2020–2024
Tej Duab Tshav Ntuj Loj thiab Me
Plaub Hlis Ntuj xyoo 2024 lub tuam rooj sab laj
11:17

Tej Duab Tshav Ntuj Loj thiab Me

Los ntawm Txwj Laug Alexander Dushku

Ntawm Pawg Xya Caum

Peb kuj yuav tau peb ib tug duab tshav ntuj ci ntsa iab—txais ib qho zuj zus.

Kuv zaj lus yog hais rau cov uas txhawj txog lawv zaj lus tim khawv vim tias lawv tsis tau txais kev tshoov siab rau lawv sab ntsuj plig loj heev. Kuv thov kom nej muaj kev kaj siab thiab kev nplij siab.

Kev muab Yexus Khetos txoj moo zoo txum tim rov qab los twb pib thaum txoj kev kaj thiab qhov tseeb tib vuag los ci ntsa iab! Ib tug tub hlaus nyob hauv New York, uas muaj ib lub npe dog dig hu ua Joseph Smith, tau mus hauv ib koog ntoo kom thov Vajtswv. Nws txhawj txog nws lub siab thiab Vajtswv saib nws zoo li cas. Nws xav kom txais kev zam txim rau nws tej kev txhaum. Thiab nws tsis paub tseeb yuav tsum koom lub koom txoos twg. Nws xav paub meej thiab xav tau kev kaj siab lug—nws xav tau txoj kev kaj thiab kev txawj ntse.1

Thaum Joseph txhos caug thov Vajtswv thiab “pib hais tej kev xav hauv [nws] lub siab rau Vajtswv,” ces kev tsaus nti vij vog ntawm nws ib puag ncig. Ib yam phem tiag tsim txom nws thiab nws tsum tsis thov—muab nws tus nplaig khi kom nws tsis txawj hais lus. Kev tsaus ntuj nti muaj hwj chim heev ua rau Joseph xav tias nws yuav tuag. Tiam sis nws “muab tag nrho [nws] lub zog thov Vajtswv kom tso [nws] dim tus yeeb ncuab no lub hwj chim uas tau tsuam [nws].” Ces, “thaum kiag lub sij hawm uas [nws] twb yuav luag qaug rau hauv qhov tsis muaj kev cia siab thiab tso [nws] tus kheej rau txoj kev puas tsuaj,” thaum nws tsis paub tias nws puas muaj zog txaus nyiaj tau ntxiv, ces ib tug duab ci ntsa iab puv koog ntoo ntawd, ua rau kev tsaus ntuj thiab nws tus yeeb ncuab ploj mus.”2

“Ib tug duab ci” tshaj lub hnub ci maj mam nqis los txog thaum tus duab ci roos nws. Ib tug neeg los tshwm sim, ces ib tug ntxiv.3 Nkawd “ci ntsa iab thiab muaj yeeb koob uas yeej piav tsis tau.” Tus thib ib, peb Leej Txiv Saum Ntuj Ceeb Tsheej, hais nws lub npe, “taw tes rau tus sab tod—[Joseph!] Tus no yog Kuv Leej Tub uas Kuv Hlub. Cia li mloog Nws hais!”4

Thiab thaum txoj kev kaj thiab qhov tseeb ci los tib vuag, ces txoj kev muab txoj moo zoo txum tim rov qab los twb pib lawm. Tom qab ntawd twb muaj kev tshwm sim thiab cov koob hmoov ntau nplua mias los: cov vaj lug kub tshiab, cov yawm sij pov thawj hwj, cov thwj tim thiab cov yaj saub, cov kab ke thiab tej kev khi lus, thiab rov qab muaj tus Tswv lub Koom Txoos uas tseeb thiab muaj sia, uas ib hnub yuav puv lub ntiaj teb kom muaj txoj kev kaj thiab kev ua tim khawv txog Yexus Khetos thiab Nws txoj moo zoo uas tau muab txim tim rov qab los.

Txhua yam no thiab ntau yam ntxiv, twb muaj vim ib tug tub hluas tau thov Vajtswv thiab pom ib tug duab ci ntsa iab.

Peb kuj muaj tej yam uas peb xav tau heev. Peb xav dim kev ntxhov siab thiab kev tsaus ntuj hauv lub ntiaj teb no. Peb kuj yuav tsum paub ntawm peb tus kheej thiab.5 Yog vim li no Thawj Tswj Hwm Russell M. Nelson tau caw peb kom peb “kawm txhua yam txog txoj kev kaj ntawm Kev Muab Txoj Moo Zoo Txum Tim Rov Qab Los.”6

Ib yam tseeb tseem ceeb ntawm Kev Muab Txoj Moo Zoo Txum Tim Rov Qab Los yog qhov uas twb qhib rooj ntug—qhia tias peb kuj txais tau txoj kev kaj thiab txoj kev txawj ntse los ntawm Vajtswv. Kuv ua tim khawv hais tias qhov no muaj tseeb.

Tiam sis peb yuav tsum ceev faj ntshe peb mag rab ntxias ntawm sab ntsuj plig. Tej lub sij hawm cov mej zeej hauv lub Koom Txoos poob siab thiab tawm lub Koom Txoos mus vim lawv tsis tau muaj tej kev tshoov siab ntawm sab ntsuj plig loj heev—vim tsis tau muaj ib tug duab ci ntsa iab loj heev. Thawj Tswj Hwm Spencer W. Kimball ceeb toom hais tias, “Thaum tib neeg xav tau qhov loj kawg li, ntshe lawv yuav tsis txais kev tshwm sim uas los zuj zus tsis tu tsis tseg.”7

Thawj Tswj Hwm Joseph F. Smith hais tias, “Tus Tswv tsis pub kuv pom tej txuj ci tseem ceeb [thaum kuv hluas], thiab nws ua rau kuv pom qhov tseeb, ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub.”8

Nov yog tus Tswv tus txheej txheem, cov kwv tij thiab cov muam. Nws tsis xa ib tug duab cia ntsa iab loj heev, tiam sis tus Tswv xa ib tug duab tshav ntuj, ces xa ntxiv, ces xa ntxiv.

Vajtswv xa cov duab tshav ntsuj los rau peb txhua lub sij hawm. Cov vaj lug kub qhia tias Yexus Khetos yog “txoj kev kaj thiab txoj sia ntawm neeg ntiaj teb,”9 thiab Nws “tus Ntsuj Plig muab qhov kaj rau txhua tus neeg uas los rau hauv lub ntiaj teb,”10 thiab Nws txoj kev kaj “puv nkaus lub qab ntuj dav dav,” kom “txhua yam muaj txoj sia.”11 Khetos txoj Kev Kaj yeej nyob ib puag ncig peb.

Yog peb tau txais lub txiaj ntsim Vaj Ntsuj Plig Dawb Huv thiab siv zog muab siab rau ntseeg, hloov siab lees txim, thiab ua raws li peb tej kev khi lus, ces peb tsim nyog txais tej duab tshav ntuj no tsis tu tsis tseg. Zoo li Txwj Laug David A. Bednar hais tias, “peb ‘nyob hauv kev tshwm sim.’”12

Tiam sis, peb nyias txawv nyias. Tsis muaj ob tug neeg uas txais Vajtswv txoj kev kaj thiab qhov tseeb raws li tib txoj kev. Cia li siv sij hawm me ntsis kom xav seb los ntawm txoj kev twg koj thiaj li txais tau txoj kev kaj thiab tus Tswv tus Ntsuj Plig.

Tej zaum koj twb txais txoj kev kaj thiab tej lus tim khawv li no kom “ua rau koj lub siab kaj” txog ib yam uas koj txhawj txog.13

Los sis tau txais ib txoj kev tshoov siab—ib lub suab yau yau—uas ua rau koj tsis txhawj “hauv koj lub cim xeeb thiab hauv koj lub siab”14 thiab yaum nej los ua ib yam dab tsi zoo, xws li kev pab lwm tus.

Tej zaum nej tau nyob hauv ib chav kawm hauv lub koom txoos—los sis rau ib lub camp rau cov tub hluas ntxhais hluas—thiab ua rau nej xav xav coj raws li Yexus Khetos thiab muaj siab ntseeg.15 Tej zaum nej twb sawv hais lus tim khawv uas nej tsis paub tiag tiam sis muaj kev cia siab es thaum nej hais ces nej hno lawm tias qhov no muaj tseeb.

Los sis tej zaum nej twb thov Vajtswv thiab muaj kev xyiv fab vim nej paub tias Vajtswv hlub nej.16

Tej zaum nej twb hnov ib tug hais lus tim khawv txog Yexus Khetos thiab ua rau koj txais kev tshoov siab thiab muaj kev cia siab.17

Tej zaum nej tau nyeem hauv Phau Ntawv Maumoos thiab ib nqe tshoov nej lub siab, zoo li Vajtswv tau sau rau nej ib leeg xwb.18

Tej zaum nej tau hnov Vajtswv txoj kev hlub lwm tus thaum koj pab lawv.19

Los sis tej zaum nyuaj rau nej hnov tus Ntsuj Plig vim nej nyuaj siab los sis txhawj xeeb tiam sis nej muaj peev xwm nco txog yav tas los thiab to taub “tus Tswv txoj kev hlub tshua.”20

Lub ntsiab yog qhov uas muaj ntau txoj kev kom txais tau tej duab tshav ntuj ntawm ib zaj lus tim khawv. Nyaj yog ob peb txoj kev xwb. Tej zaum tej no tsis loj, tiam sis tag nrho tej no yog ib feem ntawm peb zaj lus tim khawv.

Cov kwv tij thiab cov muam, kuv tsis tau pom ib tug duab ci ntsa iab loj, tiam sis zoo li nej kuv twb txais tau tej duab tshav ntuj ntau zaus. Kuv twb sim nco ntsoov txog tej yam uas muaj nqis no. Thaum kuv nco txog tej ntawd, ua rau kuv to taub thiab nco qab lwm lub sij hawm thiab. Nov yog tej lub sij hawm los ntawm kuv lub neej. Tej zaum tej no yuav tsis ua rau nej xav tsis thoob, tiam sis tej no muaj nqis rau kuv heev.

Kuv nco txog thaum kuv yog ib tug tub hluas uas txhoj pob thaum tib neeg ua kev cai raus dej. Thaum kev sib ntsib yuav pib, kuv hnov tus Ntsuj Plig yaum kom kuv zaum thiab nyob tswm seeb. Kuv tau zaum thiab nyob ntsiag to mus txog thaum kev sib ntsib tas.

Ua ntej kuv ua tub txib, kuv ntshai tias kuv zaj lus tim khawv tsis muaj zog txaus. Tsis tau muaj leej twg hauv kuv tsev neeg uas mus ua tub txib, thiab kuv tsis paub xyov kuv puas muaj zog txaus. Kuv nco qab kuv tau kawm thiab thov Vajtswv kawg siab kom txais ib zaj lus tim khawv tseeb txog Yexus Khetos. Ces muaj ib hnub, thaum kuv thov kuv Leej Txiv Saum Ntuj Ceeb Tsheej, ua rau kuv hnov txoj kev kaj thiab kev sov siab. Thiab kuv paub lawm. Kuv paub xwb.

Kuv nco qab muaj ib hmo kuv tsim los thaum kuv txais “tswv yim zoo tag nrho” uas qhia kuv tias tus Tswv yuav hu kuv ua hauj lwm hauv pawg txwj laug.21 Ob lub lim tiam tom qab ntawd kuv txais kev hu ua li ntawd.

Kuv nco txog ib lub tuam rooj sab laj thaum ib tug mej zeej hauv Pawg Kaum Ob tug Thwj Tim hais tib co lus uas kuv tau qhia ib tug phooj ywg tias kuv xav hnov.

Kuv nco qab thaum kuv tau koom ob peb puas tus kwv tij txhos caug thov Vajtswv pab ib tug phooj ywg zoo uas feeb tsis meej thiab siv ib lub tshuab ua pa nyob hauv ib lub tsev kho mob nyob deb tom qab nws lub plawv nres tsis dhia ntxiv. Thaum peb koom siab thov Vajtswv kom nws tsis txhob tas sim neej, nws tau tsim los thiab rub txoj pa tawm ntawm nws caj pas. Hnub no nws yog ib ceg txheem ntseeg tus thawj tswj hwm.

Thiab kuv nco qab ib zaug thaum kuv txais kev tshoov siab uas muaj zog tom qab kuv ua npau suav txog ib tug phooj ywg uas tau tas sim neej thaum ntxov, ua rau kuv nco nws heev. Nws luag nyav thiab muaj kev xyiv fab. Kuv paub tias nws nyob zoo.

Nov yog ib txhia ntawm kuv tej duab tshav ntuj. Tej zaum nej muaj nej tej zaj lus thiab—thaum nej txais tej duab tshav ntuj ntawm nej zaj lus tim khawv. Thaum peb to taub, nco qab, thiab khaws tej duab tshav ntuj “koom ua ib ke,”22 ces ib yam zoo kawg pib. “Txoj kev kaj npuab rau txoj kev kaj”—“kev tseeb yeej nrog kev tseeb.”23 Ib tug duab tshav ntuj ntawm yus zaj lus khawv yeej txhawb nqa thiab koom ua ke nrog lwm tus duab, thiab ib tug ntxiv, thiab ib tug ntxiv. Ib nqe lus ntxiv rau ib nqe lus, ib tug duab tshav ntuj ntxiv rau ib tug duab—ib me pliag uas muaj nqi rau yus sab ntsuj plig zuj zus—ces nyob hauv peb muaj ib lub hauv paus ntawm txoj kev kaj thiab tej yam uas txhawb peb sab ntsuj plig. Tej zaum ib tug duab tshav ntuj tsis muaj zog txaus los sis ci ntsa iab txaus kom muaj ib zaj lus tim khawv tag nrho, tiam sis nyob ua ke ces yuav los ua ib txoj kev kaj uas kev tsaus ntuj ntawm kev ua xyem xyav kov tsis yeej.

“Auj yog li ntawd, qhov no puas muaj tseeb?” Amas nug. “Yeej muaj tseeb, vim qhov no yog qhov kaj.”24

Tus Tswv qhia peb tias, “Qhov uas yog Vajtswv li yog qhov kaj; thiab tus uas txais qhov kaj, thiab mus ntxiv nrog Vajtswv, yuav txais qhov kaj ntxiv; thiab qhov kaj ntawd yuav ci loj zuj zus mus txog hnub uas zoo tag nrho.”25

Qhov no txhais hais tias, cov kwv tij thiab cov muam, thaum yav tom ntej thiab los ntawm “kev rau siab ntso heev,”26 peb kuj txais tau peb tus duab ci ntsa iab—ib tug duab tshav ntuj ib zaug. Thiab nyob hauv tus duab ci ntsa iab ntawd, peb kuj yuav pom Leej Txiv Saum Ntuj Ceeb Tsheej uas hlub peb, hu peb lub npe, thiab taw tes rau peb tus Cawm Seej, Yexus Khetos, thiab caw peb los “Mloog Nws hais!”

Kuv ua tim khawv txog Yexus Khetos hais tias Nws yog txoj kev kaj thiab txoj sia ntawm neeg ntiaj teb tag nrho—tsis hais nej thiab kuv los yog.

Kuv ua tim khawv tias Nws yog Leej Tub tseeb uas muaj txoj sia ntawm tus Vajtswv tseeb uas muaj txoj sia thiab Nws yog tus thawj ntawm lub Koom Txoos uas tseeb thiab muaj sia no, uas Nws cov yaj saub thiab cov thwj tim uas muaj sia nyob.

Thov kom peb yuav to taub thiab txais Nws txoj kev kaj uas muaj yeeb koob ces xaiv Nws kom kov yeej kev tsaus ntuj ntawm lub ntiaj teb no—tas mus li thiab mus ib txhis li. Los ntawm Yexus Khetos lub npe, amees.

Lus Cim

  1. Saib Joseph Smith—Keeb Kwm 1:10–13.

  2. Saib Joseph Smith—Keeb Kwm 1:14–16.

  3. Saib Joseph Smith, Journal, Kaum Ib Hlis Ntuj 9–11, 1835, 24, josephsmithpapers.org.

  4. Joseph Smith—Keeb Kwm 1:17.

  5. Saib Joseph Smith—Keeb Kwm 1:20. Thaum Joseph Smith rov qab mus tsev tom qab Thawj Zaug Ua Yog Toog, nws niam nug seb puas muaj teeb meem dab tsi. Nws teb hais tias, “Kuv kuj nyob zoo thiab. … Kuv tau kawm paub rau kuv tus kheej hais tias kev ntseeg Presbyterian twb tsis tseeb” (ntxiv qhov uas ntawv qaij).

  6. Russell M. Nelson, “Tej Lus Xaus,” Liyahaunas, Kaum Ib Hlis Ntuj 2019, 122.

  7. Spencer W. Kimball, nyob hauv Conference Report, Munich Germany Area Conference, 1973, 77; hais nyob hauv Graham W. Doxey, “The Voice Is Still Small,” Ensign, Kaum Ib Hlis Ntuj 1991, 25.

  8. Teachings of Presidents of the Church: Joseph F. Smith (1998), 201: “Thaum kuv yog ib tug tub hluas uas pib ua hauj lwm qhuab qhia, kuv pheej mus thiab thov tus Tswv muab ib yam zoo kawg nkaus rau kuv pom, kuv thiaj li yuav txais ib zaj lus tim khawv. Tiam sis tus Tswv tsis tau muab tej yam xav tsis thoob rau kuv, thiab nws qhia kuv qhov tseeb, ib kab tag mam li ib kab…mus txog thaum nws ua rau kuv paub qhov tseeb ntawd txij los ntawm kuv lub taub hau mus rau kuv kuv qab xib taws, thiab nws qhia kuv mus txog kev ua xyem xyav thiab kev ntshai twb ploj mus lawm. Nws tsis tas txib ib tug tim tswv los saum ntuj los ua li no, thiab nws tsis tas ua kom ib tug tim tswv hais nrov nrov. Los ntawm Vajtswv tus Ntsuj Plig uas ua suab yau yau tej lus ntxhis, nws muab kuv zaj lus tim khawv rau kuv. Thiab los ntawm lub ntsiab cai thiab lub hwj chim no, nws yuav ua rau tag nrho cov tib neeg paub txog qhov tseeb kom nrog nraim lawv, thiab ua rau lawv paub qhov tseeb ib yam li Vajtswv paub, thiab ua raws li Leej Txiv lub siab nyiam ib yam li Yexus Khetos ua.”

  9. Mauxiyas 16:9.

  10. Lus Qhuab Qhia thiab Kev Khi Lus 84:46; kuj saib Yauhas 1:9.

  11. Lus Qhuab Qhia thiab Kev Khi Lus 88:12–13.

  12. Saib David A. Bednar, “The Spirit of Revelation” (2021), 7.

  13. Lus Qhuab Qhia thiab Kev Khi Lus 6:23.

  14. Lus Qhuab Qhia thiab Kev Khi Lus 8:2; kuj saib Hilamas 5:30.

  15. Saib Mauxiyas 5:2; Lus Qhuab Qhia thiab Kev Khi Lus 11:12.

  16. Saib 2 Nifais 4:21; Hilamas 5:44.

  17. Tus Tswv tau qhia tias kev txawj ntseeg lwm tus zaj lus tim khawv yog txiaj ntsim ntawm sab ntsuj plig (saib Lus Qhuab Qhia thiab Kev Khi Lus 46:13–14).

  18. Kev tshwm sim hauv lub caij nyoog no qhia tias cov lus hauv vaj lug kub los “tau muab tej no rau nej los ntawm kuv tus Ntsuj Plig, … thiab nej yuav tsis tau tej no yog hais tias tsis yog los ntawm kuv lub hwj chim los; yog li ntawd, nej muaj peev xwm ua tim khawv tias nej tau hnov kuv lub suab, thiab paub kuv tej lus.” (Lus Qhuab Qhia thiab Kev Khi Lus 18:35–36).

  19. Saib Mauxiyas 2:17; Maulaunais 7:45–48.

  20. 1 Nifais 1:20. Txwj Laug Gerrit W. Gong tau hais txog txoj kev “pom thiab zoo siab txog tus Tswv lub siab hlub tshua ntau nyob hauv peb lub neej” (“Kev Txhawb Pab,” Liyahaunas, Tsib Hlis Ntuj 2023, 18) thiab qhov uas “tus Tswv pab peb lub neej meej tshaj thaum peb nco txog yav tas los” (“Nco Ntsoov txog Nws,” Liyahaunas, Tsib Hlis Ntuj 2016, 108). Lub txiaj ntsim ntawm kev paub thiab lees tias tus Tswv tau pab peb lub neej, tsis hais peb tsis tau nco qab los sis xav txog thaum tib lub sij hawm ntawd, yeej muaj hwj chim heev. Cov vaj lug kub hais ntau txog lub hwj chim ntawm sab ntsuj plig uas yog kev nco ntsoov (saib Hilamas 5:9–12; Lus Qhuab Qhia thiab Kev Khi Lus 20:77, 79), uas pab tau yus txais kev tshwm sim (saib Maulaunais 10:3–4).

  21. Joseph Smith qhia hais tias: “Ib tug neeg yuav tau tej yam zoo thaum nws ua tib zoo mloog thawj lub tswv yim los ntawm tus ntsuj plig ntawm kev tshwm sim; piv xam hais tias, thaum nej txais tej tswv yim zoo tag nrho, tej zaum tus ntsuj plig yuav ua rau nej paub tseeb tias yuav tsum ua li cas, ces thaum twg nej twb mloog tau, ces nej yuav pom cov tswv yim ntawd tshwm los tib hnub los sis tsis ntev tom qab ntawd; (yog li ntawd) tej tswv yim uas Vajtswv tus Ntsuj Plig tau tso rau hauv nej lub paj hlwb, yuav muaj lawm tiag; ces thaum nej kawm mloog thiab to taub Vajtswv tus Ntsuj Plig, nej thiaj yuav haj yam to taub txoj ntsiab cai uas yog kev tshwm sim no, mus txog rau thaum nej rais los mus ua neeg zoo tag nrho rau ntawm Yexus Khetos” (Teachings of Presidents of the Church: Joseph Smith [2007], 132).

  22. Efexus 1:10.

  23. Lus Qhuab Qhia thiab Kev Khi Lus 88:40: “Vim kev txawj kev ntse npuab rau kev txawj kev ntse; tswv yim txais tswv yim; kev tseeb yeej nrog kev tseeb; kev tsim txiaj nyiam kev tsim txiaj; qhov kaj npuab rau qhov kaj.”

  24. Amas 32:35. Amas tau hais tias tej yam me me uas puv nkaus txoj kev kaj, txawm yog tej yam me los, yeej muaj tseeb. Qhov tseeb ntawd muaj hwj chim heev thaum koom ua ke nrog lwm yam kom ua ib qho loj.

  25. Lus Qhuab Qhia thiab Kev Khi Lus 50:24.

  26. Amas 32:41.