Zoo Li Nws Tau Ua

Kwv yees li 18 lub hlis tas los, thaum lub caij nplooj ntoo zeeg xyoo 2017 kuv tus tij laug Mike uas muaj 64 xyoos qhia kuv tias nws muaj mob cancer hauv tus txiav. Nws kuj qhia kuv tias nws tus neeg qhia tom tsev tau foom koob hmoov pov thawj hwj rau nws thiab nws tau nrog nws tus npisov tham. Nws kuj xa daim duab rau kuv txog lub Tuam Tsev Oakland nyob ze lub tsev kho mob uas lawv pab kho nws, es nws sau ntawv hais tias “Saib kuv pom dab tsi los ntawm kuv chav kho mob.”

Tej yam nws hais txog neeg qhia tom tsev, cov koob hmoov pov thawj hwj, tus npisov thiab lub tuam tsev ua rau kuv xav tsis thoob npaum li nws tus mob cancer. Mike, ib tug pov thawj hauv lub Pov Thawj Hwj Aloos, twb tsis tau mus koom lub koom txoos yuav luag li 50 xyoo lawm.

Wb tsev neeg txhua tus yeej xav paub txog nws txoj kev vam meej ntawm sab ntsuj plig npaum li peb xav paub kev tawm tsam mob cancer zoo li cas, yog vim nws pheej nug tej yam txog Phau Ntawv Maumoos, lub hwj chim khi tsev neeg ua ke, thiab lub neej tom qab yus tuag. Ob peb hlis dhau mus ces tus mob cancer kis mus, ua rau Mike yuav tsum tau kev kho mob tshwj xeeb es nws los rau Utah thiab Qhov Chaw Kho Mob Cancer Huntsman.

Tsis ntev tom qab nws los txog, muaj ib tug tuaj xyuas Mike hu ua John Holbrook, nws yog pawg ntseeg qhov chaw tshaj tawm txoj moo zoo tus thawj coj hauv pawg ntseeg rau qhov chaw kho mob uas Mike nyob lawm. John hais tias “kuv paub tias Mike yog Vajtswv ib tug tub” thiab nkawd sib raug zoo thiab ua phooj ywg zoo, es yog li ntawd John los ua Mike tus kwv uas txhawb pab nws. John caw Mike kom hais cov tub txib tuaj xyuas, es kuv tus tij laug hais tias nws tsis kam, tiam sis ib lub hlis tom qab nkawd ua phooj ywg, John rov qab nug, piav rau Mike hais tias, “Kuv xav tias koj yuav nyiam mloog txog txoj moo zoo.” Zaum no Mike kam, nws thiaj li ntsib ob tug tub txib ntau zaus, thiab Npisov Jon Sharp tuaj xyuas thiab, es nkawd sib tham ntau ua rau Mike txais nws zaj koob hmoov los ntawm tus yawg suab, 57 xyoo tom qab nws ua kev cai raus dej.

Thaum lub Kaum Ob Hlis Ntuj xyoo tas los, tom qab nws ua txheej txheem ntau lub hlis lawm, Mike txiav txim siab kom tsis txhob ua kev kho mob cancer ntxiv lawm vim ua rau nws raug tej yam tsis zoo los ntawm cov tshuaj, thiab yuav tos seb nws yuav tuag thaum twg. Nws cov kws kho mob tau qhia peb tias Mike yuav ua neej nyob kwv yees li peb lub hlis ntxiv xwb. Thaum tib lub sij hawm no, nws nug tej yam txog txoj moo zoo ntxiv—thiab cov thawj coj pov thawj hwj tau tuaj xyuas thiab txhawb nqa nws ntxiv. Thaum peb mus xyuas Mike feem ntau peb pom ib Phau Ntawv Maumoos uas nws muab qhib tso rau saum lub rooj ze nws lub txaj thiab peb sib tham txog txoj moo zoo, cov yawm sij pov thawj hwj, lub tuam tsev thiab qhov uas tib neeg nyob mus ib txhis.

Thaum lub Kaum Ob Hlis Ntuj ib nrab, tom qab nws txais nws txoj koob hmoov yawg suab lawm, zoo li Mike muaj zog ntxiv thiab xav tias nws muaj zog nyob tau peb lub hlis ntxiv. Peb tau npaj kom nws nrog peb nyob thaum lub caij Christmas, Xyoo Tshiab thiab mus ntxiv. Thaum lub Kaum Ob Hlis Ntuj hnub tim 16, Npisov Sharp hu tuaj rau kuv, qhia kuv paub tias nws thiab ceg txheem ntseeg tus thawj tswj hwm tau xam phaj Mike, thiab nws tsim nyog txais lub Pov Thawj Hwj Mekixedes, thiab nws nug seb kuv puas khoom tuaj. Twb tau teem sij hawm ua kab ke ntawd thaum hnub Friday, lub Kaum Ob Hlis Ntuj hnub tim 21.

Thaum txog hnub ntawd, kuv tus poj niam, Carol, thiab kuv wb tuaj txog qhov chaw kho mob thiab cov kws kho mob ntsib wb nyob nws hoob sab nraud thiab qhia wb tias Mike mem tes tsis dhia. Wb nkag hauv hoob ntawd thiab pom tus yawg suab, nws tus npisov, thiab nws ceg txheem ntseeg tus thawj tswj hwm tos wb—ces Mike rua muag. Nws pom kuv thiab qhia tias nws hnov tau kuv thiab xav txais lub pov thawj hwj. Tsib caug xyoo tom qab tau tsa Mike ua ib tug pov thawj hauv lub Pov Thawj Hwj Aloos, kuv tau muaj cib fim, nrog rau nws cov thawj coj, muab lub Pov Thawj Hwj Mekixedes rau nws thiab tsa kuv tus tij laug ua ib tug txwj laug. Tsib teev tom qab ntawd, Mike tau tso lub ntiaj teb no tseg, thiab thaum nws hla daim ntaub thaiv ntsib wb niam wb txiv nws yog ib tug uas tuav lub Pov Thawj Hwj Mekixedes.

Ib xyoos tas los, Thawj Tswj Hwm Russell M. Nelson tau hu peb txhua tus kom peb saib xyuas peb cov kwv tij thiab cov muam raws li “ib txoj kev uas siab dua thiab dawb huv dua li qub.” Thawj Tswj Hwm Nelson qhia txog tus Cawm Seej tias “vim nov yog Nws lub Koom Txoos, peb cov uas yog Nws cov tub qhe yuav txhawb pab ib tug mus ib tug, ib yam li Nws tau ua. Peb yuav txhawb pab lawv los ntawm Nws lub npe, nrog Nws lub hwj chim thiab txoj cai, thiab nrog Nws txoj kev ua siab zoo.”

Tib neeg tau ua raws li Vajtswv tus yaj saub hais, vim lawv txhawb pab lwm tus nyob thoob plaws lub ntiaj teb, es lawv koom tes ua li ntawd, thaum cov mej zeej rau siab ua raws li tau txib lawv ua kom txhawb pab, thiab lawv txhawb pab lwm tus txawm tsis tau npaj ua ntej, vim lawv hlub zoo li Yexus Khetos hlub thaum muaj cib fim uas tsis tau paub txog ua ntej. Nyob hauv peb tsev neeg, peb twb pom txoj kev txhawb pab zoo li no.

John, uas yog Mike tus phooj ywg, nws tus tij laug uas txhawb pab, thiab qhov chaw tshaj tawm txoj moo zoo tus thawj tswj hwm dhau los, nws tau qhia nws cov tub txib hais tias, “yog muaj leej twg uas hais tias, ‘tsis xav kawm,’ tsis txhob tso tseg. Tib neeg yuav hloov siab.” Ces nws qhia peb hais tias, “Mike twb hloov siab ntau heev.” John yog ib tug phooj ywg ua ntej, nws yaum Mike thiab txhawb nqa nws—tiam sis John txoj kev txhawb pab tsis tau tsum tom qab nws tuaj xyuas Mike. John paub tias ib tug txhawb pab yog ib tug zoo dua li ib tug phooj ywg thiab kev ua phooj ywg loj tuaj thaum peb txhawb pab lwm tus.

Ib tug neeg tsis tas raug mob mob heev ntshe yuav tuag, zoo li kuv tus tij laug, kom xav tau lwm txoj kev txhawb pab. Tej yam lawv xav tau los muaj tej yam me tej yam loj, thiab muaj tej xwm txheej sib txawv. Ib tug uas tsis muaj tus khub; ib nkawm niam txiv uas tsis tshua muaj siab ntseeg; ib tug hluas uas nyuaj siab; ib tug niam tsev uas muaj ntau dhau ua; cov uas raug kev sim siab; cov uas muaj teeb meem ntawm nyiaj txiag, kev noj qab nyob zoo, los sis ntawm kev sib yuav—ntshe muaj teeb meem suav tsis txheeb. Tiam sis, ib yam li Mike, tsis muaj leej twg uas pab tsis tau, thiab yeej tsis lig dhau rau tus Cawm Seej txoj kev hlub.

Nyob hauv qhov website rau lub Koom Txoos uas hais txog kev txhawb pab, peb kawm tias “txawm muaj ntau lub hom phiaj uas qhia vim li cas peb txhawb pab lwm tus, peb yuav tsum ua hauj lwm vim peb xav pab lwm tus hloov siab los ntseeg ntxiv thiab hloov los ua neeg zoo li tus Cawm Seej ntxiv.” Txwj Laug Neil L. Andersen tau hais li no:

“Ib tug neeg uas muaj siab zoo yeej pab tau lwm tus kho lub log, thauj phooj ywg mus rau tus kws kho mob, noj su nrog ib tug uas tu siab, los yog luag thiab hais nyob zoo kom lwm tus zoo siab.

“Tiam sis ib tug uas ua raws li thawj txoj lus txib yeej yuav ua ntau dua li tej yam tseem ceeb no kom pab lwm tus.”

Thaum peb ua kev txhawb pab raws li Yexus Khetos tau ua, peb yuav tsum nco ntsoov tias qhov uas Nws hlub, txhawb nqa, pab, thiab foom koob hmoov rau lwm tus yog vim Nws muaj ib lub hom phiaj tseem ceeb dua li qhov uas lawv xav tau tam sim ntawd. Nws paub meej txog tej yam lawv xav tau txhua hnub thiab muaj kev khuv leej txog lawv tej kev txom nyem thaum Nws kho lawv tus mob, pub rau lawv noj, zam txim rau lawv, thiab qhia lawv. Tiam sis Nws yeej xav pab ntev dua li hnub no xwb. Nws xav kom cov nyob ib puag ncig coj raws li Nws, paub Nws, thiab hloov ua neeg zoo li Vajtswv.

Thaum peb nrhiav kev kom txhawb pab lwm tus zoo li Nws tau ua, peb yuav muaj cib fim kom tsis txhob xav txog peb tus kheej thiab txhawb nqa lwm tus. Tej cib fim no tej zaum yuav tsis yooj yim thiab yuav sim peb lub siab seb peb puas xav ua zoo li tus Xib Hwb tiag. Nws txoj kev pab uas loj tshaj plaws, Nws txoj Kev Theej Txhoj uas nyob mus ib txhis, ntshe tsis yooj yim hlo li. Nyob hauv phau Mathais, tshooj 25, peb kawm tias tus Tswv xav li cas txog peb, thaum peb ua zoo li Nws thiab xav ntsoov txog tej kev nyuaj siab, kev txom nyem, thiab tej teeb meem uas neeg coob raug, tiam sis feem coob tsis pom:

“Nej cov uas tau kuv txiv txoj koob hmoov, nej cia li los nyob lub teb chaws uas nws twb npaj cia rau nej puag thaum tsis tau tsim ntuj tsim teb los lawm.

“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev. …

“Thaum cov neeg ncaj ncees hnov li ntawd lawv yuav teb hais tias, Tus Tswv, thaum twg ais peb pom koj tshaib plab peb tau muab mov rau koj noj? los sis pom koj nqhis dej thiab muab dej rau koj haus no?

“Thaum twg ais koj tuaj ua qhua peb tau hu koj los so hauv peb tsev? …

“Vaj ntxwv yuav teb hais tias, Kuv qhia tseeb rau nej hais tias, thaum nej pab kuv cov kwv tij no ib tug, txawm yog tus ntawd tsis muaj hwj chim dab tsi li los yog, nej tseem pab nws thiab, qhov uas nej pab li ntawd twb yog nej pab kuv ntag.”

Txawm peb yog cov kwv tij los sis cov muam uas txhawb pab, los yog peb paub tias muaj leej twg xav tau ib yam dab tsi, tsim nyog uas peb nrhiav tus Ntsuj Plig txoj kev coj kev—ces ua li Nws qhia. Tej zaum peb xav paub peb yuav tsum ua li cas kom pab tau, tiam sis tus Tswv paub, thiab los ntawm Nws tus Ntsuj Plig Nws yuav qhia peb. Ib yam li Nifais uas “tus Ntsuj Plig tau coj [nws] kev, [nws] tsis paub ua ntej txog tej uas [nws] yuav ua,” tus Ntsuj Plig kuj yuav coj peb kev thaum peb sim ua li tej cuab yeej hauv tus Tswv txhais tes kom foom koob hmoov rau Nws cov me nyuam. Thaum peb nrhiav tus Ntsuj Plig txoj kev coj kev thiab tso siab rau tus Tswv, peb yuav muaj cib fim thiab sij hawm thaum peb ua tau thiab foom koob hmoov rau lwm tus—los yog hais tias, txhawb pab lawv.

Tej zaum muaj lwm lub sij hawm thaum peb pom lwm tus xav tau dab tsi tiam sis peb xav tias peb ua tsis taus txaus vim peb xav tias qhov peb muaj los tsis txaus. Yog peb xav ua “zoo li Nws tau ua” ces peb yuav txhawb pab los ntawm tej yam peb muaj peev xwm ua thiab tso siab tias tus Tswv yuav ua kom peb ua taus ntxiv kom foom koob hmoov rau “cov uas nrog peb koom ua ke hauv lub neej no.” Tej zaum ib txhia yuav pub sij hawm thiab siv lawv tej txuj ci kom pab; tej zaum lwm tus yuav hais lus zoo los sis siv lawv lub zog. Txawm yog peb xav tias peb tej kev ua hauj lwm tsis txaus los, Thawj Tswj Hwm Dallin H. Oaks tau qhia ib lub ntsiab cai tseem ceeb hais txog “me me thiab yooj yim.” Nws qhia tias tej yam me me thiab yooj yim muaj hwj chim heev vim tej ntawd ua rau yus muaj “tus Vaj Ntsuj Plig Dawb Huv nrog nraim [yus] nyob,” yog ib tug khub uas foom koob hmoov rau tus uas pub kev pab thiab tus uas txais.

Vim nws paub tias tsis ntev nws mam tas sim neej no, kuv tus tij laug Mike hais tias, “Xav tsis thoob uas mob cancer hauv tus txiav ua rau yus tsom ntsoov rau qhov uas tseem ceeb tshaj plaws.” Ua tsaug rau cov txiv neej thiab cov poj niam uas pom kev xav tau, tsis tau txiav txim, thiab txhawb pab zoo li tus Cawm Seej ua, es thiaj li tsis lig dhau rau Mike hloov siab. Ib txhia tej zaum yuav hloov siab ua ntej, lwm tus los tej zaum lawv yuav hloov siab hauv lub neej tom ntej. Txawm li ntawd los, peb yuav tsum nco ntsoov tias yeej tsis lig dhau thiab yeej tsis tau muaj leej twg uas tawm hauv txoj kev deb dhau kom Yexus Khetos txoj Kev Theej Txhoj uas nyob mus ib txhis pab tsis taus lawv.

Lub rooj sab laj thaum lub Kaum Hli Ntuj tas los, Txwj Laug Dale G. Renlund qhia tias “txawm peb ua yuam kev ntev npaum li cas … , txog lub sij hawm uas peb txiav txim hloov siab, Vajtswv pab peb rov qab los cuag Nws.” Tiam sis, kev txiav txim hloov siab li no feem ntau yog vim lwm tus caw yus ua li ntawd, xws li “Kuv xav tias koj yuav nyiam mloog txog txoj moo zoo.” Zoo li yeej tsis lig dhau rau tus Cawm Seej, ces yeej tsis lig dhau kom caw lwm tus.

Lub caij Easter ua rau peb rov qab muaj cib fim xav txog peb tus Cawm Seej Yexus Khetos txoj kev theej txhoj thiab tus nqi loj loj uas Nws them rau peb txhua tus—tus nqi uas “ua rau [Nws], tus zoo tshaj plaws ntawm tag nrho sawv daws, kom tshee hnyo vim yog txoj kev mob.” Nws hais tias, “Txawm li ntawd los, … kuv tau haus thiab ua tiav kuv tej kev npaj rau noob neej.”

Kuv ua tim khawv tias vim Nws “ua [li ntawd] tiav,” yeej yuav muaj kev cia siab. Los ntawm Yexus Khetos lub npe, amees.