Vajtswv txoj Kev Hlub

Muaj ib lub caij ntuj sov thaum peb tsev neeg mus rau ib qhov chaw puag tom ntug nroog, peb tau pw nraum zoov thaum tsis muaj huab saum ntuj. Peb thiaj li pom tau kab lig ntuj Milky Way uas zoo nkauj kawg, muaj cov hnub qub suav tsis txheeb thiab tej lub sij hawm ib lub pob zeb ya saum nruab ntug. Thaum peb xav tsis thoob txog tej yam uas Vajtswv tau tsim, ua rau peb nrog Nws sib raug zoo. Wb cov me nyuam yaus, uas tau loj hlob nyob hauv Hong Kong, yeej tsis tau pom ib yam dab tsi zoo li no. Lawv nug kuv seb nyob tim tsev peb puas nyob hauv qab tib lub ntuj no. Kuv sim piav rau lawv tias yog tib lub ntuj, tiam sis tej yam hauv cua thiab qhov kaj hauv ntiaj teb hauv qhov chaw peb nyob thaiv peb txoj kev pom tau tej lub hnub qub txawm yog yeej muaj hnub qub nyob saum ntuj los.

Cov vaj lug kub qhia peb tias “Kev ntseeg yog qhov uas peb paub tseeb hais tias peb yuav tau tej uas peb cia siab rau thiab yog qhov uas peb cia siab ntsoov rau tej uas peb qhov muag tsis pom.” Txawm yog muaj tej yam uas meem txom peb thiab tej kev dag ntxias ntawm lub ntiaj teb no ua rau peb pom tsis tau tej yam ntawm sab ntsuj plig, thaum peb muab siab rau ntseeg Vajtswv thiab Nws Leej Tub Yexus Khetos, peb paub tseeb tias muaj Nkawd tiag thiab Nkawd xav txog peb.

Nyob hauv Phau Ntawv Maumoos, tus yaj saub Lihais pom “ib tsob ntoo, uas muaj cov txiv uas neeg xav tau kom muaj kev zoo siab” thiab cov txiv “qab zib tshaj txhua yam.” Thaum nws saj cov txiv, ua rau nws lub siab muaj kev xyiv fab kawg nkaus, thiab nws xav kom nws tsev neeg noj thiab. Peb kawm tias tsob ntoo no yog ib lub cim txog “Vajtswv txoj kev hlub,” thiab zoo li Lihais, peb kuj txais tau ib txoj kev ua tim khawv txog Vajtswv thaum peb caw Nws los nyob hauv peb lub neej.

Yexus Khetos yog tus uas qhia tias Leej Txiv Saum Ntuj Ceeb Tsheej hlub peb. Dhau los ntawm Nws txoj kev txi theej txhoj, Nws tau ris peb tej kev txhaum thiab raug mob vim peb ua txhaum. Nws ib leeg xwb tau ris peb tej kev tu siab, peb tej kev nyuaj siab, thiab peb tej kev mob kev nkees. Nws txib tus Vaj Ntsuj Plig Dawb Huv los nplij peb lub siab, thiab tej yam uas los ntawm tus Ntsuj Plig yog kev xyiv fab, kev kaj siab lug, thiab kev ntseeg, uas ua rau peb muaj kev cia siab thiab kev hlub puv npo.

Txawm yog txhua tus txais tau Vajtswv txoj kev hlub los, neeg coob mob siab nrhiav, thiab lwm tus xav muaj Vajtswv txoj kev hlub tiam sis ntseeg tias lawv tsis tsim nyog txais. Lwm tus rau siab xav ceev Vajtswv txoj kev hlub cia. Cov vaj lug kub thiab tus Tswv tus yaj saub qhia peb tias peb yuav muaj Vajtswv txoj kev hlub tsis tu tsis tseg, dhau los ntawm Yexus Khetos txoj kev tshav ntuj, thaum peb hloov siab lees txim ntau zaus, zam txim pub rau lwm tus, rau siab coj raws li cov lus txib, thiab ua siab dawb pab lwm tus. Peb yuav paub txog Vajtswv txoj kev hlub thaum peb ua tej yam kom muab siab npuab Nws, xws li nrog Nws sib tham thaum peb thov Vajtswv thiab kawm vaj lug kub txhua hnub, thiab tsis txhob ua tej yam uas ua rau peb txav mus deb, xws li muab hlob, sib cav sib ceg, thiab ntxeev siab.

Thawj Tswj Hwm Russell M. Nelson tau caw peb “nrog tus Cawm Seej txoj kev pab [cia li] dawj tej yam phem tawm ntawm peb lub neej mus” thiab kom peb “tso tej kev chim siab tseg.” Nws tau txhawb nqa peb kom “txheem lub hauv paus rau peb sab ntsuj plig ntxiv” thaum peb ”tsom ntsoov rau tus [Cawm Seej] thiab rau cov kab ke thiab tej kev khi lus ntawm Nws lub tuam tsev.” Nws tau cog lus tias “thaum peb ua raws li peb tej kev khi lus ntawm lub tuam tsev, peb txais tau tus Tswv lub hwj chim uas ntxiv zog rau peb zuj zus. … Peb txais tau Yexus Khetos thiab peb Leej Txiv Saum Ntuj Ceeb Tsheej txoj kev hlub dawb paug ntau nplua mias!”

Kuv muaj ib tug phooj ywg uas tau koob hmoov vim nws muaj ib tsev neeg zoo thiab ib txoj hauj lwm zoo. Tiam sis qhov no twb hloov thaum nws raug mob ua rau nws ua tsis taus hauj lwm, ces tom qab ntawd nws thiab nws tus poj niam sib nrauj. Txij thaum ntawd los yeej nyuaj rau nws, tiam sis nws txoj kev hlub nws cov me nyuam thiab tej kev khi lus uas nws nrog Vajtswv khi tau txhawb nqa nws. Muaj ib hnub nws tau kawm tias nws tus khub dhau los tau yuav txiv thiab xav muab nkawd txoj kev ua kev cai sib khi hauv lub tuam tsev txiav. Ua rau nws nyuaj siab thiab ntxhov siab heev. Nws nrhiav kev kaj siab lug thiab kev to taub meej hauv tus Tswv lub tsev. Ib hnub tom qab nws mus rau lub tuam tsev, kuv tau hnov nws xov:

“Nag hmo yeej yog ib hmo zoo kawg nyob hauv lub tuam tsev. Kuv xav tias txhua tus paub tias kuv tseem npau taws me ntsis. … Kuv paub tias kuv yuav tsum hloov siab, thiab kuv twb thov tag nrho lub lim tiam no kom kuv hloov taus. … Nag hmo nyob hauv lub tuam tsev kuv hnov tus Ntsuj Plig muab kev npau taws tshem ntawm kuv lub siab mus … Kuv yeej zoo siab kom dim tau qhov ntawd. … Zoo li twb muab ib lub nra hnyav uas phem heev tshem ntawm kuv mus.”

Txawm yog nws tseem muaj tej teeb meem no, kuv tus phooj ywg nco txog lub sij hawm nyob hauv tus Tswv lub tsev ntawd, thaum lub hwj chim ntawm Vajtswv txoj kev hlub tau pab nws nrog Vajtswv sib raug zoo, xav zoo txog nws lub neej, thiab tsis txhawj txog yav tom ntej.

Thaum peb paub txog Vajtswv txoj kev hlub, ua yooj yim rau peb ris peb tej nra thiab ua siab ntev thiab zoo siab ywj rau Nws lub siab nyiam. Peb tso siab rau Vajtswv hais tias Nws yuav nco txog Nws tej kev khi lus nrog peb, txhawb pab peb thaum peb raug txom nyem, thiab tso peb dim ntawm kev ua qhev los. Peb kuj xav kom peb tsev neeg thiab cov uas peb hlub txais tau kev xyiv fab no thiab. Ib yam li Lihais tsev neeg, txhua tus muaj kev ywj siab xaiv seb lawv puas noj cov txiv los tsis noj, tiam sis peb muaj cib fim hlub, qhia, thiab caw lawv kom cov uas peb hlub yuav paub txog Vajtswv txoj kev hlub.

Kom pab lwm tus paub txog Vajtswv txoj kev hlub, peb yuav tsum coj raws li Yexus Khetos tej cwj pwm xws li kev txo hwj chim, kev siab hlub, kev khuv leej, thiab kev ua siab ntev, thiab pab lwm tus tig mus rau tus Cawm Seej thaum peb ua raws li ob txoj lus txib tseem ceeb uas yog kev hlub Vajtswv thiab kev hlub peb cov neeg zej zog.

Nyuaj rau kuv ib tug tub nrog lwm tus sib haum thiab xav zoo txog nws tus kheej thaum nws yog ib tug tub hluas. Kuv tus poj niam thiab kuv wb thov Vajtswv qhia wb ua li cas kom pab tau nws, thiab wb yeej txaus siab ua txhua yam uas tus Tswv xav kom wb ua. Muaj ib hnub kuv txais kev tshoov siab nug kuv pawg txwj laug tus thawj tswj hwm seb nws puas paub txog leej twg uas kuv nrog kuv tus tub mus xyuas tau. Tom qab nws xav me ntsis, nws tau hais kom wb mus xyuas ib tug poj niam uas muaj mob heev thiab, thaum ceg ntseeg tus thawj tswj hwm tso cai, muab lub cim nco txog rau nws txhua lub lim tiam. Kuv zoo siab heev, tiam sis kuv txhawj tias kuv tus tub yuav xav li cas txog qhov uas yuav tsum ua txhua lub lim tiam no.

Thawj zaug wb mus xyuas los, wb pab tus poj niam nyuaj siab vim nws mob tsis tu ncua. Nws ris wb txiaj vim nws txais tau lub cim nco txog, thiab wb nyiam nrog nws thiab nws tus txiv tham. Tom qab wb mus xyuas ob peb zaug, muaj ib hnub Sunday kuv tsis nyob thiab kuv nrog kuv tus tub mus tsis tau, tiam sis kuv hais kom nws nco qab txog wb tes num no. Thaum kuv los tsev, kuv xav xav mloog seb nws txoj kev mus xyuas zoo li cas. Kuv tus tub teb hais tias nws khuv xim nws cov phooj ywg vim lawv tsis tau ua tej yam zoo li no. Thiab nws hais ntxiv tias nws coj nws tus kwv nrog nws mus pab tus poj niam, thiab nkawd twb muab lub cim nco txog rau nws, tiam sis tus poj niam tu siab thaum lub lim tiam ntawd vim nws tau caw phooj ywg tuaj rau nws lub tsev kom saib movie, tiam sis nws lub tshuab tso movie tsis khiav lawm. Kuv tus tub hais tias nws nrhiav nyob online, nrhiav tau qhov teeb meem, thiab kho lub tshuab rau tus poj niam tam sim ntawd. Ua rau nws xav tias nws txawj pab, nws zoo siab, thiab tus poj niam no tso siab rau nws ua ib yam dab tsi uas ua rau nws muaj kev xyiv fab. Nws paub tias Vajtswv hlub nws.

Txawm nej ua zoo npaum li nej ua tau, tiam sis lub neej muaj kev nyuaj siab, nej xav tias tsis muaj leej twg hnov nej tej lus thov, los sis nej tsis txais Vajtswv txoj kev hlub, thov kom nej paub tias txhua yam nej ua muaj nqis heev, thiab, ib yam li muaj cov hnub qub nyob saum ntuj, cia li paub tias Leej Txiv Saum Ntuj Ceeb Tsheej thiab Yexus Khetos paub, hnov, thiab hlub nej.

Muaj ib lub sij hawm, thaum Nws cov thwj tim nyob hauv ib lub nkoj es “dej ntas tej niag twv tuaj ntaus lub nkoj,” tus Cawm Seej tau los ko taw saum nplaim dej los rau lawv thiab nplij lawv lub siab hais tias, “Nej tsis txhob poob siab! Twb yog kuv ntag, tsis txhob ntshai.” Thaum Petus xav mus ko taw saum nplaim dej mus cuag tus Cawm Seej, Yexus hais tias “Cia li tuaj.” Thiab thaum Petus tsis saib xyuas thiab pib tog rau hauv dej, tus Cawm Seej txawm cev loo tes mus tuav nkaus Petus tes thiab pab nws nyob nyab xeeb thiab hais tias, “Ua li cas koj kev ntseeg yuav tsawg ua luaj li! Ua li cas koj tsis cia siab?”

Thaum muaj cua daj cua dub uas nplawm peb hauv peb lub neej, peb puas kam zoo siab thiab ua siab loj? Peb yuav ua li cas kom nco qab tias tus Cawm Seej tsis tso peb tseg thiab nws nyob ze peb tiam sis peb tsis pom qab Nws tau ua li ntawd? Peb puas txaus siab muaj kev ntseeg mus cuag Nws, qhov tseem ceeb yog thaum peb xav tias taug tsis taus txoj kev mus tom ntej? Thiab Nws ua li cas kom coj peb mus rau kev nyab xeeb thaum peb ua yuam kev? Peb yuav ua li cas kom rau siab ntseeg ntsia Nws nrog txhua txoj kev xav, thiab tsis txhob ua xyem xyav los sis ntshai?

Yog nej xav muaj Vajtswv txoj kev hlub ntau nplua mias hauv nej lub neej ntxiv, kuv xav caw nej ua tej yam no:

• Qhov thib ib, nyob twj ywm ntau zaus kom nco ntsoov tias koj yog Vajtswv ib tug me nyuam thiab xav txog tej yam uas koj ris Vajtswv txiaj.

• Qhov thib ob, thov Vajtswv txhua hnub, thov Leej Txiv Saum Ntuj Ceeb Tsheej kom pab koj paub leej twg nyob ib puag ncig koj xav tau Nws txoj kev hlub.

• Qhov thib peb, rau siab thov Vajtswv nug seb koj ua tau li cas kom pab tus ntawd paub txog Vajtswv txoj kev hlub.

• Thiab qhov thib plaub, ua raws li tej kev tshoov siab uas koj txais tam sim ntawd.

Yog tias peb ib sij thov Vajtswv thiab thov kom Vajtswv pab lwm tus, Nws yuav qhia peb txog tib neeg uas peb pab tau. Thiab yog peb pab lawv tam sim ntawd, ces peb yog cov uas Nws siv kom teb lawv tej lus thov. Yog peb ua li ntawd, ces thaum sij hawm dhau mus, peb yuav txais kev teb peb tej lus thov, thiab peb yuav paub txog Vajtswv txoj kev hlub hauv peb lub neej.

Ob peb lub hlis tas los thaum kuv thiab kuv tus poj niam ncig mus hauv Nyablaj Teb, wb caij nyab hoom thaum muaj cua daj cua dub. Lub nyab hoom co co heev, thiab wb pom tau cov huab dub, los nag hlob heev, thiab xob laim. Tom qab siv sij hawm ntev kom nce mus saum ntuj, thaum kawg wb lub nyab hoom ya tau saum cov huab tsaus ntuj thiab pom tau lub ntuj zoo nkauj kawg li. Ua rau wb nco qab ntsoov txog peb Leej Txiv Saum Ntuj Ceeb Tsheej thiab Yexus Khetos thiab wb paub txog Nkawd txoj kev hlub rau peb.

Kuv cov phooj ywg, vim kuv yog ib tug uas paub txog Vajtswv txoj kev hlub, kuv zoo siab ua tim khawv tias tus Cawm Seej Yexus Khetos yeej yog Vajtswv txoj kev hlub. Nws txoj kev hlub peb yeej zoo tag nrho uas Nws muab rau peb txhua tus tsis tu tsis tseg. Thaum peb rau siab coj raws li Nws, thov kom peb yuav muaj Nws txoj kev hlub puv npo thiab peb yuav ua li ib lub tsev taws teeb uas coj lwm tus rau Nws txoj kev hlub. Los ntawm Yexus Khetos lub npe, amees.