“Sawv Daws Thiaj Yuav Paub Hais tias Nej Yog Kuv cov Thwj Tim”
Peb txoj kev hlub Vajtswv thiab Nws cov me nyuam yog ib zaj lus tim khawv rau lub ntiaj teb hais tias nov yog tus Cawm Seej lub Koom Txoos tiag tiag.
Ntau xyoo tas los Muam Uchtdorf thiab kuv wb ncig teb chaws Yelemes sab qab teb. Yog lub caij ua ntej Easter, thiab wb tau caw ib tug phooj ywg zoo, uas tsis yog ib tug mej zeej ntawm lub Koom Txoos, koom nrog wb mus rau Hnub Caiv kev sib ntsib teev ntuj. Wb hlub tus phooj ywg zoo no, yog li ntawd yooj yim rau wb qhia nws tias wb xav li cas txog tus Cawm Seej thiab Nws lub Koom Txoos es wb thiaj li caw nws tuaj saib! Nws txaus siab tuaj thiab tau koom wb sib ntsib hauv ib ceg ntseeg nyob ze.
Yog tias nej tau coj ib tug phooj ywg zoo rau lub koom txoos thawj zaug, tej zaum nej paub tias kuv xav li cas thaum Hnub Caiv sawv ntxov ntawd. Kuv xav kom txhua yam yuav zoo tag nrho. Wb tus phooj ywg yog ib tug neeg uas kawm txawj kawm ntse thiab kuj xav txog tej yam ntawm sab ntsuj plig thiab. Kuv cia siab hais tias tej kev sib ntsib hauv ceg ntseeg no yuav tshoov nws lub siab thiab cov neeg haud yuav ua cov sawv cev zoo rau lub Koom Txoos.
Ceg ntseeg ntawd twb sib ntsib hauv tej chav uas lawv muab ntiav nyob theem ob ntawm ib lub khw muag khoom noj. Kom mus haud, peb yuav tsum nce ntaiv ntawm lub tsev sab nram qab, thiaj li hnov tsw ntawm cov khoom noj nyob ntawd.
Thaum pib ua kev sib ntsib txais lub cim nco txog, kuv xav paub seb kuv tus phooj ywg xav li cas vim yog thawj zaug nws tuaj no, kuv thiaj li pom tej yam uas ua rau kuv txaj muag me ntsis. Piv xam hais tias, peb txoj kev hu nkauj yeej tsis zoo li lub Tsev Kheej Pawg Hu Nkauj. Thaum txais lub cim nco txog twb hnov cov me nyuam uas nyob tsis tus hais lus nrov. Cov neeg hais lus twb ua zoo npaum li lawv hais tau, tiam sis lawv tsis muaj txuj ci qhia tab meeg sawv daws. Kuv twb txaj muag tas kev sib ntsib ntawd, es kuv cia siab tias tej zaum Hnub Caiv Kev Kawm Vaj Lug Kub yuav zoo dua.
Yeej tsis yog li ntawd.
Tas lub sij hawm ntawd kuv txhawj hais tias wb tus phooj ywg xav li cas txog lub koom txoos uas wb tau coj nws los saib.
Tom qab ntawd, thaum peb tsav tsheb mus tsev, kuv tig mus nrog wb tus phooj ywg tham. Kuv xav piav tias nov yog ib ceg ntseeg me me thiab lub Koom Txoos tag nrho tsis zoo li ceg ntseeg ntawd. Tiam sis ua ntej kuv hais tau ib lo lus, nws cia li hais lus.
Nws hais tias, “Zoo kawg.”
Kuv tsis tau paub yuav hais li cas.
Nws hais ntxiv tias, “Qhov uas ib leeg ua zoo rau ib leeg nyob hauv neb lub koom txoos tshoov kuv lub siab. Zoo li lawv nyias muaj nyias caj ceg, tiam sis pom meej hais tias lawv ib leeg hlub ib leeg. Kuv yeej xav tias Yexus Khetos xav kom Nws lub Koom Txoos yuav zoo li no.”
Es kuv twb hloov siab lees txim txog kuv txoj kev rau txim rau lwm tus. Kuv twb xav kom txhua yam hauv kev sib ntsib yuav zoo tag nrho kom kuv tus phooj ywg yuav xav zoo txog peb. Tiam sis cov mej zeej hauv ceg ntseeg no sib hlub, ua siab zoo, ua siab ntev, thiab muaj kev khuv leej zoo tag nrho.
Xwv Kom txoj Kev Ntseeg Yuav Loj Hlob Tuaj Nyob rau hauv lub Ntiaj Teb
Kuv cov kwv tij thiab cov muam, kuv cov phooj ywg zoo, kuv nyiam Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Yeej yog tus Cawm Seej thiab lub Koom Txoos uas muaj sia nyob, thiab lub koom txoos no qhia txog Yexus Khetos txoj moo zoo uas tau muab txum tim rov qab los. Nws lub hwj chim thiab txoj cai pov thawj hwj nyob no. Yexus Khetos coj lub Koom Txoos no Nws tus kheej, dhau los ntawm cov tub qhe uas Nws tau hu thiab tso cai rau, thiab dhau los ntawm ib tug yaj saub niaj hnub no, uas yog Thawj Tswj Hwm Russell M. Nelson. Tus Cawm Seej tau muab ntiag tug hauj lwm rau Tsoom Haiv Neeg Ntseeg hauv Hnub Nyoog Kawg kom muab Vajtswv cov me nyuam sau los ua ke thiab npaj lub ntiaj teb rau tus Cawm Seej txoj Kev Los Zaum Ob. Kuv ua tim khawv tias tag nrho tej yam no muaj tseeb.
Tiam sis kuj yuav tsum nco ntsoov tias thawj zaug uas tib neeg ntsib cov neeg hauv Yexus Khetos lub Koom Txoos, lawv tsis xav txog txoj cai pov thawj hwj los sis cov kab ke los sis kev muab Ixayees sau los ua ke. Qhov lawv saib rau nqi tshaj txhua yam yog qhov uas lawv xav li cas thaum lawv nrog peb nyob thiab peb ib leeg ua li cas rau ib leeg.
Yexus hais tias, “Nej ib leeg yuav tsum hlub ib leeg. Sawv daws thiaj yuav paub hais tias nej yog kuv cov thwj tim.” Feem ntau, ib tug neeg thawj zaj lus tim khawv txog Yexus Khetos los thaum nws paub tias Yexus Khetos cov thwj tim hlub nws.
Tus Cawm Seej tshaj tawm tias Nws tau muab Nws lub Koom Txoos txum tim rov qab los “xwv kom txoj kev ntseeg yuav loj hlob tuaj nyob rau hauv lub ntiaj teb.” Yog li ntawd, thaum tib neeg tuaj koom peb tej kev sib ntsib hauv lub Koom Txoos, tus Cawm Seej xav kom txoj kev ntseeg Nws yuav loj hlob tuaj! Yog peb cov phooj ywg paub tias peb hlub lawv ces yuav txhawb nqa lawv kom nyob ze Yexus Khetos! Nov yog peb lub hom phiaj txhua zaus peb koom ua ke.
Txhua tus ua xav ntseeg Yexus Khetos ntxiv los sis xav muab siab npuab Leej Txiv Saum Ntuj Ceeb Tsheej ntxiv yeej yuav nrog cov neeg hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg sib haum xeeb. Qhov uas peb caw lawv rau peb tej kev sib ntsib yeej yooj yim npaum li peb caw lawv los rau hauv peb lub tsev.
Lub Hom Phiaj thiab Qhov Muaj Tiag
Kuv paub tias kuv piav txog lub hom phiaj xwb. Thiab nyob rau hauv lub ntiaj teb no, peb muaj raws li lub hom phiaj no tsawg tsawg xwb. Thiab “mus txog hnub zoo tag nrho,” ntshe lub hom phiaj thiab qhov muaj tiag tiag yeej yuav tsis zoo ib yam. Yog li ntawd peb yuav tsum ua li cas thaum peb xav tias lub Koom Txoos tsis zoo li ib qho chaw zoo tag nrho? Thaum peb xav tias peb pawg ntseeg tsis zoo liib qho chaw zoo tag nrho uas txhawb kev ntseeg thiab kev hlub? Los sis thaum peb xav tias peb tsis sib haum nrog lwm tus?
Ib yam uas peb yuav tsum tsis txhob ua yog tso lub hom phiaj pov tseg!
Phab ntawv qhia lub npe ntawm Phau Ntawv Maumoos muaj tej lus ceeb toom no hais tias: “Yog muaj tej qho tsis yog tej ntawd tsuas yog neeg tej kev yuam kev xwb; yog li ntawd, tsis txhob thuam tej yam uas los ntawm Vajtswv.”
Ib phau ntawv—los sis ib lub tsev koom txoos los sis ib tug neeg—muaj puas tau tej yam uas “yuam kev” los sis tej yam “tsis yog” es tseem yog Vajtswv txoj hauj lwm los?
Kuv teb hais tias yog mas!
Yog li ntawd, txawm peb sim ua raws li tus Tswv tej kev cai uas siab heev, peb kuj yuav tsum ua siab ntev rau lwm tus. Peb txhua tus tsis yog neeg zoo tag nrho, thiab peb txhua tus cia siab rau tus Cawm Seej kom peb ua zoo dua. Qhov no muaj tseeb rau peb txhua leej txhua tus, thiab qhov no muaj tseeb rau Vajtswv lub nceeg vaj hauv lub ntiaj teb thiab.
Tsis yog tus Tswv caw peb koom Nws lub nceeg vaj xwb tiam sis Nws kuj caw peb rau siab txhawb nqa lub nceeg vaj kom loj dua thiab. Vajtswv xav kom muaj ib haiv neeg uas “koom siab koom ntsws.” Yog peb yuav koom ib lub siab, peb yuav tsum muaj lub siab dawb huv, peb thiaj li yuav tsum hloov siab loj heev.
Tiam sis qhov no tsis txhais tias kuv hloov kuv lub siab kom ua raws li nej lub siab nyiam. Thiab nej tsis tas hloov nej lub siab kom ua raws li kuv lub siab nyiam. Qhov no txhais tias peb txhua tus hloov peb lub siab kom ua raws li tus Cawm Seej lub siab nyiam.
Yog peb tsis tau hloov siab tag nrho, cia li nco ntsoov tias, yog muaj tus Tswv txoj kev pab, nej yeej ua taus txhua yam.
Kev Sib Haum thiab Kev Koom Ua Ke
Thiab yog nej twb xav tias nej tsis tshua sib haum nrog lwm tus, thov kom nej paub tias tsis yog nej xav li ntawd xwb. Peb txhua tus tau raug tej xwm txheej thaum peb xav tias peb yog tus qhua nyob hauv ib qho chaw tshiab puas yog? Kuv twb muaj tej lub sij hawm zoo li no ntau zaus. Thaum kuv muaj 11 xyoos, kuv tsev neeg raug yuam tsiv tsev rau ib qho chaw uas peb tsis paub. Txhua yam txawv ntawm tej yam uas kuv paub. Thiab kuv hais lus sis uas ua rau lwm tus me nyuam paub tias kuv yeej txawv cov neeg uas lawv ib txwm paub. Thaum lub sij hawm uas kuv xav tau phooj ywg thiab koom siab nrog lwm tus, kuv kho siab thiab xav tias kuv tsis ua haum lawv siab.
Nyob hauv lub ntiaj teb no, tej yam txawv uas peb pom tau—tej yam txawv uas lwm tus siv kom muab neeg faib ua pab ua pawg—nyob ntawm tej yam ntawm sab cev nqaij daim tawv: yus lub cev, haiv neeg, yus yam lus, ris tsho, kab lig kev cai, thiab li ntawd. Tiam sis Vajtswv “tsis saib neeg li noob neej saib. Neeg saib lub cev ntaj ntsug, tiam sis tus Tswv saib neeg lub siab.”
Raws li Nws xav, muaj ib txoj kev xav txog neeg uas tseem ceeb tshaj: qhov uas peb yog Vajtswv cov me nyuam. Thiab peb txhua tus yeej nyob tau hauv pawg no.
Peb yeej xav koom nrog cov neeg uas muaj yam ntxwv, hais lus, ua tej yam, thiab xav zoo li peb. Yeej muaj sij hawm ua li ntawd.
Tiam sis nyob hauv tus Cawm Seej lub Koom Txoos, peb muab tag nrho Vajtswv cov me nyuam sau los ua ke uas txaus siab sau los thiab nrhiav qhov tseeb. Tsis yog peb sab cev nqaij daim tawv zoo li cas, tej kev xav txog tseem fwv, kab lig kev cai, los sis yog yam neeg twg uas ua rau peb koom ua ke. Tsis yog qhov uas peb muaj caj ceg zoo ib yam uas ua rau peb koom siab. Yeej yog qhov uas peb muaj tib lub hom phiaj, peb txoj kev hlub Vajtswv thiab kev hlub neeg zej zog, peb txoj kev cog lus rau Yexus Khetos thiab Nws txoj moo zoo. Peb “koom ib lub siab rau ntawm Khetos.”
Kev koom siab uas peb nrhiav tsis yog kom txhua tus sawv hauv tib lub qhov chaw; tiam sis yog kom txhua tus tig mus rau tib qho chaw—tig mus ntsia Yexus Khetos. Peb koom ib lub siab, tsis yog vim peb tuaj tib qhov chaw tuaj tiam sis yog vim peb xav xav mus rau tib qhov chaw, tsis yog vim peb yog leej twg tiam sis yog vim peb xav ua neeg zoo li cas.
Yexus Khetos lub Koom Txoos tseeb yeej muaj lub hom phiaj ua li no.
Ib lub Cev
Yog nej hlub Vajtswv, yog nej xav paub Nws zoo dua thaum nej coj raws li Nws Leej Tub, ces nej nyob qhov chaw yog lawm. Yog nej rau siab sim ua raws li tus Cawm Seej tej lus txib—txawm yog nej tsis zoo tag nrho los—ces nej yeej yuav sib haum koom nrog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Thiab yog nej txawv ntawm tib neeg nyob ib puag ncig nej nev? Ua li ntawd tsis txhais tias nej tsis sib haum—nej tseem yog ib feem ntawm Yexus Khetos lub cev. Yeej xav tau txhua tus nyob hauv Yexus Khetos lub cev. Pob ntseg txawj hnov tej yam uas qhov muag tsis pom. Txhais ko taw ua tej yam uas txhais tes ua tsis taus.
Qhov no tsis txhais tias nej txoj hauj lwm yog kom txhua tus hloov los ua neeg zoo li nej. Tab sis qhov no txhais tias tej yam nej muaj peev xwm ua tseem ceeb heev—thiab muaj ib yam dab tsi tseem ceeb rau nej kawm!
Ib lub Suab
Txhua tuas rooj sab laj, peb tau koob hmoov mloog cov nkauj los ntawm tej pawg hu nkauj uas muaj txuj ci heev. Thaum nej mloog, tej zaum nej yuav mloog hais tias cov uas hu nkauj tsis hu tib lub suab. Tej thaum ib feem ntawm pawg huv nkauj seev lub suab nkauj, lwm lub sij hawm muaj lwm cov hu lub suab nkauj. Tiam sis lawv sawv daws koom ua ke kom ua suab zoo nkauj, thiab lawv koom siab koom ntsws tag nrho. Txhua tus hauv pawg hu nkauj muaj tib lub hom phiaj: qhuas Vajtswv thiab txhawb peb lub siab kom xav txog Nws. Txhua tus yuav tsum muab siab rau tib lub hom phiaj ntawd. Thiab thaum lawv ua li ntawd ces zoo li lawv hu ib lub suab nkauj xwb.
Yog tias nej tseem tsis yog mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb caw nej koom nrog peb thaum peb zoo siab hu tus Cawm Seej “zaj nkauj txoj kev hlub uas txhiv dim.” Peb xav tau nej. Peb hlub nej. Lub Koom Txoos yuav zoo dua yog nej los siv zog ua hauj lwm rau tus Tswv thiab Nws cov me nyuam.
Yog tias nej twb qhia dhau los ntawm kev cai raus dej, dhau los ntawm kev khi lus nrog Vajtswv, hais tias nej xav “los rau hauv Vajtswv pab yaj, thiab los ua nws cov neeg,” ua nej tsaug vim nej koom tes pab ua txoj hauj lwm tseem ceeb no thiab pab kom Yexus Khetos lub Koom Txoos ua raws li tus Cawm Seej xav.
Ib yam li kuv kawm los ntawm kuv tus phooj ywg hauv Yelemes Teb, peb txoj kev hlub Vajtswv thiab Nws cov me nyuam yog ib zaj lus tim khawv rau lub ntiaj teb hais tias nov yog tus Cawm Seej lub Koom Txoos tiag.
Thov Vajtswv foom koob hmoov rau peb kom ua siab ntev thiab rau siab ua raws li peb tus Cawm Seej, tus Txhiv Dim, thiab tus Xib Hwb tej hom phiaj—yog li ntawd txhua tus yuav paub tias peb yog Nws cov thwj tim. Los ntawm Yexus Khetos lub npe dawb ceev, amees.