Kev Coj Ncaj: Kev Coj Cwj Pwm Zoo Li Yexus Khetos

Yexus Khetos yog tus uas Coj Yam Ntxwv rau peb. Kev coj zoo kom tas yus lub neej los yuav tsum coj raws li Vajtswv hais, ib leeg coj zoo rau ib leeg, thiab ua ncaj vim peb los saum ntuj los. Kev coj ncaj ncees yeej los ntawm txoj lus txib thib ib kom hlub Vajtswv/ Vim nej hlub Vajtswv, nej ua ncaj rau Nws txhua lub sij hawm. Yus to taub tias muaj qhov ncaj thiab qhov txhaum thiab muaj qhov tseeb tiag tiag—Vajtswv cov lus tseeb. Kev coj zoo txhais hais tias peb tsis tso peb tej kev cai los sis kev coj li cas tseg kom lwm tus qhuas los sis lees yuav peb.⁵ Yus “ua qhov uas yog” thiab cia tej nqi zog los tom qab ntawd.⁶ Tej kev kho ntawv hauv phau Qhia Kuv txoj Moo Zoo rau cov tub txib twb ntxiv lo lus kev coj ncaj los ua Khetos ib tug cwj pwm.⁷

Ntau xyoo tas los, Txwj Laug Uchtdorf txais kev txib kom muab peb ceg txheem ntseeg hloov. Thaum wb xam phaj ua ke, nws nug kuv ib lo lus uas kuv yeej nco ntsoov: “Puas muaj dab tsi hauv koj lub neej uas, yog tias cov pej xeem paub txog, yuav ua rau koj los sis cov Ntseeg txaj muag?” Ua rau kuv xav tsis thoob, kuv xav xav kom tas kuv lub neej, sim xav txog tej lub sij hawm uas kuv tau ua yuam kev thiab nug kuv tus kheej tias: “Yog lwm tus paub txog txhua yam kuv tau ua, ces lawv yuav xav li cas txog kuv los sis lub Koom Txoos?”

Thaum lub sij hawm ntawd, kuv xav tias Txwj Laug Uchtdorf nug kuv txog kev ua neeg tsim nyog, tiam sis kuv to taub lawm tias nws nug txog kev coj ncaj. Kuv puas tau ua ncaj raws li tej yam uas kuv ntseeg? Neeg ntiaj teb puas pom tias kuv tej lus thiab tej yam kuv ua yeej tsis sib txawv? Kuv coj li cas puas ua rau lawv nco txog Vajtswv?

Thawj Tswj Hwm Spencer W. Kimball qhia hais tias, “Kev coj ncaj” yog peb “txoj kev txaus siab ua neej raws li tej yam peb ntseeg thiab tej yam uas peb khi lus.”⁸

Qhov tseem ceeb tshaj plaws yog peb xav ua neej ncaj ncees yog kev coj raws li Vajtswv hais.

Txij thaum peb yog me nyuam yaus los, peb tau kawm zaj dab neeg txog Daniyees hauv lub qhov tsov. Daniyees yeej coj raws li Vajtswv hais txhua lub sij hawm. Lwm tus nom tswv khib heev lawv thiaj li “tshuaj saib … nrhiav lus kom [nws]”⁹ thiab ntxias kom tus nom tsa kev cai yuam txhua tus thov rau lawv cov vaj tswv xwb. Daniyees paub txog kev cai ntawd tiam sis nws mus tsev thiab—thaum “lub qhov rais qhib lug”¹⁰—nws tau txhos caug thiab thov Ixayees tus Vajtswv ib hnub twg peb zaug. Yog li ntawd, lawv muab Daniyees tso hauv lub qhov tsov. Thaum sawv ntxov, tus vaj ntxwv pom tias Daniyees tus Vajtswv tau cawm nws dim thiab tus vaj ntxwv tsa ib txoj kev cai tshiab tias txhua tus yuav tsum hwm thiab “saib taus Daniyees tus Vajtswv: [vim] Nws yog tus Vajtswv uas muaj sia nyob.”¹¹

Tus vaj ntxwv twb los paub Vajtswv dhau los ntawm Daniyees txoj kev coj ncaj. Lwm tus pom Vajtswv dhau los ntawm peb tej lus thiab tej yam peb ua. Ib yam li Daniyees, qhov uas peb coj raws li Vajtswv hais yuav ua rau peb txawv lwm cov neeg hauv ntiaj teb no.

Tus Cawm Seej qhia hais tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”¹² Thawj Tswj Hwm Russell M. Nelson qhia tias “[Kev kov yeej lub ntiaj teb] yog kev kov yeej tej kev ntxias uas hais tias tsim nyog xav txog tej yam los ntawm lub ntiaj teb ntau tshaj yus xav txog tej yam los ntawm Vajtswv. Yog kev tso siab rau Khetos cov lus qhuab qhia ntau dua li yus tso siab rau tib neeg lub tswv yim.”¹³ Ib yam li ntawd, peb yuav tsum tsis txhob ua raws li kev ntxias kom “nyias taug nyias tus kheej txoj kev xwb, thiab raws li tus yam ntxwv ntawm [peb] tus kheej tus vaj tswv, uas muaj tus yam ntxwv zoo li neeg ntiaj teb.”¹⁴

Qhov fab ntxeev ntawm lub ntiaj teb no yeej yog ib feem tseem ceeb ntawm Vajtswv txoj hau kev cawm seej. Qhov uas peb ua li cas txog qhov fab ntxeev ntawd yog qhia tias peb yog leej twg—yog kev ntsuas peb coj zoo npaum li cas. Tej kev ntxias ntawm lub ntiaj teb no los muaj zog npaum li yuav ua rau neeg tsis coj ncaj hauv lawv txoj kev sib yuav los sis tso tej lus uas cem txog lub Koom Txoos cov lus qhuab qhia los sis kab lig kev cai. Kev coj ncaj thaum peb xaiv ua tej yam yeej yog ib yam qhia tawm tias hauv yus nruab siab yus twb cog lus tias yus yuav coj raws li tus Cawm Seej Yexus Khetos.

Ib yam li kev coj zoo yog los ntawm txoj lus txib tseem ceeb thib ib kom hlub Vajtswv, qhov uas peb ib leeg coj zoo rau ib leeg yog los ntawm txoj lus txib thib ob, kom hlub peb cov neeg zej zog ib yam li peb hlub peb lub cev. Ib lub neej coj ncaj tsis yog ib lub neej uas zoo tag nrho; yog ib lub neej uas peb siv zog txhua hnub kom coj raws li Vajtswv hais thiab sim coj zoo rau lwm tus. Thawj Tswj Hwm Oaks qhia peb tias, “Qhov uas peb xav ua raws li txoj lus txib thib ob no yuav tsum tsis txhob ua rau peb tsis nco qab txoj lus txib thib ib.”¹⁵”

Lub ntiaj teb sim ua rau tib neeg xav coj zoo thaum lawv tsa kev cai kom coj li cas los sis tsim kev cai uas tswj hwm tib neeg txoj kev coj li cas nyob hauv tej lub koom haum. Txawm yog tej yam no zoo los, ntshe tej kev cai no tsis tau los ntawm qhov tseeb tag nrho thiab yuav hloov nyob ntawm seb tib neeg coj kab lig kev cai zoo li cas xwb. Ib yam li Txwj Laug Uchtdorf nug kuv, tej lub koom haum qhia cov neeg uas ua hauj lwm kom xav txog lawv yuav txiav txim li cas yog tias tau tshaj tawm xov xwm nyob saum huab cua los sis hauv ntawv xov xwm loj heev. Thaum lub Koom Txoos tawm plaws txoj kev pom tsis tseeb thiab dim plaws txoj kev tsaus ntuj los,¹⁶ peb yuav tsum ua zoo li Daniyees thiab tawm hauv tej yam uas neeg ntiaj teb xav kom peb ua thiab ua rau tib neeg pom tau tus Vajtswv uas tseeb thiab muaj sia nyob txhua lub sij hawm thiab nyob hauv txhua qhov chaw.¹⁷

Qhov uas peb hais tias peb coj zoo yeej tsis txaus yog tias tej yam peb ua tsis haum tej lus uas peb hais. Ib yam li ntawd, kev ua siab zoo li neeg ntseeg Khetos pauv tsis tau kev coj ncaj. Vim peb yog cov neeg uas tau khi lus, thiab vim peb yog cov thawj coj hauv Nws lub Koom Txoos, peb yuav tsum tsis txhob ua tej yam ntxim cem thiab ua raws nraim li tej kev cai uas tus Tswv tau tsa.

Qhov uas peb coj zoo txhawb nqa kev ntseeg thiab kev tso siab thiab pab kom lwm tus paub tias peb xav ua raws li tus Tswv lub siab nyiam xwb. Nyob hauv peb tej pawg sab laj, peb tiv taus luag tej kev ntxias thiab ua raws li tus Tswv tus txheej txheem kom nrhiav tej lub tswv yim los ntawm txhua tus poj niam thiab txiv neej ces ua raws nraim li tej lus ntuas uas peb txais los ntawm tus Ntsuj Plig.¹⁸

Peb tsom ntsoov rau tus Cawm Seej, thiab peb ceev faj kom txhob ua tej yam uas lwm tus pom tias peb ua kom zoo rau peb tus kheej, peb tsev neeg, los sis ua kom zoo rau ib tug thiab tso lwm tus tseg xwb. Peb xyuam xim ua tej yam kom tsis muaj leej twg xav tias peb ua tej yam kom tib neeg qhuas peb,¹⁹ kom muaj koob muaj npe, ua rau tib neeg nyiam, los sis kom luag tej tshaj tawm tej yam uas peb hais.

Qhov kawg, kev ua neej zoo qhia tias peb yuav tsum ua ncaj vim peb los saum ntuj los.

Peb paub cov neeg uas tsis ua li no. Ib tug uas peb paub zoo yog tus neeg uas tawm tsam Khetos hu ua Khaulihos, tus uas tau coj neeg coob mus , vim nws ua rau cov “uas nyiam sab cev nqaij daim tawv zoo siab.”²⁰ Tiam sis, thaum nws yuav luag tas sim neej no, nws lees hais tias, “Kuv yeej ib txwm paub tias yeej muaj ib tug Vajtswv.”²¹ Thawj Tswj Hwm Henry B. Eyring qhia tias kev dag “yog qhov fab ntxeev ntawm peb sab ntsuj plig,”²² vim peb los saum ntuj los. Khaulihos dag nws tus kheej, thiab tsis muaj qhov tseeb hlo li.²³

Tiam sis, tus Yaj Saub Joseph Smith ua siab loj tshaj tawm tias, “Kuv twb paub, thiab kuv paub hais tias Vajtswv twb paub, thiab kuv xyeej tsis tau.”²⁴

Tus Tswv hlub Joseph tus tij laug Hyrum vim “txoj kev coj zoo ntawm nws lub siab.”²⁵ Nws thiab Joseph coj raws li Vajtswv hais mus txog thaum kawg—coj raws li qhov uas nkawd los saum ntuj los, txoj kev kaj thiab txoj kev txawj ntse uas nkawd tau txais, thiab sim coj kom zoo li nkawd yog tus neeg uas nkawd xav ua thaum kawg.

Thov kom peb yuav ua raws nraim li “Vajtswv lub siab nyiam”²⁶ thiab coj ncaj zoo li Yexus Khetos. Thov kom peb yuav coj raws li tus uas Coj Yam Ntxwv rau peb, tus Cawm Seej ntawm lub ntiaj teb, thiab tsis txhob tsum tiam sis ua neej raws li Vajtswv hais, ib leeg coj zoo rau ib leeg, thiab ua ncaj vim peb los saum ntuj los.

Ib yam li Yauj hais tias, “Cia Vajtswv muab rab teev uas haum txiaj los luj kuv, nws thiaj pom hais tias kuv yog neeg zoo npaum li cas.”²⁷ Los ntawm Yexus Khetos lub npe dawb ceev, amees.