Ua Tib Zoo los sis Lam Tau Lam Ua

Muaj ib zaug kuv pom ib daim paib tiv ntawm ib lub qhov rais rau ib lub taj laj uas hais tias: “Kev Zoo Siab, $15.00.” Kuv yeej xav paub saib $15 yuav yuav tau kev zoo siab npaum li cas, ces kuv thiaj li nkag mus saib. Kuv tsuas pom tej yam khoom pheej yig thiab khoom ua si dog dig xwb—kuv twb tsis pom ib yam dab tsi uas yuav ua rau kuv muaj kev zoo siab raws li daim paib hais li! Tau ntau xyoo los no, kuv yeej xav txog daim paib ntawd thiab xav hais tias yooj yim rau peb nrhiav kev zoo siab ntawm tej yam pheej yig los sls tej yam uas tsis kav ntev. Ua cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb muaj hmoov kawg uas peb paub tias yuav nrhiav tau kev zoo siab li cas thiab nrhiav tau qhov twg. Twb yog nrhiav tau thaum peb ua tib zoo ua neej raws li peb tus Tswv thiab tus Cawm Seej Yexus Khetos txoj moo zoo thiab rau siab hloov los ua neeg zoo li Nws.

Peb muaj ib tug phooj ywg zoo heev uas ua ib tug tsav lub tsheb ciav hlau. Muaj ib hnub thaum nws tsav lub tsheb ciav hlau, nws txawm pom hais tias muaj ib lub tsheb nres pem hauv ntej ntawm txoj kev tsheb ciav hlau. Nws pom tau hais tias lub tsheb daig lawm ces yuav mus tsis dhau txoj kev tsheb ciav hlau. Nws cia li nias kiag qhov uas muaj kam ceev, kom thiaj li cheem tau tag nrho cov tsheb ciav hlau uas ntev yuav luag ib mais (1.2 km) thiab tseem thauj ib co khoom hnyav npaum li 6,500 toos (5,900 metric toos). Txawm li cas los, yeej yuav cheem tsis tau lub tsheb ciav hlau kom tsis txhob nrau lub tsheb li. Muaj hmoov kawg uas cov neeg hauv lub tsheb hnov lub tswb ntawm lub tsheb ciav hlau nrov ces lawv khiav tawm tag ua ntej ob lub tsheb sib nrau. Thaum peb tus phooj ywg uas tsav lub tsheb ciav hlau tseem nrog tus tub ceev xwm sib tham, ib tug poj niam uas chim heev los rau ntawm nkawd. Nws nthe heev heev hais tias nws yog tus uas pom txhua yam thiab ua tim khawv hais tias tus tsav lub tsheb ciav hlau yeej tsis sim lem lub tsheb ciav hlau kom tsis txhob nrau lub tsheb li.

Ham tsis, yog hais tias tus tsav lub tsheb ciav hlau sim lem lub tsheb ciav hlau tawm ntawm txoj kev tsheb ciav hlau kom tsis txhob nrau lub tsheb, ces tag nrho leej tsheb ciav hlau yuav nres nkaus thiab lub tsheb ciav hlau yuav mus tsis taus lawm. Muaj hmoov kawg uas lub tsheb ciav hlau cov log khawm ruaj ruaj rau txoj kev tsheb ciav hlau thiab mus ncaj qha rau pem hauv ntej xwb txawm hais tias muaj dab tsi thaiv pem hauv ntej. Peb muaj hmoov kawg, uas peb taug ib txoj kev thiab, txoj kev khi lus uas peb twb cog lus tseg thaum peb ua kev cai raus dej los ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Txawm hais tias yeej yuav muaj dab tsi thaiv peb kev, los yog hais tias peb rau siab taug txoj no mus ces nws yuav coj peb mus rau txoj sia nyob mus ib txhis uas peb xav mus txog.

Qhov uas piav txog tsob ntoo uas cawm txoj sia yog ib qho kev qhia hais tias thaum peb lam tau lam ua xwb ces peb yuav plam ntawm txoj kev khi lus mus. Xav saib tus nqaj hlau thiab txoj kev ncaj thiab nqaim, los sis txoj kev khi lus, yuav coj peb ncaj qha mus rau ntawm tsob ntoo uas cawm txoj cia, uas muaj tag nrho tej koob hmoov ntawm tus Cawm Seej thiab Nws txoj kev Theej Txhoj rau cov uas rau siab ntseeg. Kuj muaj ib tug dej uas piv tau tias yog tej kev qias neeg ntawm lub ntiaj teb. Vaj lug kub qhia hais tias tus dej no “ntws raws” txoj kev tab sis ntws “ze” tso ntoo xwb, tsis yog ntws mus rau tsob ntoo kiag. Lub ntiaj teb muaj ntau yam uas yuav dag tau cov neeg uas Vajtswv xaiv tseg, yuav ua kom lawv lam tau lam ua neej raws li lawv tej kev khi lus—ces qhov no coj lawv mus ze tsob ntoo xwb, tab sis tsis coj mus rau ntawm ntsoo tsob kiag. Yog hais tias peb tsis ua ib tib zoo ua neej raws raim li peb tej kev khi lus, ces tej zaum peb tej kev lam tau lam ua yuav coj peb mus rau txoj kev tsis zoo los sis yuav coj peb mus koom nrog cov uas twb mus rau hauv lub tsev loj thiab dav lawm. Yog hais tias peb tsis ua tib ua zoo, tej zaum peb yuav poob mus rau tus dej qias neeg.

Yeej muaj txoj kev ua tib zoo thiab lam tau lam ua ntawm txhua yam, yeej suav txoj kev ua neej raws li txoj moo zoo tib si thiab. Thaum peb xav txog peb txoj kev cog lus rau tus Cawm Seej, peb puas ua tib zoo ua los sis lam tau lam ua? Vim hais tias peb yog tib neeg, puas yog qee zaum uas peb yeej cia li ua tej uas tsis tshua zoo los sis ua tej yam zoo xyaw tej yam tsis tshua zoo? Qees zaum peb yeej cia li hais tias, “txawm li cas”, “tshuas yog” los sis “tab sis” mas, rau cov yaj saub tej lus qhuab qhia los sis kev ua tib zoo ua neej raws li txog moo zoo, thaum peb hais li no ces twb yog peb hais tias, “Cov lus qhuab qhia ntawm tsis yog hais rau kuv.” Txawm peb xav li no ntau npaum li cas los, qhov tseeb tiag, qhov tsis yog yeej tsis yog!

Cov tub hluas ntxhais hluas zaj ntsiab lus rau 2019 yog muab hauv Yauhas 14:15 los, uas tus Tswv hais tias: “Yog nej hlub kuv, cia li coj kuv tej lus txib.” Yog peb hais tias peb hlub Nws, ua li cas peb tsis ua tib zoo ua lub neej raws li Nws cov lus txib?

Kev ua tib zoo ua neej raws li txoj moo zoo yeej tsis txhais tau hais tias yuav tsum coj nruj nruj heev. Nws txhais tau hais tias kom peb coj zoo thiab ua zoo li Yexus Khetos ib tug thwj tim. Thaum peb xav txog qhov sib txawv ntawm kev ua tib zoo ua thiab kev lam tau lam ua ntawm kev ua neej raws li txoj moo zoo, ces xav txog tej no:

Peb puas ua tib zoo teev tiam rau hnub Caiv thiab puas npaj mus noj lub cim nco txog txhua lub lim tiam?

Peb puas yuav ua tib zoo thov Vajtswv thiab kawm vaj lug kub los sis rau siab kawm hauv kev qhia Los, Nrog Kuv Mus—Rau Tib Leeg and Tsev Neeg?

Peb puas ua tib zoo teev tiam hauv lub tuam tsev thiab peb puas ua tib zoo ua neej raws tej kev khi lus uas peb cog tseg thaum peb ua kev cai raus dej thiab hauv lub tuam tsev? Peb puas ua tib zoo hnav ris tsho zoo thiab npog peb lub cev, thaum peb nyob ntawm tej chaw dawb ceev? Peb puas ua tib zoo hnav tej tsoos tsho los ntawm lub tuam tsev? Los sis puas yog peb lam tau lam hnav ris tsho raws li lub ntiaj teb?

Peb puas ua tib zoo saib xyuas cov neeg uas peb mus txhawb pab thiab ua peb txoj hauj lwm hauv lub Koom Txoos, los sis peb lam tau lam ua xwb?

Peb puas ua tib zoo los sis lam tau lam nyeem txhua yam thiab saib txhua yam hauv TV thiab hauv peb lub xov tooj? Peb puas ua tib zoo saib tej lus peb hais? Los sis peb lam tau lam hais lus phem?

Yog hais tias peb ua tib zoo ua raws li tej kev cai hauv phau ntawv Ntxiv Dag Zog rau cov Tub Hluas Ntxhais Hluas, ces peb yuav tau koob hmoov thiab yuav pab peb nyob ruaj hauv txoj kev khi lus. Txawm hais tias yog sau rau cov tub hluas ntxhais hluas xwb los, tej kev cai no yeej yuav tsis tag kas nuv thaum peb tawm hauv lub Koom Haum Tub Hluas thiab Koom Haum Ntxhais Hluas mus lawm. Tej kev cai no yeej yog rau peb txhua leej txhua tus, txhua lub sij hawm. Thaum peb rov qab kawm tej kev cai no tej zaum yuav pab peb ua tib zoo ua neej raws li txoj moo zoo.

Peb yuav tsum tsis txhob muab peb tej kev cai no saib qis vim lwm tus neeg tsis nyiam. Peb yog Yexus Khetos cov thwj tim, ces peb yuav tsum pab txhawb nqa kom lwm tus neeg, nyob rau qhov chaw siab, chaw dawb ceev kom lawv thiaj li tau koob hmoov thiab.

Kuv caw kom peb sawv daws mloog zoo saib tus Vaj Ntsuj Plig Dawb qhia kom peb yuav kho peb lub neej li cas kom thiaj ua tib zoo ua tau raws li peb tej kev khi lus. Tab sis kuv thov nej sawv daws kom tsis yws yws txog lwm tus neeg uas tab tom taug txoj kev no thiab. “Txoj kev txiav txim yog kuv li, tus Tswv hais li.” Peb txhua tus tseem tam tom loj hlob tuaj thiab yuav hloov.

Zaj dab neeg hauv Phau Ntawv Maumoos uas hais txog cov neeg Alixais uas tsis muaj siab ntseeg lawm ua rau kuv xav tsis thoob li. Lawv pleev ib lub cim xim liab rau ntawm lawv lub hauv pliaj kom sawv daws paub hais tias lawv tsis koom Yexus Khetos thiab Nws lub Koom Txoos ntxiv lawm. Hais txog qhov fab ntxeev, peb cov uas yog Yexus Khetos cov thwj tim ne, peb ho pleev lub cim zoo li cas rau peb tus kheej? Lwm tus neeg puas pom tau tus Cawm Seej tus meej yim ntawm peb lub ntsej muag thiab puas yuav paub hais tias peb yog cov sawv cev rau Nws vim peb ua tib zoo coj tus tus?

Peb yog cov neeg khi lus, ces peb yuav tsum ua neej kom txawv cov neeg feem coob hauv lub ntiaj teb. Lawv hu peb ua “ib haiv neeg txawv”—qhov no yog ib qho zoo heev! Xws li lub ntiaj teb tam tom muaj kev phem zuj zus, ces peb yuav tsum rau rau siab taug txoj kev uas yuav coj peb mus rau tus Cawm Seej, ua kom txoj kev khi lus thiab lub ntiaj teb tej kev ntxias nyob sib nrug deb.

Thaum kuv xav txog txoj kev zoo siab nyob mus ib txhis, kuv pom tau hais tias qee zaum peb tsis tshua paub tseeb. Yeej yuav muaj kev tsaus ntuj thaum peb taug txoj kev khi lus. Kev dag ntxias thiab kev lam tau lam ua yuav ua rau peb maj mam plam zuj zus ntawm peb txoj kev khi lus mus ces peb yuav ntsib kev tsaus ntej ntawm lub ntiaj teb. Yog thaum muaj li no lawm ces, peb tus yaj saub Thawj Tswj Hwm Russell M. Nelson, tau hais kom peb cia li tsuag tsuag rov qab los taug txoj kev khi lus. Kuv zoo siab kawg uas muaj txoj kev hloov siab lees txim thiab muaj tus Cawm Seej txoj Kev Theej Txhoj.

Peb yeej yuav ua tsis tau ib lub neej zoo tag nrho. Tsuas muaj tib tug neeg uas thiaj ua tau lub neej zoo tag nrho thaum nws nyob hauv lub ntiaj teb thileti-aus no xwb. Tus ntawd yog Yexus Khetos. Cov viv ncaus thiab cov nus, txawm hais tias peb yeej tsis zoo tag nhro los, peb yeej muaj peev xwm ua neeg tsim nyog: tsim nyog noj lub cim nco txog, tsim nyog txais tej koob hmoov hauv lub tuam tsev, thiab tsim nyog txais tau kev tshwm sim.

Vaj Ntxwv Npeyamis ua tim khawv txog tej koob hmoov thiab kev zoo siab uas yuav muaj los rau cov uas ua tib zoo ua raws li tus Cawm Seej: “Thiab tsis tas li ntawd, kuv thov kom nej xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig; thiab yog lawv rau siab ntseeg mus kom txog thaum kawg Vajtswv yuav txais lawv mus rau hauv ceeb tsheej, xwv kom lawv thiaj yuav nrog Vajtswv nyob hauv qhov chaw uas muaj kev zoo siab tsis txawj kawg.”

$15.00 yuav puas tau kev zoo siab? Yuav tsis tau. Kev zoo siab tiag tiag uas kav ntev yog los ntawm kev ua xyuam xim coj raws li Yexus Khetos txoj moo zoo. Los ntawm Yexus Khetos lub npe, amees.