Nej Phau Ntawv Qhia Txheej Txheem Siv lub Pov Thawj Hwj

Vim nej yog cov tub kawm ntawv, nej feem coob kuj txhawb nqa nej tej txuj ci, tej nej nyiam kawm, thiab nyiam ua los ntawm tej yam ntxim saib ntxim ua hauv tsev kawm ntawv los yog kawm nej tus kheej xwb, hauv tej pawg, tsis hais tej pawg uas sib tw ncaws pob ntaus pob.

Vim kuv nyiam ncaws pob ntaus pob txij thaum kuv hluas los, kuv yeej nyiam saib cov uas xyaum sib tw mus txog thaum lawv txawj heev. Yog leej twg xav txawj txawj ua ib yam dab tsi tiag tiag, ces qhov uas yus ib txwm muaj txuj ci ua los yus yuav tsum rau siab ntso, tso ntau yam tseg, thiab kawm thiab xyaum tsis tu tsis tseg. Cov neeg sib tw ncaws pob ntaus pob hnov lawv cov xib hwb tej lus cem thiab txaus siab tso tej yam lawv xav tau tam sim no tseg kom tau ib yam dab tsi zoo dua thaum yav tom ntej.

Peb paub ib co mej zeej ntawm lub Koom Txoos thiab cov uas tuav lub pov thawj hwj uas twb vam meej ua cov kws txawj sib tw siab tshaj plaws. Muaj ntau tus uas txawj ua, tiam sis kuv hais ob peb tug xwb vim tsis muaj sij hawm ntau. Tej zaum nej paub ib txhia ntawm cov kws txawj sib tw no: ob tug uas ntaus pob baseball, Jeremy Guthrie thiab Bryce Harper; sib tw basketball, Jabari Parker thiab Jimmer Fredette; ncaws pob soccer, Ricardo Rojas; sib tw rugby, William Hopoate; thiab sib tw football, Taysom Hill thiab Daniel Sorensen. Lawv txhua tus nyias twb pab txhawb nqa nyias txoj kev sib tw ncaws pob ntaus pob.

Txawm cov neeg no txawj sib tw heev, cov kws sib tw ntaus pob ncaws pob no yuav qhia nej tias lawv tsis yog neeg txawj ua txhua yam thiab tsis yog zoo tag nrho. Lawv khwv heev kom ua tau zoo tshaj plaws—thiab kom ua raws li txoj moo zoo. Lawv rov qab sawv thaum lawv dawm ko taw thiab lawv siv zog nyiaj kom mus txog thaum kawg.

Thaum ua kev sib tw hauv ib pawg, lawv tsim tej txheej txheem kom paub ua li cas thiab muab tej ntawd sau ua ke hauv ib phau ntawv. Cov kws txawj sib tw kawm lawv lub luag hauj lwm thiab kawm lawv yuav ua li cas rau txhua tus txheej txheem. Cov neeg sib tw zoo rau siab kawm phau ntawv qhia txheej txheem, yog li ntawd thaum yuav tsum ua ib tug txheej txheem, lawv paub zoo tias lawv yuav mus qhov twg thiab paub ua li cas.

Daim duab yog los ntawm Dave Kaup/REUTERS/stock.adobe.com

Zoo ib yam li ntawd, peb cov uas tuav lub pov thawj hwj kuj muaj ib pawg (ib pawg pov thawj hwj) thiab ib phau ntawv qhia txheej txheem (cov vaj lug kub dawb huv thiab cov yaj saub tej lus).

Nej puas txhawb nej pawg dag zog?

Nej puas tau kawm nej phau ntawv qhia txheej txheem?

Nej puas to taub nej lub luag hauj lwm?

Xwv kom ua piv txwv ntxiv, cov xib hwb zoo paub tias lawv pawg thiab tej pawg uas yuav nrog lawv sib tw muaj zog thiab qaug zog li cas. Lawv npaj rau kev sib tw kom lawv muaj peev xwm kov yeej. Nej ne?

Nej paub tias nej raug kev ntxias twg uas ua rau nej tsis khov, thiab nej txawj twv ua ntej hais tias tus yeeb ncuab yuav ua li cas kom tab kaum nej thiab ua rau nej poob siab. Nej puas tau npaj ib txoj kev ua neej thiab ib phau ntawv qhia txheej txheem kom nej thiaj paub ua li cas thaum nej raug kev ntxias?

Thaum nej raug kev ntxias hauv lub ntiaj teb no—txawm yog nrog lwm tus los sis thaum nej nyob nej ib leeg saib TV xwb—nej paub nej tau npaj ua li cas. Yog ib tug phooj ywg hais kom nej haus cawv los sis haus tshuaj phem, nej paub nej yuav siv tus txheej txheem twg. Nej twb xyaum thiab nej paub ua li cas ua ntej.

Thaum nej tau npaj lawm, nej muaj ib phau ntawv qhia txheej txheem, thiab nej rau siab xav ua nej lub luag hauj lwm, nej yuav kawm hais tias kev ntxias kov tsis tau yeej nej. Nej twb txiav txim siab tias nej yuav ua li cas. Nej tsis tas txiav txim siab txhua lub sij hawm uas nej raug kev ntxias.

Ib tug ntawm Kaum Ob tug Thwj Tim tau hais ib zaj uas qhia txog lub ntsiab no. Thaum nws yog ib tug pov thawj uas kawm high school, nws nrog nws cov phooj ywg ua ke. Tom qab lawv noj mov, lawv lam tsav tsheb es ib tug hais kom lawv mus saib movie. Qhov teeb meem yog qhov uas nws paub tias tsis tsim nyog saib qhov movie ntawd. Txawm yog nws ntxhov siab thiab txhawj xeeb txog qhov no los, nws twb tau npaj rau qhov no lawm. Yog ib phab ntawv los ntawm nws phau ntawv qhia txheej txheem siv lub pov thawj hwj.

Nws ua ib pas thiab ua siab loj qhia lawv tias, “Kuv tsis xav saib qhov movie ntawd. Cia li xa kuv mus tsev ua ntej,” es lawv twb ua li ntawd. Yog ib tug txheej txheem yooj yim uas ua rau nws kov yeej! Ntau xyoo tom qab ntawd, ib tug phooj ywg piav hais tias qhov uas tus tub hluas no coj yam ntxwv zoo li no twb ntxiv dag zog rau nws no kom ua siab loj thaum raug xwm txheej ib yam li ntawd hauv nws lub neej.

Kuv twb thov ob peb tug Kwv Tij qhia tias nej yuav tsum muaj tej txheej txheem twg hauv nej phau ntawv. Nyov yog tej yam uas lawv txais kev tshoov siab hais:

• Thov Vajtswv txhua hnub kom tau txoj kev kaj loj ntxiv thiab ib zaj lus tim khawv txog Yexus Khetos.

• Cia li mloog zoo rau nej niam nej txiv tej lus, nej tus npisov, thiab mloog nej cov thawj coj hauv Koom Haum Tub Hluas thiab nej pawg pov thawj hwj.

• Txhob saib duab liab qab thiab tej yam tsis tsim nyog hauv social media.

• Cia li nco ntsoov tej uas nej cog lus rau Vajtswv thiab ua hauj lwm kom ua li ntawd.

• Kawm tej zaj hauv vaj lug kub txog cov yaj saub thiab coj yam ntxwv zoo li lawv.

• Foom koob hmoov rau Leej Txiv Saum Ntuj Ceeb Tsheej cov me nyuam thaum nej pab lawv.

• Nrhiav phooj ywg zoo uas pab nej hloov los ua neeg zoo li nej xav ua.

• Cia li kawm kom txawj siv FamilySearch app thiab tshawb fawb nej tsev neeg zaj keeb kwm.

• Npaj tej qhov chaw nej mus tau kom nej dim tau kev phem.

• Kev hlub thiab kev pab yuav txhawb lwm tus mej zeej hauv nej pawg pov thawj hwj lub zog.

Kuv kuj sib tham nrog cov kws sib tw ntaus pob ncaws pob uas peb nyuam qhuav pom lawv daim duab. Kuv kawm tias lawv tsis hais txog lawv tus kheej tias lawv ua dab tsi, vim lawv ncaws pob ntaus pob, tiam sis lawv hais txog qhov uas lawv yog leej twg, vim lawv yog Leej Txiv Saum Ntuj Ceeb Tsheej cov tub thiab cov uas tuav lub pov thawj hwj.

Nim no cia peb mloog seb lawv hais li cas:

• Jimmer Fredette, uas yog ib tug dikas kawm khi txoj kas las vav hauv daim duab no, hais tias: “Kuv tau kawm kom tso siab rau tej yam kuv paub thiab kuv txoj kev ntseeg tias txoj moo zoo muaj tseeb. Qhov no tau pab coj kuv kev kom … kuv ua ib tug uas tuav lub pov thawj hwj tsim nyog thiab qhov tseem ceeb tshaj plaws—ib tug yam ntxwv zoo.”

  

• Bryce Harper, hauv daim duab no yog ib tug txiv tsev, sau hais tias: “Kuv xav tias kev muaj koob muaj npe, muaj nyiaj txiag, thiab muaj nqi zog MVP yuav ua rau kuv zoo siab. Tiam tsis tshuav ib dab tsi ntxiv. Yog li ntawd kuv … npaj mus [rau hauv] lub tuam tsev. Tam sim no kuv taug ib txoj kev [rov qab] mus cuag kuv Leej Txiv Saum Ntuj Ceeb Tsheej thiab muaj ib tsev neeg nyob mus ib txhis—uas yog kev xyiv fab loj tshaj plaws hauv lub ntiaj teb no!”

  

• Daniel Sorensen, uas yog ib tug tub txib hauv daim duab no, hais tias: “Ib phau ntawv qhia txheej txheem zoo yog kev npaj uas siv txhua tus hauv ib pawg tej txuj ci thiab lub zog. … Thaum kuv kawm ntawv thiab xyaum ua raws li Yexus Khetos txoj moo zoo, kuv paub siv kuv tej kev dag zog kom ua hauj lwm siv lub pov thawj hwj.”

  

• Jeremy Guthrie, uas yog ib tug qhov chaw tshaj tawm txoj moo zoo tus thawj tswj hwm hauv daim duab no, hais tias: “Thaum kuv yog ib tug dikas uas muaj 12 xyoos … [Kuv tau hnov] tus Ntsuj Plig ua tim khawv rau kuv [tias] ‘lub neej no yog lub caij … npaj mus ntsib Vajtswv.’ Tus txheej txheem rau lub neej no yog kev ntseeg Vajtswv [thiab] kev hloov siab lees txim los ntawm tus Cawm Seej. … Phau ntawv qhia txheej txheem yog nyob hauv cov vaj lug kub thiab los ntawm cov yaj saub tej lus.”

  

• Jabari Parker, uas lawv muab tsa ua ib tug txwj laug hauv daim duab no, hais tias: “Kuv tsis paub kuv yuav zoo li cas yog tias kuv tsis tau txiav txim siab ua kev cai raus dej. … Kuv ris Vajtswv txiaj vim muaj Nws coj kuv kev txhua hnub.”

  

• Ricardo Rojas, uas yog ceg ntseeg ib tug thawj tswj hwm hauv daim duab no, hais tias: “Los ntawm [Vajtswv] lub pov thawj hwj [peb] pab tau ua Nws txoj hauj lwm. Vajtswv xav kom peb ‘ua siab tawv thiab nyob khov kho tsis txhob ntshai,’ kom tiv thaiv qhov tseeb.” Ua li no tau pab nws thaum nws ua kev sib tw thiab thaum nws siv lub pov thawj hwj.

  

• Taysom Hill, uas yog ib tug tub txib hauv daim duab no, xav tias Yexus Khetos txoj moo zoo yog nws phau ntawv qhia txheej txheem hauv nws lub neej. Nws hais tias, “Vim kuv ntseeg [Vajtswv] txoj hau kev thiab ua zoo npaum li kuv ua tau kom ua raws li kuv lub luag hauj lwm ces ua rau kuv muaj kev kaj siab lug thiab kev zoo siab hauv kuv lub neej, vim kuv paub tias Vajtswv zoo siab txog kuv tej hauj lwm.”

  

• William Hopoate, hauv daim duab no foom koob hmoov rau nws tus me nyuam tub, hais tias txoj moo zoo pab nws “paub tus yeeb ncuab lub tom txwv thiab pab txhawb nqa nws sab ntsuj plig kom tiv tau tej xib xub hluav taws thiab pab lwm tus zoo dua ntxiv.”

  

Nej ne? Nej puas paub tias nej muaj keeb kwm siab thiab dawb huv heev vim nej yog Vajtswv cov tub, cov uas tuav Nws lub pov thawj hwj dawb huv? Cia li xav txog keeb kwm uas nyob mus ib txhis no thiab tsim nej txoj kev npaj ua neej thiab nej phau ntawv qhia txheej txheem siv lub pov thawj hwj uas yuav pab nej thaum nej raug ntxias thiab raug kev nyuaj. Cia li xav txog tej tswv yim kom mus tom ntej thiab kom tiv thaiv.

Tswv yim kom mus tom ntej pab nej zaj lus tim khawv muaj zog thiab ua rau nej nyob rau ntawm txoj kev ti thiab nqaim. Piv txwv hais tias thov Vajtswv tsis tu tsis tseg, nyeem vaj lug kub, koom lub Koom Txoos, them ib feem kaum, thiab ua raws li tej lus qhia nyob hauv phau ntawv Ntxiv Dag Zog rau cov Tub Hluas Ntxhais Hluas.

Tej tswv yim tiv thaiv yog kev npaj ua ntej nej yuav ua li cas thaum nej raug kev ntxias. Thaum nej raug kev ntxias kom tsis txhob ua raws li nej tej kev cai, cia li paub ua ntej nej yuav ua li cas.

Nej yuav tsum muaj ib phau ntawv qhia txheej txheem kom ua li ntawd.

Nej tsis xav thov Vajtswv hnub no los? Twb txog lub sij hawm uas yuav tsum ua li nej tau npaj ua lawm.

Nej xav tias nej zaj lus tim khawv tsis muaj zog zuj zus? Muaj ib tug txheej txheem rau nej. Nej paub ua li cas.

Nej yog cov uas tuav Vajtswv lub pov thawj hwj dawb huv. Qhov uas nej tau cog lus tias nej yuav tuav nkaus tus nqaj hlau yuav ua rau nej hloov los ua tus neeg nyob mus ib txhis uas Vajtswv tau tsim kom nej ua.

Vajtswv paub thiab hlub nej. Nws yuav foom koob hmoov rau nej thiab coj nej kev.

Tej zaum nej xav tias nej tsis yog neeg tshwj xeeb, thiab xav tias nej ua tsis tau ib tug zoo tshaj plaws. Tiam sis qhov no tsis muaj tseeb. Nej tsis paub tias Vajtswv hais tias, “Tej uas qaug zog nyob hauv lub ntiaj teb yuav tawm los thiab ua kom tej uas muaj zog thiab muaj hwj chim tawg mus” los?

Nej xav tias nej qaug zog los? Tsis tshwj xeeb los? Pab nej zoo siab, nej nyob hauv pawg pov thawj hwj no!

Nej xav tias nej tsis tseem ceeb los? inferior? Tej zaum nej yog tus uas Vajtswv xav tau.

Ib tug uas coj yam ntxwv zoo yog Daviv uas mus ua rog tawm tsam ib tug yeeb ncuab txaus ntshai, Kaulias. Vim nws tso siab rau tus Tswv, thiab tau npaj ua ntej, Daviv cawm nws tus kheej thiab tag nrho Ixayees pawg tub rog! Cia li paub tias tus Tswv yuav nrog nej nyob thaum nej ua siab loj tuaj Nws tog. “Yog Vajtswv tuaj peb tog lawm, leej twg tseem yuav tawm tsam tau peb?”

Nws qhib tau qhov rooj thiab pab peb nrhiav zog thiab muaj peev xwm uas peb tsis tau paub tias peb muaj.

Mloog nej cov xib hwb, xws li nej niam nej txiv, nej tus npisov, thiab cov thawj coj hauv Koom Haum Tub Hluas. Kawm nej phau ntawv qhia txheej txheem. Nyeem vaj lug kub. Cia li kawm cov yaj saub tej lus uas hais niaj hnub nim no. Tsim txheej txheem rau nej tus kheej uas qhia tias nej yuav ua li cas kom qhia tias nej yog Yexus Khetos cov thwj tim.

Cia li paub nej yuav siv tej txheej txheem twg kom txhawb nej sab ntsuj plig thiab kom tsis txhob mag tus yeeb ncuab tej kev ntxias.

Ua li no ces Vajtswv yeej yuav siv nej.

Nim no, muaj ib txhia uas tsis ua raws li txoj moo zoo lawm thiab lawv mus ua loj leeb. Lwm tus yuav zaum hauv qhov chaw saib txoj kev sib tw xwb. Ib txhia xaiv kom zaum rau ntawm lub rooj zaum xwb, txawm yog tus xib hwb xav kom lawv mus pab.. Kuv caw nej kom cawm, txhawb nqa, thiab hlub lawv vim lawv nyob hauv nej pawg pov thawj hwj!

Ib txhia xav mus sib tw—thiab lawv yeej ua li ntawd. Qhov tseem ceeb tsis yog qhov uas lawv muaj txuj ci npaum li cas tiam sis yog qhov uas lawv txaus siab npaum li cas kom mus ua. Lawv tsis tas tos seb puas hu lawv mus ua vim lawv paub nqe vaj lug kub uas hais tias, “Yog nej muaj tej kev xav ua hauj lwm rau Vajtswv ces Vajtswv hu nej mus ua txoj hauj lwm no.”

Nej muaj peev xwm ua ib tug uas pab tau.

Nej ua li no thaum nej kawm thiab ua raws li nej phau ntawv qhia txheej txheem siv pov thawj hwj.

Thaum nej ua li no nej yuav dawm ko taw thiab vau—tej zaum ntau zaus. Nej tsis yog neeg zoo tag nrho; kev poob yog ib feem ntawm tus txheej txheem kom tsim nyog uas ua rau nej kho tau nej tej cwj pwm thiab ua hauj lwm muaj kev khuv leej ntxiv. Tus Cawm Seej thiab Nws txoj Kev Theej Txhoj uas nyob mus ib txhis yog txoj kev kov yeej tej yam peb ua yuam kev los ntawm kev hloov siab lees txim tiag tiag.

Cov kws sib tw ncaws pob ntaus pob zoo siv ntau lub sij hawm kom ua ib yam me me zoo tag nrho. Vim nej tuav lub pov thawj hwj, nej yuav tsum xav ua zoo ib yam li lawv. Yog nej swb, cia li hloov siab lees txim thiab kawm los ntawm tej nej tau ua. Cia li xyaum kom ua tau zoo dua tom qab ntawd. Yeej nyob ntawm nej. Nej puas kam kawm nej phau ntawv qhia txheej txheem?

Kuv thov nej: Cia li tso siab rau tus Tswv. Cia li muab Vajtswv tej cuab yeej tag nrho thiab mus ua neej.

Tsis muaj neeg coob uas yog cov kws sib tw ncaws pob ntaus pob, tiam sis thaum hais txog kev ua thwj tim, yeej muaj ntau tus uas xaiv coj raws li Khetos.

Muaj tseeb tiag, nov yog nej lub luag hauj lwm hauv lub neej no—kom kawm tus Tswv tej kev, ua Nws cov thwj tim, thiab siv zog ua raws li Vajtswv txoj hau kev. Vajtswv yuav txhawb nqa thiab foom koob hmoov rau nej thaum nej tig mus rau Nws. Nej ua tau li no vim Nws saib nej rau nqi.

Kuv thov kom nej cog lus tias nej yuav ua neej tsim nyog muaj lub pov thawj hwj dawb huv thiab siv zog ua nej lub luag hauj lwm dawb ceev txhua hnub. Kuv foom koob hmoov rau nej kom muaj peev xwm thiab muaj kev xav ua li ntawd. Kuv hais lus tim khawv txog lub hwj chim ntawm lub pov thawj hwj, txog cov yaj saub, thiab txog Yexus Khetos thiab Nws lub luag hauj lwm ua peb tus Cawm Seej thiab tus Txhiv Dim. Los ntawm Yexus Khetos lub npe, amees.