“Cia Li Ua Siab Tus thiab Paub tias Kuv Yog Vajtswv”

Nyob rau xyoo 1833, Haiv Neeg Ntseeg nyob hauv Missouri raug tsim txom ntau heev. Tej pawg neeg phem tau ntiab lawv tawm ntawm lawv cov tsev nyob hauv Jackson County, thiab cov mej zeej ib txhia twb tau tsiv tsev mus rau cheeb tsam nyob ze. Tiam sis lawv tseem raug kev tsim txom, thiab muaj neeg coob hais tias yuav sim muab lawv tua tuag. Thaum lawv raug tej xwm txheej nyuaj no, tus Tswv tau qhia tej yam no rau tus Yaj Saub Joseph Smith nyob hauv Kirtland, Ohio:

“Yog li ntawd, nej cia li txais kev nplij siab txog Xi-oos; vim txhua tus tib neeg twb nyob hauv kuv txhais tes; cia li ua siab tus thiab paub hais tias kuv yog Vajtswv.”³

Kuv ntseeg tus Tswv cov lus ntuas kom peb “ua siab tus” tsis yog txoj kev tsis txhob hais lus los sis tsis txhob txav mus. Tej zaum nws xav kom peb nco ntsoov thiab tso siab rau Nws thiab Nws lub hwj chim “txhua lub sij hawm thiab … nyob hauv txhua qhov chaw uas [peb] nyob.”⁴ Yog li ntawd, tej zaum cov lus “cia li ua sib tus” ua rau peb nco qab tias peb yuav tsum tsom ntsoov rau tus Cawm Seej tsis tu tsis tseg vim Nws yog lub hauv paus ntawm kev ua siab tus ntawm peb sab ntsuj plig uas txhawb peb lub dag zog kom muaj peev xwm ua thiab kov yeej tej yam nyuaj.

Kev ntseeg tiag tiag yeej tsom ntsoov rau tus Tswv Yexus Khetos—kev ntseeg Nws yog Leej Txiv Tib Leeg Tub uas los saum ntuj los thiab kev ntseeg Nws lub luag hauj lwm txhiv peb dim.

“Vim nws tau ua kom muaj raws li txhua qhov ntsiab lus ntawm txoj kev cai, thiab nws aws tag nrho cov uas ntseeg nws; thiab cov uas ntseeg nws yuav muab siab npuab txhua yam uas zoo; yog li ntawd nws hais daws noob neej zaj; thiab nws nyob saum ntuj ceeb tsheej mus ib txhis li.”⁵

Yexus Khetos yog peb tus Txhiv Dim,⁶ peb tus Neeg Nruab Nrab,⁷, thiab tus Daws Peb Zaj⁸ nrog Leej Txiv Nyob Mus Ib Txhis Li thiab lub pob zeb uas nyob rau saud peb yuav tsum ua lub hauv paus ntawm sab ntsuj plig rau peb lub neej.

Hilamas piav hais tias, “Nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas [nej] yuav tsum cog [nej] lub hauv paus; xwv kom thaum tus dab phem yuav xa nws tej cua muaj zog, muaj tseeb tiag, nws tej xub nyob hauv tej khaub zig cua, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug [nej], tej ntawd yuav tsis muaj hwj chim kov yeej [nej] kom cab tau neb mus rau hauv tus kwj tob tob ntawm kev nyuaj siab thiab kev txom nyem uas tsis muaj qhov kawg, vim yog lub pob zeb uas [nej] tau cog rau saud, uas yog lub hauv paus ruaj nrees, ib lub hauv paus uas yog neeg cog rau saud lawv yuav tsis vau.”⁹

Qhov uas peb yuav tsum ua peb lub neej rau saum “lub pob zeb” uas yog Yexus Khetos yeej yog ib lub cim zoo. Cia li nco ntsoov tias nyob hauv nqe no tus Cawm Seej tsis yog lub hauv paus. Tiam sis, tus Tswv hais kom peb txhim tsa peb lub hauv paus ntawm sab ntsuj plig nyob rau saum Nws.¹⁰

Lub hauv paus yog ib feem ntawm ib lub tsev uas txuas rau cov av. Ib lub hauv paus pov hwm lub tsev kom txhob puas tsuaj thaum raug cua daj cua dub thiab thaum raug lwm yam uas phem. Ib lub hauv paus zoo faib qhov hnyav rau ntawm ib thaj tsam loj zog kom cov av thiaj li tsis tog mus thiab ua kom tiaj thiaj li ua tau ib lub tsev.

Yuav tsum muab ib lub hauv paus cog rau hauv cov av khov kho kom lub tsev uas nyob saud yuav nyob ruaj khov thaum sij hawm dhau mus. Thiab muaj tej lub tsev uas siv tej pas hlau kom muab lub tsev lub hauv paus cog rau sab txheej hauv qab uas muaj pob zeb tawv tawv thiab khov khov tiag hauv qab cov av thiab cov xuab zeb.

Ib yam li no, peb yuav tsum muab peb lub neej lub hauv paus cog rau ntawm lub pob zeb uas yog Yexus Khetos yog peb yuav nyob ruaj nrees. txheem Tej kev khi lus thiab cov kab ke dawb ceev ntawm tus Cawm Seej txoj moo zoo yeej zoo li tej pas hlau uas cog kom cov pob zeb tawv tawv txheej hauv qab txheem tau lub tsev. Txhua zaus peb rau siab txais, nco ntsoov, thiab ua raws li peb tej kev khi lus, ces peb muab tej pas hlau ntawm peb lub neej cog rau hauv “lub pob zeb” uas yog Yexus Khetos peb thiaj li nyob taus khov kho thiab ruaj nrees ntxiv.

“Yog li ntawd, tus uas ntseeg Vajtswv yeej yuav muaj kev cia siab rau ib lub ntiaj teb uas zoo dua, muaj tseeb tiag, twb yog ib qho chaw nyob ntawm Vajtswv sab tes xis, txoj kev cia siab ntawd twb yog los ntawm kev ntseeg los, yog qhov uas txheem tib neeg tus ntsuj plig, uas yuav ua rau lawv ruaj thiab khov kho, ua tej yam uas zoo tas mus li, uas coj lawv mus qhuas Vajtswv.”¹¹

Peb hloov zuj zus kom “muaj ib hnub,”¹² “kev tsim txiaj txhawb [peb] tej kev xav kom tsis tu ncua,” peb “txoj kev tso siab … muaj zog tuaj nyob ntawm Vajtswv xub ntiag,” thiab “tus Vaj Ntsuj Plig Dawb Huv [ua] peb tus khub tsis tu tsis tseg.”¹³ Peb haj yam nyob tau ruaj nrees, khov kho, thiab tsis ntxhov siab.¹⁴ Thaum peb txhim tsa peb lub hauv paus nyob rau saum tus Cawm Seej, peb tau koob hmoov “ua siab tus”—kom paub tias Vajtswv yog peb Leej Txiv Saum Ntuj Ceeb Tsheej, peb yog Nws cov me nyuam, thiab Yexus Khetos yog peb tus Cawm Seej.

Tus Tswv muab tej lub sij hawm dawb ceev thiab tej qhov chaw dawb huv kom pab peb hnov thiab kawm txog kev ua siab tus.

Piv txwv hais tias, Hnub Caiv yog Vajtswv hnub, ib lub sij hawm dawb ceev uas Nws tshwj cia kom nco ntsoov thiab hwm Vajtswv los ntawm Leej Tub, ua cov kab ke pov thawj hwj, thiab txais tej kev khi lus dawb ceev thiab rov qab khi tej lus ntawd. Txhua lub lim tiam peb hwm tus Tswv thaum peb kawm vaj lug kub hauv tsev thiab nrog haiv neeg ntseeg¹⁵ thaum peb mus rau kev sib ntsib txais lub cim nco txog thiab lwm yam kev sib ntsib. Thaum txog Nws hnub dawb huv, peb tej kev xav, tej yam peb ua, thiab xeeb ceem yog tej cim uas peb pub rau Vajtswv qhia rau Nws tias peb hlub Nws npaum li cas.¹⁶ Txhua Hnub Caiv, yog peb txaus siab ua, ces peb yuav ua siab tus thiab paub tias Vajtswv yog peb Leej Txiv Saum Ntuj Ceeb Tsheej, peb yog Nws cov me nyuam, thiab Yexus Khetos yog peb tus Cawm Seej.

Ib yam tseem ceeb uas peb ua thaum Hnub Caiv yog txoj kev “mus rau hauv lub tsev thov Vajtswv thiab fij [peb] tej cim nco txog thaum yog [tus Tswv] hnub dawb huv.”¹⁷ “Lub tsev thov Vajtswv” uas peb sib sau ua ke haud thaum Hnub Caiv yog tej lub tsev sib ntsib thiab lwm qhov chaw—tej lub qhov chaw dawb huv rau peb hwm, teev tiam Vajtswv, thiab kawm txog Nws. Twb mub txhua lub tsev sib ntsib fij tseg los ua ib qho chaw rau tus Tswv tus Ntsuj Plig nyob thiab Vajtswv cov me nyuam yuav “yuav los paub txog lawv tus Txhiv Dim.”¹⁸ Yog peb txaus siab ua, ces peb yuav “ua siab tus” nyob hauv peb tej qhov chaw hwm Vajtswv thiab yuav paub hais tias Vajtswv yog peb Leej Txiv Saum Ntuj Ceeb Tsheej, peb yog Nws cov me nyuam, thiab Yexus Khetos yog peb tus Cawm Seej.

Lub tuam tsev kuj yog lwm lub qhov chaw dawb huv uas tau muab tsa kom teev tiam thiab hwm Vajtswv thiab kawm txog tej yam tseeb mus ib txhis li. Peb xav, ua, thiab hnav ris tsho txawv lwm lub qhov chaw nyob huav tus Tswv lub tsev. Nyob hauv Nws lub tsev dawb huv, yog peb txaus siab ua, ces peb yuav ua siab tus thiab paub tias Vajtswv yog peb Leej Txiv Saum Ntuj Ceeb Tsheej, peb yog Nws cov me nyuam, thiab Yexus Khetos yog peb tus Cawm Seej.

Lub hom phiaj ntawm txoj kev muaj sij hawm dawb ceev thiab tej qhov chaw dawb huv yeej zoo ib yam: kom tsom ntsoov rau peb Leej Txiv Saum Ntuj Ceeb Tsheej thiab Nws txoj hau kev, tus Tswv Yexus Khetos thiab Nws txoj Kev Theej Txhoj, tus Vaj Ntsuj Plig Dawb Huv lub hwj chim, thiab tej lus cog tseg uas koom ua ke nrog cov kawb ke thiab tej kev khi lus dawb ceev los ntawm tus Cawm Seej txoj moo zoo.

Hnub no kuv rov qab qhia txog ib lub ntsiab cai uas kuv tau qhia ua ntej. Peb lub tsev yeej yuav tsum los muaj sij hawm dawb ceev thiab hloov los ua ib qhov chaw dawb huv, kom nyob haud tib neeg thiab tsev neeg thiaj yuav “ua siab tus” thiab paub tias Vajtswv yog peb Leej Txiv Saum Ntuj Ceeb Tsheej, peb yog Nws cov me nyuam, thiab Yexus Khetos yog peb tus Cawm Seej. Peb yeej yuav tsum tawm peb lub tsev kom teev tiam Vajtswv thaum Hnub Caiv thiab hwm Nws nyob hauv tus Tswv lub tsev. Tiam sis peb kuj yuav tsum rov qab los tsev nrog lub zeem muag thiab lub dag zog ntawm sab ntsuj plig uas peb txais tau hauv tej qhov chaw dawb huv ntawd peb thiaj li yuav muaj peev xwm tsom ntsoov rau tej lub hom phiaj tseem ceeb ntawm lub neej no thiab kov yeej tej kev ntxias uas peb raug hauv ib lub ntiaj teb uas poob mus.

Tej yam peb ua thaum Hnub Caiv, hauv lub tuam tsev, thiab hauv tsev, yuav tsum muaj tus Vaj Ntsuj Plig Dawb Huv lub hwj chim kom txhawb peb lub siab, thiab sib raug zoo nrog Leej Txiv thiab Leej Tub, nrog “ib txoj kev cia siab uas ci kawg nkaus”¹⁹ uas cia siab hais tias peb yuav txais Vajtswv tej lus cog tseg mus ib txhis li.

Vim lub tsev thiab lub Koom Txoos yeej koom ua ke hauv Khetos,²⁰ tej zaum peb yuav muaj teeb meem nyob ib puag ncig, tiam sis peb yuav tsis muaj kev ntxhov siab. Tej zaum peb yuav tsis to taub vim li cas peb raug tej xwm txheej thiab raug teeb meem, tiam sis peb yuav tsis poob siab. Tej zaum peb yuav raug tsim txom, tiam sis peb kuj yuav paub tias peb tsis nyob peb ib leeg.²¹ Peb txais tau dag zog ntawm sab ntsuj plig kom nyob khov kho, ruaj nrees, thiab ua raws nraim li qhov yog.

Kuv cog lus tias thaum peb ua peb lub neej lub hauv paus saum “lub pob zeb” uas yog Yexus Khetos, ces tus Vaj Ntsuj Plig Dawb Huv yuav foom koob hmoov rau peb kom peb ua siab tus uas ua rau peb paub thiab nco ntsoov tias Vajtswv yog peb Leej Txiv Saum Ntuj Ceeb Tsheej, peb yog Nws cov me nyuam, Yexus Khetos yog peb tus Cawm Seej, thiab peb yuav tau koob hmoov kom ua thiab kov yeej tej yam nyuaj.

Kuv muaj kev xyiv fab ua tim khawv tias Vajtswv yog peb Leej Txiv Saum Ntuj Ceeb Tsheej, peb yog Nws cov me nyuam, thiab Yexus Khetos yog peb tus Txhiv Dim thiab “lub pob zeb” ntawm peb txoj kev cawm seej. Kuv ua tim khawv li no los ntawm Yexus Khetos lub npe dawb ceev, amees.