Thov Vajtswv, Nws Nyob Ntawd

Nej yuav tsum paub dab tsi?

Muaj ib zaj nkauj txog kev thov Vajtswv uas cov me nyuam hauv lub Koom Haum Me Nyuam Yaus hu thoob plaws lub ntiaj teb. Zaj no pib nrog ib lo lus nug. Nej puas paub zaj nkauj no? Yog kuv ua siab loj tiag, kuv yuav hu rau nej!

“Leej Txiv Saum Ntuj Ceeb Tsheej, koj puas nyob ntawd tiag? Thiab koj puas hnov thiab teb txhua tus me nyuam zaj lus thov Vajtswv?”²

Ua li cas kom paub tias Leej Txiv Saum Ntuj Ceeb Tsheej nyob ntawd tiag, txawm tias nej tsis pom Nws?

Thawj Tswj Hwm Russell M. Nelson tau caw kom nej “nthuav nej lub siab lub ntsws rau nej Leej Txiv Saum Ntuj Ceeb Tsheej. … Ces cia li mloog!”³ Mloog qhov nej xav hauv nej lub siab thiab tej kev xav uas los rau hauv nej lub paj hlwb.⁴

Leej Txiv Saum Ntuj Ceeb Tsheej muaj ib lub cev uas muaj nqaij thiab muaj txha thiab Nws yog Leej Txiv ntawm nej tus ntsuj plig. Vim tias Leej Txiv Saum Ntuj Ceeb Tsheej muaj tag nrho txhua lub hwj chim thiab paub txhua yam, Nws pom tag nrho Nws cov me nyuam⁵ thiab hnov thiab teb tau txhua lo lus thov. Nej yuav paub ntawm nej tus kheej tias Nws nyob ntawd thiab Nws hlub nej.

Thaum nej paub tias Leej Txiv Saum Ntuj Ceeb Tsheej yog tiag thiab Nws hlub nej, ces nej yuav ua siab loj thiab muaj kev cia siab! “Thov, nws nyob ntawd; hais lus, nws yeej mloog.”⁶

Nej puas tau xav tias nej nyob ib leeg? Muaj ib hnub thaum peb tus ntxhais xeeb ntxwv Ashley muaj rau xyoo, nws yog tib tug uas tsis muaj ib tug phooj ywg ua si nrog rau tom tsev kawm ntawv chaw ua si. Thaum nws sawv ntawd, nws xav tias nws tsis tseem ceeb thiab tsis muaj leej twg pom nws, nws cia li xav tias: “Tos! Kuv tsis nyob kuv ib leeg! Kuv muaj Yexus Khetos!” Ashley txhos caug nyob nruab nrab ntawm qhov chaw ua si, puab tes, thiab thov rau Leej Txiv Saum Ntuj Ceeb Tsheej. Thaum nws qhib nws qhov muag, muaj ib tug ntxhais sawv ntawd thiab nug nws seb nws puas xav ua si. Ashley tau kawm hais tias, “Peb tseem ceeb rau tus Tswv thiab peb yeej tsis nyob ib leeg.”

Tej zaum nej yuav xav paub vim li cas tej yam nyuaj tshwm sim hauv nej lub neej los sis vim li cas nej tsis txais tej koob hmoov uas nej thov kom txais. Feem ntau lo lus nug zoo tshaj plaws los nug Leej Txiv Saum Ntuj Ceeb Tsheej tsis yog vim li cas tiam sis dab tsi.

Nej puas nco thaum Nifais thiab nws tsev neeg tshaib plab thaum lawv hla roob moj sab qhua? Thaum Nifais thiab nws cov kwv tij mus nrhiav tsiaj kom tau noj, Nifais tus hneev nti lov. Tiam sis nws tsis nug vim li cas.

Nifais ua tus hneev nti tshiab thiab nug nws txiv, Lihais, seb nws mus qhov twg tau nqaij noj. Lihais thov Vajtswv, thiab tus Tswv qhia nws seb Nifais yuav tsum mus qhov twg.⁷ Leej Txiv Saum Ntuj Ceeb Tsheej yuav coj nej mus thaum nej nug Nws seb nej ua tau dab tsi thiab nej kawm tau dab tsi.

Leej Txiv Saum Ntuj Ceeb Tsheej xav pab nej loj hlob! Nws hlub peb kawg nkaus li Nws thiaj li txib Nws Leej Tub, Yexus Khetos, los qhia kev rau peb paub ua neej.⁸ Yexus raug kev txom nyem, tuag, thiab sawv rov los kom peb thiaj yuav txais kev zam txim rau peb tej kev txhaum thiab loj hlob kom hloov los uas neeg zoo li Nws.

Nej puas xav loj hlob ua siab ntev los sis ua siab ncaj ntxiv? Nej puas xav loj hlob kom muaj txuj ci ntxiv? Tej zaum nej txaj muag thiab xav loj hlob ua siab loj ntxiv. “Thov Vajtswv, nws nyob ntawd”!⁹ Los ntawm Nws tus Ntsuj Plig Dawb Huv, nej lub siab hloov tau thiab nej txais tau lub zog.

Kuv tus phooj ywg tshiab Jonah tau sau: “Feem ntau kuv yeej ntshai thaum kuv mus tsev kawm ntawv txhua sawv ntxov. Kuv txhawj txog tej yam xws li mus txog lig, tsis nco qab ib yam dab tsi, thiab xeem ntawv. Thaum kuv muaj 10 xyoo, kuv pib thov Vajtswv thaum kuv txav mus kawm ntawv nrog kuv niam. Kuv thov kom kuv txais tau kev pab, thiab kuv thov rau kuv tsev neeg. Kuv yeej xav txog tej yam uas ua rau kuv ris Vajtswv txiaj. [Kev thov Leej Txiv Saum Ntuj Ceeb Tsheej] tau pab kuv. Tej lub sij hawm kuv tsis hnov kev pab thaum kuv tawm ntawm lub tsheb, tiam sis thaum kuv mus txog kuv hoob kawm kuv muaj kev kaj siab.”¹⁰

Jonah txoj kev ntseeg loj tuaj thaum nws thov Vajtswv txhua hnub thiab mus tmo ntej.

Nej thov Vajtswv tau kom pab qhia Leej Txiv Saum Ntuj Ceeb Tsheej txoj kev hlub rau lwm tus.¹¹ Los ntawm Nws tus Ntsuj Plig, Leej Txiv Saum Ntuj Ceeb Tsheej yuav pab nej kom pom ib tug neeg uas tu siab nej thiaj nplij tau lawv lub siab. Nws pab tau nej qhia txog Nws txoj kev hlub los ntawm kev zam txim pub rau ib tug neeg. Nws muaj peev xwm ua rau nej ua siab loj pab lwm tus thiab qhia lawv tias lawv yog Vajtswv ib tug me nyuam. Nej pab lwm tus los paub thiab hlub Yexus thiab Leej Txiv Saum Ntuj Ceeb Tsheej ib yam li nej.¹²

Rau tag nrho kuv lub neej, kuv thov Vajtswv kom kuv txiv yuav los ua ib tug mej zeej nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Txawm tias kuv yog ib tug ntxhais hluas, kuv yeej paub tej koob hmoov uas nws txais tau. Peb tsev neeg txais tau tej koob hmoov ua kev sib khi ua ke tas mus ib txhis. Kuv tsev neeg, cov phooj ywg, thiab kuv thov Vajtswv rau nws, tiam sis nws tsis koom lub Koom Txoos. Leej Txiv Saum Ntuj Ceeb Tsheej tsis yuam leej twg los xaiv.¹³ Nws xa lo lus teb rau peb cov lus thov los ntawm lwm txoj hau kev.

Thaum kuv loj txaus, kuv txais kuv yawg suab txoj koob hmoov. Hauv txoj koob hmoov, tus yawg suab qhia kuv tias qhov zoo tshaj plaws uas kuv ua tau kom pab kuv tsev neeg nyob ua ke saum ntuj ceeb tsheej yog coj yam ntxwv txog Yexus Khetos txoj moo zoo. Qhov ntawd yog qhov kuv ua tau!

Kuv txiv nyob tau 86 xyoo. Tsib hnub tom qab nws tam sim neej, kuv tau txais kev xyiv fab dawb ceev. Leej Txiv Saum Ntuj Ceeb Tsheej tau qhia kuv los ntawm Nws tus Ntsuj Plig tias kuv txiv xav txais tej koob hmoov ntawm Yexus Khetos txoj moo zoo! Kuv yeej yuav nco ntsoov hnub uas kuv txhos caug ntawm lub thaj hauv lub tuam tsev nrog kuv tus niam hluas thiab cov nus ua kev sib khi nrog kuv niam kuv txiv. Kuv pib thov kom txais koob hmoov no thaum kuv tseem nyob hauv lub Koom Haum Me Nyuam Yaus, thiab kuv tau txais thaum kuv yog ib tug niam tais.

Tej zaum nej thov Vajtswv rau tej koob hmoov rau nej tsev neeg thiab lwm tus uas nej hlub. Tsis txhob tso tseg! Leej Txiv Saum Ntuj Ceeb Tsheej yuav qhia nej kom paub nej ua tau dab tsi.

Qhia Leej Txiv Saum Ntuj Ceeb Tsheej seb muaj dab tsi hauv nej lub siab.¹⁴ Thaum nej thov kom Nws pab, nej yuav txais Nws tus Ntsuj Plig los coj nej.¹⁵ Txoj kev thov Vajtswv txhua hnub yuav ua rau nej hlub Leej Txiv Saum Ntuj Ceeb Tsheej thiab Yexus Khetos. Qhov no yuav pab nej coj raws li Nkawd tag nej lub neej!

Cia li xav seb yuav ua li cas yog tias cov me nyuam nyob Afikas, Amelikas Qab Teb, Exias, Yulauv, Amelikas Qaum Teb, thiab Audaliyas thov Vajtswv txhua hnub. Thoob plaws lub ntiaj teb yuav txais koob hmoov uas los ntawm Vajtswv txoj kev hlub!