Ntsia Ntsoov Yexus Khetos

Thaum Yexus taug kev hauv Kapena-us nrog ib pawg neeg coob ib puag ncig, ib tug poj niam uas raug mob heev ntev li 12 xyoos cev tes thiab kov Yexus lub tw tsho. Nws tus mob twb zoo lawm tam sim ntawd.

Cov vaj lug kub qhia tias Yexus paub “hais tias hwj chim tawm ntawm [Nws] mus lawm,” es “Yexus txawm tig hlo los nug cov neeg uas raws nws qab” thiab “ntsia tej neeg uas sawv ib ncig saib yog leej twg kov [Nws].” “Tus poj niam ntawd paub hais tias Yexus paub lawm,” nws “txawm los txhos caug ntua ntawm Yexus ko taw thiab qhia txhua yam rau Yexus.”

Yexus hais rau nws hais tias, “Me ntxhais, koj tus mob zoo lawm, twb yog vim koj ntseeg. Koj cia li mus kaj siab lug.”

Yexus Khetos tau cawm tus poj niam no. Nws tus mob ntawm sab cev nqaij daim tawv lawm, tiam sis thaum Yexus tig los ntsia nws, tus poj niam hais tias nws ntseeg Yexus thiab Yexus tau kho nws lub siab kom zoo. Yexus muaj kev hlub hais lus rau nws, qhia nws tias Yexus pom zoo, thiab foom koob hmoov rau nws kom muaj kev kaj siab lug.

Cov kwv tij, vim peb tuav lub pov thawj hwj dawb huv, peb ua txoj hauj lwm cawm neeg txoj sia. Xyoo tas los, tus Tswv tau tso txoj kev coj txoj hauj lwm no rau Ixayees cov txwj laug ris. Tus Tswv txoj kev txib peb yeej tshoov peb lub siab—nrog peb cov muam ua ke, peb yuav tsum txhawb pab lwm tus, xwv kom muab Ixayees sib sau ua ke nyob ob sab ntawm daim ntaub thaiv, ua kom peb tsev ua ib qhov chaw dawb huv rau kev ntseeg thiab kev kawm txog txoj moo zoo, thiab npaj neeg ntiaj teb rau Yexus Khetos txoj Kev Los Zaum Ob.

Zoo li txhua yam, tus Cawm Seej tau qhia kev rau peb lawm: peb yuav tsum ntsia ntsoov thiab ua hauj lwm rau Yexus Khetos ib yam li Nws tau ntsia ntsoov thiab ua hauj lwm rau Nws Leej Txiv. Tus Cawm Seej hais li no rau tus Yaj Saub Yauxej Xamiv:

“Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai.

“Saib tej qhov txhab uas raug nkaug to ntawm kuv sab tav, thiab tej caws pliav los ntawm ntsia hlau uas nyob ntawm kuv ob txhais tes thiab ob txhais ko taw; cia li rau siab ntseeg, ua raws li kuv tej lus txib, thiab neb yuav tau txais lub nceeg vaj ceeb tsheej ua neb tug.”

Nyob hauv lub ntuj ua ntej yug los Yexus cog lus rau Nws Leej Txiv tias Nws yuav ua raws li Leej Txiv lub siab nyiam thiab ua peb tus Cawm Seej thiab tus Txhiv Dim. Thaum Nws Leej Txiv nug hais tias, “Kuv yuav xa leej twg mus?” Yexus teb hais tias:

“Kuv nyob no, xa kuv mus.”

“Leej Txiv, cia muaj raws li koj siab nyiam, thiab lub yeeb koob yog koj li mus ib txhis.”

Tas Nws lub neej, Yexus tau ua raws li txoj kev cog lus ntawd. Nws tau txo hwj chim, muaj siab mos siab muag thiab hlub lwm tus thaum Nws qhia txog Nws Leej Txiv cov lub qhuab qhia thiab ua Nws Leej Txiv txoj hauj lwm nrog lub hwj chim thiab txoj cai uas Nws Leej Txiv tau muab rau Nws.

Yexus twb tso siab rau Nws Leej Txiv. Nws tias:

“Kuv hlub Leej Txiv.”

“Kuv ua txhua yam raws li nws lub siab nyiam xwb.”

“Kuv los … tsis yog los ua raws li kuv lub siab, tiam sis kuv los ua raws li [Leej Txiv] uas txib kuv los lub siab nyiam.”

Thaum Nws nyob hauv Khexemanes Nws thov Vajtswv, “Txawm yog li cas los koj tsis txhob ua raws li kuv lub siab nyiam, tiam sis ua raws li koj lub siab nyiam xwb.”

Thaum tus Tswv hais kom Ixayees cov txwj laug “ntsia ntsoov kuv nrog txhua txoj kev xav” thiab “saib qhov txhab” rau ntawm Nws lub cev uas tau sawv rov los, Nws hais kom peb tsis txhob ua txhaum ntxiv thiab tsis ua raws li neeg ntiaj teb ua thiab hais kom peb tig mus rau Nws thiab hlub thiab mloog Nws lus. Nws hais kom peb qhia Nws cov lus qhuab qhia thiab ua Nws txoj hauj lwm raws li Nws txoj kev. Yog li ntawd, Nws hais kom peb tso siab plhuav rau Nws, ywj peb lub siab nyiam rau Nws, thiab los ntawm Nws lub hwj chim txhiv dim hloov los ua neeg zoo li Nws.

Cov kwv tij, yog peb ntsia ntsoov Yexus Khetos Nws yuav foom koob hmoov rau peb kom peb ua Nws cov txwj laug hauv Ixayees—uas txo hwj chim, muaj siab mos siab muag, thiab muaj Nws txoj kev hlub puv npo. Thiab peb yuav ua rau peb tsev neeg thiab peb cov kwv tij thiab cov muam nyob ob sab ntawm daim ntaub thaiv txais kev xyiv fab thiab cov koob hmoov los ntawm Nws txoj moo zoo thiab Nws lub Koom Txoos.

Thawj Tswj Hwm Russell M. Nelson tau hais kom peb ntsia ntsoov Yexus Khetos zoo ib yam li no hais tias: “Kev ua ib tug thwj tim uas muaj hwj chim zoo li lawv los tsis yog ib qho yooj yim los sis tsis yog ib qho yus lam ua xwb. Peb yuav tsum tsom ntsoov rau tus Cawm Seej thiab Nws txoj moo zoo. Yog ib qho nyuaj kom ntsia ntsoov Nws nrog txhua txoj kev xav. Tiam sis thaum peb ua li ntawd, peb tej kev ua xyem xyav thiab kev ntshai yuav ploj mus.”

Ntsia yog ib lo lus zoo heev. Ib tug ntsia ua rau tej yam nyob ruaj khov, thiab tsis txav hlo li. Thiab peb ntsia ntsoov Yexus Khetos thiab Nws txoj moo zoo thaum peb ua raws li peb tej kev khi lus.

Thaum peb ua raws li peb tej kev khi lus, ces tej ntawd hloov txhua yam peb ua thiab hais. Peb ua neej raws li kev khi lus thaum ua tej yam yooj yim txhua hnub nrog kev ntseeg uas ntsia ntsoov Yexus Khetos: kev thov Vajtswv kawg siab los ntawm Nws lub npe, kev nco ntsoov Nws tej lu, kev tig mus rau Nws kom hloov siab lees txim, ua raws li Nws cov lus txib, txais lub cim nco txog thiab hwm Nws Hnub Caiv kom dawb huv, teev tiam nyob hauv Nws lub tuam tsev dawb huv ntau npaum li ua tau, thiab siv Nws lub pov thawj hwj dawb huv kom pab Vajtswv cov me nyuam.

Qhov uas peb ua raws li peb tej kev khi lus ua rau peb qhib siab rau tus Cawm Seej lub hwj chim txhiv dim thiab tus Vaj Ntsuj Plig Dawb Huv txoj kev tshoov siab kom peb dawb huv. Ib nqe lus ntxiv rau ib nqe lus, tus Cawm Seej hloov peb tus cwj pwm, ua rau peb hloov siab los ntseeg Nws ntxiv thiab peb muaj siab xav ua raws li peb tej kev khi lus.

Peb xav xav ua raws nraim li tej yam uas peb tau cog lus rau peb Leej Txiv Saum Ntuj Ceeb Tsheej peb yuav ua. Leej Txiv Saum Ntuj Ceeb Tsheej tej lus cog tseg ua rau peb muaj kev ris txiaj thiab kev xyiv fab. Peb tej kev khi lus tsis yog tej kev cai uas peb yuav tsum ua xwb, peb saib tej ntawd yog tej ntsiab cai zoo uas tshoov peb lub siab thiab coj peb thiab ua rau peb ntsia ntsoov Yexus Khetos.

Tej kev teev tiam no los txhua tus ua tau, tsis hais cov hluas cov laus los yog. Nej cov tub hluas uas tuav lub Pov Thawj Hwj Aloos, txhua yam kuv tau hais hmo no los hais rau nej thiab. Kuv ua Vajtswv tsaug rau nej. Nej pab Tsoom Haiv Neeg Ntseeg hauv Hnub Nyoog Kawg txais tau cov kab ke thiab kev khi lus uas dawb huv txhua lub lim tiam. Thaum nej npaj, foom koob hmoov, los yog muab lub cim nco txog rau lwm tus; txhawb pab lwm tus; ua kev cai raus dej hauv lub tuam tsev; caw ib tug phooj ywg los koom nrog nej; los yog cawm ib tug mej zeej hauv nej pawg, ces nej ua txoj hauj lwm cawm seej. Nej kuj muaj peev xwm ntsia ntsoov Yexus Khetos thiab ua raws li nej tej kev khi lus txhua hnub. Kuv cog lus rau nej tias yog nej ua li no, tus Tswv yuav tso siab rau nej ua Nws cov tub qhe, thiab muaj ib hnub nej yuav ua cov txwj laug hauv Ixayees.

Cov kwv tij, kuv paub tias nej ntshai ua txhua yam no. Tiam sis thov kom nej nco txog tus Cawm Seej tej lus hais tias: “Tsis yog kuv tib leeg xwb; Leej Txiv tus uas txib kuv los, nws yeej nrog kuv … thiab.” Peb yeej zoo li no thiab. Peb tsis nyob peb ib leeg xwb. Tus Tswv Yexus Khetos thiab peb Leej Txiv Saum Ntuj Ceeb Tsheej hlub peb, thiab Nkawd nrog peb nyob. Vim Yexus ntsia ntsoov Nws Leej Txiv thiab theej peb lub txhoj peb thiaj li paub tias yog peb ntsia ntsoov Yexus Nws yuav pab peb.

Tsis muaj leej twg uas zoo tag nrho. Tej lub sij hawm peb raug khuam kev. Peb poob siab los yog tsis nco qab. Peb dawm ko taw. Tiam sis yog peb saib ntsoov Yexus Khetos nrog ib lub siab uas xav hloov siab lees txim, ces Nws yuav txhawb nqa peb, ntxuav peb kom tsis muaj kev txhaum, zam txim pub rau peb, thiab kho peb lub siab kom zoo. Nws yeej ua siab ntev thiab ua siab zoo; Nws txoj kev hlub uas txhiv dim yeej tsis tu tsis tseg. Nws yuav pab peb ua raws li peb tej kev khi lus thiab ua raws li qhov uas Vajtswv hu peb kom ua cov txwj laug hauv Ixayees.

Thiab Leej Txiv yuav foom koob hmoov pub rau peb kom peb ua tau raws li Nws lub hom phiaj—“txhua yam, tag nrho saum ntuj thiab hauv ntiaj teb, txoj sia thiab txoj kev kaj, tus Ntsuj Plig thiab lub hwj chim, uas tau xa mus los ntawm Leej Txiv lub siab nyiam dhau ntawm Yexus Khetos, uas yog nws Leej Tub los.”

Thaum txoj kev kaj thiab hwj chim los ntawm tus Tswv los rau hauv peb lub neej, muaj peb yam txuj ci tseem ceeb:

Yam thib ib, peb txawj pom kev! Los ntawm kev tshwm sim peb saib lwm tus zoo li Yexus saib tus poj niam: tsis saib ntsej muag tiam sis saib lub siab. Thaum peb saib li Yexus saib, Nws foom koob hmoov rau peb kom hlub cov uas peb pab los ntawm Nws txoj kev hlub. Nrog Nws txoj kev pab, cov uas peb pab yuav pom tus Cawm Seej thiab txais Nws txoj kev hlub.

Yam thib ob, peb muaj hwj chim pov thawj hwj! Peb muaj txoj cai thiab lub hwj chim ua tej yam los ntawm Yexus Khetos lub npe kom “foom koob hmoov, coj kev, pov hwm, txhawb nqa, thiab kho lwm tus” thiab ua txuj ci tseem ceeb rau cov uas peb hlub thiab pov hwm peb tej kev sib yuav thiab tsev neeg.

Yam thib peb, Yexus Khetos nrog peb mus! Peb mus qhov twg, Nws nrog peb mus. Thaum peb qhia, Nws nrog peb qhia. Thaum peb nplij lwm tus lub siab, Nws nplij siab thiab. Thaum peb foom koob hmoov, Nws foom koob hmoov thiab.

Cov kwv tij, puas tsim nyog uas peb yuav zoo siab heev? Yeej tsim nyog! Peb tuav Vajtswv lub pov thawj hwj dawb huv. Thaum peb ntsia ntsoov Yexus Khetos, thiab ua raws li peb tej kev khi lus, peb yuav koom tes nrog peb cov muam thiab txhawb pab lwm tus raws li ib txoj kev siab dua, muab Ixayees sib sau ua ke nyob ob sab ntawm daim ntaub thaiv, txhawb nqa thiab khi peb tsev neeg ua ke, thiab npaj neeg ntiaj teb rau tus Tswv Yexus Khetos txoj Kev Los Zaum Ob. Yuav muaj li no. Kuv ua tim khawv txog qhov no.

Kuv xaus lus nrog qhov no uas kuv thov Vajtswv kawg siab tias, peb txhua tus, yuav ntsia ntsoov Yexus Khetos los ntawm txhua yam peb xav. Txhob ua xyem xyav. Tsis txhob ntshai. Los ntawm Yexus Khetos lub npe, amees.