Zoo Li Ib tug Me Nyuam Yaus

Xyoo kawg ntawm Nws lub neej hauv lub ntiaj teb no Yexus tau haj yam siv zog qhia Nws cov Thwj Tim. Yog tias txoj moo zoo thiab Nws lub Koom Txoos yuav kav ntev dhau lub sij hawm Nws nyob hauv ntiaj teb, ces yuav tsum muab ntxiv tso rau hauv 12 tug txiv neej lub siab vim lawv tsuas paub Nws rau 24 lub hlis xwb.

Muaj ib hnub Yexus pom Kaum Ob tug Thwj Tim sib cav thiab nug tias, “Puag ta thaum peb taug kev tuaj, nej pheej sib cav hais txog dab tsi?” Lawv txaj muag txog lawv txoj kev sib cav, cov vaj lug kub hais tias lawv thiaj li “tsis teb Yexus li.” Tiam sis tus xib hwb zoo tshaj plaws paub lawv lub siab xav li cas thiab paub tias muaj me ntsis kev muab hlob. Yog li ntawd Nws “hu ib tug me nyuam yaus los sawv ntawm lawv xub ntiag, …

“Thiab hais tias, Kuv qhia tseeb rau nej hais tias, yog nej tsis hloov nej lub siab kom zoo li tug me nyuam yaus no lub, ces nej yuav tsis tau mus saum ntuj ceeb tsheej.

“Tus uas txo hwj chim li tus me nyuam yaus no, tus ntawd yuav yog tus uas loj dua ntais nyob saum ntuj ceeb tsheej.”

Yuav tsum nco ntsoov tias ua ntej Yexus Khetos yug los, Vaj Ntxwv Npeyamis zaj lus qhia kawg kuj hais cov lus no txog ib tug me nyuam txoj kev txo hwj chim. Nws hais tias: “Tus neeg ntawm sab cev nqaij daim tawv yog ib tug yeeb ncuab rau Vajtswv, … tsuas yog nws … los ua ib tug neeg dawb huv los ntawm tus Tswv Khetos txoj kev theej txhoj, thiab hloov los ua zoo li ib tug me nyuam, … mloog lus, … txo hwj chim, … muaj kev hlub puv npo, … ib yam li ib tug me nyuam yaus txaus siab ua txhua yam rau nws txiv.”

Nim no, yeej muaj tej yam uas cov me nyuam ua uas peb tsis tshua txhawb nqa. Nees nkaum tsib xyoos tas los no, kuv tus tub xeeb ntxwv uas muaj peb xyoos tom nws tus muam uas muaj tsib xyoos caj npab. Kuv tus ntxhais tus txiv, uas saib xyuas cov me nyuam hmo ntawd, tau qhia txhua zaj lus txog kev thaj yeeb nyab xeeb uas nws txawj xav txog, es thaum kawg hais tias nyaj tus me nyuam tub tsis paub tias yuav mob li cas yog tias yus tom ib tug neeg txhais caj npab. Tus txiv tsev no txoj kev qhia yeej mus zoo rau ib feeb, los ib feeb ib nrab xwb, mus txog thaum hnov ib tug me nyuam yaus quaj nrov txaus ua rau qhov rais co co es kuv tus ntxhais xeeb ntxwv qw hais tias, “Nim no nws paub lawm.”

Yog li ntawd peb yuav tsum saib tej kev tsim txiaj dab tsi hauv cov me nyuam ntawm lub neej no? Muaj dab tsi uas ua rau Yexus Khetos los kua muag hauv lub sij hawm uas ua rau neeg muaj siab mos siab muag tshaj hauv Phau Ntawv Maumoos? Yexus qhia dab tsi thaum Nws hais kom hluav taws thiab cov tim tswv tuaj tiv thaiv roos cov me nyuam ntawd, thiab txib cov laus kom “Saib [lawv] cov me nyuam yaus”?

Peb tsis paub txhua yam uas tau pab kom muaj tag nrho tej ntawd, tiam sis kuv yeej xav tias ib feem yog vim lawv dawb huv thiab tsis muaj txim, lawv txo hwj chim, thiab Nws paub tias yuav ua li cas rau lawv lub neej yog tias txo hwj chim mus ntxiv.

Vim li cas ib tug hais txog peb hnub nyoog nyuaj siab no hais tias “txhua yam tsis muaj qab hau li”? Vim li cas “tej zeem muag tsis muaj nuj nqis thiab lawv txoj kev muab hlob” ntawm cov neeg hauv lub tsev loj thiab dav, yog tej yam tuag ntawm sab ntsuj plig nyob hauv Lihais zaj ua yog toog? Thiab cov Neeg Xaulas, pawg no uas tau thov Vajtswv qhuas lawv tus kheej? Amas hais txog lawv tias, “Auj Vajtswv es, lawv thov rau koj nrog lawv qhov ncauj, thaum lawv muaj plhus heev, … vim yog los ntawm tej yam tsis muaj nuj nqis ntawm lub ntiaj teb.”

Qhov fab ntxeev mas, puas muaj dab tsi uas muaj nuj nqis tshaj, los dawb huv tshaj, los txo hwj chim tshaj ib tug me nyuam yaus txoj kev thov Vajtswv? Yeej zoo li lub rooj ntug qhib thaum ntawd. Lawv paub tias muaj Vajtswv thiab Yexus Khetos tiag, tiam sis lwm tus ntshe lawv xav li ntawd xwb.

Zoo li Txwj Laug Richard L. Evans hais 60 xyoo tas los: “Peb feem coob hais tias peb ntseeg Khetos, tiam sis peb … tsis tshua saib Nws rau nqi. … Peb saib Nws zoo, tiam sis peb tsis coj raws li Nws. … Peb hais txog Nws tej lus, tiam sis peb tsis ua neej raws li tej lus ntawd.” “Peb qhuas Nws, tiam sis peb tsis pe hawm Nws.”

Lub neej no yuav txawv li cas yog tias tej lub sij hawm neeg ntiaj teb saib Yexus rau nqi tshaj lawv nyiam hais lus dev.

Tiam sis cov me nyuam hlub Nws tiag tiag, thiab txoj kev hlub ntawd yuav pab lawv nrog lwm tus sib raug zoo hauv lub neej no. Txawm yog lawv yaus heev, yooj yim rau cov me nyuam hlub thiab zam txim rau lwm tus, thiab lawv txoj kev luag yeej yuav chob tus uas muaj siab tawv tshaj.

Tej yam uas cov me nyuam yaus zoo li cas los tshuav ntxiv thiab. Kev dawb huv? Kev tso siab? Ua siab loj? Coj cwj pwm zoo?

Cia kuv hais rau nej txog kuv ib tug phooj ywg hluas zoo zoo uas tau txo hwj chim rau Vajtswv.

Thaum lub Ib Hlis Ntuj hnub tim 5, xyoo 2025,—91 hnub dhau los—Easton Darrin Jolley tau txais lub Pov Thawj Hwj Aloos thiab twb muab nws tsa ua ib tug dikas hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Ntev li nws nco qab tau, Easton twb xav muab lub cim nco txog ntawm tus Tswv Pluas Mov rau cov mej zeej. Tiam sis nws kuj ntshai kawg li txog lub cib fim dawb ceev no hais tias nws yuav ua yuam kev, nws yuav vau, yuav muaj neeg thab nws los sis nws yuav ua rau nws tus kheej thiab nws tsev neeg txaj muag.

Vim rau qhov Easton muaj mob ib ce uas neeg muaj tsawg heev, Ullrich congenital muscular dystrophy. Kev muaj mob twb tsim teeb meem rau nws lub neej thaum nws tseem yog me nyuam yaus thiab ua rau nws tej kev cia siab thiab kev ua npau suav rau yav tom ntej ploj mus. Tsis ntev ces nws yuav nyob hauv lub rooj muaj log tas ib sim neej. Nws tsev neeg tsis sib tham txog tej yam uas yuav muaj tom qab ntawd.

Hnub Sunday tom qab tau muab nws tsa ua ib tug dikas, yog thawj zaug uas Easton yuav muab lub cim nco txog rau lwm tus. Thiab qhov uas nws lub siab xav yog kom muab ob lub cim dawb ceev no rau nws txiv, uas yog tus npisov hauv nws pawg ntseeg. Thaum nws xav txog kev ua txoj hauj lwm no nws tau taij thov thiab quaj thov kom txhua leej txhua tus cog lus tias yuav tsis muaj leej twg, tsis pub ib tug twg, pab nws ua li no. Nws yuav tsum ua li no nws tus kheej xwb, tsis cia leej twg pab.

Tom qab tus pov thawj tau muab ntais thiab foom koob hmoov rau cov mov mog—ib lub cim txog Khetos lub cev uas raug mob—Easton, nrog nws lub cev uas kuj raug mob. rau siab sawv ntsug kom txais lub phaj. Tiam sis, muaj peb theem ntaiv los ntawm chaw sib ntsib rau lub sam thiaj. Yog li ntawd, tom qab nws txais nws lub phaj, nws ncav tes siab npaum li ncav tau thiab tso rau saum tus nqaj ntoo ze tus pas tuav nce ntaiv. Ces, nws cia li zaum ntawm ib theem ntaiv, thiab siv ob txhais tes rub kom nws muab sab ceg xis tso rau theem ntaiv thib ib. Ces nws rub nws sab ceg lauj muab tso rau theem ntaiv ntawd, thiab ua li ntawd mus txog thaum nws nce tau peb theem ntaiv kom nyob saum sam thiaj uas siab npaum li ib lub roob.

Ces nws txav mus rau ib tug nqaj ntoo uas nws tuav tau kom pab nws rov qab sawv ntsug. Ces nws rov qab mus nqa lub phaj. Ob peb ruam tom ntej ces nws sawv ntawm tus npisov, nws txiv, uas los kua muag ntws rau nws ob sab plhu, thiab yuav tsum tswj nws tus kheej kom txhob khawm tus tub uas ua siab loj thiab rau siab ntseeg tag nrho. Ces Easton, uas txaus siab lawm thiaj li luag nyav loj heev, nyaj nws twb xav hais tias, “Kuv ua rau [kuv txiv] tau koob meej [thiab] tes hauj lwm uas [nws] kom kuv ua, kuv twb ua tiav lawm.”

Kev ntseeg, kev ncaj ncees, kev dawb huv, kev tso siab, kev hwm, thiab thaum kawg, kev hlub rau nws txiv uas nws xav xav kom zoo siab. Tej yam no thiab ntau yam ntxiv ua rau peb kuj hais tias, “Tus uas txo hwj chim li tus me nyuam yaus no, tus ntawd yuav yog tus uas loj dua ntais nyob saum ntuj ceeb tsheej.”

Cov kwv tij thiab cov muam thiab cov phooj ywg, cov duab zoo nkauj tshaj yog cov me nyuam mos liab thiab cov me nyuam yaus thiab cov tub hluas ntxhais hluas uas txawj xav thiab muaj nqis tshaj plaws zoo li cov uas kuv tau hais txog hnub no. Kuv ua tim khawv lawv muaj yam ntxwv txog Vajtswv lub nceeg vaj hauv lub ntiaj teb uas muaj zog thiab zoo nkauj kawg.

Kuv kuj ua tim khawv tias Joseph Smith pom tej yam uas nws hais tias nws pom thiab tau txais tej yam uas nws hais tias nws tau txais. Kuv ua tim khawv tias Russell M. Nelson yog tus yaj saub thiab tus txawj pom tau uas Vajtswv tau tsa. Vim kuv tau nyeem ntawv tas kuv lub neej, kuv ua tim khawv tias Phau Ntawv Maumoos yog phau ntawv uas muaj nqis tshaj txhua phau uas kuv tau nyeem thiab yeej yog lub plawv zeb ntawm kuv lub tsev me me hauv Nws lub nceeg vaj uas muaj tsev ntau heev. Kuv ua tim khawv tias lub pov thawj hwj thiab kev thov Vajtswv yeej muab kuv lub neej txum tim rov qab los—Khetos lub pov thawj hwj thiab nej tej lus thov Vajtswv. Kuv paub tias tag nrho tej yam no muaj tseeb thiab kuv ua tim khawv rau nej txog tej no los ntawm tus tub uas mloog lus thiab txo hwj chim tshaj plaws lub npe—Alafas thiab Aumenkas, tus Kuv Yeej Yog, tus uas raug ntsia saum ntoo khaub lig, tus uas ua tim khawv ncaj ncees—tus uas yog tus Tswv Yexus Khetos, amees.