Ua Qhov Chaw Thaiv Rog Kom Pov Hwm Sab Ntsuj Plig

Kuv cov kwv tij thiab cov muam, thaum peb xaus lub rooj sab laj no, kuv ua nej tsaug rau peb Leej Txiv Saum Ntuj Ceeb Tsheej rau cov lus ntuas, cov lus tseeb, thiab kev tshwm sim uas tau hais nyob rau ntawm lub sam thiaj tau ob hnub no. Vajtswv cov tub qhe uas Nws hu kom hais Nws cov lus dawb huv twb qhia peb zoo. Los ntawm kev tshwm sim hauv hnub nyoog kawg tus Tswv ua rau peb nco qab tias, “Txawm yog los ntawm kuv lub suab los sis los ntawm kuv cov tub qhe lub suab, yeej zoo ib yam.”

Thaum kuv saib pawg Haiv Neeg Ntseeg no, thiab xav txog cov mej zeej uas saib lub tuam rooj sab laj nyob thoob plaws lub ntiaj teb no, ua rau kuv xav txog qhov uas cov neeg sib sau ua ke hauv Phau Ntawv Maumoos thaum Yexus Khetos tshwm sim rau cov Neeg Nifais tom qab Nws raug ntsia saum ntoo khaub lig. Nws qhia txoj moo zoo rau lawv ces yaum hais tias, “Nej cia li mus rau tom nej lub vaj lub tsev, thiab ua tib zoo xav txog tej yam uas kuv tau hais, thiab thov Leej Txiv, los ntawm kuv lub npe, xwv kom nej yuav to taub.”

“Nej cia li mus rau tom nej lub vaj lub tsev, thiab ua tib zoo xav” yog qhov uas nej yuav tsum ua kom thiaj li muaj siab xav ua raws li cov yaj saub thiab cov thawj coj ntawm lub Koom Txoos tej lus uas lawv hais hauv qhov chaw dawb huv no. Cov tsev uas tsom ntsoov rau Khetos yeej zoo li tej tsev thaiv rog rau Vajtswv lub nceeg vaj hauv lub ntiaj teb hauv ib lub caij nyoog uas cov yaj saub qhia tias, tus dab phem “tshum noob neej lub siab, thiab txhaub kom lawv npau taws tawm tsam tej uas zoo.”

Txij thaum ub los tib neeg tau tsa tej tsev thaiv rog kom cheem tus yeeb ncuab nyob sab nraud. Feem ntau cov tsev thaiv rog no muaj ib tug pej thuam uas muaj cov neeg zov nyas—zoo li cov yaj saub—ceeb toom txog tej pawg rog uas lim hiam thiab los tawm tsam.

Thaum cov pioneer nyob hauv Utah, kuv yawg koob Thomas Rasband thiab nws tsev neeg yog ib co ntawm thawj cov neeg uas nkag rau hauv lub Hav Heber nyob hauv cov Roob Wasatch hauv lub xeev Utah

Xyoo 1859, Thomas tau pab tsa qhov chaw thaiv rog Heber, uas ua kom pov hwm lawv. Yog ib lub tsev tsis nyuaj ua uas siv cov ntoo cottonwood ib lub tso saum ib lub, kom ua ciaj ciam sab nraud ntawm qhov chaw thaiv rog. Twb tau ua cov tsev ntoo nyob hauv qhov chaw thaiv rog uas siv phab ntsa ntawd. Phab ntsa no ua rau tsev neeg pioneer muaj kev nyab xeeb thiab pov hwm lawv thaum lawv ua neej thiab teev tiam tus Tswv.

Peb yeej zoo li no thiab. Peb tsev yeej yog tej qhov chaw uas thaiv tej yam phem ntawm lub ntiaj teb. Nyob hauv peb tsev peb los cuag Khetos thaum peb kawm ua raws li Nws cov lus txib, kawm cov vaj lug kub thiab thov Vajtswv ua ke, thiab sib pab kom taug txoj kev ntawm peb tej kev khi lus. Qhov uas peb kawm peb tus kheej thiab nrog peb tsev neeg nyob hauv tsev thaum siv cov ntaub ntawv qhia Los, Nrog Kuv Mus yog kom pab “peb hloov siab los ntseeg thiab pab peb hloov los ua neeg zoo li Yexus Khetos.” Thaum peb ua li ntawd ces zoo li Povlauj hais peb hloov los ua “neeg tshiab” thiab peb koom siab koom ntsws nrog Vajtswv. Peb yuav tsum muaj zog li ntawd kom tiv thaiv tus yeeb ncuab tej kev tawm tsam.

Thaum peb ua neej nrog kev ntseeg Yexus Khetos, peb yuav hnov tus Vaj Ntsuj Plig Dawb Huv, tus uas coj peb mus rau qhov tseeb, tshoov peb lub siab kom ua neej tsim nyog txais tus Tswv cov koob hmoov, thiab ua tim khawv tias Vajtswv muaj txoj sia nyob thiab hlub peb. Yuav muaj tag nrho tej no hauv qhov chaw thaiv rog uas yog peb tsev. Tiam sis nco ntsoov tias, peb tej lub tsev tsuas yuav ruaj khov npaum li peb txhua tus nyob haud xwb.

Thawj Tswj Hwm Russell M. Nelson tau qhia hais tias, “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.” Vim nws yog tus Tswv tus yaj saub, tus pom tau, thiab tus txais kev tshwm sim hauv hnub nyoog no, tus zov nyas saum tus pej thuam ntawm peb tsev thaiv rog, uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, nws pom tau tus yeeb ncuab los.

Cov kwv tij thiab cov muam, peb ua tsov ua rog tawm tsam Dab Ntxwg Nyoog seb leej twg yuav tau tib neeg cov ntsuj plig. Twb tsa tej ciaj ciam ua rog ua ntej peb lub neej hauv lub ntiaj teb no. Dab Ntxwg Nyoog thiab ib feem peb ntawm peb Leej Txiv Saum Ntuj Ceeb Tsheej cov me nyuam twb tso Nws cov lus tseg tias yuav txais txoj kev tsa nto tseg. Txij thaum ntawd los, tus yeeb ncuab cov tub qhe twb tawm tsam cov neeg rau siab ntseeg uas tau xaiv Leej Txiv txoj hau kev.

Dab Ntxwg Nyoog paub tias nws lub sij hawm twb yuav tag thiab tshuav tsis ntev. Txawm nws ntse thiab muaj peev xwm npaum li cas los, nws yuav tsis yeej. Tiam sis, nws tseem tawm tsam peb kom tau peb tej ntsuj plig.

Xwv kom pov hwm peb, peb yuav tsum tsa ib qhov chaw thaiv rog rau peb sab ntsuj plig, ib qhov chaw thaiv rog uas tus yeeb ncuab nkag tsis tau haud.

Dab Ntxwg Nyoog yog ib tug nab ntse heev, nws nkag hauv peb lub siab lub ntsws thaum peb tsis zov nyas, thaum peb poob siab, los yog tsis muaj kev cia siab lawm. Nws qhuas peb, cog lus tias yuav yooj yim, thiab ntxias peb thaum peb poob siab lawm. Nws hais tias tsis ua li cas yog tias peb muab hlob, tsis ua siab zoo, dag, tsis txaus siab, thiab coj tsis dawb huv ces tsis ntev peb “lub siab tsis xeev li.” Tus Ntsuj Plig tso tau peb tseg. “Thiab tus dab phem dag ntxias lawv tej ntsuj plig li no, thiab maj mam coj lawv mus rau hauv ntuj txiag teb tsaus.”

Pebv hnov tau tus Ntsuj Plig muaj hwj chim heev thaum peb hu nkauj qhuas Vajtswv nrog tej lus zoo li no:

Thaum peb ua ib qho chaw thaiv rog uas ua rau peb sab ntsuj plig muaj zog, peb yuav tiv tau tus yeeb ncuab tej kev tawm tsawm, peb yuav tso nws tseg, thiab muaj tus Ntsuj Plig txoj kev kaj siab lug. Peb yuav coj raws li tus Tswv thiab tus Cawm Seej tus yam ntxwv, tus uas, thaum nws raug ntxias hauv roob moj sab qhua hais tias, “Dab Ntxwg Nyoog, koj cia li khiav ntawm kuv mus.” Peb txhua tus yuav tsum kawm los ntawm peb lub neej kom paub ua li ntawd.

Tej hom phiaj ncaj ncees li no los Phau Ntawv Maumoos hais txog thaum tus Thawj Tub Rog Maulaunais npaj cov Neeg Nifais raug tawm tsam los ntawm Amalikhaiyas uas ntxias lwm tus, nyiam nqaij ntuag ntshav nrog, thiab xav tau hwj chim. Maulaunais tau tsa tej qhov chaw thaiv rog kom pov hwm cov neeg Nifais “xwv kom lawv yuav tau ua neej rau tus Tswv lawv tus Vajtswv, thiab xwv kom lawv yuav tswj tuav tau qhov uas lawv cov yeeb ncuab muab hu ua lub ntsiab cai ntawm cov ntseeg Khetos.” Maulaunais “nyob ruaj nrees ntawm txoj kev ntseeg Khetos” thiab nws rau siab ntseeg “coj Vajtswv tej lus txib … thiab tawm tsam txoj kev ua phem.”

Thaum cov neeg Lamas tuaj ua rog, lawv xav tsis thoob vim cov neeg Nifais tau npaj li no, thiab lawv raug swb lawm. Cov neeg Nifais tau “ua tus Tswv lawv tus Vajtswv tsaug, vim yog nws lub hwj chim uas loj tshaj txhua yam uas tau tso lawv dim ntawm lawv cov yeeb ncuab txhais tes.” Lawv twb ua qhov chaw thaiv rog kom pov hwm qhov sab nraud, thiab lawv twb tau txhawb nqa kev ntseeg tus Tswv Yexus Khetos nyob sab haud—hauv lawv lub siab lub ntsws.

Peb yuav ua li cas kom thaiv peb tus kheej hauv ib lub caij nyoog ntxhov siab xwv kom peb yuav “cov cuab yeej nyob hauv Vajtswv txhais tes los ua txoj hauj lwm tseem ceeb no”? Cia peb saib hauv vaj lug kub.

Peb yuav tsum mloog lus. Tus Tswv txib Lihais kom xa nws cov tub rov qab mus rau Yeluxalees “nrhiav cov ceev xwm txheej, thiab nqa cov ntawd los rau ntawm roob moj sab qhua no.” Lihais tsis tau nug vim li cas; nws tsis tau xav paub yuav ua li cas. Nifais kuj tsis tau xav li ntawd, es nws hais tias, “Kuv yuav mus thiab ua tej uas tus Tswv tau txib kom ua.”

Peb puas txaus siab ua raws li Vajtswv hais zoo li Nifais? Los yog peb puas nug sev vim li cas Vajtswv yuav txib li ntawd ib yam li Nifais ob tug tij laug, es vim nkawd tsis ntseeg nkawd twb tso tus Tswv tseg thaum kawg? Kev mloog lus, nrog “lub siab dawb huv,” yog qhov uas tus Tswv hais kom peb ua.

Peb tso siab rau tus Tswv, tus uas hais rau Yausuas thaum Yausuas npaj coj cov Ixayees mus rau hauv thaj av uas tau cog lus tseg lawm tias, “[Nej] ua siab tawv qhawv tsis txhob ntshai, tsis txhob txhawj, thiab tsis txhob poob siab, rau qhov kuv yog tus Tswv uas yog [nej] tus Vajtswv, kuv yuav nrog nraim [nej] txhua qhov uas [nej] mus.” Yausuas tau tso siab rau tej lus ntawd thiab qhia cov neeg: “Nej cia li tu nej lub siab, rau qhov tag kis tus Tswv yuav ua tej txuj ci tseem ceeb rau nej pom.” Tus Tswv tau muab tus dej Yauladees cais, thiab qhov uas cov Ixayees mus ub mus no hauv roob moj sab qhuas tau 40 xyoo twb tiav lawm.

Peb yuav tsum ua tim khawv txog qhov tseeb ib yam li Anpinadais hauv Phau Ntawv Maumoos ua. Nws raug ntes, thiab raug coj mus rau Vaj Ntxwv Nau-as thiab nws cov pov thawj phem, Anpinadais qhia Kaum Nqe Lus Txib thiab qhia tias Khetos yuav “nqis los nrog noob neej nyob, thiab … txhiv nws cov neeg dim.” Ces, nrog kev ntseeg hauv nws lub siab ntsws, nws tshaj tawm tias, “Auj Vajtswv es, txais kuv tus ntsuj plig,” thiab Anpinadais “tau tuag vim raug hluav taws hlawv.”

Peb ua thiab rov qab ua kev khi lus thiab peb txais lub cim nco txog thiab teev tiam Vajtswv hauv lub tuam tsev. Lub cim nco txog yog qhov tseem ceeb tshaj rau peb txoj kev teev tiam thaum Hnub Caiv, vim peb txais txoj lus cog tseg kom “muaj nws Leej Ntsuj Plig niaj hnub nrog [peb] nyob.” Los ntawm txoj kab ke dawb ceev ntawd peb cog lus tias peb yuav ris Yexus Khetos lub npe, coj raws li Nws, thiab lav ris txoj hauj lwm zoo no ib yam Nws tau ua. Nyob hauv lub tuam tsev, peb yuav “muab tej yam ntawm lub ntiaj teb no tso tseg” thiab paub tias tus Tswv nyob ntawd thiab txais tau Nws txoj kev kaj siab lug. Peb tsom ntsoov rau peb cov poj koob yawm txwv, peb tsev neeg, thiab txoj sia nyob mus ib txhis nyob hauv Leej Txiv lub xub ntiag. Yog vim li ntawd Thawj Tswj Hwm Nelson hais li no nyob hauv lub nroog Loos, “Txoj kev zoo uas yuav los ntawm lub tuam tsev no los ntsuas tsis taus.”

Peb yuav tsum ua ncaj ncees thaum peb ua txhua yam. Peb yuav tsum kawm kom paub qhov zoo thiab qhov phem thiab tswj peb tus kheej kom peb tsis tas pheej txiav txim siab tias qhov twg yog qhov zoo thiab yog qhov phem. Peb yuav tsum txaus siab ua raws li Petus tej lus, tus Thwj Tim ntawm lub Koom Txoos thaum ub uas ceeb toom tias, “Nej yuav tsum ceev faj zov zoo tsis txhob nkees, rau qhov dab Ntxwg Nyoog tus uas yog nej tus yeeb ncuab, nws mus mus los los ib yam li tus tsov ntxhuav uas quaj mhiav tom tsiaj noj.”

Thaum peb rau siab ua kom peb tej qhov chaw thaiv rog khov ntxiv ces peb hloov los ua neeg zoo li Yexus Khetos, ua li Nws cov thwj tim tseeb, es Nws pov hwm peb tus ntsuj plig.

Nej zaj lus tim khawv txog Yexus Khetos yog nej tsev thaiv rog, yog kev puaj phais rau nej tus ntsuj plig. Thaum kuv yawg koob thiab nws cov neeg pioneer tsa Tsev Thaiv Rog Heber, lawv tso ib cav ntoo dhos rau ib cav ntoo mus txog thaum tau muab lub tsev thaiv rog “dhos ua ke kom ntom ntom” thiab lawv muaj kev pov hwm. Peb zaj lus tim khawv yeej zoo ib yam. Peb txais tus Vaj Ntsuj Plig Dawb Huv tej lus tim khawv thaum Nws hais lus rau peb sab ntsuj plig, Nws qhia “tej lus tseeb [hauv nruab siab].” Thaum peb ua raws li Yexus Khetos txoj moo zoo, thaum peb siv tus Cawm Seej txoj Kev Theej Txhoj thiab txib mus tom hauv ntej nrog kev ntseeg, tsis ntshai, peb muaj kev tiv thaiv tus yeeb ncuab tej kev ntxias. Peb zaj lus tim khawv muab peb sib txuas lus nrog lub ntuj ceeb tsheej, thiab peb tau koob hmoov vim peb muaj “qhov tseeb ntawm txhua yam.” Thiab, zoo li ib lub tsev thaiv rog uas pov hwm cov pioneer, tus Cawm Seej ob txhais npab ntawm Nws txoj kev hlub muab peb puag khawm.

Tus yaj saub Ethaws qhia tias, “Yog li ntawd, tus uas ntseeg Vajtswv yeej yuav muaj kev cia siab rau ib lub ntiaj teb uas zoo dua, muaj tseeb tiag, twb yog ib qho chaw nyob ntawm Vajtswv sab tes xis, txoj kev cia siab ntawd twb yog los ntawm kev ntseeg los, yog qhov uas txheem tib neeg tus ntsuj plig, uas yuav ua rau lawv ruaj thiab khov kho, ua tej yam uas zoo tas mus li, uas coj lawv mus qhuas Vajtswv.”

Kuv cov kwv tij thiab cov muam, kuv foom koob hmoov rau nej kom nej tso siab rau tus Tswv thiab Nws txoj moo zoo thaum nej mus tom ntej. Cia li puag raws cov uas dawm taws thiab nrog tus Ntsuj Plig lub zog nyob hauv nej cia li hlub thiab coj lawv rov qab los rau lub tsev thaiv rog uas pov hwm sab ntsuj plig. Cia li sim “ua li Yexus” thaum nej ua txhua yam; tso kev phem thiab kev ntxias tseg; hloov siab lees txim, ib yam li peb tus yaj saub ntuas peb ua nag hmo; ua siab ncaj; ua neeg dawb huv; muaj kev khuv leej thiab kev siab hlub; thiab hlub tus Tswv nej tus Vajtswv zoo li ib tug thwj tim tseeb.

Peb zaj lus tim khawv txog Yexus Khetos txoj moo zoo, peb tsev, peb tsev neeg, thiab peb txoj kev ua mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yuav ua peb tsev thaiv rog uas pov hwm peb thiab thaiv peb kom txhob raug tus phem lub hwj chim. Kuv ua tim khawv txog qhov no los ntawm peb tus Tswv thiab Cawm Seej, Yexus Khetos, lub npe, amees.