Noj Khetos tej Lus Nplua Mias

Thaum kuv tseem hluas, kuv xav hais tias kev noj nplua mias yog noj ib pluag mov ntxuag sushi, thiab kua nyeem. Nim no kuv paub hais tias kev noj nplua mias yeej ntau tshaj qhov uas noj ib pluag qab qab xwb. Yog ib qho kev xyiv fab, ib qho ntxiv dag zog rau lub cev, ua ib qho koob tsheej, faib rau sawv daws, hlub tsev neeg thiab cov neeg txheeb ze, ua Vajtswv tsaug, thiab kho tej kev sib raug zoo thaum noj tej zaub mov qab qab heev. Kuv ntseeg hais tias thaum peb noj Khetos tej lus nplua mias, peb yuav tsum xav txog tib yam uas muaj los ntawd. Kev noj cov vaj lug kub nplua mias tsis yog nyeem cov vaj lug kub xwb. Rau siab noj nplua mias coj kev xyiv fab los rau peb thiab pab peb nrog tus Cawm Seej sib raug zoo.

Phau Ntawv Maumoos qhia peb li no. Nco qab ntsoov txog Lihais zaj npau suav uas nws pom ib tsob ntoo “uas muaj cov txiv [uas ua tau] kom neeg muaj kev zoo siab.” Cov txiv no yog Vajtswv txoj kev hlub, thiab thaum Lihais noj lub txiv, “nws … qab zib, tshaj txhua yam uas [nws] tau noj tas los.” Nws “ua rau [nws] sab ntsuj plig muaj kev xyiv fab heev” thiab yog ib yam uas nws xav muab pub rau nws tsev neeg (1 Nifais 8:10–12).

Thaum peb noj nplua mias, feem ntau peb yuav pom tau hais tias txawm peb muaj zaub mov noj ntau npaum li cas los yog hom zoo li cas los qhov ntawd tsis tseem ceeb yog tias peb ris Vajtswv txiaj. Lihais tsev neeg noj nqaij nyoos thaum nyob roob moj sab qhua, tias sis Nifais piav txog qhov kev sim siab li no hais tias, “Peb tau koob hmoov ntau nplua mias los ntawm tus Tswv” npaum li tias “peb cov poj niam … muaj zog” thiab “nyiaj tau lawv tej kev mus tsis yws yws li” (1 Nephi 17:1–2).

Kev noj nplua mias qee zaum muaj kev sim saj saib puas zoo. Amas hais txog ib lub noob zoo uas muab cog rau hauv peb tej siab tej ntsws. Thaum peb sim lub noob ntawd saib puas zoo, peb yuav pom tau hais tias lub noob rais los mus ua ib yam “qab qab” (saib Amas 32:28–33).

Tej koob hmoov uas los ntawm txoj kev noj Khetos tej lus nplua mias yeej muaj hwj chim thiab hloov tau peb lub neej. Muaj peb txoj koob hmoov uas kuv xav caw nej los txais rau hauv nej lub neej.

Qhov thib ib, Khetos tej lus yuav pab tau peb “ua rau [peb] sab ntsuj plig txais tau kev tshwm sim ntau dua” (Russell M. Nelson, “Kev Tshwm Sim rau lub Koom Txoos, Kev Tshwm Sim rau Peb lub Neej,” Liahona, Tsib Hlis Ntuj 2018, 96) thiab coj peb kev rau hauv peb lub neej no. Maumoos qhia tias Khetos tej lus “muaj hwj chim coj tau cov neeg coob heev mus ua tej uas ncaj ncees,” thiab tias tej lus ntawd muaj hwj chim ntau dua qhov uas “rab ntaj” ua tau (Amas 31:5). Thaum kuv nrhiav kom tau Vajtswv txoj kev txawj ntse thaum kuv ntsib kuv tej kev cov nyom, txhua txhia lub sij hawm, thaum kuv sim “lub hwj chim ntawm Vajtswv txoj lus” (Amas 31:5) kuv tau txais kev tshoov siab kom txiav txim siab qhov yog, kov yeej kev haub kev ntxias, thiab muaj siab ntseeg rau ntawm Khetos thiab kev hlub rau lwm tus neeg ib ncig ntawm kuv ntau dua. Peb tus yaj saub, Russelll M. Nelson, tau qhia peb hais tias “hauv tej hnub uas tseem yuav los, peb sab ntsuj plig yuav tsis txawj ciaj li yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv” (“Kev Tshwm Sim rau lub Koom Txoos, Kev Tshwm Sim rau Peb lub Neej,” 96). Tej kev txais tshwm sim yuav los thaum peb sim “lub hwj chim ntawm txoj lus,” thiab txoj lus ntawd yuav muaj hwj chim ntau tshaj lwm yam uas peb sim tau los yog xav tau tawm.

Qhov thib ob, thaum peb tsis paub tseeb peb yog leej twg tiag es tsis saib peb tus kheej rau nqi, “Vajtswv txoj lus zoo” (Jacob 2:8) hauv cov vaj lug kub yuav pab peb paub hais tias peb yog leej twg tiag thiab ntxiv dag zog rau peb. Lub sij hawm uas kuv paub tias kuv yog Vajtswv ib tug me nyuam yog ib lub sij hawm zoo kawg hauv kuv lub neej. Thaum kuv tseem yog ib tug tub hluas, kuv tsis paub dab tsi txog tus Cawm Seej tej lus qhia. Thawj zaug uas kuv nyeem Phau Tshiab, Khetos cov lus kuj kho kuv sab ntsuj plig kom zoo. Kuv pom tias tsis yog kuv nyob kuv ib leeg xwb thiab hais tias kuv yog Vajtswv ib tug me nyuam. Thaum kuv pom tias kuv yog Vajtswv ib tug tub, kuv pom tias dhau los ntawm Khetos txoj Kev Theej Txhoj kuv ncav tau kuv lub hom phiaj nyob mus ib txhis li.

Ib yam li ntawd Enos qhia txog qhov kaj siab lug uas muaj los rau nws thaum nws xav txog Khetos txoj lus. Thaum Enos cia cov lus uas nws txiv qhia nws txog “lub neej nyob mus ib txhis li, thiab kev xyiv fab ntawm cov Ntseeg, [tog] tob heev hauv [nws] lub siab lub ntsws,” nws sab ntsuj plig “nqhis heev; thiab [nws] txhos caug rau ntawm tus uas Tsim [nws] lub xub ntiag … thiab thov txog Nws” (Enos 1:3–4). Hauv zaj lus thov Vajtswv ntawd Enos kawm paub txog tus Cawm Seej thiab kawm tias peb txhua tus muaj nqis ntau heev rau Vajtswv, thiab Vajtswv hlub peb thiab xav zam txim pub rau peb, thiab yog Nws cov me nyuam.

Qhov thib peb, peb txhawb nqa lwm tus neeg tau siv Khetos cov lus. Ib yam li Enos muaj ib lub sij hawm uas Khetos txoj lus chob nkaus nws lub siab, tus Tswv yeej yuav pab peb qhia tau txoj moo zoo rau lwm tus neeg kom lawv hloov siab thiab. Peb cov feem coob yeej poob siab me ntsis thaum peb sim caw peb ib tug phooj ywg los mloog txoj moo zoo vim rau qhov uas tsis tau muaj raws li peb lub siab xav. Txawm muaj li cas los xij los, tus Tswv caw kom peb qhib qhov ncauj thiab qhia txoj moo zoo rau lwm tus neeg.

Ob xyoos dhau los, tus Tswv pab ua rau kuv niam xav mloog txoj moo zoo, es thaum kawg kuv niam txiav txim siab los ua kev cai raus dej. Kuv tau tos ntsoov hnub ntawd kwv yees li 35 xyoos tag nrho. Kom kuv niam thiaj xav txiav txim siab ua li ntawd, coob tug mej zeej ntawm lub Koom Txoos kuj tau pab kuv niam ib yam li Khetos yuav pab nws. Muaj ib hnub Sunday, nws xav tias nws yuav mus tshawj. Nws ua raws li tus Ntsuj Plig qhia ntawd. Thaum kuv niam zaum hauv chav noj lub cim nco txog tom hauv ntej es tos lub rooj sab laj pib, muaj ib tug me nyuam tub plaub xyoos sawv rau ntawm nws ib sab thiab ntsia ntsoov nws. Kuv niam luag nyav rau tus tub. Tus me nyuam tub ntawd txawm khiav mus rov qab rau qhov chaw uas nws zaum, uas nyob qhov chaw uas kuv niam zaum sab tod. Tus me nyuam tub no txawm nqa dab tsi rov qab los rau kuv niam thiab muab ib phau nkauj pub rau kuv niam thiab rov qab mus zaum. Kuv niam twb pom tias muaj phau nkauj tso rau saum ntau lub rooj zaum hauv chav noj lub cim nco txog. Kuv niam yeej muab tau ib phau nkauj los ntawm lub rooj zaum ntawm nws ib sab. Txawm yog li ntawd los, kuv niam xav tsis thoob txog qhov uas tus me nyuam tub ua siab zoo li ntawd, uas nws kawm hauv nws lub tsev thiab tom tshawj. Yeej yog ib lub sij hawm zoo rau nws. Nws paub hais tias Vajtswv tab tom caw nws los cuag tus Cawm Seej. Nws xav hais tias tsim nyog nws ua kev cai raus dej. Tus me nyuam tub no tsis ua li ntawd kom tau nqi zog, nws tsuas ua li ntawd vim nws ua raws li Vajtswv txoj lus thiab hlub nws tus neeg zej zog. Qhov uas nws ua siab zoo hloov kuv niam lub siab.

Khetos cov lus yuav pab qhib qhov muag qhib lub siab lub ntsws ntawm cov neeg uas tseem pom tsis tau Nws. Nyob ntawm txoj kev mus rau Emmaus, ob tug thwj tim nrog Yexus taug kev mus. Nkawd tu siab heev thiab tsis to taub hais tias tus Cawm Seej tau kov yeej kev tuag. Nkawd tsis pom hais tias tus Khetos uas tseem muaj txoj sia nyob tab tom nrog nkawd taug kev mus. Txawm hais tias Yexus “piav ntxaws ntxaws txog tag nrho cov vaj lug kub uas hais txog Nws,” nkawd tseem tsis saib Nws ua tus Cawm Seej sawv rov los mus txog thaum nkawd nrog Nws zaum noj mov mog. Ces nkawd “qhov muag” txawm qhib. Thaum peb—los yog peb cov phooj ywg, kwv luag, thiab neeg zej zog—nrog Yexus noj mov mog ua ke, peb qhov muag yuav qhib tau. Thaum ob tug thwj tim nyob Emmaus xav txog nkawd lub sij hawm nrog tus Cawm Seej, nkawd hais tias nkawd ob lub siab kub lug thaum nws qhia cov vaj lug kub rau nkawd (saib Lukas 24:27–32). Qhov no yuav muaj tseeb rau peb txhua tus.

Thaum xaus no, kuv ua tim khawv hais tias kev noj Khetos cov lus nplua mias yuav muaj los thaum lub sij hawm twg los yog lub cib fim twg los tau yog tias peb npaj peb lub siab los txais. Kev noj Khetos cov lus nplua mias yuav pab peb txais tau kev tshwm sim, paub tseeb hais tias peb yog Vajtswv cov me nyuam, thiab coj peb cov phooj ywg los cuag Khetos thiab txais txoj sia nyob mus ib txhis li. Cia kuv xaus hais Nifais cov lus caw hais tias: “Nej yuav tsum txiv mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus. Yog li ntawd, yog tias nej yuav thawb lawm tom hauv ntej, mloog ntsoov Khetos tej lus, thiab nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis” (2 Nifais 31:20) Los ntawm Yexus Khetos lub npe, amees.