Koob Hmoov Nplua Mias

Kuv cov kwv tij thiab cov muam, peb Leej Txiv Saum Ntuj Ceeb Tsheej thiab Yexus Khetos xav foom koob hmoov rau peb txhua tus. Qhov uas peb yuav ua li cas kom siv thiab txais tau cov koob hmoov ntawd yeej yog qhov uas tib neeg sib cav thiab sib tham txog tau ntev lawm. Ib txhia hais tias cov koob hmoov yog nqi zog xwb; peb txais tau tsuas yog los ntawm peb tej hauj lwm xwb. Lwm tus hais tias Vajtswv twb xaiv cov uas Nws yuav foom koob hmoov rau thiab yuav ua li cas lawm—thiab hloov tsis tau tej kev txiav txim ntawd. Ob txoj kev xav no los muaj teeb meem. Cov koob hmoov uas los saum ntuj los tsis yog nqi zog uas peb txais tau thaum peb ua tej yam zoo thiab tsis yog peb tos ntsoov xwb seb peb puas yuav txais tau zoo li peb twv txiaj. Tsis yog li ntawd, qhov tseeb los tsis zoo ib yam li ntawd tiam sis yog ib qho tsim nyog rau ib Leej Txiv Saum Ntuj Ceeb Tsheej uas hlub cov uas yuav txais Nws qub txeeg qub teg—cov neeg ntawd yog peb. Qhov tseeb uas tau muab txum tim rov qab los qhia peb tias cov koob hmoov tsis yog nqi zog hlo li, tiam sis peb yeej yuav tsum ua tej yam raws li peb txoj kev ntseeg, thaum xub thawj thiab mus ntxiv.

Thaum peb xav txog qhov uas peb txais Vajtswv cov koob hmoov li cas, ces peb yuav muab cov koob hmoov uas los saum ntuj los piv rau ib pawg taws loj loj heev. Cia li xav seb hauv lub plawv muaj ib pawg ntshiv taws me me, nyob rau saum los muaj ib co nplais taws. Tso tej pas ntoo saud, ces cav taws, thiab qhov kawg yog cov cav taws loj loj. Pawg taws no yuav kub hnyiab tau ntev, ua rau yus tau qhov kaj thiab ua rau yus sov sov tau ob peb hnub. Ces cia li xav tias nyob rau ntawm pawg taws no ib sab muaj ib tug ntais ntawv xwb, hom uas lub ntsis muaj tsuas tsiav.

Yog tias yuav ua kom qhov sov thiab qhov kaj tawm ntawm pawg taws ntawd, ces yuav tsum ntaus tus ntais ntawv thiab rauv cov ntshiv taws. Cov ntshiv taws yuav kub hnyiab sai sai thiab ua rau cov ntoo loj dua kub hnyiab. Thaum twg pib kub hnyiab, ces yuav kub hnyiab mus ntxiv txog thaum tag nrho cov taws kub tas los yog yus ua rau hluav taws tsis muaj pa.

Qhov uas yus zes tus ntais ntawv thiab rauv ntshiv taws yog tej yam me me uas yus ua kom qhov sov tawm ntawm cov taws. Mus txog thaum yus ntaus tus ntais ntawv, ces tsis muaj dab tsi, tsis hais pawg taws loj npaum li cas. Yog tias yus ntaus tus ntais ntawv tiam sis tsis rauv ntshiv taws, ces qhov kaj thiab qhov sov uas los ntawm tus ntais ntawv xwb yeej me me thiab qhov sov los ntawm pawg taws yuav tawm tsis tau. Thaum twg tsis muaj pa, ces hluav taws tuag xwb.

Zoo li ntawd, cov koob hmoov uas Vajtswv xav pub rau peb los peb yuav tsum ua tej yam kom txais tau—ua tej yam raws li peb txoj kev ntseeg Yexus Khetos. Kev ntseeg tus Cawm Seej yog ib lub ntsiab cai ntawm kev muaj peev xwm thiab hwj chim. Peb ua tej yam raws li kev ntseeg ua ntej; ces peb txais tau lub hwj chim—raws li Vajtswv lub siab nyiam thiab lub sij hawm. Qhov uas yuav tsum ua li ntawd ua ntej yeej tseem ceeb heev. Tej yam peb yuav tsum ua yeej me me thaum piv txog cov koob hmoov uas peb txais tau thaum kawg.

Cia li xav txog tej yam uas muaj thaum cov nab muaj taug los rau cov neeg Ixayees thaum ub thaum lawv tab tom mus rau thaj av uas tau cog lus tseg. Thaum cov nab uas muaj taug tom ces ua rau yus tuag. Tiam sis ib tug neeg tus mob los kho tau yog nws ntsia ib tug nab tooj uas Maxues muab ntsia rau ntawm ib tug ncej. Yuav siv zog npaum li cas kom ntsia ib yam dab tsi? Txhua tus uas ntsia twb txais tau lub hwj chim saum ntuj thiab tau kho lawv tus mob zoo. Lwm tus neeg Ixayees uas raug nab tom tsis tau ntsia tus nab tooj thiab lawv tuag. Tej zaum lawv tsis muaj kev ntseeg ntsia. Tej zaum lawv tsis tau ntseeg tias qhov uas yus ua ib yam yooj yim yuav uas rau yus txais tau kev kho mob uas tau cog lus. Los sis tej zaum lawv txhob txwm ua lawv lub siab tawv thiab xyeej Vajtswv tus yaj saub tej lus ntuas.

Lub ntsiab cai txog kev txais tau koob hmoov uas los ntawm Vajtswv los yeej nyob mus ib txhis. Ib yam li cov neeg Ixayees thaum ub, peb kuj yuav tsum muab siab rau ntseeg Yexus Khetos kom txais tau koob hmoov. Vajtswv tau qhia hais tias “Ua ntej ntuj tsim teb raug tau tshaj tawm ib txoj kev cai uas hloov tsis tau nyob saum ntuj ceeb tsheej ua ntej ntuj tsim teb raug, uas yog lub hauv paus rau tag nrho cov koob hmoov—thiab thaum peb tau ib txoj koob hmoov twg los ntawm Vajtswv los, twb yog los ntawm qhov uas peb ua raws li txoj kev cai uas yog lub hauv paus ntawm txoj koob hmoov ntawd.” Hais li ntawd los, yus tsis txais koob hmoov ua nqi zog—lub tswv yim ntawd tsis muaj tseeb—tiam sis yus yuav tsum ua neeg tsim nyog kom txais tau. Peb txoj kev cawm seej yog los ntawm Yexus Khetos txoj kev tshav ntuj thiab tej hauj lwm. Vim Nws txoj kev theej txhoj loj kawg li ces zoo li pawg taws tsis tu ib zaug li; ntshe tej yam me me peb ua yeej zoo li peb tsis tau ua dab tsi. Tiam sis tej ntawd tseem muaj nqi, thiab tej ntawd tseem ceeb; nyob hauv kev tsaus ntuj, ib tug ntais ntawv uas cig lawm los pom tau deb deb heev. Muaj tseeb tiag, pom tau tej ntawd saum ntuj ceeb tsheej vim yuav tsum muaj tej yam me me los ntawm peb txoj kev ntseeg kom muaj raws li Vajtswv tej lus cog tseg.

Xwv kom txais tau ib txoj koob hmoov los ntawm Vajtswv, cia li muab siab rau ntseeg, uas zoo li yus ntaus tus ntais ntawv kom txais tau txoj koob hmoov los saum ntuj. Ua piv txwv, ib lub hom phiaj ntawm kev thov Vajtswv yog kom txais tau cov koob hmoov uas Vajtswv kam pub rau peb tiam sis nyob ntawm seb peb puas thov kom tau. Amas tau thov kom txais tau kev siab hlub tshua thiab nws tus mob twb ploj lawm; nws tsis raug tsim txom vim nws nco qab txog nws tej kev txhaum ntxiv lawm. Nws txoj kev xyiv fab kov yeej nws txoj kev mob—tsuas yog vim nws thov nrog rau kev ntseeg Yexus Khetos. Lub zog kom hwj chim tawm los uas peb xav tau yog qhov uas peb muaj kev ntseeg Khetos txaus kom peb thov Vajtswv thiab lees Nws lub siab nyiam thiab lub sij hawm uas Nws yuav teb.

Feem ntau lub zog kom hwj chim tawm uas yuav tsum muaj kom tau koob hmoov tsis yog lam saib los thov xwb; yuav tsum pheej rov qab ua tej yam los ntawm kev ntseeg ntxiv. Thaum ib nrab ntawm tiam 19, Brigham Young tau qhia kom ib pawg Tsoom Haiv Neeg Ntseeg hauv Hnub Nyoog Kawg mus saib thiab ua neej nyob hauv Arizona, ib cheeb tsam qhuav qhuav nyob hauv Amelikas Qaum Teb. Tom qab lawv mus txog Arizona, pawg neeg ntawd tsis muaj dej thiab lawv ntshai tias lawv yuav tuag nqhis. Lawv tau thov Vajtswv pab. Tsis ntev twb tau los nag thiab los daus, lawv thiaj li muab lawv tej thoob puv dej thiab pub rau lawv cov tsiaj. Lawv zoo siab thiab rov qab muaj zog, es lawv rov qab mus rau Salt Lake City thiab qhuas txog Vajtswv txoj kev zoo. Thaum lawv rov qab los txog, lawv qhia txog tej yam lawv kawm rau Brigham Young thiab hais tias lawv txiav txim siab tias tsis muaj neeg nyob tau hauv Arizona.

Tom qab nws mloog lawv hais li cas, Brigham Young nug ib tug txiv neej hauv chav ntawd seb nws xav li cas lawv txoj kev mus thiab qhov txuj ci tseem ceeb ntawd. Tus txiv neej ntawd, Daniel W. Jones, teb hais tias, “Yog nyob ntawm kuv ces kuv yuav tso dej kom tej thoob puv, mus tom ntej ntxiv, thiab thov Vajtswv ntxiv.” Brigham Young tau tso tes rau Tij Laug Jones thiab hais tias, “Tus txiv neej no yuav ua tus thawj coj lwm zaus mus rau Arizona.”

Peb txhua tus nco txog tej lub sij hawm thaum peb mus tom ntej thiab rov qab thov Vajtswv—es tom qab ntawd peb twb tau txais koob hmoov. Tej yam los ntawm Michael thiab Marian Holmes lub neej qhia txog tej lub ntsiab cai no. Michael thiab kuv wb ua hauj lwm ua ke ua Xya Caum Coj Cheeb Tsam. Kuv yeej zoo siab thaum twg nws yuav thov Vajtswv hauv peb tej kev sib ntsib vim nws sab ntsuj plig muaj zog heev; nws txawj hais lus rau Vajtswv. Kuv nyiam mloog nws thov Vajtswv. Tiam sis, thaum nkawd nyuam qhuav sib yuav, Michael thiab Marian tsis thov Vajtswv los sis mus lub koom txoos. Nkawd maj heev vim muaj peb tug me nyuam yaus thiab ib lub koom haum ua tsev uas vam meej heev. Michael xav tias nws tsis yog ib tug neeg ntseeg zoo. Muaj ib hmo, nkawd tus npisov tuaj xyuas nkawd thiab yaum kom lawv pib thov Vajtswv.

Tom qab tus npisov mus, Michael thiab Marian txiav txim siab tias nkawd yuav sim thov Vajtswv. Ua ntej yuav pw, nkawd txhos caug rau lub txaj ib sab, thiab Michael tsis tshua txaus siab pib thov Vajtswv. Tom qab hais ob peb lo lus thov Vajtwv, Michael tsum kiag, thiab hais tias, “Marian, kuv tsis txawj.” Nws sawv thiab pib tawm mus, tiam sis Marian, tuav nws txhais tes, rub kom nws rov qab txhos caug, thiab hais tias, “Mike, koj txawj. Sim ua ib zaug ntxiv!” Vim nws yaum li no, Michael twb hais ib zaj lus thov Vajtswv tsis ntev.

Cov Holmes twb pib thov Vajtswv. Nkawd tus neeg zej zog caw nkawd tuaj koom lub koom txoos. Thaum nkawd nkag rau hauv chav teev ntuj thiab mloog zaj nkauj qhuas Vajtswv qhib, tus Ntsuj Plig ntxhi lus rau nkawd tias, “Qhov no muaj tseeb.” Tom qab ntawd, tsis muaj leej twg pom thiab tsis muaj leeg twg thov, tiam sis Michael pab nqa khib nyiab tawm lub tsev sib ntsib mus. Thaum nws ua li ntawd, nws tau txais kev tshoov siab, “Nov yog Kuv lub tsev.”

Michael thiab Marian tau ua hauj lwm hauv lub Koom Txoos thiab hauv nkawd pawg ntseeg thiab ceg txheem ntseeg. Nkawd ua kev cai sib khi ua ke, thiab nkawd peb tug me nyuam tau khi ua ke nrog nkawd. Muaj me nyuam ntxiv, lawv muaj 12 tug me nyuam thaum kawg. Ob tug Holmes tau ua qhov chaw tshaj tawm txoj moo zoo tus thawj tswj hwm thiab tus khub—ob zaug lawm.

Thawj zaug nws thov Vajtswv yog ib yam me me nws ua los ntawm kev ntseeg uas ua rau nws txais tau cov koob hmoov uas los saum ntuj los. Ob tug Holmes twb pab hluav taws los ntawm kev ntseeg loj tuaj thaum nkawd koom lub koom txoos thiab pab lwm tus. Lawv txoj kev rau siab ua cov thwj tim tau ntau xyoo yog qhov uas ua rau nkawd txoj kev ntseeg zoo li hluav taws loj heev uas tshoov peb lub siab.

Tiam sis, hluav taws yuav tsum muaj pa tsis tu tsis tseg kom cov ntoo kub hnyiab npaum li kub tau. Raws li Michael thiab Marian Holmes qhia, yuav tsum muaj kev ntseeg Khetos tsis tu tsis tseg kom hluav taws tsis tuag. Tej yam me me peb ua pab peb ua raws li peb tej kev khi lus thiab coj peb mus txais tau cov koob hmoov loj tshaj plaws uas Vajtswv pub tau rau peb. Tiam sis ua tau pa tsuas yog peb taug kev mus tsis tu tsis tseg. Tej lub sij hawm peb yuav tsum ua ib lub hneev nti thiab ib tug xib xub ua ntej peb txais tau kev tshwm sim kom paub peb yuav tsum nrhiav qhov twg kom tau zaub mov. Tej lub sij hawm peb yuav tsum ua tej cuab yeej ua ntej peb txais kev tshwm sim kom paub ua ib lub nkoj. Tej lub sij hawm, thaum tus Tswv tus yaj saub qhia, peb yuav tsum ua ib lub ncuav los ntawm roj thiab hmoov nplej me ntsis kom peb txais tau ib lub hub roj thiab ib lub tais hmoov nplej uas tsis paub tas. Thiab tej lub sij hawm peb yuav tsum “cia li ua siab tus thiab paub hais tias [Vajtswv] yog Vajtswv” thiab tso siab rau lub sij hawm Nws teem tseg.

Thaum nej txais ib txoj koob hmoov los ntawm Vajtswv, nej paub tias nej twb tau ua raws li ib txoj kev cai nyob mus ib txhis uas tswj hwm kev txais tau txoj koob hmoov ntawd. Tiam sis nco ntsoov tias txoj kev cai uas “hloov tsis tau” tsis yog raws nej lub sij hawm, es cov koob hmoov yuav los raws li lub sij hawm uas Vajtswv teem tseg. Cov yaj saub thaum ub uas xav tau lub ntuj ceeb tsheej “muab siab rau ntseeg mus txog hnub uas lawv tuag. Lawv tseem tsis tau tej uas Vajtswv cog lus tseg hais tias Vajtswv yuav muab pub rau lawv, tiam sis lawv cia siab hais tias yav tom ntej lawv yuav tau, lawv thiaj zoo siab tos.” Yog tias nej tseem tsis tau txais ib txoj koob hmoov uas nej xav tau los ntawm Vajtswv, nej tsis tas xav mus xav los seb nej yuav tsum ua li cas ntxiv. Tiam sis, cia li ua raws li Yauxej Xamiv tej lus ntuas kom “cia peb zoo siab hlo ua txhua yam uas peb muaj hwj chim ua tau; thiab tom qab ntawd … sawv twj ywm, nrog txoj kev tso siab hlo, … tos [Vajtswv] txhais npab tshwm sim los.” Muaj tej koob hmoov uas tau ceev cia rau yav tom ntej, tsis hais rau cov uas rau siab tshaj plaws ntawm Vajtswv cov me nyuam.

Rau lub hlis tas los, peb pib kawm hauv tsev uas lub Koom Txoos txhawb nqa kom kawm tau cov lus qhuab qhia, ntxiv zog rau peb txoj kev ntseeg, thiab pab tib neeg thiab tsev neeg nyob khov kho. Thawj Tswj Hwm Russell M. Nelson cog lus tias tej yam hloov no yuav pab peb sab ntsuj plig nyob tau, ua rau peb muaj kev xyiv fab los ntawm txoj moo zoo ntxiv, thiab ua rau peb hloov siab los ntseeg Leej Txiv Saum Ntuj Ceeb Tsheej thiab Yexus Khetos ntxiv. Tiam sis nyob ntawm peb seb peb puas tau cov koob hmoov no. Peb txhua tus lav ris txoj kev kawm los ntawm Come, Follow Me—For Individuals and Families, nrog cov vaj lug kub thiab lwm cov ntaub ntawv Come, Follow Me. Peb yuav tsum hais txog tej no nrog peb tsev neeg thiab phooj ywg thiab teem sij hawm thaum Hnub Caiv kom rauv taws. Los sis peb tso tau cov ntaub ntawv no nyob hauv ib pawg hauv peb tsev es cia qhov sov thiab qhov kaj nyob haud xwb.

Kuv caw nej rau siab ntseeg kom qhib lub hwj chim saum ntuj thiaj tau txais cov koob hmoov los ntawm Vajtswv. Cia li muab siab rau ntseeg kom ntaus tus ntais ntawv thiab rauv taws. Muab pa rau hluav taws thaum nej ua siab ntev tos ntsoov tus Tswv. Kuv hais tej lus caw no, kuv thov kom tus Vaj Ntsuj Plig Dawb Huv yuav coj nej kev, nej thiaj li yuav zoo li tus neeg rau siab ntseeg uas hais txog phau Paj Lug, uas txais tau “koob hmoov nplua mias.” Kuv ua tim khawv tias nej Leej Txiv Saum Ntuj Ceeb Tsheej thiab Nws Leej Tub, Yexus Khetos, muaj txoj sia nyob, nkawd xav txog nej, thiab zoo siab foom koob hmoov rau nej, los ntawm Yexus Khetos lub npe, amees.