Kev Xyiv Fab Los ntawm Kev Khi Lus Ua Thwj Tim

Muaj ib hnub nyob rau xyoo 2023, Uyanga Altansukh ua hauj lwm hauv lub nroog Darkhan hauv lub teb chaws Mongolia sab qaum teb thaum qhov chaw tshaj tawm txoj moo zoo Mongolia tus thawj tswj hwm tau nkag hauv nws qhov chaw ua hauj lwm. Nws hais tias:

“Kuv pom nws es kuv xav tias nws lub ntsej muag ci ntsa iab. Nws ua siab zoo thiab tso luag rau txhua tus nyob ib puag ncig, thiab ua rau kuv kaj siab. Ua ntej nws mus, kuv nug nws ob peb yam. Ob peb hnub tom qab ntawd, nws rov qab tuaj rau kuv qhov chaw ua hauj lwm thiab kuv nug nws seb puas kam kuv mus rau nws lub koom txoos. Kuv xav tias yuav pab kuv. Kuv txhawj txog kuv cov me nyuam, vim zoo li txhua leej txhua tus muaj kev nyuaj siab txhawj xeeb thiab nyob hauv kev tsaus ntuj. Kuv xav kom kuv cov me nyuam ua neeg zoo li tus txiv neej no uas muaj ntsej muag ci ntsa iab, thiab ua rau lwm tus nyob ib puag ncig muaj kev xyiv fab.

“Muaj ib hnub cov tub txib qhia peb txog txoj kev cai them ib feem kaum. Kuv cov me nyuam zoo siab hais tias, ‘Niam, peb yuav tsum them ib feem kaum os.’ Kuv twb pom kuv cov me nyuam txoj kev ntseeg thaum ntawd. Ua ntej kuv koom lub Koom Txoos, kuv saib lub tuam rooj sab laj thiab mloog Thawj Tswj Hwm Russell M. Nelson hais lus. Nws tshaj tawm cov tuam tsev tshiab nyob thoob plaws lub ntiaj teb thiab hais tias yuav ua ib lub tuam tsev hauv Ulaanbaatar, Mongolia. Kuv zoo siab kawg thiab los kua muag, txawm yog kuv tsis to taub vim li cas los. Vim muaj kev zoo siab no, kuv thiaj paub tias kuv txoj kev ntseeg thiab zaj lus tim khawv loj tuaj.”

Uyanga, ib yam li neeg coob, yog ib tug uas tau koom ua ke nrog Ixayees kom npaj rau Yexus Khetos txoj Kev Los Zaum Ob. Nws twb pib taug txoj kev ua raws li nws tej kev khi lus lawm thiab tau los ua Khetos ib tug thwj tim. Qhov uas yus yog Yexus Khetos tus thwj tim txhais li cas? Kuv nyiam lus Nyijpooj txoj kev txhais lo lus thwj tim—deshi—de uas txhais tias tus kwv, thiab shi uas txhais tias me nyuam.

Yexus Khetos tau tshaj tawm tias, “Twb muaj kuv nyob thaum chiv keeb nrog Leej Txiv, thiab twb yog tus Tub Hlob.” Vim Nws yog leej twg, thiab Nws tau ua dab tsi, peb pe hawm Nws, teev tiam Nws, qhuas Nws, thiab peb coj raws li Nws. Yexus Khetos tau txhiv peb dim, thiab peb yeej ris Nws txiaj rau Nws txoj kev txi theej txhoj uas kav mus ib txhis li.

Peb muaj ib Leej Txiv Saum Ntuj Ceeb Tsheej uas hlub peb vim peb yog Nws cov me nyuam. Nws txoj kev hlub yeej zoo tag nrho. Yexus Khetos thiab Nws ntiag tug hauj lwm qhia txog Vajtswv txoj kev hlub rau peb. Ib yam li Yauhas sau hais tias, “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”

Thaum peb sim to taub txog tej yam uas peb tsis paub, tej lub sij hawm peb tso siab rau tej yam uas peb tau kawm hauv lub ntiaj teb, los yog tej yam uas peb yeej paub lawm. Piv txwv hais tias, peb kawm tau me ntsis txog Vajtswv tus uas yog Leej Txiv dhau los ntawm peb txoj kev ua leej niam los leej txiv thiab peb tsev neeg hauv lub ntiaj teb no. Tiam sis, peb yuav tsum ceev faj kom txhob siv txhua yam ntawm tej yam no thaum peb xav to taub peb Leej Txiv Saum Ntuj Ceeb Tsheej. Vajtswv tus uas yog Leej Txiv muaj tej cwj pwm uas zoo tshaj ib tug neeg tseem tsis zoo tag nrho uas tau poob lawm. Vajtswv yog Leej Txiv uas zoo tag nrho. Nws txoj kev hlub, kev ua siab zoo, ua siab ntev, thiab kev to taub tag nrho, thiab Nws muaj yeeb koob zoo tag nrho. Peb tso siab rau Nws kawg siab kawg ntsws los tau. Yexus Khetos txoj kev hlub yeej zoo ib yam li Vajtswv txoj kev hlub thiab yog tus uas qhia txog txoj kev hlub ntawd.

Yexus Khetos yog tus uas coj yam ntxwv thiab yog txoj kev. Dhau los ntawm Khetos, peb yuav to taub zoo duab txog Leej Txiv tej cwj pwm zoo tag nrho thiab Nws txoj hau kev. Dhau los ntawm Khetos, peb txais tau lub hwj chim kom kov yeej tej yam uas tib neeg ib txwm xav tau kom peb thiaj li yuav hloov los ua neeg zoo li Leej Txiv ntxiv.

Ib yam li peb Leej Txiv Saum Ntuj Ceeb Tsheej, Yexus Khetos muaj kev hlub tshua thiab Nws ncaj ncees. Ob qho cwj pwm uas yog kev txim lij thiab kev hlub tshua tsis yog tej yam fab ntxeev. Ob qho no yeej koom ua ke. Kev txim lij thiab kev hlub tshua ob yam huv tib si qhia peb tias Vajtswv hlub Nws cov me nyuam zoo tag nrho. Peb tso siab rau Vajtswv thiab Yexus Khetos tau vim Nkawd ua ncaj rau peb txhua tus.

Vajtswv tus uas yog Leej Txiv thiab Nws Leej Tub Yexus Khetos yeej koom siab muaj ib lub hom phiaj thiab ib txoj kev hlub. Vim Vajtswv thiab Yexus Khetos hlub peb, peb muaj cib fim ua cov thwj tim tseeb uas nrog Nkawd khi lus. Thaum peb ua li ntawd, peb haj yam nrog Yexus Khetos sib raug zoo: “Thiab nim no, vim yog kev khi lus uas nej tau khi ces yuav muab nej hu ua Khetos cov me nyuam, nws cov tub, thiab nws cov ntxhais; vim saib seb, hnub no nws los ua nej leej txiv ntawm sab ntsuj plig; vim nej hais tias nej lub siab tau hloov los ntawm kev ntseeg nws lub npe; yog li ntawd, nej thiaj yug los ntawm nws thiab tau peem tsheej los ua nws cov tub thiab nws cov ntxhais.”

Vim peb yog cov thwj tim, thaum peb khi lus thiab ua raws li tej kev khi lus dawb ceev ntawd, peb tau koob hmoov txais lub hwj chim ntawm sab ntsuj plig. Peb koom ua ke nrog Yexus Khetos thiab Vajtswv tus uas yog Leej Txiv muaj kev sib raug zoo tshwj xeeb li thiab txais tau Nkawd txoj kev hlub thiab txoj kev xyiv fab uas tsuas pub rau cov uas tau ua raws li lawv tej kev khi lus. Peb txoj kev txawj paub txog Vajtswv txoj kev hlub puv npo, los yog muaj lub siab hlub ib yam li Nws, yeej nyob ntawm seb peb puas xav thiab ua tej yam ncaj ncees.

Nyob hauv Yauhas, tshooj 15, nqe 9, peb nyeem hais tias, “Kuv hlub nej ib yam li kuv Txiv hlub kuv.” Ces tom qab ntawd Nws caw peb: “Nej yuav tsum muaj lub siab hlub ib yam li kuv.”

Nyob hauv nqe tom qab ntawd, Nws qhia peb kom paub muaj lub siab hlub ib yam li Nws: “Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws.”

Ces peb kawm tias yog vim li cas peb ua raws li cov lus txib nyob hauv nqe 11: “Kuv hais tej no rau nej kom nej zoo siab ib yam li kuv zoo siab, thiab nej yuav zoo siab kawg nkaus li.”

Dhau los ntawm peb txoj kev khi lus ua Nws cov thwj tim, peb thiaj to taub zoo dua hais tias Vajtswv zoo li cas thiab txoj kev xyiv fab uas Nws xav kom Nws cov me nyuam tag nrho muaj. Peb kuj pib to taub tej lub ntsiab cai uas ua rau peb ua xyem xyav thaum xub thawj. Piv txwv hais tias, vim li cas Vajtswv yuav muaj kev xyiv fab puv npo thaum ib txhia ntawm Nws cov me nyuam raug txom nyem heev? Lo lus teb yeej nyob ntawm Vajtswv lub zeem muag zoo tag nrho thiab Nws txoj hau kev zoo tag nrho. Nws txawj pom txij thaum chiv keeb mus txog yav tom ntej Nws thiaj paub tias peb muaj peev xwm ua neeg zoo li cas. Nws tau npaj ib txoj hau kev, dhau los ntawm Nws Leej Tub Yexus Khetos, rau peb txhua tus uas yog Nws cov me nyuam, kom kov yeej kev mob, kev txom nyem, kev txhaum, kev muaj txim, thiab kev kho siab ntawm lub ntiaj teb no. Vajtswv tau npaj ib txoj hau kev rau peb thiab cia peb xaiv.

Cov neeg uas coj yam ntxwv txog kev muaj kev zoo siab vim lawv ua cov thwj tim los tej zaum yuav pab peb to taub lub ntsiab no. Tej zaum nej tau hnov hais tias peb tsuas zoo siab npaum li tus me nyuam uas tu siab tshaj. Kuv xav tias tsis tas zoo li no. Kuv niam uas muaj 94 xyoos muaj 200 tus xeeb leej xeeb ntxwv uas tseem muaj txoj sia nyob. Txhua lub sij hawm, ntshe ib tug los ntawm 200 tus xeeb ntxwv ntawd yuav tsis zoo siab. Yog tias qhov no muaj tseeb, ntshe kuv niam yuav tsis zoo siab tas li, es nws yeej tsis yog li ntawd. Cov uas paub nws paub tias nws zoo siab npaum li cas.

Nim no kuv xav hais ib zaj lus ntxiv. Thaum lub Ib Hlis Ntuj xyoo 2019, kuv tus poj niam thiab kuv wb yuav mus rau Thawj Tswj Hwm Nelson hoob kas. Nws tau tso nws lub rooj zaum ze ze rau wb, thiab wb hauv caug yuav luag kov nws li. Tom qab nws hu kuv ua txoj hauj lwm no, Thawj Tswj Hwm Nelson tau tig mus rau Debbie thiab tsom ntsoov rau nws. Thawj Tswj Hwm Nelson yeej ua siab zoo, muaj siab mos, muaj kev hlub tshua, thiab zoo siab heev, ib yam li ib leej txiv los sis yawg uas zoo tag nrho. Nws tuav Debbie txhais tes thiab muab plhws, nplij nws lub siab tias txhua yam yuav zoo thiab wb tsev neeg yuav tau koob hmoov. Ua rau wb xav tias thaum lub sij hawm ntawd wb yog ob tug tseem ceeb tshaj rau nws thiab nws muaj sij hawm ntau kawg li nrog wb tham. Wb tau tawm nws hoob kas mus thaum hnub Friday tav su ntawd ua rau wb txais kev nplij siab, muaj kev hlub, thiab kev zoo siab.

Ces Hnub Monday wb tau nyeem xov xwm. Tib hnub uas Thawj Tswj Hwm Nelson nrog wb tham, nws ib tug ntxhais tau tas sim neej vim nws mob kheesxawj. Ua rau wb xav tsis thoob Wb yeej pab nws thiab nws tsev neeg tu siab. Wb lub siab kuj ris nws txiaj vim nws ua zoo li Yexus Khetos tsom ntsoov rau wb txawm yog nws nyuaj siab rau nws tus ntxhais uas raug mob li ntawd.

Thaum wb xav txog qhov no, wb nug wb tus kheej, “Nws yuav ua li cas kom ua siab zoo, muaj txoj kev hlub, thiab zoo siab thaum raug xwm txheej nyuaj npaum li ntawd?” Lus teb yog vim nws paub. Nws paub tias Yexus Khetos tau kov yeej lawm. Nws paub tias nws yuav nrog nws tus ntxhais nyob thiab yuav siv tas mus ib txhis nrog nws. Kev xyiv fab thiab kev txawj pom mus ib txhis li yeej los ntawm kev koom siab nrog tus Cawm Seej thaum peb ua raws li peb tej kev khi lus thiab ua Yexus Khetos cov thwj tim.

Thawj Tswj Hwm Nelson tau qhia tias: “Ib yam li tus Cawm Seej muab kev kaj siab lug uas ‘tsis muaj leej twg to taub,’ [Filipis 4:7], Nws kuj muab kev xyiv fab loj kawg nkaus uas tsis muaj leej twg hauv lub ntiaj teb yuav to taub hlo li. Piv txwv hais tias, yus yeej tsis xav tias yus yuav muaj kev xyiv fab thaum yus tus me nyuam muaj mob uas kho tsis taus, los yog thaum yus poob hauj lwm, los yog thaum yus tus khub ntxeev siab rau yus. Tiam sis tus Cawm Seej muab txoj kev xyiv fab rau yus.”

Thaum peb ua raws li peb tej kev khi lus, peb yuav muaj siab xav pab lwm tus muaj kev xyiv fab thiab kev hlub uas peb muaj hauv peb lub siab vim peb nrog Vajtswv khi lus. Peb pab tau ua lub hom phiaj tseem ceeb tshaj plaws hauv lub ntiaj teb niaj hnub no—uas yog kev muab Ixayees sau los ua ke. Pab pab tau kom coj Vajtswv cov me nyuam los cuag Yexus Khetos. Ib yam li tus yaj saub Yakhauj qhia, “Thiab nej tau koob hmoov; vim rau qhov nej rau siab ua hauj lwm nrog kuv nyob hauv kuv lub vaj txiv ntoo roj, thiab tau ua raws li kuv tej lus txib, thiab coj tau cov txiv nyeg rov los rau kuv, ua rau kuv lub vaj txiv ntoo roj tsis lwj ntxiv lawm, thiab muab cov phem pov tseg, saib seb nej yuav tau kev xyiv fab nrog kuv vim yog cov txiv ntawm kuv lub vaj txiv ntoo roj.”

Thaum peb cog lus tias peb yuav ua raws li peb tej kev khi lus ua Nws cov thwj tim, tsis hais peb muaj peev xwm npaum li cas, ces peb haj yam nrog Leej Txiv thiab Leej Tub sib raug zoo, peb txoj kev xyiv fab yuav loj tuaj, thiab peb txoj kev pom kev yuav dav zog mus ib txhis li. Ces peb txais vaj txiaj ntsim muaj hwj chim thiab yuav muaj kev xyiv fab uas Vajtswv tau npaj rau cov thwj tim tseeb uas nrog Nws khi lus. Los ntawm Yexus Khetos lub npe dawb ceev, amees.