Tus Khetos: Txoj Kev Kaj uas Ci hauv Kev Tsaus Ntuj
Yog nej xav tias hluav taws ntawm nej zaj lus tim khawv nqig mus thiab kev tsaus nti tab tom los, cia li ua siab loj. Cia li ua raws li nej tau cog lus rau Vajtswv.
Kuv hoob kas nyob hauv lub Tsev rau Koom Haum Niam Tsev los pom tau lub Tuam Tsev Salt Lake zoo heev. Txhua txhia hmo, cov teeb hauv lub tuam tsev taws thaum yuav luag tsaus ntuj. Lub tuam tsev yeej zoo li hluav taws uas ci ntsa iab tsis tu tsis tseg rau kuv pom ntawm kuv qhov rais.
Muaj ib hmo thaum lub Ob Hlis Ntuj tas los, kuv hoob kas tsaus ntuj heev thaum lub hnub tab tom poob. Kuv saib ntawm qhov rais, es pom lub tuam tsev tsis ci. Tsis tau taws teeb. Kuv tu siab tam sim ntawd. Kuv pom tsis tau lub tuam tsev lub hau zuag zuag puag saud uas kuv tau pom txhua hmo tau ntau xyoos.
Qhov uas kuv pom kev tsaus nti thaum kuv xav tias kuv yuav pom txoj kev kaj ua rau kuv nco txog qhov uas peb xav tau kom kawm tau ntxiv yog kev sib raug zoo nrog Yexus Khetos uas yog lub hauv paus ntawm txoj kev kaj ntawd. Nws yog lub hauv paus ntawm peb lub hwj chim, txoj Kev Kaj thiab txoj Sia ntawm lub Ntiaj Teb. Yog peb tsis nrog Nws sib raug zoo, ces peb yuav pib tuag ntawm sab ntsuj plig. Dab Ntxwg Nyoog paub qhov ntawd, nws thiaj li siv tej teeb meem uas peb txhua tus raug. Nws xav ua rau peb txoj kev kaj qauj lawm, txiav txoj kev sib txuas, tu kev txais hluav taws xob, thiab cia peb nyob hauv qhov tsaus nti. Tej kev ntxhov siab los peb ib txwm muaj hauv lub neej no, tiam sis Dab Ntxwg Nyoog sim ua rau peb nyob ib leeg thiab qhia tias peb yog tib tug uas raug li no.
Peb Ib Txhia Tu Siab Kawg Nkaus
Thaum peb raug kev txom nyem, thaum peb tu siab kawg li peb thiaj ua tsis tau pa, thaum zoo li peb twb raug ntaus ib yam li tus txiv neej nyob rau ntawm txoj kev mus rau Yelikaus thiab muaj neeg tso peb tseg, Yexus yog tus uas tuaj thiab pleev roj rau peb qhov txhab, maj mam nqa peb mus rau ib lub tsev so, thiab saib xyuas peb. Rau cov uas tu siab heev Nws hais tias: “Kuv … yuav ua rau tej nra uas nyob saum nej xub pwg kom sib, xwv kom nej tsis nco tias muaj tej nra ntawd nyob saum nej nraub qaum, … xwv kom nej yuav paub tseeb tias kuv, tus Tswv Vajtswv, yeej los saib xyuas kuv cov neeg thaum lawv muaj kev txom nyem.” Khetos kho tau qhov txhab.
Peb Ib Txhia Nkees Heev
Txwj Laug Jeffrey R. Holland hais tias: “Peb tsis tas khiav ceev dua li peb muaj zog. … Tiam sis [txawm li ntawd los], kuv paub … tias nej feem coob khiav ceev ceev heev ua rau nej thiaj tsis muaj zog thiab tsis muaj siab xav ua ntxiv.” Thaum twg peb muaj ntau dhau ua, peb tsum thaub qab thiab nug Leej Txiv Saum Ntuj Ceeb Tsheej seb yuav tso tej yam twg tseg. Ib yam uas peb yuav tsum kawm hauv lub neej no yog tej yam uas peb yuav tsum tsis txhob ua. Txawm li ntawd los, tej lub sij hawm peb lub neej ua rau peb nkees dhau. Yexus cog lus tias, “Nej cov uas sab sab vim nej ris nra hnyav, nej cia li los cuag kuv, thiab kuv yuav cia nej so.”
Khetos txaus siab nrog peb ris tus quab thiab rub kom pab peb tej nra tsis hnyav. Khetos yog kev so.
Peb Ib Txhia Xav tias Peb Tsis Zoo Li Lwm Tus
Tej lub sij hawm peb xav tias tsis muaj leej twg nyiam peb los sis tsis pom zoo rau peb. Phau Tshiab hais txog tej yam uas Yexus ua kom ncav tes pab ntau hom tib neeg: neeg mob ruas, neeg sau se, me nyuam yaus, neeg Kalilais, poj niam ntiav, Lwm Haiv Neeg, cov poj niam, neeg txhaum, neeg Xamalis, cov poj ntsuam, cov Falixais, cov tub rog Loos, neeg uas deev luag poj luag txiv, cov uas tsis huv ua kab ke. Yuav luag nyob hauv txhua zaj, Nws ncav tes pab ib tug uas cov pej xeem tsis tshua pom zoo rau.
Lukas 19 hais ib zaj txog tus thawj sau se nyob hauv Yelikaus hu ua Xakhais. Nws tau nce ntoo kom pom tau Yexus taug kev. Tseem fwv Loos ntiav Xakhais ua hauj lwm thiab luag xav tias nws yuav nyiaj xiab thiab yog neeg txhaum. Yexus pom nws nyob saum tus ntoo thiab hu rau nws tias, “Xakhais, koj cia li nqis los, rau qhov hnub no kuv yuav mus so hauv koj tsev.” Thiab thaum Yexus pom tias Xakhais muaj lub siab zoo thiab pom tej yam nws ua kom pab lwm tus, Nws lees yuav Xakhais lub txiaj ntsim, hais tias, “Hnub no txoj kev cawm dim twb los rau hauv tus txiv neej no lub tsev lawm, [vim] tus txiv neej no yog Anplaham ib tug xeeb ntxwv thiab.”
Khetos tau qhia cov neeg Nifais hais tias, “Kuv twb tsis tau hais kom nej ib tug twg khiav mus.” Nyob hauv Tes Hauj Lwm 10 Petus kawm ib yam tseem ceeb thaum nws hais tias, “Vajtswv qhia rau kuv hais tias kuv tsis txhob hu leej twg hais tias yog neeg tsis huv.” Ib yam uas Yexus Khetos cov thwj tim thiab Tsoom Haiv Neeg Ntseeg hauv Hnub Nyoog Kawg yuav tsum ua yog ib leeg hlub ib leeg. Yexus tau caw peb ua li Nws tau caw Xakhais: “Nej sim mloog saib, kuv sawv ntawm sab qhov rooj nraud thiab khob; yog [nej] hnov kuv khob thiab qhib qhov rooj rau kuv, kuv yuav los hauv [nej] lub tsev. Kuv yuav nrog [nej] noj mov thiab [nej] yuav nrog kuv noj mov.” Khetos yeej pom peb nyob saum peb tus ntoo.
Peb Ib Txhia Ntxhov Siab Vim Muaj Lus Nug Ntau
Ob peb xyoos tas los, kuv ntxhov siab txhawj xeeb vim muaj tej lus nug uas kuv nrhiav tsis tau lus teb. Hnub Saturday sawv ntxov, kuv ua npau suav. Nyob hauv kuv zaj npau suav kuv tau pom ib lub me nyuam tsev thiab kuv to taub tias kuv yuav tsum nkag mus haud. Muaj tsib lub qhov rooj ib puag ncig, tiam sis qhov rais yog pob zeb ua xwb. Nyob hauv kuv zaj npau suav kuv yws yws, tsis xav mus haud vim kuv ntshai ti ti heev. Ces ua rau kuv xav tias Yales tus tij laug twb ua siab ntev muab cov pob zeb yaj kom hloov ua iav kom pom kev tshab. Iav yog pob zeb uas twb hloov ua lwm yam. Thaum tus Tswv kov cov pob zeb kom pab Yales tus tij laug, cov pob zeb ci ci nyob hauv cov nkoj uas tsaus nti. Ua ciav kuv xav xav mus nyob rau hauv lub me nyuam tsev ntawd tshaj lwm qhov chaw. Yog qhov chaw—tib lub qhov chaw—rau kuv “pom” tseeb. Tej lus nug uas kuv txhawj txog los tsis tau ploj mus, tiam sis nyob hauv kuv lub siab yog ib txoj lus nug tom qab kuv tsim los uas kuv xav paub: Koj yuav ua li cas kom koj txoj kev ntseeg loj tuaj, ib yam li Yales tus tij laug, xwv kom koj cov pob zeb yuav hloov los ua txoj kev kaj?
Peb lub hlwb hauv lub neej no yeej xav to taub thiab nrhiav lub ntsiab uas yooj yim rau peb to taub. Kuv tsis paub vim li cas hauv lub neej no daim ntaub thaiv tuab ua luaj li. Lub sij hawm no tsis yog lub sij hawm ntawm peb txoj kev ua neeg nyob mus ib txhis uas peb paub txhua yam. Yog lub sij hawm uas peb kawm kom paub (los yog peb txoj kev cia siab) rau tej uas peb qhov muag tsis pom. Kev paub tseeb yeej los ntawm tej yam uas nyuaj rau peb tshuaj ntsuam, tiam sis muaj txoj kev kaj thaum nyob hauv kev tsaus nti. Yexus hais tias, “Kuv yog qhov kaj thiab txoj sia ntawm lub ntiaj teb.” Rau cov uas nrhiav qhov tseeb, tej zaum thaum xub thawj yus xav tias yog ib qho ruam uas tau siv pob zeb ua qhov rais ua rau yus ntshai ti ti. Tiam sis yog yus ua siab ntev thiab rau siab ntseeg, Yexus yuav muab cov qhov rais ua yog pob zeb hloov los ua iav thiab txoj kev kaj. Khetos yog txoj kev kaj rau peb pom kev.
Peb Ib Txhia Xav tias Peb Yeej Yuav Zoo Tsis Txaus
Zas xim liab uas hais txog hauv Phau Qub yeej zoo nkauj heev tiam sis kuj tsis thim, uas txhais tias zas xim lo cov ntaub plaub yaj thiab yuav tsis thim tsis hais tau muab ntxhua pes tsawg zaus los yog. Dab Ntxwg Nyoog siv txoj kev xav no zoo li nws xuas qws ntaus peb: cov ntaub plaub yaj dawb uas zas xim liab yeej yuav tsis rov qab dawb hlo li. Tiam sis Yexus Khetos hais tias, “Tej uas kuv ua … nyob siab tshaj tej uas nej ua … npaum li ntawd,” thiab qhov txuj ci tseem ceeb ntawm Nws txoj kev tshav ntuj yog qhov uas thaum peb hloov siab lees txim rau peb tej kev txhaum, Nws cov ntshav liab ua rau peb hloov ua neeg huv. Xav tsis thoob ho ua li cas, tiam sis txawm li ntawd qhov no muaj tseeb.
Daim duab los ntawm iStock.com/iinwibisono
“Txawm yog nej tej kev txhaum yuav liab cuag ntshav los yuav dawb paug li daus, txawm yog nej tej kev txhaum dub doog los yuav dawb paug li tej plaub yaj.” Tus Tswv hais tias: tus uas “tau hloov siab lees txim rau nws tej kev txhaum, ces twb zam txim rau tus ntawd, thiab kuv, tus Tswv, tsis nco qab txog tej ntawd ntxiv.” Los yog hais tias: Peb cia li los sib hais txog zaj no. Txhua tus puav leej ua txhaum; thiab ua yuam kev. Los cuag kuv thiab hloov siab lees txim. Kuv yuav tsis nco txog nej tej kev txhaum ntxiv. Yuav kho koj kom rov qab zoo. Kuv muaj ib txoj hauj lwm rau nej ua. Khetos ua kom plaub yaj dawb paug.
Tiam sis yuav ua li cas kom ua li ntawd. Yuav ua li cas kom rov qab txais tau Yexus Khetos lub hwj chim thaum peb qaug zog? Thawj Tswj Hwm Russell M. Nelson hais qhov no yooj yim heev: “Yuav tsum ua raws li tej kev khi lus uas dawb ceev. … Tsis yog ib txoj kev nyuaj heev.” Cia li tsom ntsoov rau Yexus Khetos hauv nej lub neej.
Yog nej xav tias hluav taws ntawm nej zaj lus tim khawv nqig mus thiab kev tsaus nti tab tom los, cia li ua siab loj. Cia li ua raws li nej tau cog lus rau Vajtswv. Nug tej yam nej xav paub. Ua siab ntev muab cov pob zeb yaj kom hloov ua iav. Tig mus rau Yexus Khetos, uas hlub nej.
Yexus hais tias, “Kuv yog txoj kev kaj uas ci tuaj rau hauv qhov tsaus, thiab qhov tsaus tsis to taub txoj kev kaj ntawd.” Qhov no txhais tias txawm siv zog npaum li cas los, qhov tsaus yeej yuav tua tsis tau txoj kev kaj. Yeej tsis ua ib zaug li. Nej tso siab tau hais tias yuav muaj Nws txoj kev kaj thaum nej xav tau.
Peb, los yog cov neeg uas peb hlub, tej zaum zoo li tua teeb lawm. Hais txog lub Tuam Tsev Salt Lake, muaj neeg hu tuaj rau tus uas saib xyuas qhov chaw, Tij Laug Val White, tam sim ntawd. Tib neeg twb pom. Xav paub vim li cas tsis tau taws teeb ntawm lub tuam tsev? Ces cov neeg ua hauj lwm xub mus saib txhua daim qhib hluav taws xob hauv lub tuam tsev thiab xuas tes taws teeb. Ces tom qab ntawd lawv muab cov roj teeb loj hauv lub tshuab qhib hluav taws xob pauv thiab sim seb muaj dab tsi piam tas.
Yeej nyuaj taws teeb yog nyob nej tus kheej xwb. Peb xav tau phooj ywg. Peb ib leeg xav tau ib leeg. Ib yam li cov neeg uas ua hauj lwm hauv lub tuam tsev, peb ib leeg pab tau ib leeg thaum peb tuaj, kom peb sab ntsuj plig rov qab muaj zog, thiab kho tej yam uas tau ua tsis yog lawm.
Tej zaum peb lub teeb ci zoo li ib lub teeb xwb nyob ntawm tus ntoo. Tiam sis peb tseem ci ntsa iab me me, thiab nyob ua ke, zoo li cov teeb hauv Tshav Tuam Tsev thaum lub caij Christmas, peb yuav ua rau neeg coob tsis coob xav tuaj hauv tus Tswv lub tuam tsev. Qhov zoo tshaj plaws, ib yam li Thawj Tswj Hwm Nelson tau qhia, peb yuav ua rau peb tus kheej thiab cov neeg uas muaj nqis rau peb txais tau tus Cawm Seej txoj kev kaj los ntawm qhov uas peb ua raws li peb tej kev khi lus. Tus Tswv ua ntau yam kom muab nqi zog uas yog hwj chim thiab kev xyiv fab vim peb ua li ntawd.
Kuv ua tim khawv tias tus Tswv hlub nej. Tus Tswv paub tias nej siv zog npaum li cas. Nej tab tom ua tau zoo. Cia li ua ntxiv. Nws pom txhua yam uas nej ua ntsiag to thiab suav tej ntawd rau nej kom tau zoo thiab cov uas nej hlub kom tau zoo. Tej yam nej ua muaj nqis. Nej tsis nyob nej ib leeg xwb. Nws lub npe, Emanu-es txhais tias “Vajtswv nrog peb.” Nws yeej nrog nej nyob.
Cia li mus ob peb ruam tom ntej rau ntawm txoj kev khi lus, txawm yog tsaus ntuj nti thiab nej pom tsis deb. Cov teeb yuav rov qab ci ntsa iab. Kuv ua tim khawv tias Yexus cov lus muaj tseeb, thiab muaj txoj kev kaj puv npo: “Txav los nyob ze kuv ces kuv yuav txav los nyob ze nej; rau siab ntso nrhiav kuv ces nej yuav ntsib kuv; thov, ces nej yuav tau txais; khob, ces yuav qhib rau nej.” Los ntawm Yexus Khetos lub npe, amees.