Tus Tswv Tab Tom Khiav Nws txoj Hauj Lwm Nrawm Nroos

Charles Dickens tau pib sau nws phau ntawv The Tale of Two Cities nrog cov lus no hais tias “yog lub caij nyoog zoo tshaj plaws, kuj yog lub caij nyoog phem tshaj plaws.” Qhov no muaj tseeb nyob hauv peb lub caij nyoog.

Peb nyob hauv ib lub caij nyoog uas muaj kev kub ntxhov thaum “tag nrho ntiaj teb … ntxhov hnyo.” Tag kis no Txwj Laug Gary E. Stevenson twb hais zoo txog Thawj Tswj Hwm Russell M. Nelson tej lus ntuas kom peb pab neeg sib haum xeeb rau cov uas coj raws li Yexus Khetos, kom pab ua rau neeg nyob sib haum xeeb los. Yeej yog ib feem ntawm kev pab neeg koom siab, muaj kev thaj yeeb, thiab kho tej yam mob nyob hauv “lub caij nyoog phem tshaj.”

Peb kuj nyob hauv “lub caij nyoog zoo tshaj,” es kuv yuav hais txog qhov no. Tus Tswv hais nyob hauv zaj lus piav txog phau Lus Qhuab Qhia thiab Kev Khi Lus, tshooj 1, hais tias, “yuav tshaj tawm txhij txhua ntawm … txoj moo zoo mus kom thoob ntiaj teb.” Tus Tswv yeej khiav Nws txoj hauj lwm nrawm nroos hauv peb lub caij nyoog. Peb yuav tsum ris Vajtswv txiaj heev vim Nws khiav Nws txoj hauj lwm nrawm nroos, uas muaj lawm thiab tab tom muaj txawm yog peb nyob hauv ib lub caij nyoog nyuaj heev. Peb nyob hauv ib lub caij nyoog thaum cov uas coj raws li tus Tswv tau koob hmoov kom hnov Nws lub suab thiab qhib peb lub siab lub ntsws mloog Nws lus. Cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, uas muab siab npuab tus Cawm Seej thiab ua raws li Nws cov lus txib, yeej muaj lub hom phiaj thiab nyob kaj siab lug.

Muaj tej lub sij hawm hauv lub Koom Txoos zaj keeb kwm, twb muaj cov neeg coob uas tau los khi lus thiab ua raws li tej kev khi lus ntawd. Muaj ib lub sij hawm nyob rau xyoo 1837 mus txog 1850. Cov Thwj Tim hauv tus Tswv lub Koom Txoos thaum ntawd tau ua tub txib nyob hauv United Kingdom. Vim lawv ua tub txib ces txhiab txhiab tus neeg tau koom lub Koom Txoos, ces nyob rau xyoo 1850 twb muaj lub Koom Txoos cov mej zeej coob nyob hauv United Kingdom coob dua li muaj nyob hauv Teb Chaws Amelikas. Thaum lub sij hawm ntawd, tus Tswv tau hais kom Haiv Neeg Ntseeg no sau los ua ke rau Utah. Neeg coob twb tsiv mus rau lwm lub teb chaws, ib txhia txais kev txhawb nqa los ntawm Pob Nyiaj rau Kev Pab Tsiv Mus rau Lwm lub Teb Chaws uas Tsis Paub Kawg.

Kuv nyiam ib zaj lus txog qhov uas ib co neeg hloov siab los ntseeg coob los ntawm Akiv Teb thiab Wales nyob rau xyoo 1852 tuaj txog lub Hav Salt Lake. Thawj Pawg Thawj Tswj Hwm tau ntsib pawg no nyob ntawm ncauj kev rau Kwj Ha Emigration, kuj muaj Thawj Tub Rog Pitt Pawg Qoj Nkauj. Ntawv xov xwm Deseret News piav tias lawv yog “ib pawg taug kev deb [tsis hais] cov poj niam thiab cov me nyuam, uas tshav ntuj kub lawv, thiab huab cua tawm tsam lawv, tiam sis lawv tsis nyuaj siab; lawv muaj kev zoo siab thiab kaj siab, uas peb pom tau ntawm lawv lub ntsej muag uas muaj kev xyiv fab.

Thaum lawv “hla Tshav Tuam Tsev, … twb muaj txhiab txhiab tus txiv neej, poj niam, thiab me nyuam, uas koom ua ke los ntawm txhua qhov txhia chaw hauv lub nroog tuaj kom koom ua ke tos txais lawv.” Thawj Tswj Hwm Brigham Young hais lus rau lawv: “Thov kom tus Tswv uas yog Vajtswv ntawm Ixayees foom koob hmoov rau nej. … Peb tau thov Vajtswv pab nej tsis tu tsis tseg; ntau txhiab tus neeg tau thov Vajtswv rau nej, txhua hnub, thov tus uas tau txib peb los muab Ixayees sau los ua ke, cawm noob neej dim thaum peb tshaj tawm txoj moo zoo, thiab npaj lawv rau tus Mexiyas txoj kev los.”

Ib yam li lub sij hawm zoo siab ntawd, thov cia kuv rov qab hais rau cov neeg hloov siab los ntseeg tshiab thiab cov neeg uas rov qab los koom tus Tswv lub Koom Txoos: Peb hlub nej; peb xav tau nej; tus Tswv xav tau nej. Tej zaum peb tsis tos nej nrog tej pawg qoj nkauj, tiam sis peb thov Vajtswv foom koob hmoov rau nej thaum nej taug kev raws nraim li txoj kev khi lus uas yuav ua rau koj ntsib tau Vajtswv tus uas yog Leej Txiv thiab Yexus Khetos nyob hauv lub nceeg vaj xilethi-aus.

Yeej muaj puav pheej uas qhia tias kev ntseeg Yexus Khetos loj zuj zus hauv peb lub caij nyoog. Nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg twb muaj neeg coob zuj zus hloov siab los ntseeg. Thaum 36 lub hli dhau los, yuav luag 900,000 tus neeg hloov siab los ntseeg tau koom lub Koom Txoos. Cov neeg hloov siab los ntseeg no yog 5 feem pua ntawm tag nrho cov mej zeej hauv lub Koom Txoos. Peb zoo siab tos txais cov mej zeej tshiab thiab ua nej tsaug vim nej tau xaiv taug txoj kev no.

900,000 tus neeg hloov siab los ntseeg rau 36 lub hli no los yeej muaj ntau tshaj tag nrho cov mej zeej hauv lub Koom Txoos nyob rau xyoo 1940 uas yog 110 xyoo tom qab tau txhim tsa lub Koom Txoos, es thaum ntawd tsuas muaj 860,000 tus mej zeej. Xyoo ntawd Txwj Laug Jeffrey R. Holland, Txwj Laug Dieter F. Uchtdorf, thiab kuv tau yug los.

Cov neeg hloov siab los ntseeg tshiab no twb los thoob plaws lub ntiaj teb no los. Rau thawj rau lub hli no, kev hloov siab los ntseeg twb nce siab li 20 feem pua tshaj xyoo tas los no nyob hauv Yulauv, Afikas, Exias, Phaxifikas, thiab Latees Amelikas. Nyob hauv Amelikas Qaum Teb twb nce 17 feem pua. Tus Tswv txoj hauj lwm los yeej muaj hwj chim mus tom ntej. Tej najnpawb no yeej ua tim khawv tias txoj moo zoo yeej tshoov tib neeg lub siab thiab hloov tib neeg lub neej nyob txhua qhov chaw.

Hauv peb lub caij nyoog, cov neeg hloov siab los ntseeg uas muaj nqis no tsis sau los ua ke hauv ib qhov chaw zoo li yav tas los. Los ntawm cov mej zeej ntawm lub Koom Txoos txoj kev ntseeg thiab txoj kev fij siab, muaj tej yam uas pab tej pawg ntseeg—vim muaj tej tsev teev ntuj thiab cov tuam tsev—nyob thoob plaws lus ntiaj teb. Vim peb muaj cov yawm sij pov thawj hwj thiab tej kev pab ntawd, ces peb ua tau cov kab ke cawm seej nyob yuav luag thoob plaws lub ntiaj teb.

Txawm yog peb nyob qhov twg los, cov mej zeej tam sim no yuav tsum tos txais txhiab txhiab tus mej zeej tshiab ib yam li peb tau tos txais cov Neeg Ntseeg Akiv thiab Welsh raws li kuv piav hauv peb zaj keeb kwm. Kuv nyiam Txwj Laug Gerrit W. Gong zaj lus hauv tuas no thaum nws qhia peb tias tsis xav kom leej twg zaum nws ib leeg tsis hais los ntawm sab siab ntsws los sis sab ntsuj plig los yog.

Peb lub luag hauj lwm dawb ceev yog kom txais yuav thiab tos txais cov mej zeej tshiab thiab cov uas rov qab los. Thaum tus Tswv khiav Nws txoj hauj lwm nrawm nroos, peb yuav tsum hlub, tu, thiab pab cov uas txais yuav Nws txoj moo zoo. Peb yuav pab txhim tsa ib haiv neeg Xi-oos, thau peb “koom siab koom ntsws, thiab nyob raws li kev ncaj ncees.” Yog peb yuav nrog tus Tswv koom siab, peb yuav tsum koom siab koom ntsws rau tus Tswv pom. Txhua tus mej zeej muaj kev lav ris tos txais lwm tus, tsis hais lawv tau ua kev cai raus dej thaum twg los yog.

Kuv tej lus ntuas rau cov mej zeej ntawm lub Koom Txoos yog kom peb khawm cov neeg uas tus Tswv tau xaiv cov uas tau lees yuav Yexus Khetos txoj moo zoo.

Thawj Tswj Hwm Gordon B. Hinckley qhia peb tias cov neeg hloov siab los ntseeg tshiab yuav tsum muaj “ib tug phooj ywg, ib txoj kev lav ris, thiab kev tu zoo zoo ‘los ntawm Vajtswv txoj lus zoo.’ (Maulaunais 6:4).” Tsim nyog uas peb ua phooj ywg rau cov neeg hloov siab los ntseeg tshiab no kom qhia lawv tias lawv nrog peb koom siab thiab lawv tsis yog neeg qhua xwb. Peb pab tau lawv to taub tias lawv yog Yexus Khetos cov thwj tim uas muaj peev xwm txhawb pab lwm tus thiab txais tau tej kev hu kom ua hauj lwm. Cov neeg hloov siab los ntseeg hluas yuav tsum xav seb puas yuav mus ua tub txib. Txhua tus yuav tsum rau siab siv zog ua neej raws li Yexus Khetos.

Neeg feem coob yuav tsum tso ntau yam tseg thaum lawv koom lub Koom Txoos thiab lawv xav tau kev hlub thiab kev txhawb nqa los ntawm lawv Haiv Neeg Ntseeg.

Nej cov tshiab los sis cov uas rov qab los ntseeg, tej zaum nej yuav muaj tej teeb meem. Ua siab ntev rau nej tus kheej. Cov tub txib tau qhia nej txog cov lus qhuab qhia tseem ceeb thiab piav txog tej kev khi lus thiab cov kab ke ntawm lub nceeg vaj uas qhia txog nyob hauv cov vaj lug kub thiab nyob hauv phau Qhia Kuv Txoj Moo Zoo.

Yuav tsum txais cov kab ke thiab khi lus thiab ua raws li cov lus txib. Tsom ntsoov rau tej kev khi lus uas yuav tsum muaj kom txais kev tsa nto. Txoj moo zoo qhib kev rau tib neeg txais tau kev tsa nto, tsuas yog tias yus khi lus thiab ua raws li tej kev khi lus dawb ceev nrog Vajtswv. Tsuas yog txoj kev cai raus dej, txoj kev pom zoo, thiab kev muab lub Pov Thawj Hwj Mekhixedes rau cov txiv neej, peb khi lus nyob hauv lub tuam tsev. Rau cov neeg tuag, peb sawv cev ua cov kab ke cawm seej rau lawv tsuas yog nyob hauv lub tuam tsev xwb. Yog li ntawd, nej yuav tsum muaj ib lub hom phiaj kom npaj nej tus kheej mus rau lub tuam tsev.

Tej lub sij hawm nej yuav xav tias nej paub tsis txaus. Kev txawj ntse txog txoj moo zoo yog ib txoj koob hmoov uas yus tau zuj zus, tiam sis tsis yog ib txoj kab ke cawm seej. Txoj moo zoo tsis yog ib txoj kev sim seb yus paub npaum li cas. Tiam sis, zoo li Thawj Tswj Hwm Nelson tau cog lus tias: “Thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnu. … Thaum nej xav txog tej yam uas nej kawm, lub rooj ntug yuav qhib plho, thiab nej yuav txais lus teb rau nej cov lus nug thiab tau kev coj qhia rau nej lub neej.”

Tsis tas li ntawd xwb, txhua xyoo lub Koom Txoos cov ntaub ntawv uas qhia hauv Hnub Caiv tej kev sib ntsib qhia txog Phau Qub, Phau Tshiab, Phau Ntawv Maumoos, thiab phau Lus Qhuab Qhia thiab Kev Khi Lus. Thaum sij hawm dhau mus nej yuav ntseeg nej tus kheej thaum nej txoj kev txawj ntse txog txoj moo zoo loj tuaj. Kev kawm vaj lug kub txhua hnub yuav pab nej lub neej vim yuav ua rau nej txoj kev hloov siab los ntseeg Yexus Khetos txoj moo zoo loj tuaj.

Kev kawm Yexus Khetos cov lus qhuab qhia tseeb yog ib yam uas yuav ua kom tas lub neej no, tsis hais kev to taub cov lus qhuab qhia thiab kev coj lub neej raws li Yexus Khetos. Tej kev khi lus uas yuav tsum khi yeej yog ib tug txheej txheem uas peb hu ua kev ua raws li tej kev khi lus. Thawj Tswj Hwm Nelson tau qhia zoo txog cov ntsiab cai no. Cov mej zeej, qhov tseem ceeb yog cov tshiab thiab cov uas rov qab los, yuav tau koob hmoov yog lawv kawm thiab ua raws li nws tej zaj lus txog tej kev khi lus thiab kev taug kev ua raws li tej kev khi lus ntawd.

Yog tias nej cuab hom phiaj kom tsim nyog txais txhua txoj kev khi lus uas yuav tsum txais kom muaj kev tsa nto, nej yuav taug txoj kev uas mus rau lub nceeg vaj xilethi-aus. Peb yuav tsum tsom ntsoov rau lub tuam tsev thiab cov kab ke ntawm lub tuam tsev. Tej kev khi lus feem ntau los txhua tus muaj peev xwm txais tau. Ib txoj kev khi lus, kev sib yuav mus ib txhis li, yog kev koom ua hauj lwm nrog ib tug khub. Tsim nyog uas peb muaj ib lub hom phiaj kom nrhiav tau tus khub mus ib txhis li ntawd.

Txawm yog li ntawd los, tsis txhob poob siab yog tias kev sib yuav mus ib txhis li tsis yog ib yam uas nej ua tau tam sim no. Cov yaj saub tau qhia tias yeej yuav tsis tshem ib txoj koob hmoov twg ntawm cov mej zeej uas rau siab ntseeg thiab ua raws li cov lus txib. Ib tug yaj saub hauv Phau Ntawv Maumoos, Vaj Ntxwv Npeyamis, tau hais zoo hais tias: “Cov uas ua raws li Vajtswv tej lus txib … tau koob hmoov rau txhua txhia yam, … thiab yog lawv rau siab ntseeg mus kom txog thaum kawg … lawv thiaj yuav nrog Vajtswv nyob hauv qhov chaw uas muaj kev zoo siab tsis txawj kawg.”

Nej yuav kawm, yog nej tseem tsis tau kawm, hais tias cov mej zeej tsis zoo tag nrho. Cov lus qhuab qhia uas tau muab tshwm sim txog peb txoj kev ua neej hauv ntiaj teb no qhia tias peb yuav ua yuam kev. Peb nyob hauv ib lub ntiaj teb uas tsis zoo tag nrho thiab poob lawm, tsis yog ib lub ntuj xilethi-aus. Lub neej no yog ib lub caij uas sim peb lub siab, uas muaj cib fim rau peb tas li kom hloov siab lees txim thiab sim seb peb yuav ua li cas.

Peb txhua tus xav tias peb tsis txaus thaum peb siv zog hloov los ua neeg zoo li Yexus Khetos. Nws txoj Kev Theej Txhoj qhib kev rau peb hloov siab lees txim txhua hnub thaum peb ua yuam kev. Ib yam li Nifais, ib tug yaj saub hauv Phau Ntawv Maumoos, hais tias: “[Peb] yuav tsum sib zog mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus. Yog li ntawd, yog tias nej yuav thawb lawm tom hauv ntej, mloog ntsoov Khetos tej lus, thiab nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis.”

Yog peb xav txog tej teeb meem hauv peb lub caij nyoog, peb yuav tsum nco qab tias tus Cawm Seej, thaum nws ua hauj lwm hauv lub ntiaj teb no, kuj nyob hauv ib lub caij nyoog uas muaj kev kub ntxhov ntau heev. Nws tsis tsom ntsoov rau tej teeb meem ntawm kev kav teb kav chaw thaum ntawd; Nws tsom ntsoov rau txoj kev hloov Haiv Neeg Ntseeg lub siab kom dawb huv.

Kev coj raws li tus Cawm Seej thiab Nws cov lus qhuab qhia los yeej ib txwm tsis yooj yim hauv ib lub ntiaj teb uas ntxhov hnyo. Yeej tsis yooj yim rau tus Cawm Seej ua neej thaum lub ntiaj teb muaj kev kub ntxhov ntau, yeej tsis yooj yim rau peb cov thawj coj thiab mej zeej thaum pib txhim tsa lub Koom Txoos, thiab yeej yuav tsis yooj yim rau peb. Zoo siab uas peb muaj yaj saub kom coj peb txoj hau kev hauv lub caij nyoog niaj hnub no. Thawj Tswj Hwm Dallin H. Oaks yuav muaj hwj chim ua li ntawd thaum yav tom ntej.

Kuv ua tim khawv tias cov lus qhuab qhia ntawm Yexus Khetos lub Koom Txoos yeej muaj tseeb nyob mus ib txhis li. Kuv ua tim khawv tseeb hais tias Yexus Khetos muaj txoj sia nyob, thiab vim peb muaj Nws txoj Kev Theej Txhoj, peb yuav koom ib lub siab nrog Nws. Los ntawm Yexus Khetos lub npe dawb ceev, amees.