Hwm tej Yam Dawb Ceev

Nyob hauv phau Khiav Dim, peb nrog Mauxes mus rau lub Roob Haules thaum nws tso nws tej hauj lwm txhua hnub tseg—ib yam uas peb txhua tus yuav tsum txaus siab ua—kom mus saib tsob ntoo uas kub hluav taws tiam sis tsis kub hnyiab li. Thaum nws tuaj txog, “[Vajtswv] hu Mauxes hauv tsob ntoo ntawd tuaj hais tias, Mauxes! Mauxes! Mauxes teb hais tias, Kuv nyob ntawm no. [Thiab] Vajtswv … hais tias, cia li hle koj nkawm khau, rau qhov koj sawv ntawm thaj chaw uas dawb huv.” Mauxes hwm Vajtswv, txo hwj chim, thiab xav tsis thoob thaum nws tau hle nws nkawm khau thiab npaj nws tus kheej kom hnov tus Tswv txoj lus thiab mus nyob hauv tus Tswv lub xub ntiag dawb huv.

Lub sij hawm dawb ceev saum lub roob ntawd, ib lub sij hawm uas nws xav tsis thoob thiaj hwm Vajtswv, ua rau Mauxes paub tias nws tau los saum ntuj los, thiab yog ib lub sij hawm uas pab nws hloov los ntawm ib tug neeg yug yaj xwb los ua ib tug yaj saub uas muaj hwj chim, ua rau nws thiaj taug ib txoj kev tshiab hauv nws lub neej. Ib yam li ntawd, peb txhua tus muaj peev xwm hloov peb txoj kev ua thwj tim kom coj dawb huv ntxiv yog peb hloov siab saib taus kev hwm Vajtswv yog ib qho tseem ceeb rau peb sab ntsuj plig.

Lo lus reverence muaj caj ceg los ntawm lo lus Latees reverei, uas txhais tias “xav tsis thoob.” Thaum hais txog txoj moo zoo, txoj kev txhais lus no hloov kom muaj kev xav tias yus hwm, hlub, thiab ris Vajtswv txiaj. Thaum cov uas muaj siab xav ua zoo thiab muab siab npuab Vajtswv thiab Yexus Khetos hwm tej yam dawb ceev ces pab lawv muaj kev xyiv fab heev.

Kev hwm tej yam dawb ceev yog ib qho tseem ceeb rau peb sab ntsuj plig; yeej yog qhov uas los ntawm peb txoj kev hloov los ua neeg dawb huv thiab qhia tias peb hlub thiab xav nyob ze peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos, npaum li cas. Thiab txoj kev hwm tej yam dawb ceev yeej ua rau peb sab ntsuj plig muaj zog tshaj. Qhov no pab peb xav txog Vajtswv, tso siab rau Nws thiab ua neej raws li Nws qhia. Muaj tseeb tiag, kev hwm Vajtswv tsis yog ib feem ntawm tej yam uas pab peb sab ntsuj plig muaj zog; yeej yog lub ntsiab—yog lub hauv paus ntawm tag nrho tej uas txhawb nqa peb sab ntsuj plig, uas ua rau peb nrog Vajtswv sib raug zoo, xws li peb cov me nyuam qhia thaum lawv hu nkauj: “Thaum kuv hwm Vajtswv, kuv paub kawg siab tias Leej Txiv Saum Ntuj thiab Yexus nyob ze.”

Vim peb yog Yexus Khetos cov thwj tim, Nws caw peb txais lub txiaj ntsim uas yog kev hwm Vajtswv hauv peb lub neej kom peb yuav nrog Vajtswv thiab Nws Leej Tub Yexus Khetos sib raug zoo, thiab ua rau peb sab ntsuj plig haj yam muaj zog. Yog peb muaj siab xav ua li no ntxiv, ces peb yeej yuav muaj kev zoo siab thiab kev xyiv fab hauv peb lub neej ntxiv thiab yuav tsis muaj chaw rau kev tu siab thiab kev nyuaj siab. Peb yuav tsum nco ntsoov tias kev hwm tej yam dawb ceev ua rau tej yam peb ua txhua hnub muaj nqis thiab ua rau peb haj yam ris Vajtswv txiaj—peb thiaj hwm, saib taus, thiab nyiam tej yam siab thiab dawb huv dua.

Tiam sis, peb nyob hauv ib lub ntiaj teb uas neeg tsawg zuj zus hwm tej yam dawb ceev. Muaj tseeb tiag, neeg ntiaj teb pheej txhawb nqa tej yam uas saib tsis taus kev hwm Vajtswv, xws li nej pom tau yog nej nyeem xov xwm, saib TV los sis saib hauv internet. Thaum tib neeg tsis hwm tej yam dawb ceev ces ua rau lawv lam tau lam ua tej yam, ntshe tsis ntev ces tag nrho ib tiam neeg yuav tsis muaj siab xav li cas txog dab tsi ces tiam neeg tom qab ntawd yuav muaj kev nyuaj siab kawg.

Txoj kev saib tsis taus tej yam dawb ceev ua rau peb rhuav tej kev khi lus nrog Vajtswv thiab ua rau peb xav tias peb tsis muaj kev lav ris dab tsi rau Vajtswv. Yog li ntawd, ntshe peb yuav xav txog peb txoj kev txaus siab xwb; tswj tsis taus peb lub siab xav muaj tej yam uas peb ntshaw; thiab thaum kawg peb yuav ua tej yam tsis dawb huv vim peb ntxub tej yam dawb ceev, tsis hais Vajtswv los yog, thiaj ntxub qhov uas peb yog Leej Txiv Saum Ntuj Ceeb Tsheej cov me nyuam. Kev saib tsis taus tej yam dawb ceev pab tus yeeb ncuab ua raws li nws tej lub hom phiaj vim nws tav peb txoj kev txais kev tshwm sim uas peb yuav tsum muaj hauv peb hnub nyoog no.

Qhov uas kev hwm tej yam dawb ceev tseem ceeb npaum li cas los nyob hauv cov vaj lug kub ntau. Muaj ib zaug hauv phau Lus Qhuab Qhia thiab Kev Khi Lus uas qhia tias kev hwm peb Leej Txiv Saum Ntuj Ceeb Tsheej thiab Nws Leej Tub, Yexus Khetos, yog ib yam uas cov uas txais tau lub nceeg vaj xilethi-aus yuav tsum muaj.

Nyob hauv peb lub koom txoos peb siv zog kom saib Leej Txiv thiab Leej Tub yog neeg dawb huv tshaj plaws, tsis hais thaum peb kos duab txog Nkawd. Yeej yuav tsum muaj tus Vaj Ntsuj Plig Dawb Huv tej lus qhia kom paub tias tej daim duab no yuav zoo li cas thiaj qhia txog Vajtswv thiab Nws Leej Tub tej cwj pwm uas los saum ntuj los. Peb yeej ceev faj kom txhob ua duab txog tej yam uas yuav ua rau peb tsis tsom ntsoov rau peb Leej Txiv Saum Ntuj Ceeb Tsheej thiab Nws Leej Tub Yexus Khetos thiab Nkawd tej lus qhia, tsis hais kev siv tej cuab yeej ntawm txuj ci technology, xws li thaum siv artificial intelligence (AI) kom tsim ntaub ntawv thiab tsim duab.

Peb siv lub ntsiab cai no thaum peb sau txhua yam xov xwm uas xa los ntawm lub Koom Txoos tej tshooj uas raug cai. Txhua zaj lus qhia, phau ntawv, thiab zaj lus uas hais los peb xyuam xim sau thiab pom zoo raws li tus Ntsuj Plig qhia kom peb txhawb nqa Yexus Khetos txoj moo zoo tej lus qhia, tej lub ntsiab, thiab tej kev cai. Nyob hauv nws zaj lus rau cov tub hluas ntxhais hluas ntawm lub Koom Txoos, Txwj Laug David A. Bednar qhia tias, “Yog tias yuav paub ua neej raws li sab ntsuj plig thiab siv txuj ci technology ob yam huv tib si li no, Tsoom Haiv Neeg Ntseeg hauv Hnub Nyoog Kawg yuav tsum txo hwj chim thiab thov Vajtswv kom (1) kawm tej lub ntsiab cai ntawm txoj moo zoo uas pab tau lawv paub siv artificial intelligence thiab (2) siv zog ua hauj lwm kom tus Vaj Ntsuj Plig Dawb Huv nrog nraim lawv nyob thiab muaj lub txiaj ntsim txais kev tshwm sim.”

Kuv cov kwv tij thiab cov muam, txawm yog txuj ci technology muaj nqis npaum li cas, yeej tsis ua rau peb xav tsis thoob thaum peb ua raws li tus Vaj Ntsuj Plig Dawb Huv txoj kev tshoov peb lub siab kom hwm Vajtswv. Vim peb coj raws li Yexus Khetos, peb yuav tsum ceev faj kom txhob ua rau peb txoj kev nrog Vajtswv thiab Nws Leej Tub sib raug zoo ploj zuj zus thaum peb siv cov ntaub ntawv thiab cov duab uas AI tsim ua tej yam tsis tsim nyog. Peb yuav tsum nco ntsoov tias kev siv txuj ci technology zoo li “neeg lub hwj chim” yeej pauv tsis taus tej kev tshoov siab, tej lus txhawb nqa, thiab tej lus tim khawv uas tsuas txais tau dhau los ntawm tus Vaj Ntsuj Plig Dawb Huv lub hwj chim. Ib yam li Nifais hais tias, “Auj tus Tswv es, kuv tau tso siab rau koj, thiab yuav tso siab rau koj mus ib txhis li. Kuv yuav tsis tso siab rau neeg lub hwj chim li.”

Tus Tswv tau qhia tus Yaj Saub Joseph Smith hais tias cov tuam tsev uas ua rau tus Tswv los yuav tsum yog tej qhov chaw uas neeg tuaj hwm Nws. Nyob hauv nws txoj hauj lwm qhuab qhia, peb tus yaj saub, Thawj Tswj Hwm Russell M. Nelson, tau qhia tas zog txog peb txoj kev pe hwm tus Tswv nyob hauv lub tuam tsev dawb huv. Nyob hauv tus Tswv lub tsev, lawv qhia peb txog peb txoj kev nkag mus rau ntawm Leej Txiv thiab Leej Tub xub ntiag dawb huv. Qhov uas tshoov kuv lub siab yog qhov uas tsis ntev tom qab peb nkag hauv ib lub tuam tsev thiab npaj peb tus kheej kom ua tau cov kab ke dawb ceev peb hle khau ces hloov khaub ncaws kom hnav ris tsho dawb. Ib yam li Mauxes, yog peb txhob txwm ua li no, peb yuav pom tias kev hle nkawm khau ntawm lub ntiaj teb yog txoj kev pib taug kev ntawm cov av dawb huv peb thiaj li hloov los ua tej yam uas siab dua thiab dawb huv dua.

Cov kwv tij thiab cov muam, peb tsis tas nce roob, ib yam li Mauxes, kom kawm txog kev hwm tej yam dawb ceev thiab hloov peb txoj kev ua thwj tim kom haj yam rau siab muab siab npuab Vajtswv. Piv xam hais tias, peb yuav hwm tej yam dawb ceev thaum peb tiv thaiv peb tsev neeg kom txhob raug neeg ntiaj teb tej kev ntxias. Yuav ua taus li no thaum peb mob siab thov peb Leej Txiv Saum Ntuj Ceeb Tsheej los ntawm Yexus Khetos lub npe thiab nrhiav kev kom paub peb tus Cawm Seej thaum peb rau siab kawm Vajtswv txoj lus hauv cov vaj lug kub thiab peb cov yaj saub tej lus qhia. Tsis tas li ntawd xwb, peb sab ntsuj plig yuav hloov ua zoo zuj zus thaum peb siv zog ua raws li peb tej kev khi lus uas peb nrog tus Tswv khi yog peb ua raws li cov lus txib. Tej yam no yuav ua rau peb ua siab tus thiab kaj siab. Yog peb nco ntsoov ua tej yam no ces peb lub tsev yuav los ua tej qhov chaw uas tiv thaiv peb sab ntsuj plig—zoo li tej tsev teev ntuj rau tus Ntsuj Plig los nyob ib yam li lub roob uas Mauxes nce saud.

Peb sab ntsuj plig kuj yuav hloov thaum peb rau siab ntseeg koom lub Koom Txoos tej kev sib ntsib teev ntuj, tsis hais kev hloov siab kom paub tus Tswv lub siab nyiam thaum peb mob siab hu nkauj qhuas Vajtswv. Ib yam li Mauxes, thaum peb tig ntawm tej yam hauv lub ntiaj teb no mus, qhov tseem ceeb yog peb lub xov tooj ntawm tes los sis tej yam twg uas tsis ua haum lub sij hawm dawb ceev no, ces pab peb tsom ntsoov rau lub cim nco txog, peb lub siab lub ntsws yuav xav ntsoov txog tus Cawm Seej thiab Nws txoj kev txi theej txhoj nrog rau peb tej kev khi lus. Kev tsom ntsoov rau tej yam no thaum txais lub cim nco txog yuav txhawb nqa peb kom nrog tus Cawm Seej sib raug zoo thiab yuav ua rau peb xav tias Hnub Caiv yog ib hnub zoo siab thiab hloov peb lub neej.

Peb txoj kev ua thwj tim yuav hloov peb sab ntsuj plig thaum peb pe hawm Vajtswv hauv lub roob ntawm tus Tswv lub tsev—peb cov tuam tsev dawb huv—thiab siv zog ua neej raws li peb tej kev khi lus, qhov tseem ceeb yog thaum peb raug tej kev sim siab ntawm lub neej no.

Kuv tus poj niam thiab kuv wb tau muaj tej lub sij hawm hwm Vajtswv nyob hauv lub tuam tsev li no thaum wb siv zog ua raws li tej lub ntsiab cai no hauv peb lub neej, uas ua rau wb txoj kev ua thwj tim hloov zuj zus. Kuv nco qab ntsoov zoo li yog nag hmo xwb thaum kuv nyob hauv qhov chaw faus neeg ua ntej yuav muab wb tus me nyuam thib ob faus cia, vim nws yug los ntxov dhau thiab tau tso lub ntiaj teb no tseg es kuv tus poj niam tseem nyob hauv lub tsev kho mob. Kuv nco qab tias kuv tau rau siab thov Vajtswv kawg siab kawg ntsws, thov kom Nws pab kuv nyiaj tau txoj kev sim siab no. Tam sim ntawd, kuv tau txais kev nplij siab uas meej thiab muaj hwj chim heev hais tias: Wb lub neej yuav zoo yog tias kuv tus poj niam thiab kuv nyiaj mus, thiab tso siab rau txoj kev xyiv fab uas los ntawm kev ua neej raws li Yexus Khetos txoj moo zoo. Txoj kev tu siab uas zoo li yog kev sim siab nyuaj dhau twb hloov los ua ib lub sij hawm dawb ceev rau kuv, ib lub sij hawm uas tau pab txhawb nqa wb txoj kev ntseeg thiab tso siab rau tej kev khi lus uas peb nrog tus Tswv khi tseg thiab rau Nws tej lus cog tseg rau kuv thiab kuv tsev neeg.

Kuv cov kwv tij thiab cov muam, kev hwm tej yam dawb ceev ua rau peb ris Vajtwv txiaj, muaj kev zoo siab ntxiv, ua rau peb txais tau kev tshwm sim, thiab muaj kev xyiv fab ntxiv hauv lub neej no. Kev hwm tej yam dawb ceev pab peb ua neej dawb huv thiab xav txog Vajtswv.

Kuv ua tim khawv rau nej tias thaum peb siv zog hwm Vajtswv hauv peb lub neej txhua hnub, ces peb yuav haj yam txo hwj chim, to taub Vajtswv lub siab nyiam li cas rau peb, thiab ntseeg cov lus cog tseg ntawm tej kev khi lus uas peb nrog tus Tswv sib khi lus tseg. Kuv ua tim khawv tias thaum peb muab siab npuab lub txiaj ntsim hwm tej yam dawb ceev—tsis hais nyob hauv lub roob ntawm tus Tswv lub tsev, nyob hauv tsev sib ntsib, los sis hauv peb lub tsev—peb yuav xav tsis thoob thaum peb txais tau Leej Txiv Saum Ntuj Ceeb Tsheej thiab Yexus Khetos txoj kev hlub. Kuv hwm Vajtswv tshaj tawm txog tej lus tseeb no los ntawm peb tus Cawm Seej, Yexus Khetos, lub npe dawb ceev, amees.