Txoj Hau Kev Hlub Tshua

Xyoo tas los no thaum lub Plaub Hlis Ntuj, tsis ntev tom qab hnov xov tias lub Koom Txoos tau yuav lub Tuam Tsev Kirtland, Thawj Tswj Hwm Russell M. Nelson tau caw peb kawm zaj lus thov Vajtswv muab lub Tuam Tsev Kirtland fij tseg, raws li hais nyob hauv tshooj 109 ntawm phau Lus Qhuab Qhia thiab Kev Khi Lus. Thawj Tswj Hwm Nelson hais tias zaj lus thov Vajtswv muab fij tseg ntawd “qhia peb zoo txog qhov uas lub tuam tsev ua rau peb muaj hwj chim ntawm sab ntsuj plig kov yeej teeb meem ntawm lub neej no hauv hnub nyoog kawg.”

Kuv paub tias nej txoj kev kawm tshooj 109 tau ua rau nej txais tau koob hmoov. Hmo no, kuv xav qhia nej txog ob peb yam uas kuv kawm thaum kuv tau ua raws li peb tus yaj saub tej lus caw. Kuv txoj kev kawm ntawv uas ua rau kuv nyob kaj siab lug no ua rau kuv nco qab tias tus Tswv muaj lub siab hlub tshua thiab peb Leej Txiv Saum Ntuj Ceeb Tsheej txoj hau kev cawm seej yeej yog ib txoj hau kev hlub tshua.

Ib yam li nej paub lawm hais tias, “cov uas nyuam qhuav tau hu ua tub txib los xav kom lawv txais lawv vaj txiaj ntsim hauv lub tuam tsev sai li sai tau thiab mus rau lub tuam tsev ntau npaum li lawv mus tau.” Tom qab lawv txais lawv vaj txiaj ntsim, lawv kuj “ua hauj lwm tau … hauv lub tuam tsev ua ntej lawv pib mus ua tub txib.”

Kev siv sij hawm ntxiv hauv lub tuam tsev ua ntej mus hauv qhov chaw cob qhia cov tub txib (missionary training center, MTC) yuav pab ib tug tub txib tshiab kawm ntxiv txog tej kev khi lus hauv lub tuam tsev ua ntej nws yuav mus qhia txog cov koob hmoov uas los ntawm tej kev khi lus ntawd rau tib neeg nyob thoob plaws lub ntiaj teb.

Tiam sis thaum kuv kawm tshooj 109, kuv kawm tias, nyob hauv lub tuam tsev, Vajtswv muab hwj chim rau cov tub txib tshiab—muaj tseeb tiag, muab rau peb txhua tus—los ntawm ib txoj kev dawb huv ntxiv. Nyob hauv zaj lus thov Vajtswv muab lub tuam tsev fij tseg, uas tus Yaj Saub Joseph Smith txais los ntawm kev tshwm sim, nws thov tias “Thaum koj cov tub qhe tawm hauv koj lub tsev mus … ua tim khawv txog koj lub npe”, kom “txhua haiv neeg”—tsis hais “cov neeg loj hauv ntiaj teb” thiab “tag nrho cov neeg pluag, cov xav tau kev pab, thiab cov raug txom nyem … lawv lub siab yuav mos muag.” Nws tau thov kom “tej kev ntxub ntxaug yuav zam kev rau qhov tseeb, thiab kom sawv daws yuav nyiam koj cov neeg; kom tag nrho cov neeg thoob ntiaj teb yuav paub hais tias peb, uas yog koj cov tub qhe, tau hnov koj lub suab, thiab hais tias koj tau xa peb mus.”

Nov yog ib co lus cog tseg rau ib tug tub txib tshiab—kom tej kev ntxub ntxaug “yuav zam kev rau qhov tseeb,” kom “sawv daws yuav nyiam [nws],” thiab kom txhua haiv neeg paub tias tus Tswv txib nws mus. Peb txhua tus yeej xav tau tib co koob hmoov no. Yeej yog ib txoj koob hmoov kom muaj lub siab mos muag thaum peb nrog cov neeg zej zog thiab cov neeg ua hauj lwm sib tham ua ke. Zaj lus thov Vajtswv muab lub tuam tsev fij tseg tsis piav tias peb txoj kev siv sij hawm hauv lub tuam tsev yuav ua li cas kom ua rau lwm tus lub siab mos muag, tiam sis kuv paub tias yeej nyob ntawm qhov uas peb txoj kev siv sij hawm hauv tus Tswv lub tsev ua rau peb lub siab mos muag vim peb tsom ntsoov rau Yexus Khetos thiab Nws txoj kev hlub tshua.

Thaum kuv kawm zaj lus thov Vajtswv muab lub tuam tsev Kirtland fij tseg, kuv xav tsis thoob hais tias Joseph thov Vajtswv kom muaj lub siab hlub tshua—rau lub Koom Txoos cov mej zeej, rau lub Koom Txoos cov yeeb ncuab, rau cov thawj coj ntawm lub teb chaws, rau tej teb chaws ntawm lub ntiaj teb. Thiab rau nws tus kheej, nws thov kom tus Tswv nco txog nws thiab muaj lub siab hlub nws tus hlub Emma thiab nkawd cov me nyuam.

Joseph tau xav li cas thaum ib lub lim tiam tom qab ntawd, nyob rau Hnub Easter, lub Plaub Hlis Ntuj 3, 1836, nyob hauv lub Tuam Tsev Kirtland, tus Cawm Seej tshwm sim rau nws thiab Oliver Cowdery ces, raws li qhia hauv tshooj 110 ntawm phau Lus Qhuab Qhia thiab Kev Khi Lus, hais tias, “Kuv tau txais yuav lub tsev no, thiab kuv lub npe yuav nyob ntawm no; thiab kuv yuav ua kuv tus kheej tshwm sim los rau kuv cov neeg los ntawm txoj kev hlub tshua rau hauv lub tsev no.” Nyaj txoj kev cog lus txog kev hlub tshua twb muaj nqis rau Joseph. Thiab raws li Thawj Tswj Hwm Nelson tau qhia thaum lub Plaub Hlis Ntuj tas los no, txoj kev cog lus no “yeej hais txog txhua lub tuam tsev uas tau muab fij tseg lawm.”

Muaj ntau yam peb ua tau kom nrhiav tau kev hlub tshua hauv tus Tswv lub tsev. Qhov no muaj tseeb txij thaum tus Tswv tau txib Ixayees ua ib lub tuam tsev ntaub thiab tso rau ntawm chaw nruab nrab ntawm lub rooj ntawm kev hlub tshua. Nyob hauv lub tuam tsev, muaj kev hlub tshua nyob hauv tej kev khi lus uas peb khi. Tej kev khi lus no, nrog rau kev khi lus thaum ua kev cai raus dej, khi peb rau Leej Txiv thiab Leej Tub thiab ua rau peb txais tau qhov uas Thawj Tswj Hwm Nelson tau qhia tias yog “ib txoj kev hlub thiab lub siab hlub tshua tshwj xeeb … hu ua hesed hauv lus Henplais.”

Peb nrhiav tau kev hlub tshua vim peb muaj cib fim nrog peb tsev neeg ua kev cai sib khi ua ke mus ib txhis li. Nyob hauv lub tuam tsev, peb kuj to taub meej ntxiv hais tias Kev Tsim Ntuj Tsim Teb, txoj Kev Poob, tus Cawm Seej txoj kev txi theej txhoj, thiab peb txoj kev muaj cib fim rov qab mus nyob hauv peb Leej Txiv Saum Ntuj Ceeb Tsheej lub xub ntiag—txhua yam hauv txoj hau kev cawm seej—yeej yog los ntawm kev hlub tshua. Tej zaum yus hais tau tias txoj hau kev cawm seej yog txoj hau kev zoo siab vim yog ib “txoj hau kev hlub tshua.”

Kuv ris Vajtswv txiaj rau txoj kev cog lus zoo nkauj nyob hauv tshooj 110 hais tias tus Tswv yuav muaj kev hlub tshua tshwm sim hauv Nws cov tuam tsev. Kuv kuj zoo siab vim txoj kev cog lus no qhia tias tus Tswv yuav tshwm sim thiab muaj kev hlub tshua thaum peb, zoo li Joseph, thov kom txais kev hlub tshua.

Joseph Smith txoj kev thov kom txais kev hlub tshua nyob hauv tshooj 109 tsis yog thawj zaug uas nws tej lus thov kom txais kev hlub tshua ua rau nws txais kev tshwm sim. Nyob hauv Koog Ntoo Dawb Ceev, tus tub hluas Joseph thov Vajtswv kom paub tias lub Koom Txoos muaj tseeb, tiam sis nws kuj hais tias nws tau “thov tus Tswv kom hlub tshua kuv, vim tsis muaj leej twg uas kuv yuav tau mus cuag kom txais tau kev hlub tshua.” Qhov uas nws paub tias nws yuav tsum muaj tus Tswv txoj kev hlub tshua twb pab lub rooj ntug qhib rau nws. Peb xyoo tom qab ntawd tus tim tswv Maulaunais tau tshwm sim tom qab Joseph “taij thiab thov tus Vajtswv uas Muaj Hwj Chim Tag Nrho kom zam txim rau tag nrho kuv tej kev txhaum thiab kev ruam.”

Tus txheej txheem txais kev tshwm sim tom qab yus thov kom Vajtswv hlub tshua yus yeej yog ib qhov uas muaj hauv vaj lug kub ntau. Enos tau hnov tus Tswv lub suab tom qab nws thov kom txais kev zam txim. Vaj Ntxwv Lamaunais txiv txoj kev hloov siab los ntseeg pib thaum nws thov Vajtswv, “Kuv yuav tso tag nrho kuv tej kev txhaum tseg los paub koj.” Tej zaum peb yuav tsis txais koob hmoov loj li no ib yam li lawv, tiam sis rau cov neeg uas ua nyuaj rau lawv hnov lus teb rau lawv tej lus thov, kev thov tus Tswv muaj lub siab hlub tshua rau yus yog ib txoj kev uas muaj hwj chim heev kom txais tau tus Vaj Ntsuj Plig Dawb Huv tej lus tim khawv.

Maulaunais twb qhia ib lub ntsiab cai ib yam li no nyob hauv Maulaunais 10:3–5. Feem ntau peb tsis nyeem tag nrho tej nqe no kom qhia tias, yog peb thov nrog lub siab dawb paug, ces peb yuav kawm paub tias Phau Ntawv Maumoos puas muaj tseeb. Tiam sis ntshe peb tsis kawm tias kev hlub tshua tseem ceeb npaum li cas thaum peb nyeem ib feem xwb. Cia li mloog seb Maulaunais pib nws tej lus ntuas li cas: “Kuv yuav ntuas nej tias thaum nej nyeem tej no, … kom nej yuav nco qab tias tus Tswv tau hlub tshua noob neej npaum li cas, txij thaum tsim Adas los txog rau lub sij hawm uas nej yuav tau txais tej no, thiab xav txog qhov no nyob hauv nej lub siab.”

Maulaunais hais kom peb tsis txhob nyeem xwb—nyeem tej lus ceev xwm txheej uas nws yuav muab faus cia—tiam sis nws kuj hais kom peb xav hauv peb lub siab txog tej yam uas Phau Ntawv Maumoos qhia txog qhov uas “tus Tswv tau hlub tshua noob neej npaum li cas.” Yog kev xav txog tus Tswv txoj kev hlub tshua uas npaj peb lub siab kom “thov Vajtswv, Leej Txiv tus uas Nyob Mus Ib Txhis, los ntawm Khetos lub npe, saib tej no puas muaj tseeb.”

Thaum peb xav txog Phau Ntawv Maumoos, tej zaum peb yuav nug hais tias: Qhov uas Amas qhia puas muaj tseeb hais tias Vajtswv txoj hau kev hlub tshua yuav ua rau txhua tus neeg uas nyob hauv lub ntiaj teb no yuav sawv rov los, kom yuav “txum tim txhua yam rov qab los ua lub cev uas zoo tag nrho”? Amulej puas hais yog—tus Cawm Seej txoj kev hlub tshua puas them tag nrho tus nqi txim lij tiag tiag tus nqi uas peb yuav tsum them yog Nws tsis ua li ntawd, thiab “puag [peb] nyob hauv txhais npab ntawm kev nyab xeeb”?

Qhov uas Amas ua tim khawv puas muaj tseeb hais tias, Yexus Khetos tau raug txom nyem rau peb tej kev txhaum thiab peb “tej kev mob thiab tej kev txom nyem” nws thiaj li yuav “paub pab nws cov neeg ntawm sab cev nqaij daim tawv raws li lawv tej kev qaug dag qaug zog”? Tus Tswv puas muaj lub siab hlub, ib yam li Vaj Ntxwv Npeyamis qhia, hais tias, vim yog ib lub txiaj ntsim uas pub dawb, Nws tau theej txhoj rau “tej kev txhaum ntawm cov uas tau poob los ntawm Adas txoj kev ua txhaum, cov uas tau tuag es tsis paub Vajtswv lub siab nyiam ntsig txog lawv, los sis cov uas tsis paub tias lawv ua txhaum”?

Tej yam uas Lihais hais puas muaj tseeb hais tias, “Adas poob xwv kom yuav muaj taus tib neeg; thiab muaj tib neeg xwv kom lawv yuav muaj kev xyiv fab”? Yaxayas tej lus uas Anpinadais ua tim khawv txog, puas muaj tseeb, hais tias Yexus Khetos “raug mob rau peb tej kev ua txhaum, nws doog ntshav rau peb tej kev ua phem; qhov uas nws raug txim yog kom peb tau nyob kaj siab lug; thiab nws tej tawv nqaij siav yog kho kom peb zoo.”?

Los yog hais tias, Leej Txiv txoj hau kev uas Phau Ntawv Maumoos qhia txog puas muaj kev hlub tshua npaum li no tiag tiag? Kuv ua tim khawv rau nej tias Nws txoj hau kev muaj kev hlub tshua tiag thiab tej lus qhia txog kev hlub tshua hauv Phau Ntawv Maumoos uas ua rau neeg muaj kev kaj siab lug thiab kev cia siab yeej muaj tseeb.

Tiam sis, nyaj tseem nyuaj rau nej ib txhia, txawm nej rau siab nyeem thiab thov Vajtswv los, kom paub tias yuav muaj raws li Maulaunais tej lus cog tseg hais tias Leej Txiv Saum Ntuj Ceeb Tsheej “yuav qhia rau nej tias tej no muaj tseeb, los ntawm tus Vaj Ntsuj Plig Dawb Huv lub hwj chim.” Kuv paub txog txoj kev nyuaj no, vim ntau xyoo tas los, kuv muaj teeb meem ib yam thaum kuv nyeem Phau Ntawv Maumoos ob peb zaug tiam sis zoo li tsis muaj kev teb meej rau kuv tej lus thov.

Yog tias ua nyuaj rau nej, kuv xav caw nej ua raws li Maulaunais qhia kom xav txog tej yam uas Phau Ntawv Maumoos qhia tias “tus Tswv tau hlub tshua noob neej npaum li cas.” Kuv cia siab tias thaum nej txais lus teb rau nej txoj kev thov, ces thaum ntawd tus Vaj Ntsuj Plig Dawb Huv txoj kev kaj siab yuav los thiab nej yuav paub thiab ntseeg hais tias Phau Ntawv Maumoos thiab txoj hau kev hlub tshua uas phau no qhia txog los muaj tseeb.

Kuv ua Vajtswv tsaug rau Leej Txiv txoj hau kev hlub tshua thiab rau tus Cawm Seej txoj kev txaus siab ua kom muaj raws li txoj hau kev ntawd. Kuv paub tias Nws yuav muaj kev hlub tshua tshwm sim hauv Nws lub tuam tsev dawb huv thiab hauv peb lub neej yog tias peb nrhiav Nws. Los ntawm Yexus Khetos lub npe, amees.