2020–2024
Koom Ib lub Siab nrog Khetos
Plaub Hlis Ntuj xyoo 2024 lub tuam rooj sab laj
15:5

Koom Ib lub Siab nrog Khetos

Los ntawm Txwj Laug Quentin L. Cook

Ntawm Pawg Kaum Ob tug Thwj Tim

Peb koom siab ua ke vim peb hlub thiab ntseeg Yexus Khetos thiab nws txoj Kev Theej Txhoj. Lub ntsiab ntawm kev koom siab tiag tiag yog kev koom siab nrog Khetos.

Txij thaum kuv hluas los kuv yeej ib txwm xav ntau txog Yexus Khetos txoj Kev Theej Txhoj, tiam sis thaum kuv muaj 25 xyoos ua rau kuv paub tias tus Cawm Seej txoj Kev Theej Txhoj muaj tseeb. Kuv nyuam qhuav kawm ntawv tiav nyob ntawm Stanford Law School thiab tab tom kawm xeem ntawv ua tus kws lij choj hauv California. Kuv niam hu kuv thiab hais tias kuv yawm txiv Crozier Kimball, uas nyob hauv Utah, yuav tas sim neej no. Nws hais tias yog kuv xav saib nws, kuv yuav tsum los tsev. Kuv yawm txiv muaj 86 xyoo thiab mob heev. Kuv nyiam nrog nws tham. Nws zoo siab pom kuv thiab hais lus tim khawv rau kuv.

Thaum Crozier muaj peb xyoos xwb, nws txiv David Patten Kimball, tuag thaum muaj 44 xyoos.1 Crozier cia siab hais tias nws txiv thiab nws yawg Heber C. Kimball, yuav pom zoo rau nws lub neej thiab xav tias nws hwm nws caj ceg.

Kuv yawm txiv cov lus ntuas rau kuv yog kom kuv txhob xav tias kuv zoo dua vim cov poj koob yawm txwv no rau siab ntseeg. Nws hais rau kuv tias kuv yuav tsum tsom ntsoov rau tus Cawm Seej thiab tus Cawm Seej txoj Kev Theej Txhoj. Nws hais tias peb txhua tus yog Leej Txiv Saum Ntuj Ceeb Tsheej cov me nyuam uas Nws hlub. Txawm yog peb cov poj koob yawm txwv hauv lub ntiaj teb no yog leej twg, peb txhua tus yuav qhia tus Cawm Seej tias peb tau ua raws li Nws cov lus txib zoo npaum li cas.

Yawm txiv hais tias tus Cawm Seej yog “Tus Zov Rooj Vag,” uas hais txog 2 Nifais 9:41. Nws qhia kuv tias nws cia siab hais tias nws twb hloov siab lees txim txaus kom tsim nyog txais tus Cawm Seej txoj kev hlub tshua.2

Qhov no tshoov kuv lub siab. Kuv paub tias nws yog ib tug txiv neej ncaj ncees. Nws yog ib tug yawg suab thiab tau mus ua tub txib ob peb zaug. Nws qhia kuv tias tsis muaj leej twg uas yuav rov qab mus cuag Vajtswv los ntawm tej hauj lwm zoo xwb yog tsis muaj tus Cawm Seej txoj Kev Theej Txhoj. Kuv nco ntsoov txog Yawm Txiv txoj kev hlub tus Cawm Seej thiab Nws txoj Kev Theej Txhoj.

Nyob rau xyoo 2019 thaum kuv txais kev txib mus rau Yeluxalees,3 kuv tau mus rau chav sab saud uas nyob ze qhov chaw uas neeg xav tias tus Cawm Seej tau muab Nws cov Thwj Tim txhais ko taw ntxuav ua ntej Nws raug Ntsia Saum Ntoo Khaub Lig. Kuv txais kev tshoov siab thiab xav txog Nws txoj kev txib kom Nws cov Thwj Tim ib leeg hlub ib leeg.

Kuv nco txog tus Cawm Seej zaj lus thov Vajtswv foom koob hmoov rau peb. Raws li hais Yauhas phau txoj Moo Zoo hais Nws tau thov Vajtswv nyob hauv hnub kawg ntawm Nws lub neej hauv lub ntiaj teb no.

Nws tau thov Vajtswv kom pab cov neeg uas coj raws li Yexus Khetos, tsis hais peb los yog.4 Nyob hauv tus Cawm Seej zaj lus thov Nws Txiv, Nws thov kom “lawv koom ib lub siab. Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab.” Ces tus Cawm Seej hais ntxiv tias, “Kuv ua rau lawv tau koob meej ib yam li koj ua rau kuv tau koob meej; kuv ua li ntawd kom lawv koom tau ib lub siab ib yam li wb koom tau ib lub siab.”28 Kev koom siab yog qhov uas Khetos tau thov Vajtswv kom tau ua ntej Nws raug ntxeev siab thiab raug ntsia saum ntoo khaub lig. Peb yuav koom siab nrog Khetos thiab peb Leej Txiv Saum Ntuj Ceeb Tsheej dhau los ntawm tus Cawm Seej txoj Kev Theej Txhoj.

Tus Tswv txoj kev hlub tshua uas cawm peb txoj sia tsis nyob ntawm peb caj ceg, peb txoj kev kawm ntawv, peb muaj nyiaj npaum li cas, los sis peb yog haiv neeg twg. Yeej nyob ntawm kev koom siab nrog Yexus Khetos thiab kev ua raws li cov lus txib.

Tus Yaj Saub Joseph Smith thiab Oliver Cowdery tau txais kev tshwm sim txog kev tsa thiab tswj lub Koom Txoos li cas nyob rau xyoo 1830, tsis ntev tom qab uas tau muab lub Koom Txoos txhim tsa. Tus Yaj Saub tau nyeem kev tshwm sim uas tam sim no yog tshooj 20 nyob hauv lub Koom Txoos txhawj lub rooj sab laj thiab yog thawj txoj kev tshwm sim uas cov mej zeej tau pom zoo rau.6

Tej yam hauv kev tshwm sim no yeej zoo kawg. Nws qhia peb txog qhov uas tus Cawm Seej lub luag hauj lwm tseem ceeb npaum li cas thiab yuav ua li cas kom txais tau Nws lub hwj chim thiab cov koob hmoov los ntawm Nws txoj kev tshav ntuj uas theej txhoj. Tus Yaj Saub Joseph muaj 24 xyoos thiab twb tau txais kev tshwm sim ntau thiab txhais Phau Ntawv Maumoos tiav lawm los ntawm Vajtswv lub txiaj ntsim thiab lub hwj chim. Kev tshwm sim no qhia tias Joseph thiab Oliver yog ob tug Thwj Tim, nkawd thiaj li muaj txoj cai tswj hwm lub Koom Txoos.

Nqe 17 txog 36 muaj ib lub ntsiab lus txog lub Koom Txoos cov lus qhuab qhia tseem ceeb, tsis hais qhov uas muaj Vajtswv tiag, txoj Kev Tsim noob neej, txoj Kev Poob, thiab Leej Txiv Saum Ntuj Ceeb Tsheej txoj hau kwv cawm seej los ntawm Yexus Khetos txoj Kev Theej Txhoj. Nqe 37 hais txog tej yam tseem ceeb uas yuav tsum ua kom ua kev cai raus dej hauv tus Tswv lub Koom Txoos. Nqe 75 txog 79 qhia txog tej zaj lus thov Vajtswv foom koob hmoov rau lub cim nco txog uas peb thov txhua Hnub Caiv.

Cov lus qhuab qhia, tej lub ntsiab cai, lub cim nco txog, thiab tej kev cai uas tus Tswv tau qhia rau Joseph Smith, tus Yaj Saub ntawm Kev Muab Txoj Moo Zoo Txum Tim Rov Qab Los, yeej tseem ceeb kawg.7

Tej yam uas yuav tsum ua kom ua kev cai raus dej yeej tseem ceeb thiab yooj yim. Tej ntawd yog kev txo hwj chim rau Vajtswv, ib lub siab mob thiab lub siab xav ua zoo,8 hloov siab lees txim rau tag nrho peb tej kev txhaum, ris Yexus Khetos lub npe, nyiaj kom mus txog thaum kawg, thiab qhia los ntawm tej yam peb ua hais tias peb tau txais Khetos tus Ntsuj Plig.9

Yog ib qho tseem ceeb uas txhua yam no yog ntawm sab ntsuj plig. Tsis tas muaj nyiaj los sis muaj koob muaj npe. Cov pluag thiab cov muaj los kuj yuav tsum ua raws li tej kev cai ntawm sab ntsuj plig zoo ib yam.

Tsis muaj kev cai uas hais tias yuav tsum los ntawm ib haiv neeg twg, yuav tsum ua poj niam los txiv neej. Phau Ntawv Maumoos qhia meej tias tus Tswv caw txhua tus los txais Nws txoj kev zoo, “cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej; … txhua tus yeej zoo tib yam rau Vajtswv.”10 “Txhua txhia tus neeg yeej muaj cai sib txig zos, thiab tsis muaj leej twg raug txwv.”11

Vim peb sawv daws “zoo tib yam” rau Vajtswv, ces yeej tsis tsim nyog xav txog qhov uas peb txhua tus sib txawv. Ib txhia tau ua yuam kev yaum peb kom “xav tias tib neeg txawv ntawm peb thiab nyias txawv nyias ntau tshaj qhov uas lawv zoo ib yam. [Ib txhia] ua kom tej yam sib txawv me me thiab hloov ua kom loj kawg li.”12

Tsis tas li ntawd, ib txhia tau ua yuam kev xav tias vim peb caw txhua tus neeg los txais Nws txoj kev zoo thiab txoj sia nyob mus ib txhis li, tsis muaj tej kev cai txog tej yam peb ua.13

Tiam sis, cov vaj lug kub qhia tias txhua tus neeg uas muaj hnub nyoog lav ris yuav tsum hloov siab lees txim rau lawv tej kev txhaum thiab ua raws li tus Tswv cov lus txib.14 Tus Tswv qhia meej tias txhua tus muaj kev ywj siab xaiv kev ncaj ncees thiab “muaj kev ywj siab xaiv txoj kev ywj pheej thiab txoj sia nyob mus ib txhis, uas yog los ntawm tus Neeg Nruab Nrab tseem ceeb ntawm tib neeg txhua tus, … thiab rau siab mloog nws tej lus txib tseem ceeb; thiab cia siab rau nws tej lus, thiab xaiv yuav txoj sia nyob mus ib txhis.”15 Yog peb xav txais cov koob hmoov ntawm tus Cawm Seej txoj Kev Theej Txhoj, peb yuav tsum siv peb txoj kev ywj siab xaiv kev ncaj ncees kom xaiv Yexus Khetos thiab ua raws li nws cov lus txib.

Nyob hauv kuv lub neej, tib neeg nyiam sib tham thiab sib cav txog lub ntsiab ntawm “kev ywj siab xaiv.” twb muaj thiab yeej yuav muaj cov kws txawj ntse sib cav txog tej yam no.

nyob hauv ib phau xov xwm hauv tsev kawm ntawv qib siab loj heev, ib tug xib hwb biologist hais tias, “Tsis muaj kev ywj siab xaiv.”16 Nyob hauv zaj lus no tus xib hwb hais tias, “Tsis muaj Vajtswv, … thiab tsis muaj kev ywj siab xaiv, … thiab nov yog ib lub ntuj uas dav kawg li thiab tsis muaj dab tsi haud.”17 Kuv yeej tsis pom zoo hlo li.

Ib txoj lus qhuab qhia tseem ceeb ntawm peb txoj kev ntseeg yog qhov uas peb muaj kev ywj siab xaiv18 kev ncaj ncees.19 Kev ywj siab xaiv yog kev txawj txiav txim siab thiab ua tej yam. Yeej yog ib yam tseem ceeb rau txoj hau kev cawm seej. Yog tias tsis muaj kev ywj siab xaiv kev ncaj ncees, ces peb kawm tsis tau, vam meej tsis tau, los sis xaiv tsis taus kom koom siab nrog Khetos. Vim muaj kev ywj siab xaiv, peb “muaj kev ywj siab xaiv txoj kev ywj pheej thiab txoj sia nyob mus ib txhis.”20 Nyob hauv Pawg Sab Laj Saum Ntuj Ceeb Tsheej ua ntej lub neej no, Leej Txiv txoj hau kev qhia tias yuav tsum muaj kev ywj siab xaiv. Luxifaws ntxeev siab thiab “nrhiav kev ua kom tib neeg txoj kev ywj siab xaiv puas tsuaj.”21 Yog li ntawd, tsis tau muab lub txiaj ntsim muaj ib lub cev nqaij daim tawv rau Dab Ntxwg Nyoog thiab cov uas coj raws li nws.

Lwm tus ntsuj plig tau siv lawv txoj kev ywj siab xaiv kom ua raws li Leej Txiv Saum Ntuj Ceeb Tsheej txoj hau kev. Cov ntsuj plig uas tau koob hmoov vim lawv yug los hauv lub neej no tseem muaj kev ywj siab xaiv. Peb muaj kev ywj siab xaiv thiab ua tej yam, tiam sis peb tsis tswj tej yam uas yuav raug vim peb ua tej ntawd. “Tej kev xaiv zoo thiab kev ncaj ncees ua rau tib neeg zoo siab, nyob kaj siab lug thiab muaj tsoj sia nyob mus ib txhis li tiam sis kev xaiv kev txhaum thiab kev phem yuav ua rau tib neeg lub siab mob thiab nyuaj siab.”22 Ib yam li Amas tshaj hais tias “Txoj kev phem yeej ib txwm tsis yog kev zoo siab.”23

Nyob hauv lub ntiaj teb no uas nyiam sib tw heev, tib neeg xav ua tau zoo tshaj. Kev siv zog kom ua zoo npaum li peb ua taus yeej yog ib qho ncaj ncees thiab tsim nyog. Yeej yog raws li tus Tswv cov lus qhuab qhia. Kev sim saib tsis taus lwm tus los sis tab kaum lawv kom txhob vam meej yeej tsis yog raws li tus Tswv cov lus qhuab qhia. Peb hais tsis taus hais tias yog tej xwm txheej los sis lwm tus uas ua rau ib tug neeg txiav txim siab tsis ua raws li Vajtswv cov lus txib.

Nyob hauv lub ntiaj teb no, yeej yooj yim kom tsom ntsoov rau kev muaj nyiaj thiab muaj hauj lwm zoo. Tej zaum ib txhia pom tsis tau tej lub ntsiab thiab tsis xaiv tej yam uas tseem ceeb mus ib txhis li. Peb yuav muaj tswv yim yog peb ua raws li Thawj Tswj Hwm Russell M. Nelson tej lus kom peb “xav txog tej yam xilethi-aus.”24

Tej yam tseem ceeb tshaj plaws uas peb yuav tsum xaiv yeej yog tej yam uas txhua tus xaiv tau tsis hais lawv muaj tuj ci, tswv yim, cib fim, los sis nyiaj npaum li cas los. Peb yeej yuav tsum xaiv tej yam txog peb tsev neeg ua ntej. Cov vaj lug kub qhia meej txog qhov no. Cia li xav txog zaj lus nyob hauv phau 1 Nifais thaum Lihais “tau khiav tawm mus rau tom roob moj sab qhua. Thiab nws tau tso nws lub vaj lub tsev tseg, thiab thaj av uas yog nws qub txeeg qub teg, thiab nws tej nyiaj, thiab nws tej kub, thiab nws tej khoom muaj nuj nqis, thiab tsis nqa ib yam dab tsi nrog nws li, tsuas yog coj nws tsev neeg nkaus xwb.”25

Thaum peb raug tej yam uas hloov ntau hauv lub neej no, muaj ntau yam uas peb tswj tsis tau li. Muaj tej yam xws li tej kev mob kev nkees thiab kev raug xwm txheej. Phaum mob COVID-19 twb raug tib neeg uas tau ua txhua yam yog lawm. Tiam sis rau tej yam uas tseem ceeb tshaj plaws, peb yeej xaiv tau. Thaum kuv ua tub txib, Txwj Laug Marion D. Hanks, peb qhov chaw tshaj tawm txoj moo zoo tus thawj tswj hwm, tau hais kom peb txhua tus cim ntsoov ib zaj paj lug los ntawm Ella Wheeler Wilcox:

Tsis muaj txoj hmoov, tsis muaj kev vam meej

Uas tab kaum los sis yuam tau

Tus uas muaj siab ruaj nrees txoj kev txiav txim.26

Hais txog tej lub ntsiab cai, kev coj yam ntxwv, kev ua raws li peb ntseeg, thiab kev ua neej ncaj ncees, peb tswj taus peb tus kheej. Peb txoj kev ntseeg thiab kev hwm Vajtswv uas yog Leej Txiv thiab Nws Leej Tub, Yexus Khetos, yog ib yam uas peb xaiv tau.27

Thov to taub tias kuv tsis hais tias yuav tsum tsis txhob xav txog kev kawm ntawv los sis kev ua hauj lwm. Kuv hais tias thaum peb saib txoj kev kawm ntawv thiab txoj kev ua hauj lwm tseem ceeb dua li peb tsev neeg los sis kev koom siab nrog Yexus Khetos, ces ntshe tej yam uas peb raug yuav loj heev.

Cov lus qhuab qhia meej thiab yooj yim nyob hauv Lus Qhuab Qhia thiab Kev Khi Lus 20 tshoov peb lub siab vim peb to taub zoo txog tej lub ntsiab ntawm sab ntsuj plig uas dawb ceev. Kev tshwm sim no qhia tias peb txais kev cawm seej thaum Yexus Khetos muab cov neeg uas hloov siab lees txim hloov ua neeg ncaj ncees thiab dab huv vim muaj tus Cawm Seej txoj kev tshav ntuj.28 Tshooj no qhia txog Nws txoj Kev Theej Txhoj.

Peb yuav tsum siv zog coj lwm tus nrog peb koom siab koom ntsws. Yog peb yuav ua raws li Thawj Tswj Hwm Russell M. Nelson tej lus ntuas kom muab Ixayees sau los ua ke nyob ob sab ntawm daim ntaub thaiv, peb yuav tsum coj lwm tus los koom nrog peb. Ib yam li Thawj Tswj Hwm Nelson tau qhia tias: “Nyob hauv txhua thooj av teb chaws thiab thoob plaws cov pov txwv hauv dej hiav txwv, cov neeg rau siab ntseeg los sib sau ua ke hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Tej yam sib txawv ntawm kab lig kev cai, yam lus, kev ua poj niam los txiv neej, haiv neeg, thiab qhov uas neeg tuaj lub teb chaws twg tuaj tej ntawd los tsis tshua tseem ceeb thaum cov neeg rau siab ntseeg taug txoj kev ua raws li lawv tej kev khi lus thiab los cuag peb tus Txhiv Dim uas peb hlub.”29

Peb koom siab vim peb hlub thiab ntseeg Yexus Khetos thiab vim peb yog Leej Txiv Saum Ntuj Ceeb Tsheej cov me nyuam. Lub ntsiab ntawm kev koom siab tiag tiag yog kev koom siab nrog Khetos. Ob txoj kab ke ua kev cai raus dej thiab txais lub cim nco txog raws li hais nyob hauv Lus Qhuab Qhia thiab Kev Khi Lus 20, ua ke nrog peb tej kev khi lus hauv lub tuam tsev ua rau peb koom siab raws li kev tshwj xeeb thiab cia peb ua ib lub siab mus ib txhis li thiab ua neej nyob kaj siab lug thiab sib haum xeeb.

Kuv ua tim khawv tseeb hais tias Yexus Khetos muaj txoj sia nyob, thiab vim peb muaj Nws txoj Kev Theej Txhoj, peb yuav koom ib lub siab nrog Khetos. Los ntawm Yexus Khetos lub npe dawb ceev, amees.

Lus Cim

  1. David, thaum nws muaj 17 xyoo, tau pab nqa ib co Neeg Ntseeg hla tus Dej Sweetwater uas muaj dej khov thaum lawv raug tav kev nyob pem tiaj nras Wyoming (saib Saints: The Story of the Church of Jesus Christ in the Latter Days, phau 2, No Unhallowed Hand, 1846–1893 [2020], 237).

  2. Saib Maulaunais 7:27–28.

  3. Tus Thawj Xib Hwb Rabbi ntawm Norway, Rabbi Michael Melchior, thiab kuv wb yog ob tug uas sib tham hauv lub rooj sab laj ntawm cov Neeg Yudais thiab Tsoom Haiv Neeg Ntseeg hauv Hnub Nyoog Kawg cov kws kawm txuj thaum lub Rau Hli Ntuj 5, 2019, nyob ntawm BYU Jerusalem Center nyob hauv teb chaws Ixayees.

  4. Saib Yauhas 17:20.

  5. Yauhas 17:21–22.

  6. Saib “The Conference Minutes and Record Book of Christ’s Church of Latter Day Saints, 1838–1839, 1844” (neeg coob hu ua Far West Record), Rau Hli Ntuj 9, 1830, Church History Library, Salt Lake City; Steven C. Harper, Making Sense of the Doctrine and Covenants (2008), 75.

  7. Lus Qhuab Qhia thiab Kev Khi Lus 20 yog thawj zaj lus tshwm sim uas tau luam tawm hauv lub Koom Txoos ntawv xov xwm thiab cov tub txib tau siv kom qhia cov lus qhuab qhia thiab kev ua cov kab ke ntawm kev cai raus dej thiab lub cim nco txog (saib Harper, Making Sense of the Doctrine and Covenants, 75).

  8. Saib 2 Nifais 2:7.

  9. Saib Lus Qhuab Qhia thiab Kev Khi Lus 20:37.

  10. 2 Nifais 26:33.

  11. 2 Nifais 26:28.

  12. Peter Wood, Diversity: The Invention of a Concept (2003), 20.

  13. Nihos ntseeg li no (saib Amas 1:4).

  14. Saib Lus Qhuab Qhia thiab Kev Khi Lus 29:49–50.

  15. 2 Nifais 2:27–28.

  16. Stanford (phau ntawv uas Stanford Alumni Association tau muab luam tawm), lub Kaum Ob Hlis Ntuj 2023, daim plhaub.

  17. Nyob hauv Sam Scott, “As If You Had a Choice,” Stanford, Kaum Ob Hlis Ntuj 2023, 44. Zaj no hais tias tus xib hwb yog Robert Sapolsky, ib tug xib hwb uas qhia biology, neurology, thiab neurosurgery hauv Stanford, thiab ib tug kws sau ntawv txog txuj ci science. Zaj lus no muaj tej lub tswv yim uas fab ntxeev xws li los ntawm Alfred Mele, ib tug xib hwb qhia laj lim tswv yim nyob hauv Florida State University, uas tau coj ib lub txheej xwm John Templeton Foundation Project txog kev ywj siab xaiv. Nws hais tias, “Cov scientist yeej tsis tau paub tseeb tias kev ywj siab xaiv—txawm yog kev rau siab ywj siab xaiv—yog ib yam uas tsis muaj li” (nyob hauv Scott, “As If You Had a Choice,” 46).

  18. Saib D. Todd Christofferson, “Moral Agency” (Brigham Young University kev sib ntsib hawm Vajtswv, Ib Hlis Ntuj 31, 2006), speeches.byu.edu

  19. Saib Lus Qhuab Qhia thiab Kev Khi Lus 58:27.

  20. 2 Nifais 2:27.

  21. Mauxes 4:3.

  22. True to the Faith: A Gospel Reference (2004), 12.

  23. Amas 41:10.

  24. Saib Russell M. Nelson, “Think Celestial!,” Liyahaunas, Kaum Ib Hlis Ntuj 2023, 117–20.

  25. 1 Nifais 2:4.

  26. Poetical Works of Ella Wheeler Wilcox (1917), 129.

  27. Kuv ib txwm nyiam Txwj cov lus uas Txwj Laug Neal A. Maxwell qhia hais tias: “Yog tias nej tsis tau xaiv Vajtswv lub Nceeg Vaj, ces thaum kawg tej yam uas nej tau xaiv yuav tsis muaj nuj nqis dab tsi li” (xav tias yog William Law hais, ib tug xib hwb Askiv uas nyob hauv tej tiam neeg thib 18; raws li Neal A. Maxwell hais, “Response to a Call,” Ensign, Tsib Hlis Ntuj 1974, 112).

  28. Saib Lus Qhuab Qhia thiab Kev Khi Lus 20:29–31. Kev ntseeg Calvinist qhia tias los ntawm Yexus Khetos txoj kev tshav ntuj tib neeg hloov tau ua neeg ncaj ncees thiab dawb huv. Lawv qhia tias thaum twg Vajtswv tau pom zoo ua ntej tias ib tug neeg yuav txais kev cawm seej, ces tsis muaj dab tsi uas hloov tau qhov ntawd. Lus Qhuab Qhia thiab Kev Khi Lus 20 twb qhia txawv kev ntseeg Calvinism tag. Tshooj no hais tias, “Tej zaum yeej yuav muaj tib neeg poob ntawm txoj kev tshav ntuj thiab khiav tawm ntawm tus Vajtswv uas muaj sia zees nyob mus;” (saib Lus Qhuab Qhia thiab Kev Khi Lus 20:32–34; kuj saib Harper, Making Sense of the Doctrine and Covenants, 74).

  29. Russell M. Nelson, “Building Bridges,” Liyahaunas, Kaum Ob Hlis Ntuj 2018, 51.