Hu, Kom Txhob Ntog

Hnub kuv xav pib hais lus tim khawv tseeb hais tias Vajtswv yeej hnov peb cov lus thov thiab teb ib leeg rau ib leeg.

Hauv ib lub ntiaj teb uas muaj kev kub ntxhov, kev mob siab, kev poob siab, thiab kev tu siab, tej zaum peb yuav xav vam peb tus kheej thiab ua raws li peb lub siab nyiam xwb, thiab yuav vam lub ntiaj teb tej tswv yim xwb. Yog ua li no ces peb yuav tsis tau kev tu thiab kev txhawb nqa tseem ceeb tshaj plaws uas yuav pab peb kov yeej lub neej no tej kev cov nyom.

Kuv nco qab ib zaug uas kuv mus pw hauv tsev kho mob, thiab nyuaj nyuaj rau kuv tsaug zog. Thaum kuv tua teeb thiab chav tsev ntawd tsaus tsaus lawm, kuv txawm pom ib daim paib uas ci ci saum ru tsev uas hais tias, “Hu, kom txhob ntog.” Kuv xav tsis thoob, vim tag kis sawv ntxov kuv thiaj pom tib daim paib ntawd hauv ntau qhov chaw hauv chav tsev ntawd.

Vim li cas txoj xov ntawd thiaj tseem ceeb heev? Thaum kuv nug tus kws tu mob txog daim paib, nws hais tias, “Daim paib no pab tiv thaiv kom koj tsis txhob raug mob ntau tshaj koj hnov tas sim no.”

Lub neej no yeej muaj tej kev mob siab, ib txhia yog ntawm peb sab cev nqaij daim tawv, ib txhia yog rau peb tej qaug zog los sis kev tsim txom, ib txhia yog vim lwm tus neeg tej kev ywj siab xaiv, thiab ib txhia vim yog peb tej kev ywj siab xaiv.

Puas muaj ib lo lus cog tseg uas muaj hwj chim tshaj qhov uas tus Cawm Seej Kiag hais thaum Nws tshaj tawm hais tias, “Cia li thov, thiab yuav muab rau nej; cia li nrhiav, thiab nej yuav ntsib; cia li khob,” los yog hu, “thiab yuav qhib rau nej”?¹

Kev thov Vajtswv yog txoj kev sib txuas lus nrog peb Leej Txiv Saum Ntuj Ceeb Tsheej uas cia peb “hu thiab kom txhob ntog.” Tab sis mas, yeej muaj tej lub sij hawm thaum peb xav tias txoj kev hu ntawd tsis muaj neeg teb thaum peb tsis txais lus teb tas sim ntawd los sis tsis tau raws li peb lub siab xav.

Tej thaum qhov no ua rau peb muaj kev txhawj xeeb, kev tu siab, los yog kev poob siab. Tiam sis nco qab ntsoov Nifais cov lus tso siab rau tus Tswv thaum nws hais tias, “Ua li cas nws thiaj yuav tsis muaj peev xwm qhia tau kuv, kom kuv txua tau ib lub nkoj?”² Nim no, kuv nug nej hais tias, Yuav ua li cas tus Tswv thiaj tsis muaj peev xwm qhia nej, kom nej txhob ntog?

Txoj kev tso siab rau Vajtswv cov lus teb qhia tias peb lees hais tias Nws tej kev tsis yog peb tej kev³ thiab tias “txhua yam yuav tsum tshwm sim los thaum txog lub sij hawm.”⁴

Qhov uas peb paub tseeb hais tias peb yog Leej Txiv Saum Ntuj Ceeb Tsheej cov me nyuam thiab nws hlub thiab zam txim rau peb yuav pab peb “hu” thaum thov Vajtswv muaj lub siab “thov Vajtswv tsis tu tsis tseg, thiab txhob poob siab; … tias [peb] tej hauj lwm yuav pab [peb] sab ntsuj plig.”⁵ Nej sim xav seb Leej Txiv Saum Ntuj Ceeb Tsheej xav li cas txhua zaus uas peb mob siab thov Nws los ntawm Nws tus Tub, Yexus Khetos lub npe. Kuv ntseeg tias thaum peb ua li ntawd peb yuav pom ib qho hwj chim thiab kev ua siab mos siab muag!

Cov vaj lug kub muaj ntau qhov piv txwv txog cov neeg uas tau hu mus rau Vajtswv kom lawv yuav txhob ntog. Hilamas thiab nws pab tub rog, thaum lawv ntsib kev cov nyom, lawv hu mus rau Vajtswv, mob siab thov Vajtswv. Lawv txawm paub, muaj kev thaj yeeb, kev ntseeg, thiab cia siab, lawv thiaj ua siab loj thiab rau siab ntso mus txog thaum lawv tau lawv lub hom phiaj.⁶

Sim xav seb Mauxes ua li cas thiaj hu thiab taij thov Vajtswv thaum nws nyob nruab nrab tus Dej Hiav Txwv Liab thiab pab tub rog Iyiv tab tom yuav tua lawv, los sis Anplaham thaum nws raug txib kom muab nws tus tub Ixaj tua ua ib qho txi.

Kuv paub hais tias nej txhua tus tau muaj thiab tseem yuav muaj tej lub sij hawm thaum kev hu yuav yog lo lus teb kom txhob ntog.

Peb caug xyoo tas los lawm, thaum kuv thiab kuv tus poj niam tab tom npaj sib yuav raws li kev cai lis choj thiab sib yuav hauv lub tuam tsev, peb tau zaj xov hais tias yuav tsum tsis muaj kev sib yuav raws li kev cai li choj vim cov neeg tsis kam ua hauj lwm lawm. Peb tau zaj xov ntawd peb hnub ua ntej hnub uas tau teem tseg yuav ua txoj kab ke sib yuav. Tom qab sim hu lwm lub hoob kas thiab yeej tsis muaj chaw rau wb li, wb tau pib poob siab thiab nyuaj siab vim tej zaum wb yuav sib yuav tsis tau li wb twb npaj tseg.

Kuv thiab tus uas kuv qhaib ntawd tau “hu,” qhib tag nrho wb siab ntsws thov Vajtswv. Nyob nyob ces, ib tug neeg qhia wb txog ib lub hoob kas hauv ib lub zos me me sab nraud nroog uas ib tug phooj ywg ua tus hau zos nyob ntawd. Wb txawm khiav tiaj loos mus ntsib nws thiab nug seb nws puas kam muab wb sib yuav. Wb zoo siab vim nws kam. Nws tus kws pab ua ntaub ntawv qhia wb tias wb yuav tsum mus thov ntawv hauv zos thiab xa tag nrho cov ntaub ntawv tuaj ua ntej tag kis tav su thaum kaum ob moos.

Tag kis ces, wb tau tsiv mus rau lub zos me me thiab mus rau cov tub ceev xwm lub hoob kas thiab thov cov ntawv. Wb txawm xav tsis thoob, vim tus tub ceev xwm hais tias nws tsis kam muab, vim coob khub niam txiv hluas twb sim khiav ntawm niam txiv nyiag mus sib yuav hauv lub zos me me, txawm tias qhov ntawd tsis yog qhov tseeb hais txog wb. Wb txawm ntshai thiab tu siab dua.

Kuv nco qab hais tias kuv tau ntsiag to hu mus rau kuv Leej Txiv Saum Ntuj Ceeb Tsheej kom wb yuav txhob ntog. Kuv tau kev tshoov siab rau hauv kuv lub paj hlwb, uas pheej hais tias, “Daim ntawv tso cai nkag tuam tsev, daim ntawv tso cai nkag tuam tsev.” Ces kuv thiaj tau tshem hlo kuv daim ntawv tso cai nkag tuam tsev thiab cev mus rau tus tub ceev xwm, txawm kuv tus hlub xav tsis thoob txog kuv.

Wb tsis paub xav thaum tus tub ceev xwm hais tias, “Es ua li cas neb thiaj tsis qhia kuv tias neb yog los ntawm Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg? Kuv paub nej lub koom txoos zoo.” Nws txawm pib ua ib daim ntawv rau wb. Wb xav tsis thoob thaum tus tub ceev xwm txawm tsis hais ib lo lus ces tau khiav mus sab nraum lub hoob kas.

Tos lis tsib caug na this, es nws tseem tsis rov qab los. Twb 11:55 moos lawm, thiab wb yuav tsum xa cov ntaub ntawv mus rau tus hau zos ua ntej kaum ob moos tav su. Ces tus tub ceev xwm txawm rov qab los nqa ib tug me nyuam aub thiab qhia tias nws yog ib qho khoom plig rau wb txoj kev sib yuav thiab muab tus aub thiab daim ntawv cev rau wb.

Wb txawm khiav nrawm nroos mus rau tus hau zos lub hoob kas nqa wb daim ntawv thiab wb tus aub tshiab. Ces wb txawm pom ib lub tsheb los tom kev. Kuv nres ntawm lub tsheb. Ces lub tsheb txawm nres, es wb tau pom tus hau zos tus kws pab ua ntaub ntawv nyob hauv. Thaum pom wb, nws hais tias, “Thov txim, kuv twb hais rau neb tias kaum ob moos nev. Tas sim no kuv yuav tsum khiav mus ua lwm txoj hauj lwm.”

Kuv ntsiag tos ua siab mos siab muag, hu tas siab tas ntsws rau kuv Leej Txiv Saum Ntuj Ceeb Tsheej, thov nws ib zaug ntxiv kom kuv yuav “tsis txhob ntog.” Ces txawm muaj ib qho txuj ci tseem ceeb. Tus kws pab ntawd hais rau wb tias, “Neb muaj ib tug aub ntxim hlub kawg. Es kuv yuav mus qhov twg thiaj yuav tau ib tug li nws rau kuv tus tub?”

Wb txawm teb hais tias “Tus no yeej yog koj li”.

Tus kws pab ua ntaub ntawv xav tsis thoob thiab txawm hais tias, “OK, cia peb mus rau lub hoob kas thiab npaj txhij txhua.”

Ob hnub tom qab ntawd, Carol wb tau sib yuav raws kev cai lij choj, ces tau ua kev sib khi ua ke hauv lub Tuam Tsev Lima Peru.

Tiag tiag mas, peb yuav tsum nco qab tias kev hu yeej muaj kev ntseeg thiab mus ua—kev ntseeg hais tias peb muaj ib Leej Txiv Saum Ntuj Ceeb Tsheej uas yuav teb peb cov lus thov raws li Nws lub tswv yim, thiab ces, mus ua tej yam raws li tej uas peb thov. Kev thov Vajtswv—kev hu mus—yog ib lub cim uas qhia tias peb muaj kev cia siab. Tiam sis txoj kev mus ua tom qab peb thov Vajtswv yog ib lub cim uas qhia tias peb ntseeg tiag tiag—kev ntseeg uas raug kev sim siab thaum peb pib mob siab, ntshai, los sis poob siab.

Kuv xav kom nej yuav xav txog tej no:

1. Txhua zaus xub nco qab tias tus Tswv yog thawj tug uas yus thov kev pab.

2. Hu, kom txhob ntog. Tig yus lub siab kom rau siab ntso thov Vajtswv.

3. Tom qab thov Vajtswv tag, ua txhua yam yus ua tau kom tau tej koob hmoov uas yus thov tau lawm.

4. Txo hwj chim kom thiaj kam txais Nws cov lus teb raws li Nws lub sij hawm thiab Nws txoj hau kev.

5. Txhob tsum! Pheej mus lawm tom ntej taug txoj kev sib khi lus thaum yus tos Nws cov lus teb.

Tej zaum tas sim no muaj leej twg, vim lawv raug xwm txheej, xav tias lawv tab tom yuav ntog ces lawv xav hu zoo li Joseph Smith hu thaum nws hu hais tias, “Au Vajtswv, koj nyob qhov twg? … Koj txhais tes yuav nkaum ntev npaum li cas?”⁷

Thaum twg muaj li no, thov Vajtswv kom “sab ntsuj plig muaj zog zus zuj tuaj,” li Thawj Tswj Hwm Nelson qhia lawm,⁸ vim Vajtswv yeej hnov nej tej lus thov txhua txhua zaus!

Nco qab zaj nkauj no hais tias:

Thaum peb thov Vajtswv, peb yuav hnov peb Leej Txiv Saum Ntuj Ceeb Tsheej puag peb, nws tau xa Nws Tib Leeg Tub los pab nqa peb tej nras, vim yog hais tias peb hu mus rau Vajtswv, kuv hais lus tim khawv tias peb yuav tsis ntog. Los ntawm Yexus Khetos lub npe, amees.