Txhua Txhia Yam Muaj Qhov Fab Ntxeev

Tsis ntev tas los, thaum kuv tsav hauv ib lub nroog uas kuv tsis paub, kuv lem ua yuam kev, tsis yog txhob txwm ua, es ua rau kuv thiab kuv tus poj niam tsav tsheb hauv ib txoj kev loj ntev tsis ntev li tsis muaj qhov chaw rau wb tig rov qab. Wb ib tug phooj ywg tau caw wb tuaj thiab wb txhawj hais tias ntshe wb yuav tuaj lig.

Thaum wb nyob hauv txoj kev loj thiab nrhiav ib qho chaw rau wb tawm mus, kuv liam kuv tus kheej vim kuv tsis tau tsom ntsoov rau tus txheej txheem qhia kev. Qhov no ua rau kuv xav txog tej lub sij hawm hauv peb lub neej thaum peb txiav txim tsis yog thiab peb yuav tsum txo hwj chim thiab ua siab ntev ua neej ris lub txim mus txog thaum peb muaj peev xwm rov qab hloov peb lub neej.

Lub neej no yeej yog lub sij hawm rau peb xaiv ua tej yam. Peb Leej Txiv Saum Ntuj Ceeb Tsheej tau muab lub txiaj ntsim uas yog kev ywj siab xaiv kom peb thiaj li yuav kawm los ntawm tej yam uas peb xaiv—los ntawm tej uas peb xaiv yog lawm thiab tej yam uas peb xaiv tsis yog. Peb kho tej yam uas peb xaiv tsis yog thaum peb hloov siab lees txim. Ua li no thiaj li pab peb kawm vam meej. Leej Txiv Saum Ntuj Ceeb Tsheej txoj hau kev rau peb sawv daws yog kev kawm, kev loj hlob, thiab kev mus tom ntej kom txog thaum peb muaj txoj sia nyob mus ib txhis.

Txij thaum cov tub txib qhia kuv tus poj niam thiab kuv thiab wb tau koom lub Koom Txoos los, kuv twb txais kev tshoov siab los ntawm tej lus qhia tseem ceeb uas Lihais qhia nws tus tub Yakhauj nyob hauv Phau Ntawv Maumoos. Nws tau qhia Yakhauj hais tias, “tus Tswv uas yog Vajtswv cia rau tib neeg muaj kev ywj siab xaiv ua rau nws tus kheej”¹ thiab hais tias “yeej yuav tsum muaj tias, txhua yam nyias muaj nyias qhov fab ntxeev.”² Yog peb yuav siv peb txoj kev ywj siab xaiv, peb yuav tsum muaj qhov fab ntxeev uas peb xaiv tau. Yog li ntawd, Phau Ntawv Maumoos kuj qhia peb tias peb “twb tau txais kev qhia txaus”³ thiab tau muab “Khetos tus Ntsuj Plig”⁴ rau txhua leej txhua tus kom peb “paub qhov zoo thiab qhov phem.”⁵

Nyob hauv lub neej no peb muaj ntau yam tseem ceeb uas peb yuav tsum xaiv. Xws li:

• Xaiv seb peb yuav ua raws li los sis tsis ua raws li Vajtswv cov lus txib.

• Xaiv kom muaj kev ntseeg thiab pom tias thaum twg muaj tej txuj ci tseem ceeb los sis tsis ntseeg tos seb muaj dab tsi tshwm sim ua ntej peb xaiv kom ntseeg.

• Xaiv kom tso siab rau Vajtswv los sis ntshai tos lwm yam teeb meem uas yuav los tag kis.

Ib yam li kuv lem rau txoj kev tsis yog, qhov uas peb raug lub txim ntawm peb tej kev txiav txim tsis zoo yeej yuav ua rau peb mob heev vim peb yuav tsum liam peb tus kheej xwb. Txawm li ntawd los, peb yeej xaiv tau kom txais kev nplij siab dhau los ntawm tus txheej txheem hloov siab lees txim, kho tej yam uas tsis yog lawm, thiab kawm tej yam uas yuav hloov peb lub neej.

Tej lub sij hawm peb kuj yuav raug qhov fab ntxeev thiab tej kev sim siab los ntawm tej yam uas peb tswj tsis taus, xws li:

• Thaum peb noj qab nyob zoo thiab thaum peb raug mob.

• Muaj kev thaj yeeb thiab muaj kev tsov kev rog.

• Muaj hnub muaj hmo thiab muaj lub caij ntuj sov thiab lub caij ntuj no.

• Muaj sij hawm ua hauj lwm ces muaj caij so.

Txawm yog peb xaiv tsis taus tej xwm txheej no vim tias tej no tshwm sim xwb, peb tseem xaiv tau seb peb yuav ua li cas txog tej ntawd. Peb xaiv tau kom xav zoo los sis xav phem txog tej ntawd. Peb muaj peev xwm kawm los ntawm xwm txheej ntawd thiab thov peb tus Tswv pab thiab txhawb nqa peb los sis peb yuav xav tias peb nyob peb tus kheej xwb es peb yuav tsum raug kev sim siab no peb ib leeg xwb. Peb hloov tau peb tus kheej raws li qhov tshiab, los sis peb xaiv tau kom tsis txhob hloov dab tsi li. Thaum tsaus ntuj nti lawm, peb taws teeb los tau. Thaum lub caij ntuj no no, peb yuav tau xaiv kom hnav ris tsho sov. Thaum muaj kev mob kev nkees, peb nrhiav kev kho mob thiab kev pab peb sab ntsuj plig. Peb xaiv peb yuav ua li cas thaum raug tej xwm txheej no.

Hloov, kawm, nrhiav, xaiv hais txog tej yam yus ua. Peb yog cov neeg uas ua taus tej yam thiab tsis yog neeg uas raug tej yam xwb. Cia peb nco ntsoov tias Yexus tau cog lus tias Nws yuav “nws yuav ris nws cov neeg tej kev mob thiab tej kev nkeeg … kom nws yuav paub pab” peb thaum peb tig mus rau Nws.⁶ Peb xaiv tau kom ua peb lub hauv paus saum lub pob zeb uas yog Yexus Khetos, yog li ntawd thaum khaub zig cua tuaj ces “tej ntawd yuav tsis muaj hwj chim kov yeej peb.”⁷ nws tau cog lus tias “tus uas yuav los, [Nws] yuav txais yuav tus ntawd; thiab cov uas los cuag [Nws] tau koob hmoov.”⁸

Nim no, tshuav ib lub ntsiab cai uas tseem ceeb kawg li. Lihais qhia tias “yuav tsum muaj tias txhua txhia yam nyias yeej muaj nyias qhov fab ntxeev.”⁹ Qhov no txhais tias tej qhov fab ntxeev ob sab nyias nyob ze nyias. Tej lub sij hawm ob qho ntawd yeej koom ua ke. Peb yuav tsis paub kev xyiv fab tsuas yog peb tsis tau paub kev tu siab. Thaum peb tshaib plab ces peb zoo siab thaum peb muaj txaus noj lawm. Peb yuav tsis paub qhov tseeb yog tias peb tsis tau raug lwm tus tej kev ntxias.

Tej yam fab ntxeev no yeej zoo li ob sab ntawm ib lub npib nyiaj. Yeej muaj ob sab txhua lub sij hawm. Charles Dickens tau sau ntawv txog lub tswv yim no hais tias “Yog lub caij nyoog zoo tshaj plaws, kuj yog lub caij nyoog phem tshaj plaws.”¹⁰

Cia kuv hais lus piv txwv txog kuv lub neej. Kev sib yuav, kev muaj ib tsev neeg, thiab kev muaj me nyuam twb ua rau kuv thiab kuv tus poj niam wb muaj kev xyiv fab ntau tshaj lwm yam hauv wb lub neej tiam sis kuj muaj kev mob, kev nyuaj siab txhawj xeeb ntau tshaj thaum ib tug hauv wb tsev neeg raug ib yam dab tsi. Tom qab txoj kev xyiv fab thiab kev zoo siab nrog wb cov me nyuam los kuj muaj tej lub sij hawm thaum lawv raug kev mob kev nkees, nyob hauv lub tsev kho mob, thiab muaj tej hmo thaum peb pw tsis tsaug zog vim txhawj dhau, tiam sis kuj muaj tej zaj lus thov Vajtswv thiab cov koob hmoov pov thawj hwj uas nplij peb lub siab. Tej yam no qhia peb tias peb tsis nyob peb ib leeg thaum peb raug txom nyem, thiab tej no kuj qhia peb tias peb muaj peev xwm ris npaum li cas thaum muaj tus Tswv txoj kev pab. Tej yam no twb hloov peb lub siab raws li qhov zoo, thiab yeej tsim nyog rau peb kov yeej tau tej yam ntawd. Peb tsis tau los hauv lub ntiaj teb no kom kawm tej no los?

Nyob hauv cov vaj lug kub kuj muaj tej zaj lus tseem ceeb thiab:

• Lihais tau qhia nws tus tub Yakhauj hais tias qhov uas nws raug txom nyem hauv roob moj sab qhua tau pab nws paub Vajtswv txoj kev zoo thiab “[Vajtswv]yuav fij [nws] tej kev txom nyem los ua tej yam uas pab tau [nws].”¹¹

• Thaum Joseph Smith raug kaw hauv lub Tsev Kaw Liberty, tus Tswv qhia nws tias “tej yam no yuav muab kev kawm rau [nws], thiab yuav zoo rau [nws].”¹²

• Thiab, Yexus Khetos txoj kev txi uas kav ib txhis li yeej yog kev raug mob thiab raug txom nyem loj tshaj plaws, tiam sis kuj ua rau tag nrho Vajtswv cov me nyuam txais tau cov koob hmoov ntawm Nws txoj Kev Theej Txhoj.

Thaum twg muaj kev tshav ntuj, kuj muaj duab ntxoov ntxoo. Dej nyab ua kom tej yam raug puas tsuaj, tiam sis kuj cia tej yam loj hlob tuaj. Kev los kua muag vim muaj kev tu siab yuav hloov kom los kua muag vim yus zoo siab. Kev tu siab thaum ib tug uas peb hlub tas sim neej no yuav hloov kom muaj kev xyiv fab thaum rov qab sib ntsib dua. Thaum muaj kev tsov kev rog thiab kev raug puas tsuaj, kuj muaj ntau lub sij hawm thaum tib neeg ua siab zoo thiab hlub cov uas raug tej ntawd thaum lawv muaj “qhov muag [uas] pom dab tsi [thiab] muaj qhov ntsej [kom] hnov lus.”¹³

Lub ntiaj teb niaj hnub nim no yeej muaj kev ntshai thiab kev txhawj xeeb ntau—kev ntshai txog qhov uas peb yuav raug dab tsi thaum yav tom ntej. Tiam sis Yexus tau qhia peb kom tso siab rau Nws thiab “ntsia ntsoov [Nws] nrog txhua txoj kev xav; tsis txhob ua xyem xyav, tsis txhob ntshai.”¹⁴

Cia peb ua tib zoo saib ob sab ntawm txhua lub nyiaj npib uas peb txais tau hauv lub neej no. Txawm yog peb tsis txawj pom ob sab thaum tib lub sij hawm, peb yuav paub thiab ntseeg tias kuj muaj ib sab ntxiv.

Peb yuav paub tseeb hais tias tej kev nyuaj siab, kev txom nyem, thiab kev mob kev nkees tsis yog peb; tiam sis yog qhov uas peb ua li cas txog tej ntawd uas yuav pab peb kawm thiab los nyob ze Vajtswv. Yog peb tus cwj pwm thiab tej yam uas peb xaiv uas ua rau peb hloov ntau dua li tej teeb meem uas peb raug.

Thaum noj qab nyob zoo, cia li zoo siab thiab ua Vajtswv tsaug txhua lub sij hawm. Thaum raug mob, ua siab ntev kawm thiab paub tias qhov no hloov taus raws li Vajtswv lub siab nyiam. Thaum nyuaj siab, ntseeg tias yuav muaj kev zoo siab tsis ntev; nyaj peb pom tsis taus tam sim no xwb. Hloov koj txoj kev xav kom tsom ntsoov rau tej yam zoo uas los ntawm tej teeb meem, vim yeej muaj li ntawd ib yam thiab! Ris Vajtswv txiaj txhua lub sij hawm. Xaiv kev ntseeg. Xaiv kom ntseeg Yexus Khetos. Xaiv kom tso siab rau Vajtswv tsis tu tsis tseg. Xaiv kom “xav txog tej yam xilethi-aus,” ib yam li Thawj Tswj Hwm Russell M. Nelson qhia peb!¹⁵

Cia peb nco ntsoov txog peb Leej Txiv Saum Ntuj Ceeb Tsheej txoj hau kev zoo rau peb. Nws hlub peb thiab txib Nws Leej Tub uas Nws Hlub kom pab peb thaum peb raug sim siab thiab qhib lub qhov rooj rau peb kom rov qab mus cuag Nws. Yexus Khetos muaj txoj sia nyob thiab tos ntsoov nyob ntawd txhua lub sij hawm, tos peb xaiv kom hu Nws los pab peb, muab dag zog thiab kev cawm seej rau peb. Kuv ua tim khawv txog tej yam no, los ntawm Yexus Khetos lub npe, amees.