Kev Ntseeg: Kev Khi Lus ntawm Kev Tso Siab thiab Kev Ua Ncaj
Kev ntseeg yuav loj tuaj thaum peb tso siab rau Yexus Khetos thiab vam meej thaum peb rau siab ntseeg thiab ua ncaj rau Nws.
Thaum kuv muaj 17 xyoo, kuv cog lus rau kuv tus phooj ywg José Luis hais tias kuv yuav qhia nws ua luam dej. Muaj ib tag kis wb twb teem sij hawm xyaum ua luam dej. Thaum kuv qhia nws tas thiab kuv tab tom tawm lub dab ua luam dej, kuv hnov kuv tus phooj ywg qw kom kuv los pab. Nws poob dej hauv dab ua luam dej sab tob heev.
Kuv dhia hauv dej thiab ua luam dej mus txog nws thaum kuv thov Vajtswv pab kuv. Thaum kuv tuav nws tes rub nws tawm cov dej los, kuv tus phooj ywg nce saum kuv nraub qaum thiab khawm kuv nyem kuv caj pas. Ua rau wb ob leeg tab tom poob deg. Kuv siv zog ua luam dej kom nyob saum nplaim dej, es kuv thiaj li thov Vajtswv tas zog kom Vajtswv ua ib qho txuj ci tseem ceeb rau wb. Ces, Vajtswv lub hwj chim tshwm sim thaum kuv hnov zoo li ib txhais tes maj mam rub kuv zuj zus mus rau chaw ntiav, ua rau wb muaj kev nyab xeeb lawm.
Lub sij hawm no ua rau kuv paub tias zaj lus qhia uas Thawj Tswj Hwm Russell M. Nelson qhia muaj tseeb: “Thaum nej ncav tes kom txais tau tus Tswv lub hwj chim hauv nej lub neej zoo ib yam li ib tug neeg uas poob deg muab nws txhais tes yoj mus los thiab nws huas pa, ces nej yuav txais tau Yexus Khetos lub hwj chim.”
Cov me nyuam yaus thiab cov tub hluas ntxhais hluas, hnub no kuv xav hais rau nej txog lub ntsiab cai tseem ceeb uas yog kev ntseeg Yexus Khetos.
Kev Ntseeg Khetos Txhais tias Yus Tso Siab rau Nws
Lub ntsiab ntawm kev ntseeg Yexus Khetos yog dab tsi? Qhov no puas txhais tias peb ntseeg Nws los sis muaj ib zaj lus tim khawv paub tias muaj Nws tiag? Tej zaum yog li ntawd, tiam sis tsis yog li ntawd xwb. Nej puas tau xav tias kev ntseeg yog kev tso siab? Cia li xav txog tus neeg uas nej tso siab rau ntau tshaj—tej zaum yog ib tug hauv nej tsev neeg los sis ib tug phooj ywg. Vim li cas nej tso siab rau tus ntawd? Nyaj yog vim nej tau pom tus ntawd hlub thiab pab nej tas zog.
Thaum peb ntseeg Yexus Khetos, peb nco txog Nws cov koob hmoov thiab tso siab rau Nws.
Yuav Ua Li Cas Kom Tso Siab rau Yexus Khetos Ntxiv?
Nyob hauv kev sib ntsib rau cov tub hluas ntxhais hluas tsis ntev tas los, twb caw nej kom xav txog ib lub sij hawm hauv nej lub neej thaum nej tau txais kev tshav ntuj uas los saum ntuj ceeb tsheej los. Cia li sim ua li no!
Thaum xub thawj xav txog Yexus Khetos thiab kev zoo siab hauv nej lub neej uas los ntawm Nws txoj Kev Theej Txhoj thiab txoj moo zoo. Thiab sau ntawv txog “tej yam nej nco ntsoov uas txhawb nej sab ntsuj plig lub zog” thaum Vajtswv tau pab nej, cov uas nej hlub, thiab cov neeg nyob hauv vaj lug kub. Nim no, tej zaj lus tim khawv no yuav tsis ua rau nej lub neej muaj hwj chim mus txog thaum tus Ntsuj Plig muab tej lus no “sau rau hauv” nej lub siab. Yog li ntawd cia li xav thiab sau ntawv txog tag nrho tej yam uas Vajtswv tau ua kom muaj tej txuj ci tseem ceeb no thaum lub sij hawm uas yog lawm.
Tom qab ntawd, siv tus txheej txheem no kom muaj cib fim muab siab npuab Vajtswv ntxiv. Thov nej Leej Txiv Saum Ntuj Ceeb Tsheej zoo li yog thawj zaug. Hais tias nej hlub Nws thiab ris Nws txiaj rau Nws cov koob hmoov. Thov Nws seb Nws xav li cas txog nej thiab tej yam uas nej ua hauv nej lub neej.
Yog nej mob siab thiab txo hwj chim, nej yuav hnov Nws tej lus teb thiab pib nrog Leej Txiv Saum Ntuj Ceeb Tsheej thiab Yexus Khetos sib raug zoo. Tsis tas li ntawd xwb, tiam sis tej yam teev ntuj uas nej ua yuav haj yam muaj nqis! Piv txwv hais tias, nej yuav nyiam thov Vajtswv, kawm vaj lug kub nej tus kheej, thiab mus teev tiam hauv lub tuam tsev vim nej yuav muaj cib fim paub Nkawd thiab nrog Nkawd nyob.
Kev Ntseeg Muaj Zog Thaum Ua Ncaj
Cia li pom tias kev ntseeg yuav loj tuaj thaum peb tso siab rau Yexus Khetos thiab vam meej thaum peb rau siab ntseeg thiab ua ncaj rau Nws. Yog peb xav nrog Yexus Khetos sib raug zoo tiag, cia li qhia tias nej yuav rau siab ntseeg thiab ua ncaj rau Nws thaum nej khi lus thiab ua raws nraim li tej kev khi lus ntawd. Kev khi lus nrog Yexus Khetos txhawb nqa kev cia siab. Kev ua raws nraim li tej kev khi lus txhawb kev ntseeg.
Cia kuv hais txog ib zaj los ntawm kuv lub neej: Thaum kuv yog ib tug me nyuam, muaj ib hnub kuv pom kuv niam quaj thaum nws nyob nws ib leeg. Thaum kuv nug vim li cas nws quaj, nws maj mam hais tias, “Kuv xav kom koj ua ib tug tub zoo.” Txawm yog kuv paub tias kuv tsis yog tus uas ua rau nws ntxhov siab, kuv hlub thiab tso siab rau kuv niam tshaj txhua tus thiab kuv yeej xav pab kom nws lub neej tsis nyuaj me ntsis. Yog li ntawd, kuv los kua muag thiab muab siab npaum li ib tug uas muaj cuaj xyoo muab tau cog lus rau nws tias kuv yeej yuav siv zog ua ib tug tub zoo tshaj plaws thiab ua rau nws zoo siab.
Nej puas txawj xav tias lo lus cog tseg ntawd tau muaj—thiab tseem muaj—hwj chim npaum li cas rau kuv?
Lo lus cog tseg uas kuv hais rau nws yeej tau coj kuv lub neej. Ua ntej kuv txiav txim siab, kuv yuav xav seb tej yam kuv ua puas yuav ua rau nws zoo siab. Txoj kev cog lus no thiab kev sib raug zoo nrog kuv niam yeej yog tej yam ruaj nrees rau kuv txoj kev coj li cas tas kuv lub neej.
Ntau xyoo tom qab ntawd, thaum kuv paub Yexus Khetos zoo dua, kuv twb paub tias yuav tsum ua li cas kom muab siab rau ntseeg Nws. Kuv tau nrog tus Tswv khi lus, thiab thaum kuv sim ua raws li kuv tej kev khi lus, Nws tau zam txim rau kuv tej kev txhaum, coj kuv lub neej, thiab “pub nws txoj kev hlub rau kuv puv npo” kom kawg kuv lub siab lub ntsws. Yexus Khetos ua rau kuv muaj ib lub siab uas hlub Nws, saib taus Nws, thiab xav ua ncaj rau Nws.
Nej puas to taub vim li cas “kev ntseeg yog ib lub ntsiab cai ntawm kev muaj peev xwm” thiab vim li cas “tus uas tsis ntseeg yeej ua tsis tau haum Vajtswv siab”?
Thaum nej sim ua tej yam uas ua haum Nws lub siab, ces nej yuav hais li Yauxej hauv Iyiv teb thaum Pautifas tus poj niam sim ntxias nws hais tias, “Yog li ntawd kuv yuav ua li cas [ua tau txoj kev phem loj no], thiab ua txhaum rau Vajtswv?” Thiab thaum nej raug kev tawm tsam, nej yuav hais li tus yaj saub hluas Joseph hais tias, “Kuv twb paub, thiab kuv paub hais tias Vajtswv twb paub, thiab kuv xyeej tsis tau … kuv paub hais tias yog kuv xyeej ces kuv yuav txhaum Vajtswv, thiab yuav raug txim.”
Yog li ntawd kev ntseeg Yexus Khetos yog ib txoj kev tso siab rau Nws uas los ntawm kev ua ncaj thiab kev hlub. Los yog hais tias, vim peb ris Vajtswv txiaj rau Nws txoj kev hlub tshua (hesed), peb qhia tias peb yuav ua ncaj hlub Nws (emunah) thaum peb ua raws li Nws cov lus txib.
Yexus Khetos cog lus tias, “Tus uas lees yuav kuv tej lus qhia thiab ua raws li tej lus ntawd … kuv Txiv yuav hlub tus ntawd; kuv yuav hlub tus ntawd thiab qhia kuv rau nws paub.” Yog tias nej cog lus tias nej yuav ua ncaj rau Nws, Nws yuav qhia nej txog Nws txoj kev hlub rau nej.
Kev Ntseeg Thaum Raug tej Yam Nyuaj
Tiam sis nej yuav tsum teb li cas thaum raug xwm txheej phem nej thiaj li yuav tsum txais Nws tej txuj ci tseem ceeb? Txawm nej yeej yuav raug tej teeb meem uas ua rau nej ntshai, cia li tsis ntshai mus tom ntej rau Nws, ib yam li rooj sab laj 2025 FSY lub ntsiab lus hais tias: “Ntsia ntsoov kuv nrog txhua txoj kev xav; tsis txhob ua xyem xyav, tsis txhob ntshai.”
Yog Li Cas Nej Thiaj Yuav Tsis Ntshai Taug Kev Mus rau Nws?
Cia li xav seb zoo li yog nej yog ib tug uas mus rau qhov chaw tshiab uas tsis muaj daim qhia kev. Yog nej yuav kov yeej tej teeb meem nyob tom ntej, nej yuav tsum muaj ib lub teeb. Nej txoj kev rau siab ntseeg Vajtswv thiab nej tej lus thov Nws tas zog yog roj rau nej lub teeb. Yog li ntawd thaum nej nyob hauv kev tsaus ntuj thiab raug xwm txheej txaus ntshai, nej tsis tas mus tom ntej zoo li neeg dig muag, tiam sis nej yuav taws teeb uas muaj cov roj ntawm kev ntseeg Yexus Khetos kom ci ntsa iab li kev cia siab rau ib txoj kev uas nej tsis paub. Tej yam uas nej kawm yav tas los yuav ua rau nej cia siab rau tus Tswv thiab yuav txhawb nqa nej thaum nej ua neej.
Nej Yuav Mus Deb Li Cas Thaum Muaj Kev Cia Siab thiab Kev Ntseeg Yexus Khetos?
Nej puas nco qab kuv zaj dab neeg txog qhov chaw ua luam dej? Thaum lub sij hawm uas kuv poob siab, qhov txuj ci tseem ceeb twb los raws li kuv xav tau, tiam sis Vajtswv tsis hais tias yeej yuav muaj raws li peb lub siab nyiam. Peb yuav tsum muab siab rau ntseeg Yexus Khetos thiab cia siab rau Nws cov koob hmoov, raws li Nws xaiv xa tuaj rau peb. “Tos ntsoov tej txuj ci tseem ceeb,” tiam sis “cia Vajtswv yeej hauv peb lub neej.”
Vajtswv tej Lus Cog Tseg rau Nws Haiv Neeg uas Rau Siab Ntseeg
Kuv cov phooj ywg hluas, peb hlub thiab tso siab rau nej! Nej yeej koom siab rau Vajtswv tsev neeg thiab yog cov me nyuam ntawm txoj kev khi lus. Cia li ntseeg thiab tso siab rau Yexus Khetos. Nws yuav ua kom nej muaj peev xwm hloov los ua Nws cov thwj tim tiag.
Kuv caw nej kom pib hnub no thiaj li txhawb nqa nej txoj kev nrog Yexus Khetos sib raug zoo. Cia li cog lus tias nej yeej yuav tsis tso Nws tseg.
Nej txoj kev cia siab, kev hlub, thiab kev tso siab rau Yexus Khetos yuav hloov nej tus cwj pwm thiab lub siab kom muaj raws li Nws lub siab. Nej yuav ua siab loj thiab muaj zog kov yeej Dab Ntxwg Nyoog tej kev tawm tsam. Thaum nej ua yuam kev, nej yuav xav txais tau Nws txoj kev zam txim. Thaum kawg, nej yuav cia siab txog yav tom ntej. Nws yuav ntseeg nej thiab muab Nws lub hwj chim rau nej ua txhua yam uas Nws xav kom nej ua, tsis hais lub hwj chim kom rov qab mus hauv Nws lub xub ntiag.
Kuv ua tim khawv rau nej tias kev xyiv fab yeej los ntawm kev hu “zaj nkauj txog txoj kev hlub uas txhiv dim” thiab qhov uas muaj Nws “ob txhais npab ntawm nws txoj kev hlub [muab peb] puag khawm mus ib txhis li.” Los ntawm Yexus Khetos lub npe dawb ceev, amees.