Rau Peb Qhov Muag Pom
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj cov mej zeej thiab tsev neeg coob zuj zus, muaj tej qhov chaw tshaj tawm txoj moo zoo thiab cov tub txib, tej tsev sib ntsib thiab cov tuam tsev ntxiv.
Cov kwv tij thiab cov muam, kuv zoo siab koom nrog nej. Peb hlub nej, peb ua Vajtswv tsaug rau nej, thiab peb tau koob hmoov vim nej thov Vajtswv.
Thawj Tswj Hwm Russell M. Nelson tau hais nyob hauv lub rooj sab laj tas los tias: “Nej puas pom tej yam uas tshwm sim rau nej qhov muag pom? Kuv thov kom peb yuav tsom ntsoov rau lub sij hawm zoo kawg nkaus no! Tus Tswv yeej khiav Nws txoj hauj lwm nrawm nroos.”
Khiav Nws txoj hauj lwm nrawm nroos. “Nrawm nroos” yog ib lo lus uas muaj nqis heev. Lub ntsiab yog kom khiav sai, mus ceev zuj zus, thiab yog ib yam tseem ceeb. Lub Koom Txoos loj hlob tuaj thiab muaj raws li Khetos txoj hau kev nrawm nroos. Thiab peb sawv daws koom ua txoj hauj lwm no.
Thaum lub Plaub Hlis Ntuj 1834, nyob hauv Kirtland, Ohio, tus Yaj Saub Joseph Smith tau muab tag nrho cov uas tuav lub pov thawj hwj sau los ua ke hauv ib lub tsev kawm ntawv me me, lub tsev dav li 14 fij (4.3 mev) xwb. Ntshe peb tso tau ntau lub tsev kawm ntawv me li ntawd nyob hauv lub Tsev rau Rooj Sab Laj no, tseem yuav muaj chaw ntxiv thiab. Joseph Smith tau hais tias, “Hmo no nej tsuas pom qhov me ntsis ntawm lub Pov Thawj Hwj, tiam sis lub Koom Txoos no twb yuav puv tag nrho Amelikas Sab Qaum Teb thiab Sab Qab Teb—thiab yuav puv tag nrho lub ntiaj teb.”
Twb muaj raws li tus yaj saub no tej lus qhia “rau peb qhov muag pom.” Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj cov mej zeej thiab tsev neeg coob zuj zus, muaj tej qhov chaw tshaj tawm txoj moo zoo thiab cov tub txib, tej tsev sib ntsib thiab cov tuam tsev ntxiv, muaj neeg coob zuj zus uas kawm seminary, institute, thiab hauv tej tsev qib siab nyob thoob plaws lub ntiaj teb.
Peb yeej zoo siab nyob hauv lub ntiaj teb thaum lub Koom Txoos loj tuaj thiab muaj hwj huam ntxiv, tiam sis qhov tseem ceeb yog cov mej zeej lub neej thiab tej yam nyob hauv lawv lub siab. Peb hu ua Yexus Khetos cov thwj tim. Peb hais lus tim khawv txog Nws, Nws lub Koom Txoos, Nws tej kev, thiab Nws tej kev khi lus. Peb yog Nws cov neeg, thiab Nws yog peb tus Cawm Seej.
Kuv xav tsis thoob txog lub sij hawm no uas Thawj Tswj Hwm Nelson hais tias yog “lub sij hawm zoo kawg nkaus no” thiab ris tus Tswv txiaj rau Nws txoj hauj lwm no. Kuv yaum peb kom ua siab loj ua Nws cov thwj tim, cov uas ua tim khawv txog tej uas muaj raws li cov yaj saub tau hais, puag thaum ub thiab niaj hnub no los yog.
Muaj cov uas ib txwm qw hais tias, “‘Nyob ntawm no!” thiab … ‘Nyob tod,’” ib yam li lawv hais nyob hauv Joseph Smith lub caij nyoog. Tiam sis, lawv ib txwm thiab yeej yuav tsis tseem ceeb rau txoj hauj lwm zoo kawg nkaus no. Nco ntsoov Joseph Smith tej lus: “Tsis muaj ib txhais tes uas tsis dawb huv yuav nres tau txoj hauj lwm no; yuav muaj kev tsim txom, … tiam sis Vajtswv txoj lus tseeb tseem yuav tawm mus nrog kev ua siab loj, kev hwm, thiab nyob nws tus kheej, mus txog thaum qhov tseeb tau nkag mus hauv txhua thaj av, tau xyuas txhua txhia qhov chaw, tau mus thoob plaws txhua lub teb chaws, thiab txhua tus neeg tau hnov; txog thaum Vajtswv cov hom phiaj muaj tiav tas, thiab tus Yehauvas uas Muaj Hwj Chim yuav hais tias txoj hauj lwm twb tiav lawm.”
Xyoo no thaum kuv ua hauj lwm, kuv twb pom meej txog qhov uas tus Tswv khiav Nws tej hauj lwm nrawm nroos. Lub Koom Txoos ua cov tuam tsev tshiab sai dua li yav tas los, kom cov mej zeej muaj cib fim ntxiv pe hawm Vajtswv hauv tus Tswv lub tsev. Qhov thib ob, cov tub txib tej hauj lwm pab muab neeg coob zuj zus sau los ua ke hauv tus Tswv Yug Yaj Zoo, uas yog Yexus Khetos, pab yaj. Thiab qhov thib peb, neeg coob zuj zus siv lub Koom Txoos tej kev kawm ntawv uas muaj ntau hom qhia cov uas “nrhiav tus Yexus no.”
Hnub no lub Koom Txoos muaj 367 lub tuam tsev uas tau npaj ua, tab tom ua, los sis twb ua tiav lawm. Rau lub hom phiaj dab tsi? Lus teb yeej nyob ntawm txhua lub tuam tsev: “Kev Dawb Huv rau tus Tswv.” Lub tuam tsev qhib kev kom txais tau cov koob hmoov siab tshaj plaws uas peb Leej Txiv Saum Ntuj Ceeb Tsheej xav foom pub rau peb. Cov kwv tij thiab cov muam, peb hloov ua neeg dawb huv nrawm nroos thaum peb ua neej tsim nyog mus hauv lub tuam tsev, thaum peb teev tiam hauv tus Tswv lub tsev, thiab thaum peb nrog Vajtswv khi lus thiab sawv peb cov poj koob yawm txwv cev uas nyob daim ntaub thaiv sab tod.
Thawj Tswj Hwm Nelson tau hais tias: “Tus yeeb ncuab tej kev tsim txom tsuas ua heev tuaj xwb, nws sib zog thiab muab ntau yam los tsim txom peb. Tsis tau muaj dua lwm lub sij hawm uas tib neeg yuav tsum ib sij mus hauv lub tuam tsev npaum li lub caij no. Kuv taij thov kom nej yuav thov Vajtswv seb nej yuav tsum siv nej lub sij hawm li cas.” Nyob hauv Nws lub tsev peb yuav nyob ntawm tus Tswv lub xub ntiag dawb huv thiab muaj kev kaj siab lug.
Tsaib no kuv muaj cib fim tswj hwm kev muab lub Tuam Tsev Mendoza Argentina fij tseg. Nyob hauv kuv zaj lus kuv tau hais txog Txwj Laug Melvin J. Ballard txoj kev qhia txog yav tom ntej nyob rau xyoo 1926 hais tias tus Tswv txoj hauj lwm yuav maj mam loj tuaj rau ib ntus hauv Amelikas Qab Teb, “ib yam li ib lub txiv ntoo qheb loj tuaj ua ib tug ntoo. Yeej yuav tsis tawg paj txi txiv thaum ib hnub xwb,” tiam sis txhiab txhiab tus neeg yuav koom lub Koom Txoos thiab tej lub teb chaws ntawm Amelikas Qab Teb yuav los muaj “hwj chim hauv lub Koom Txoos.” Twb muaj raws li tej lus qhia ntawd rau kuv qhov muag pom.
Mendoza, uas zoo li ib lub txiv ntoo qheb tas los, twb loj hlob tuaj ua ib tug ntoo siab heev. Lub Koom Txoos loj tuaj ib yam li no nyob thoob plaws tej thooj av thiab hauv cov pov txwv ntawm dej hiav txiv.
Peb saib tus Tswv khiav Nws txoj hauj lwm nrawm nroos hauv tej qhov chaw tshaj tawm txoj moo zoo. Nyob rau xyoo 2024, 80,000 tus tub txib tau ua hauj lwm hauv 450 qhov chaw tshaj tawm txoj moo zoo. Peb caug rau qhov chaw yog qhov chaw tshaj tawm txoj moo zoo tshiab. Tsaib no cov tub txib txoj hauj lwm tau pab coj 300,000 tus mej zeej tshiab los rau hauv lub Koom Txoos. Tsis yog peb suav cov no xwb, lub ntsiab ntawm kev muab neeg sau los ua ke yog kom coj lawv mus rau Yexus Khetos thiab Nws txoj moo zoo.
Ua rau kuv xav txog ob tug Thwj Tim Brigham Young thiab Heber C. Kimball, uas nyob rau xyoo 1839 tau mus ua tub txib hauv British Isles. Nkawd mob mob heev; es nkawd yuav ncaim nkawd tsev neeg uas mob thiab txom nyem. Txawm li ntawd los, ob tug ntawd tau nce mus saum lub laub, thiab thaum nkawd tseem pom tau cov uas nkawd hlub, Heber hais tias, “Cia wb sawv thiab qw kom txhawb nqa lawv.” Nyuaj rau ob tug ntawd sawv ces nkawd qw hais tias, “Zoo siab, zoo siab rau Ixayees.”
Kuv twb pom cov tub txib zoo siab npaum li ntawd ua tus Tswv txoj hauj lwm nyob hauv Lima, Peru, thaum kuv ntsib cov tub txib los ntawm lub tsev cob qhia cov tub txib thiab cov nyob hauv tej qhov chaw tshaj tawm txoj moo zoo hauv Lima. Yeej zoo saib! Kuv qhov muag twb pom kev khiav txoj hauj lwm no nrawm nroos. Tam sim no muaj xya qhov chaw tshaj tawm txoj moo zoo nyob hauv lub nroog Lima xwb.
Thaum peb txoj kev sib ntsib kawg, cov tub txib twb npaj ib yam tshwj xeeb rau kuv. Lawv sawv thiab qw hais tias, “Zoo Siab rau Ixayees.” Kuv yeej yuav nco ntsoov lub sij hawm ntawd; kheev lawm nej sawv daws nyob tau ntawd thiab. Muaj cov tub txib rau kuv qhov muag pom uas tau tso “tej yam ntawm lub ntiaj teb no” tseg kom ua hauj lwm rau tus Tswv thiab pab Nws rov qab los nrawm nroos.
Peb pom tau tus Tswv kuj pab peb cov mej zeej thiab cov uas tsis yog mej zeej nyob thoob plaws lub ntiaj teb muaj tej lub cib fim kawm ntawv. Ib yam uas txawv ntawm peb lub koom txoos yog qhov uas peb qhia tias kev kawm ntawv tseem ceeb npaum li cas. Thaum nyuam qhuav pib lub caij nyoog muab txoj moo zoo txum tim rov qab los, tus Tswv txib kom “nrhiav kev kawm, los ntawm kev kawm ntawv thiab kev ntseeg.” Niaj hnub no los peb yeej ua li ntawd thiaj li tsim nyog uas peb qw “zoo siab.”
Tam sim no muaj 800,000 tus tub ntxhais kawm ntawv thoob plaws lub ntiaj teb uas kawm seminary thiab institute, muaj ntau tshaj ib txwm muaj hauv lub Koom Txoos. Muaj ntau txoj kev uas peb cov tub hluas ntxhais hluas koom ua ke xws li thaum sawv ntxov, nruab hnub, thiab hmo ntuj los sis nyob online, thiab kawm hauv tsev. Lawv zoo li ib pawg tub rog uas muaj hwj chim thiab ncaj ncees, lawv ib leeg txhawb ib leeg lub zog thaum lawv kawm ua ke txog Yexus Khetos, coj raws li Nws, thiab ua tim khawv tias Nws yog Vajtswv Leej Tub.
Lub caij nplooj ntoo zeeg tas los kuv tau hais lus nyob hauv qhov chaw saib kev ncaws pob hais rau cov tub ntxhais kawm ntawv seminary thiab institute thiab lawv niam thiab txiv nyob hauv University of Utah. Qhov uas tuaj mloog qhia rau peb paub tias lawv xav paub thiab coj raws li Yexus Khetos npaum li cas. Kuv zaj lus rau cov tub ntxhais kawm ntawv yeej meej heev: Siv sij hawm rau tus Tswv kom sib npaug. Kuv ntuas lawv kom kawm tej yam uas tseeb thiab siab dua, kawm txog “Leej Tub ntawm tus Vajtswv uas muaj txoj sia nyob.”
Kuv hais kom nej txhua tus hnub no ua ib yam thiab: Txawm yog nej muaj dab tsi uas yuav tsum ua hnub no los, cia li siv sij hawm sib npaug, tsis yog sij hawm uas tshuav xwb, rau tus Tswv thaum nej kawm vaj lug kub, kawm nrog tsev neeg hauv Los, Nrog Kuv Mus, thov Vajtswv, ua hauj lwm hauv lub Koom Txoos, txhawb pab lwm tus, txais lub cim nco txog, teev tiam hauv lub tuam tsev, thiab xav txog tej yam ntawm Vajtswv. Peb tus Tswv thiab tus Cawm Seej tau hais tias, “Kawm tej uas kuv qhia, nej thiaj yuav tau so.” Cia li ntseeg Nws. Thiab siv sij hawm rau Nws sib npaug.
Thawj Tswj Hwm Nelson tau hais tias: “Kuv thov kom nej yuav cia Vajtswv yeej hauv nej lub neej. Siv ib feem ntawm nej lub sij hawm pub rau Nws. Thaum nej ua li ntawd, cia li saib nej sab ntsuj plig yuav muaj zog zuj zus tuaj.”
Peb pom tias muaj zog zuj zus tuaj nyob hauv seminary, institute, thiab lub Koom Txoos tej tsev kawm ntawv qib siab. Nyob hauv tej qhov chaw no, tib neeg saib tus Tswv ua ib tug uas tseem ceeb. Yeej yuav tsum ua ib yam li no nyob hauv peb txhua tus lub neej.
Ib yam uas qhia tias peb qhia neeg coob ntxiv nyob hauv lub Koom Txoos yog BYU–Pathway Worldwide. Nyob thoob plaws lub ntiaj teb, twb muaj 75,000 tus neeg uas kawm ntawv thiab muaj neeg coob zuj zus. Feem coob yog mej zeej, thiab ib feem peb no nyob hauv Afikas Teb. Pathway los tsom ntsoov rau kev txais tau kev kawm ntawv. Yog yus kawm tiav ces ua rau yus nrhiav tau hauj lwm ua, thiab yog yus nrhiav tau hauj lwm ua ces zoo dua rau yus tsev neeg thiab yus muaj cib fim ntxiv ua hauj lwm rau tus Tswv.
Thaum kuv ntsib ib ceg txheem ntseeg cov thawj coj hauv Uganda, kuv kawm tias lawv ceg txheem ntseeg pawg thawj tswj hwm puav leej kawm BYU–Pathway. Peb yim npaj ntawm sab cev nqaij daim tawv thiab sab ntsuj plig, peb yim kov yeej tau tus yeeb ncuab tej kev tawm tsam. Cia li nco ntsoov Petus tej lus: “Dab Ntxwg Nyoog … mus mus los los ib yam li tus tsov ntxhuav uas quaj nrhiav tom tsiaj noj.”
Kuv paub tias txawm yog peb muaj txoj moo zoo lawm los, muaj ib txhia uas ntxhov siab, lawv tsis tshua ntseeg, lawv ua xyem xyav, thiab muaj tej lus nug uas zoo li tsis muaj lus teb. Cov kwv tij thiab cov muam, lub teb yeej yog Yexus Khetos. Pib muab siab npuab Nws. Saib seb Nws tau pab nej li cas hauv nej lub neej. Cia li mloog Nws hais. Nws hais tias, “Nej tsis txhob txhawj,” rau Nws cov thwj tim ua ntej Nws mus hauv lub vaj Khexemanes, ua ntej Nws ev Nws tus ntoo khaub lig hauv Yeluxalees tej kev, ua ntej Khaulakhauthas, qhov chaw uas Nws txheej peb lub txhoj tiav—qhov uas Nws ib leeg xwb, Vajtswv Leej Tub, ua taus.
Cia li paub tias Nws to taub. Nws tau ris peb txhua tus tej kev txhaum, tej uas peb ua yuam kev, kev tu siab, thiab tej hnub phem kom peb yuav rov qab nrog peb Leej Txiv Saum Ntuj Ceeb Tsheej nyob mus ib txhis li. Nws tau hais tias, “Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai.” Kev ntseeg Yexus Khetos yuav tsa nej sawv thiab kho nej sab ntsuj plig uas raug mob. Cia li tso siab rau Nws thiab nej yuav khiav nrawm nroos rov qab los rau “ob txhais npab ntawm Nws txoj kev hlub.”
Kuv rov qab hais tej lus ntawm peb tus yaj saub: “Nej puas pom tej yam uas tshwm sim rau nej qhov muag pom? Kuv thov kom peb yuav tsom ntsoov rau lub sij hawm zoo kawg nkaus no! Tus Tswv yeej khiav Nws txoj hauj lwm nrawm nroos.” Thov kom peb cov uas ua thwj tim hauv lub caij nyoog no yuav qw “Zoo Siab rau Ixayees,” thaum peb npaj rau peb tus Tswv thiab tus Cawm Seej txoj kev rov qab los. Los ntawm Yexus Khetos lub npe, amees.