau muab cov ncuav ntais cev rau cov thwj tim coj mus faib rau cov neeg. Cov ncuav thiab cov ntses yeej muaj ntau nplua mias, es tshuav kaum ob tawb puv nkaus. Cov neeg uas noj mov hnub ntawd, cov txiv neej muaj tsib txhiab leej, nrog rau cov poj niam thiab me nyuam.¹⁶

Qhov txuj ci tseem ceeb no ua rau peb kawm ib yam zoo kawg: thaum twg peb raug tej kev sim siab, yooj yim rau peb xav ntsoov txog peb tej teeb meem. Tiam sis, Yexus Khetos tau coj yam ntxwv txog txoj kev tsom ntsoov rau Nws Txiv, ua Vajtswv tsaug, thiab peb kho tsis taus txhua qhov teeb meem los ntawm peb lub hwj chim xwb, tiam sis yuav tsum muaj Vajtswv lub hwj chim.¹⁷

Thaum peb raug tej yam nyuaj, peb yeej tsom ntsoov rau tej teeb meem ntawd. Peb tej teeb meem yeej muaj tseeb thiab ua rau peb yuav tsum xav txog tej ntawd, tiam sis lub ntsiab cai ntawm kev kov yeej tej teeb meem ntawd nyob ntawm peb txoj kev tsom ntsoov. Thaum peb xav ntsoov txog thiab coj raws nraim li Yexus Khetos, peb kho peb txoj kev txawj pom kev thiab lub dag zog kom zoo li Nws.¹⁸ Txoj kev kho no tsis ua rau peb tej teeb meem ploj mus; tiam sis, ua rau peb muaj peev xwm nyiaj dhau mus raws li Nws coj peb mus.¹⁹ Yog li ntawd, peb thiaj li tsim tau tej kev kho teeb meem thiab txais kev txhawb nqa uas los ntawm laj lim tswv yim siab dua peb. Qhov uas peb xav pom kev zoo li Yexus Khetos yuav ua rau peb muaj hwj chim kom nyiaj tau thiab pab peb muaj tswv yim kom muab peb tej kev sim siab hloov los ua tej yam uas muaj yeej,²⁰ ua rau peb nco qab hais tias thaum peb koom siab nrog tus Cawm Seej, ces ib qho teeb meem loj yeej yuav hloov los ua ib txoj kev rau peb sab ntsuj plig loj hlob tuaj.

Zaj dab neeg txog Amas tus Hluas nyob hauv Phau Ntawv Maumoos yog ib zaj lus txog kev txhiv dim thiab txoj kev hloov siab uas los thaum yus tsom ntsoov rau Yexus Khetos hauv lub neej. Thaum xub thawj, Amas tawm tsam tus Tswv lub Koom Txoos, es nws coj neeg coob mus ua yuam kev kom lawv tsis ua ncaj ncees. Tiam sis, ib tug tim tswv saum ntuj ceeb tsheej tau los kom nws paub tias nws ua txhaum.

Thaum nws raug nws lub txim thiab thaum nws xav nrhiav ib txoj kev dim nws txoj kev nyuaj siab txhawj xeeb, Amas nco txog nws txiv tej lus qhia txog Yexus Khetos thiab lub hwj chim ntawm Yexus txoj Kev Theej Txhoj. Vim nws muaj siab xav tau kev txhiv dim, nws tau rau siab hloov siab lees txim thiab thov kawg siab kawg ntsws kom txais tau tus Tswv txoj kev hlub tshua. Thaum lub sij hawm tseem ceeb uas nws yuav tso txhua yam tseg kom xav txog Yexus Khetos tib leeg xwb thiab nrhiav Yexus txoj kev hlub tshua ua rau nws hloov siab loj heev. Tej saw hlau ntawm lub txim thiab kev poob siab tau ploj mus thiab ua rau nws muaj kev xyiv fab thiab nyob kaj siab lug.²¹

Yexus Khetos yog tus uas peb cia siab rau thiab tus uas kho tau txhua txoj kev mob hauv lub neej no. Dhau los ntawm Nws txoj kev txi, Nws tau them nqi rau peb tej kev txhaum thiab ris tag nrho peb tej kev txom nyem—kev mob kev nkees, kev tsis ncaj ncees, kev nyuaj siab, thiab kev ntshai—thiab Nws zam txim pub rau peb thiab kho peb zoo thaum peb tso siab rau Nws thiab nrhiav kev kom hloov peb lub neej. Nws yog tus uas kho peb tus mob,²² nplij thiab txhawb nqa peb lub siab dhau los ntawm Nws txoj kev hlub thiab lub hwj chim, ib yam li nws kho neeg coob thaum Nws nyob hauv lub ntiaj teb no.²³ Nws yog cov dej uas cawm txoj sia, uas ua rau peb sab ntsuj plig tau noj tau haus los ntawm Nws txoj kev hlub thiab kev ua siab zoo tsis tu tsis tseg. Nov zoo ib yam li kev cog lus uas Nws hais rau tus poj niam Xamalis nyob ntawm lub qhov dej, muab cov dej uas txhawv los kom muaj txoj sia nyob mus ib txhis li.²⁴

Kuv ua tim khawv tias Yexus Khetos muaj txoj sia nyob, Nws tswj hwm Nws lub Koom Txoos uas dawb ceev, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.²⁵ Kuv ua tim khawv tias Nws yog tus Cawm Seej ntawm lub ntiaj teb, tus Tub Vaj Ntxwv ntawm Kev Thaj Yeeb,²⁶ cov vaj ntxwv tus Vaj Ntxwv, cov tswv tus Tswv,²⁷ tus Txhiv Dim neeg ntiaj teb. Kuv paub tseeb hais tias Nws yeej ib txwm xav txog peb tsis tu tsis tseg. Kom ua tim khawv txog qhov no, Nws tau muab Nws lub Koom Txoos txum tim rov qab los hauv lub caij nyoog kawg no thiab tau hu Thawj Tswj Hwm Russell M. Nelson ua Nws tus yaj saub thiab tus Thawj Tswj Hwm ntawm lub Koom Txoos rau lub sij hawm no.²⁸ Kuv paub tias Yexus Khetos tau txo Nws txoj sia kom peb yuav muaj txoj sia nyob mus ib txhis.

Thaum peb siv zog tsom ntsoov rau Nws hauv peb lub neej, ces peb yuav txais tej kev tshwm sim, Nws txoj kev kaj siab lug los rau peb, thiab Nws txoj Kev Theej Txhoj ua rau peb txais tau kev zam txim thiab kev kho mob.²⁹ Yog los ntawm Nws peb thiaj li muaj zog txaus kom kov yeej, ua siab loj txaus nyiaj kom dhau, thiab muaj kev kaj siab lug tshaj qhov to taub. Thov kom peb yuav siv zog muab siab npuab nws txhua hnub,³⁰ tus uas yog lub hauv paus ntawm txhua yam uas zoo, tus uas ua rau peb cia siab tias peb yuav rov qab mus rau hauv peb Leej Txiv Saum Ntuj Ceeb Tsheej lub xub ntiag. Los ntawm Yexus Khetos lub npe dawb ceev, amees.