Nrhiav Kev Txawj Ntse Los ntawm tus Ntsuj Plig

Cov kwv tij thiab cov muam, tus Tswv pheej qhia peb kom peb “nrhiav kev kawm, uas twb yog los ntawm kev kawm ntawv thiab los ntawm kev ntseeg.” Peb yuav txais txoj kev kaj thiab kev txawj ntse tsis yog los ntawm peb txoj kev xav mus xav los, tiam sis kuj yog los ntawm tus Vaj Ntsuj Plig Dawb Huv txoj kev tshoov siab.

Muaj ib lub sij hawm thaum lub hauv paus ntawm kev txawj ntse no tsis nyob hauv kuv lub neej.

Kuv tus poj niam Irene thiab kuv tau koom lub Koom Txoos 31 xyoos tas los thaum wb nyuam qhuav siab yuav. Wb ob leeg tau loj hlob tuaj nyob hauv lub teb chaws Colombia, tiam sis ob peb hlis tom qab wb sib yuav, kuv yuav tsum mus ua hauj lwm hauv Yelemes teb. Wb tseem hluas heev thiab muaj kev cia siab ntau; yog ib lub sij hawm zoo siab kawg rau wb.

Thaum kuv rau siab ua kuv txoj hauj lwm, Irene xav tias wb yuav txais lus xov uas los saum ntuj los, nws tsis paub thaum twg los yog yuav txais li cas. Yog li ntawd, nws pib cia neeg coob nkag rau hauv wb lub tsev xws li cov uas muag phau ntawv qhia txog ntau yam, cov muag tshuab nqus tsev, cov uas muag phau ntawv qhia ua mov, tshuab ua mov, thiab li ntawd, thaum nws tseem tos lus xov ntawd.

Muaj ib hmo nws qhia kuv tias nws tau ntsib ob tug tub hluas uas hnav xuv dub uas tau khob qhov rooj es nws txais kev tshoov siab meej hais tias nws yuav tsum cia nkawd nkag rau haud wb lub tsev. Nkawd hais tias nkawd xav sib tham nrog nws txog Vajtswv tiam sis nkawd yuav rov qab los thaum kuv nyob hauv tsev. Es puas yog lus xov uas nws tseem tos?

Nkawd pib tuaj xyuas wb, thiab raws li nkawd qhia, wb tau nyeem vaj lug kub thiab tau kawm tias Yexus Khetos yog peb tus Cawm Seej thiab tus Txhiv Dim. Tsis ntev tom qab wb tu siab uas wb tau ua kev cai raus dej thaum wb yog me nyuam mos liab, es wb thiaj li tsis tau ua kev khi lus. Tiam sis, yog wb ua kev cai raus dej ntxiv ces wb yuav ua mej zeej hauv lub Koom Txoos tshiab no, es wb thiaj li yuav tsum to taub txhua yam ua ntej.

Tiam sis wb yuav ua li cas kom paub tias ob tug tub txib qhia wb qhov tseeb txog Phau Ntawv Maumoos thiab Yauxej Xamiv, thiab txoj hau kev cawm seej? Wb twb to taub los ntawm tus Tswv tej lus hais tias wb yuav “pom lawv tes hauj lwm [peb thiaj] yuav paub.” Yog li ntawd, wb tau pib tshuaj ntsuam lub Koom Txoos thaum wb nrhiav tes hauj lwm los ntawm wb lub hlwb uas xav tau pov thawj thiaj ntseeg tau. Es wb tau pom dab tsi? Wb pom:

• Tib neeg zoo siab thiab siab zoo thiab tsev neeg zoo uas to taub tias wb yuav tsum muaj kev xyiv fab hauv lub neej no thiab tsis raug txom nyem thiab kev tu siab xwb.

• Ib lub koom txoos uas tsis muaj cov xib hwb uas yus them nqi kom txhawb nqa tiam sis cov mej zeej txais kev txib thiab kev lav ris.

• Ib lub koom txoos uas muaj Yexus Khetos thiab tsev neeg nyob hauv lub plawv ntawm txhua yam, cov mej zeej yoo mov ib zaug ib lub hli thiab pub nyiaj kom pab cov neeg pluag, lawv txhawb nqa kev noj qab haus huv, thiab qhia kom tsis txhob haus los noj tej yam phem.

Tsis tas li ntawd:

• Wb nyiam qhov uas lawv tsom ntsoov rau yus txoj kev loj hlob tuaj, kev kawm ntawv, kev khwv ua hauj lwm thiab kev vam tau yus tus kheej.

• Wb tau kawm txog lawv txheej xwm pab cov neeg txom nyem.

• Thiab wb txais kev tshoov siab los ntawm lub tuam rooj sab laj uas muaj zaj nkauj zoo mloog thiab cov ntsiab cai ntawm sab ntsuj plig uas lawv qhia.

Wb pom tag nrho tej no, es wb tsis pom ib qho txhaum hauv lub Koom Txoos. Tiam sis, wb nyiam txhua yam uas wb pom. Tiam sis, wb tseem txiav txim siab tsis tau ua kev cai raus dej vim wb xav paub txhua yam ua ntej wb ua li ntawd.

Tiam sis, txawm wb tsis tau txiav txim siab los, tus Tswv ua siab ntev npaj wb, Nws hloov wb lub siab, thiab Nws pab wb kawm tias wb yuav tsum paub qhov tseeb tsis yog los ntawm yus lub hlwb tej kev xav xwb tiam sis yog los ntawm tus Ntsuj Plig lub suab yau yau uas hais lus rau peb lub siab.

Muaj ib hmo tom qab wb kawm txog txoj moo zoo tau 10 lub hlis lawm uas wb hnov tus Ntsuj Plig thiab Nws lub suab, thaum wb nyeem Mauxiyas 18: “Vim nej xav [kom] ib leeg txaus siab ris ib leeg tej nra, … nplij cov uas xav tau kev nplij siab, … yog hais tias qhov no yog qhov uas nej lub siab xav tau, puas muaj dab tsi ua rau nej tsis yeem ua kev cai raus dej los ntawm tus Tswv lub npe?”

Nqe vaj lug kub los ntawm Phau Ntawv Maumoos nkag wb lub siab lub ntsws thiab wb twb paub kiag hais tias tsis muaj ib yam dab tsi uas qhia wb tias wb yuav tsum tsis txhob ua kev cai raus dej. Wb paub hais tias tej kev xav nyob hauv tej nqe no kuj yog tej yam uas wb xav ua thiab tej ntawd yog tej uas tseem ceeb tiag tiag. Tej ntawd tseem ceeb dua li kev to taub txhua yam vim wb twb paub txaus lawm. Wb yeej ib txwm tau tso siab rau Leej Txiv Saum Ntuj Ceeb Tsheej txoj kev coj peb thiab wb paub tias Nws tseem yuav coj peb kev.

Yog li ntawd, tib hnub ntawd, peb tau teem hnub ua kev cai raus dej, thiab tsis ntev tom qab ntawd, peb tau ua kev cai raus dej!

Peb tau kawm li cas los ntawm lub sij hawm ntawd?

Qhov thib ib, peb tau kawm tias peb ntseeg tau peb Leej Txiv Saum Ntuj Ceeb Tsheej uas hlub peb, tus uas sim pab peb hloov los ua tus neeg uas Nws xav kom peb ua. Peb twb kawm tias Nws tej lus muaj tseeb thaum Nws hais tias, “Kuv yuav muab rau noob neej ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub; thiab lawv cov uas mloog kuv tej lus ntsiab cai … yuav tau koob hmoov, vim lawv yuav kawm laj lim tswv yim; rau tus uas txais kuv yuav muab ntau ntxiv.”

Thiab qhov thib ob, peb kawm tias, ntxiv rau peb txoj kev xav mus xav los, muaj ib yam ntxiv uas coj peb kev thiab pab peb to taub kom muaj kev txawj ntse Yog Nws tus Vaj Ntsuj Plig Dawb Huv lub suab yau yau uas hais lus rau peb lub siab lub ntsws.

Kuv nyiam muab lub ntsiab cai no piv rau peb txoj kev txawj pom kev. Peb Leej Txiv Saum Ntuj Ceeb Tsheej tsis tau muab ib lub qhov muag rau peb xwb tiam sis nws muab ob lub qhov muag. Peb pom tau yog muaj ib lub qhov muag xwb, tiam sis lub qhov muag thib ob ua rau peb pom tau ntxiv. Thaum tso tej uas ob lub qhov muag pom ua ke hauv peb lub hlwb, ua rau peb pom duab txog tej yam uas nyob ib puag ncig.

Yog li ntawd, peb twb tau txais ob lub hauv paus kom paub tseeb, los ntawm peb sab cev nqaij daim tawv thiab peb sab ntsuj plig. Peb lub hlwb tsim ib txoj kev pom los ntawm kev hnov ntawm peb sab cev nqaij daim tawv thiab txoj kev xav mus xav los. Tiam sis los ntawm lub txiaj ntsim Vaj Ntsuj Plig Dawb Huv, Leej Txiv kuj tau ua rau peb pom tau ib yam ntxiv, uas yog qhov tseem ceeb thiab tseeb tiag, vim tias yog los ntawm Nws ncaj qha rau peb. Tiam sis vim tias tus Ntsuj Plig tej lus ntxhi yau yau heev, neeg feem coob tsis paub txog qhov ntawd.

Thaum ob txoj kev pom kev no koom ua ke hauv peb lub siab, ces peb thiaj pom tau ib daim duab txog tej yam uas muaj tiag tiag. Muaj tseeb tiag, los ntawm tus Vaj Ntsuj Plig Dawb Huv lub zeem muag, tej yam “tseeb,” zoo li peb lub hlwb to taub, los peb kawm tau yog tej yam uas ntxias peb los yog tej yam tsis yog. Nco ntsoov Maulaunais tej lus: “Los ntawm tus Vaj Ntsuj Plig Dawb Huv lub hwj chim nej yuav paub qhov tseeb ntawm txhua yam.”

31 xyoos thaum kuv yog ib tug mej zeej hauv lub Koom Txoos, kuv tau kawm ntau zaus hais tias yog peb tso siab rau peb txoj kev xav xwb thiab xyeej los yog tsis quav ntsej txog tej kev to tuab ntawm sab ntsuj plig uas peb txais los ntawm tus Vaj Ntsuj Plig Dawb Huv tej kev tshoov siab, ces zoo li peb ua neej muaj ib lub qhov muag xwb. Tiam sis, hais lus piv txwv, Vajtswv tau muab ob lub qhov muag rau peb. Tsuas yog peb siv tej yam uas peb pom los ntawm ob lub qhov muag peb thiaj yuav paub tag nrho tej yam uas muaj tseeb thiab tej yam uas peb kawm hauv lub neej no, tsis hais kev to taub tag nrho txog peb lub hom phiaj vim peb yog Leej Txiv Saum Ntuj Ceeb Tsheej cov me nyuam.

Ua rau kuv nco txog qhov uas Thawj Tswj Hwm Russell M. Nelson qhia ib xyoo tas los thaum nws hais tias “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”

Kuv paub tiag tiag hais tias:

• Peb muaj ib Leej Txiv Saum Ntuj Ceeb Tsheej uas hlub peb, thiab peb txhua tus tau pom zoo los rau hauv lub ntiaj teb raws li Vajtswv txoj hau kev.

• Yexus yog tus Khetos; Nws muaj txoj sia nyob thiab yog kuv tus Cawm Seej thiab tus Txhiv Dim.

• Vajtswv tau hu Yauxej, ib tug tub hluas uas txo hwj chim, los ua ib tug yaj saub uas tau qhib lub caij nyoog tso cai uas muaj txhij txhua, nrog tag nrho cov yawm sij, hwj chim thiab txoj cai ntawm Vajtswv lub pov thawj hwj dawb huv.

• Phau Ntawv Maumoos yog ib zaj lus tim khawv ntxiv txog Yexus Khetos thiab tsev neeg nyob tau ua ke mus ib txhis li.

• Peb tus Tswv, Yexus Khetos, coj Nws lub Koom Txoos no, los ntawm peb tus yaj saub, Thawj Tswj Hwm Russell M. Nelson, niaj hnub no.

Tej yam no thiab tej yam tseeb uas muaj nqis ntxiv yeej yog lub hauv paus sab ntsuj plig ntawm tus neeg uas Vajtswv pab kuv hloov los ua. Thiab kuv tos ntsoov kom txais tau cov lus qhia tshiab uas Nws tseem xav kom kuv kawm—thiab nej—thaum peb ua neej no thiab “kawm … los ntawm kev kawm ntawv thiab los ntawm kev ntseeg.”

Kuv paub tej no muaj tseeb thiab ua tim khawv txog tej no los ntawm Yexus Khetos lub npe, amees.