Kuv txoj Kev Hlub tus Cawm Seej Yeej Qhia Seb “Vim Li Cas” Kuv Ntseeg

Nej puas nco qab pom hais tias peb tug yaj saub, Thawj Tswj Hwm Russell M. Nelson, pheej thov caw peb ua li ub ua li no? Yog li ntawd, nws twb caw peb los kawm thiab ntsuam xav txog tej zaj lus qhia hauv ob lub rooj sab laj tas los no. Hauv lub Plaub Hlis Ntuj xyoo 2024, nws hais tias, “Kuv cia siab hais tias nej yuav kawm tej zaj lus los ntawm lub rooj sab laj no thaum ob peb lub hlis tom ntej.” Ces, thaum lub Kaum Hli Ntuj xyoo 2024, nws hais tias, “Kuv xav kom nej kawm [cov neeg hais lus] tej zaj lus. Siv lawv tej lus kom thiaj paub tej yam twg muaj tseeb thiab tej yam twg tsis muaj tseeb thaum rau lub hlis tom ntej no.”

Tej lus caw no yog tej lus caw uas cov yaj saub tau thov kom peb yuav ua hauv peb lub neej, kuj suav tej lus caw uas peb tau txais hauv ob peb xyoos tas los no. Tej zaum peb yuav xav tias tej lus caw no tsuas yog ob peb yam ntxiv uas peb yuav tsum ua vim lawv caw thiab thov peb los ua li no. Tiam sis puas muaj dab tsi ntxiv?

Thaum xav txog qhov no thiab tej lus caw uas peb tau txais lawm, kuv thiaj li nco qab txog ib yam uas kuv tau kawm thiab txiav txim siab yuav ua ntev tas los lawm. Kuv tab tom sim ua tej no tej uas tseem ceeb rau kuv vim hais tias kuv hlub Nws; kuv hlub peb tus Cawm Seej. Kuv cov kwv tij thiab cov muam, qhov no yog lub ntsiab lus tseem ceeb tshaj plaws rau kuv ua li no, thiab muab kuv txoj kev hlub rau nej.

Ua nej tus tij laug, kuv cia siab tias nej yuav to taub hais tias kuv cov lus yeej yog caw nej los to taub tias txhua yam tsav yeej qhia txog peb txoj kev hlub tus Cawm Seej.

Qhov no yuav pab peb to taub tiag tiag seb “vim li cas” peb ua txhua yam tsav ua tus Cawm Seej cov thwj tim. Qhov no yuav pab peb haj yam nrog Vajtswv sib cog lus tseg, to taub Nws tej kev tseeb uas los saum ntuj los—Nws tej kev tseeb uas kav mus ib txhis uas yeej tsis hloov mus. Tej kev tseeb uas kav mus ib txhis zoo li … “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”

Yeej muaj tej lub sij hawm uas peb pheej ua tej yam qub xwb ces tej ntawd cia li ua peb tej kab lig kev cai, peb cia tej kab lig kev cai los sis tej yam peb ua ntawd ua lub hauv paus rau peb txoj kev ntseeg Yexus Khetos xwb. Zoo nkaus li peb ua tej no vim hais tias peb twb ua tej ntawd ntau xyoo tas los lawm yeej tsis nco qab xav seb tej ntawd muab peb txuas rau tus Cawm Seej li cas.

Nyob hauv peb lub ntiaj teb no, feem ntau peb rau siab ntso ua peb tej hauj lwm thaum peb ua tej yam thiab ncav cuag cov hom phiaj. Nyob ntawm sab ntsuj plig, peb muaj cib fim ua ntau tshaj thiab ncav cuag cov hom phiaj thaum peb to taub seb yog vim li cas peb thiaj ua tej no. Yog tias peb to taub thiab muab lub ntsiab lus ntawm tej yam peb ua txuas mus rau peb txoj kev hlub tus Cawm Seej thiab peb Leej Txiv Saum Ntuj Ceeb Tsheej, thaum peb ua tib zoo ua hauj lwm, peb yuav to taub hais tias tab txawm peb ua tej yam ncaj ncees, zoo li muaj tej kev ua si los sis kab lig kev cai hauv lub Koom Txoos thiab tej ntawd yeej tsim nyog ua thaum peb muab tej ntawd txuas rau lub ntsiab uas qhia seb “vim li cas” peb ua, peb yuav haj yam to taub lub ntsiab lus. Tsis yog peb yuav ua tej yam zoo los sis ua qhov yog xwb; peb yeej yuav ua kom yog.

Piv xam hais tias, thaum nej tsa ib lub hom phiaj yuav nyeem cov vaj lug kub, mob siab thov Vajtswv, los sis npaj ib txoj kev ua si rau nej tsev neeg los sis pawg ntseeg, lub hom phiaj puas yog kom ua tej no xwb? Los yog tej yam no puas yog tej yam yus ua xwb, cov cuab yeej, uas pab nej ncav lub hom phiaj tseeb? Lub hom phiaj puas yog kom muaj ib txoj kev ua si vim peb twb ua txoj kev ua si ntawd tau ntau xyoo los lawm ces sawv daws mam li suav hais tias lawv twb ua tiav tag lawm? Los yog, hais ib zaug ntxiv, tej no puas yog tej yam uas pab peb kawm, hnov, thiab txav mus ze tus Cawm Seej?

Thov kom nej tsis txhob xav yuam kev txog kuv tej lus hais txog tej kev ua si thiab tej kab lig kev cai los sis tsa tej hom phiaj thiab rau siab ntso ua tej ntawd; ua tej no tsis yog tej yam tsis zoo. Tiam sis, kuv thov caw nej kom nej qhib nej siab nej ntsws rau tej lub cib fim thiab tej koob hmoov uas los thaum nej to taub yog vim li cas peb ua tej no thiab seb peb coj peb txoj kev teev ntuj li cas.

Ib qho piv txwv txog txoj kev muab Yexus ua qhov nruab plawv peb tej kab lig kev cai yog qhov uas Thawj Tswj Hwm Dallin H. Oaks muab rau peb sawv daws thaum nws sawv cev rau Thawj Pawg Thawj Tswj Hwm. Thawj Tswj Hwm Oaks hais tias, “Thaum peb pib xyoo tshiab, cia peb npaj siab rau lub caij Easter uas peb nco txog Yexus Khetos txoj kev theej txhoj. … Txawm hais tias lwm tus ntseeg los sis ua li cas los xij, peb yuav tsum nco txog peb tus Cawm Seej uas muaj sia no txoj Kev Sawv Rov Los thaum peb kawm Nws tej lus qhia thiab pab txhim tsa tej kab lig kev cai rau Easter hauv peb lub xam khoo, thiab rau hauv peb lub cuab lub yig.” Tam li nej pom, tsis yog caw kom peb muaj tej kab lig kev cai xwb. Tas sis mas, peb siv tej kab lig kev cai no kom pab peb kawm ntxiv txog tus Cawm Seej thiab nco qab txog Nws txoj Kev Sawv Rov Los.

Thaum peb haj yam tsom ntsoov rau lub ntsiab lus ntawm peb txoj kev hlub tus Cawm Seej, peb haj yam yuav txais tau tej yam uas peb xav tau los sis tab tom nrhiav. Thawj Tswj Hwm Nelson hais tias, “Txawm nej muaj lus nug los sis muaj teeb meem li cas los, lus teb yeej nyob ntawm Yexus Khetos lub neej thiab tej lus qhia.” Ces nws thiaj thov peb hais tias: “Cia li kawm txog txoj Kev Theej Txhoj, Nws txoj kev hlub, Nws lub siab hlub tshua, Nws cov lus qhuab qhia, thiab Nws txoj moo zoo uas kho peb zoo thiab pab peb vam meej. Muab siab npuab Nws! Cia li coj raws li Nws!”

Cia li ua tib zoo xav txog qhov no seb: Nej puas ntseeg tias Thawj Tswj Hwm Nelson txoj kev thov caw yog kom pab peb ua ib daim ntawv khij tseg uas pab peb kawm ntxiv thiab ua tej yam hauj lwm xwb? Los yog hais tias nws tab tom caw peb los xav txog tej kev tseeb thiab ntsiab lus uas kav mus ib txhis uas yuav pab peb haj yam to taub yog vim li cas peb ua thiab kom peb muaj kev hlub rau tus Cawm Seej uas coj kav peb txoj kev ua neej nyob?

Cia kuv piav txog lub ntsiab cai uas kuv tab tom qhia no. Ib qho uas txawv heev, yog kom yus nyeem txhua zaj lus qhia hauv lub tuam rooj sab laj hauv ib lub sij hawm xwb; ces thaum nyeem tas, kuv mam li khij kuv daim ntawv hais tias kuv twb nyeem tag lawm tsis tas yuav ua dab tsi ntxiv. Kuv to taub tias qhov no yeej txawv, tiam sis ib txhia yuav xav ua li ntawd. Tej zaum, peb feem coob tsis ua li no tiam sis tsis ua qhov zoo tshaj plaws thiab.

Txoj kev caw yog kom peb kawm thiab ntsuam xav txog tej zaj lus qhia hauv lub tuam rooj sab laj ces siv tej lus qhia ntawd pab peb txiav txim seb peb yuav ua dab tsi kom thiaj ua tau neeg zoo dua.

Thaum peb ua raws li txoj kev thov caw ntawd, to taub lub ntsiab lus “yog vim li cas”, ces peb haj yam yuav muaj cib fim txav los ze tus Cawm Seej. Peb yuav pib to taub hais tias vim kuv hlub tus Cawm Seej, kuv thiaj xav kawm ntxiv txog Nws thaum kuv kawm cov yaj saub uas muaj sia nyob tej lus qhia. Thiab vim kuv hlub kuv cov kwv tij zej zog, kuv yuav qhia cov yaj saub, cov neeg pom tau, thiab cov neeg qhia kev tshwm sim tej lus qhia no rau luag tej, pib qhia cov neeg uas kuv hlub.

Ob qho piv txwv no ces, nej thiaj ua ib yam ncaj ncees. Ib qho, ces lub hom phiaj yog kom siv yam uas Leej Txiv Saum Ntuj Ceeb Tsheej thiab tus Cawm Seej tau muab rau peb, uas yog tej zaj lus qhia hauv lub tuam rooj sab laj. Qhov ob ces peb yuav txais tej koob hmoov zoo thaum peb kawm txog tej ntsiab lus, uas yuav pab peb to taub tej kev tseeb uas kav mus ib txhis thiab txais yuav tej koob hmoov uas cog lus tseg rau cov neeg uas muab Yexus Khetos, peb tus Cawm Seej tej lus qhia tso nruab plawv rau hauv lawv lub neej.

Cov kwv tij thiab cov muam, kuv cia siab tias nej yuav hnov thiab pom hais tias txoj kev muab tej yam peb ua kho kom haum peb txoj kev hlub tus Cawm Seej tseem ceeb npaum li cas. Nyob hauv ntiaj teb no, muaj ntau lub suab uas hu nej, thiab yog ua tau, lawv sim yaum kom nej yuav xav tias ib txhia kev tseeb hauv Yexus Khetos txoj moo zoo uas tau muab txum tim rov qab los yeej tsis tshua tseem ceeb. Cov suab no pib yog hais kom txhob ntseeg hais tias yuav tsum muaj txoj kev muab txim tim rov qab los hauv lub caij nyoog kawg no, los yog tsis tsim nyog muaj Vajtswv lub nceeg vaj hauv ntiaj teb no, uas yeej yog qhov uas muab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txum tim rov qab los lawm.

Tej zaum nej yuav hnov tej lub suab uas hais tias yus txoj kev to taub thiab nrog tus Cawm Seej sib raug zoo yuav txaus thiab tias yus tsis tas muaj txoj kev teev ntuj thiab lub Koom Txoos uas muab txum tim rov qab los lawm los sis ob qho ntawd tsis tseem ceeb. Kuv thov caw kom nej tsis txhob quav ntsej tej tswv yim cuav no thiab kom nej yuav nco qab txog tej uas tus Cawm Seej qhia peb txij thaum chiv keeb los—pib nrog txoj kev hlub uas Leej Txiv Saum Ntuj Ceeb Tsheej thiab Yexus Khetos muaj rau peb thiab muab peb txoj kev hlub rau Nkawd ua lub ntsiab lus uas yog vim li cas peb yuav coj raws li Nkawd.

Vajtswv Leej Txiv thiab Nws tus Tub tau los nrog Joseph Smith tham kom muab tau Yexus Khetos lub Koom Txoos txum tim rov qab los thiab tau pib lub caij nyoog uas puav txhua lub caij, Nws lub Nceeg Vaj hauv ntiaj teb no. Yog li ntawd, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog qhov uas Leej Txiv Saum Ntuj Ceeb Tsheej tau txhim tsa kom muab tau tej kev khi lus uas qhib kev rau peb rov mus tsev. Yog li ntawd, peb thiaj xav tau ntau tshaj qhov uas peb nrog Leej Txiv Saum Ntuj Ceeb Tsheej thiab Nws tus Tub sib raug zoo xwb, peb xav tau tej kab ke pov thawj hwj peb thiaj nrog Nkawd sib khi lus tseg. Qhov no ua rau peb muaj txoj kev sib khi lus nrog Nkawd thiab ua rau peb txais tau Nkawd txoj kev hlub vim muaj kev sib khi lus ntawd, uas qhib kev rau peb mus nyob tau hauv lub nceeg vaj uas muaj yeeb koob zoo tshaj plaws uas tau npaj tseg rau cov neeg uas rau siab ntso ua raws li lawv tej kev khi lus.

Kuv hais lus tim khawv tag siab tag ntsws hais tias peb tus Cawm Seej, Yexus Khetos yeej muaj sia nyob thiab los saum ntuj los. Nws hlub nej. Nws paub hais tias nej tab tom raug xwm zoo li cas hauv nej lub neej. Nws xyab tes rau nej, thiab caw nej hais tias, “Los cuag kuv, … thiab kuv yuav cia nej so.”

Kuv hlub tus Cawm Seej, thiab kuv txoj kev hlub Nws yog “vim li cas” kuv ua tej no. Los ntawm Yexus Khetos lub npe, amees.