Kom Txhua Tus Ib Leeg Txhawb Nqa Ib Leeg

Ua mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, vim peb tau txoj koob hmoov muaj ib tug ntawm pawg Vajtswv ua peb luag, peb txais tau kev pab los ntawm tus Kws Pab Qhia zoo kawg tshaj plaws. Tus Vaj Ntsuj Plig Dawb Huv paub txhua yam, ua tim khawv txog qhov tseeb, thiab yuav “pab [peb] nco tau txhua yam.” Thawj Tswj Hwm Russell M. Nelson tau hais lus ntau zaus txog saib tseem ceeb npaum li cas uas peb hnov tus Tswv lub suab. Nws tau qhia peb kom caw tus Vaj Ntsuj Plig Dawb Huv coj peb kev thiab tau taij thiab thov kom peb ntxiv dag zog rau peb sab ntsuj plig kom peb thiaj txais tau kev tshwm sim.

Hnub no kuv caw nej xav txog tus Vaj Ntsuj Plig Dawb Huv lub luag hauj lwm, twb yog hais txog txoj kev kawm thiab txoj kev qhia txoj moo zoo tom tsev thiab hauv lub koom txoos. Tus Vaj Ntsuj Plig Dawb Huv yog txais los ntawm txoj kev muaj siab ntseeg thov Vajtswv thiab thaum peb rau siab coj kom tsim nyog txais lub txiaj ntsim tsim txiaj no. Phau ntawv Kev Qhia Raws Li tus Cawm Seej txoj Kev txheeb xyuas tej ntsiab cai tus Tswv tau txhim tsa uas pab tus Vaj Ntsuj Plig Dawb Huv los qhia peb.

Ib txoj ntsiab cai no yog caw kom tib neeg rau siab kawm.” Yav nram ntej, tej zaum peb xav tias kev qhia yog lub cib fim rau ib tug niam txiv los sis ib tug kws qhia caw tus Ntsuj Plig hauv lawv txoj kev npaj thiab qhia tej yam lawv kawm nrog rau cov me nyuam los sis cov kawm, uas lawv lub luag hauj lwm yog ua tib zoo mloog. Tiam sis yeej zoo dua thaum peb, cov uas kawm, kuj npaj ua ntej thiab thaum cov kws qhia tsim qhov chaw kawm uas txais tau kev tshwm sim ncaj qha los rau peb lub siab lub ntsws. Ces, thaum peb muaj tej lub cib fim qhia tej yam peb kawm dhau ntawm tej yam peb kawm tom tsev thiab los ntawm tus Vaj Ntsuj Plig Dawb Huv, peb ib leeg pab ib leeg kawm thiab kom txhua tus ib leeg txhawb nqa ib leeg. Thiab thaum peb nruab tej ntsiab cai ntawm txoj moo zoo hauv peb txoj kev qhia, tus Ntsuj Plig yuav ua tim khawv ntxiv txog qhov tseeb.

Ib yam li nyob hauv txhua yam, Yexus Khetos yog tus yam ntxwv zoo tshaj plaws. Yexus tau caw peb txhua tus mob siab kawm thiab saib xyuas peb zaj lus tim khawv. Nws caw nws cov thwj tim npaj kawm, qhia tawm tej yam lawv kawm, thiab ua dab tsi los muaj siab ntseeg ua. Nws thov Vajtswv rau lawv, saib lawv zoo li Vajtswv saib lawv, mloog lawv, thiab pab lawv paub hais tias Vajtswv hlub lawv thiab xav tau lawv pab.

Vim peb yog cov kws qhia, peb tsom ntsoov tau saib lawv zoo zuj zus tuaj li cas, pab lawv raws li lawv xav tau, thiab coj lawv los mus xyaum ua tej yam ntxiv dag zog rau lawv sab ntsuj plig ua thwj tim. Ua cov kawm, thaum peb xaiv npaj rau peb txoj kev kawm, peb qhia tus Vaj Ntsuj Plig Dawb Huv hais tias peb kam cia Nws qhia peb.

Kuv ris Vajtswv txiaj rau ib tug kws qhia uas caw kuv ua ib tug neeg kawm zoo dua. Thaum kuv pib kawm ntawv qib siab, kuv yuam kev xav hais tias kuv yuav tsum nyiaj kev kawm ntawv kom thiaj ua tau nav kis las. Muaj ib hnub, tom qab kuv tus kws qhia nyeem ib daim ntawv uas kuv sau, nws qhia kuv hais tias nws xav tias kuv lub paj hlwb khiav zoo, kuv txawj txawj xav mus xav los zoo. Kuv twb tsis to taub cov lus ntawd txhais li cas. Nws hais tias yog tias kuv rau siab me ntsis kuv ua tau ib tug tub kawm ntawv zoo. Kuv yeej tsis xav hais tias tsim nyog ua li ntawd. Nws tej kev xav pab, kev yaum, thiab tej lus caw tau hloov kuv txoj kev kawm ntaub kawm ntawv thiab foom koob hmoov rau kuv lub neej.

Muaj dua ib txoj ntsiab cai kom caw tau tus Vaj Ntsuj Plig Dawb Huv los yog kom qhia tej lus qhuab qhia muaj tseeb. Qhov no txhais hais tias peb txoj kev kawm thiab qhia txoj moo zoo yuav tsum muaj Vajtswv txoj lus ua lub hauv paus thiab peb tsis lam tau lam hais txog tej yam uas tus Tswv tsis tau tshwm sim qhia. Tsis yog li ntawd, peb tsom ntsoov rau tej ntsiab cai tseem ceeb thiab nyob mus ib txhis li, uas cia tus Ntsuj Plig ua tim khawv txog qhov tseeb. Ib zaug ntxiv, peb ua raws li tus Cawm Seej tus yam ntxwv. Nws hais tias, “Kuv tej lus qhuab qhia tsis yog kuv li, tiam sis yog Vajtswv tus uas txib kuv los tej lus.”

Tej lus qhuab qhia tseeb yog nrhiav hauv cov vaj lug kub thiab cov yaj saub niaj hnub nim no cov lus qhia. Tus Tswv ntuas peb kom kawm cov vaj lug kub peb tus kheej thiab ua ib tse neeg thiab mus rau lub tsev koom txoos txhua lub lim tiam kom kawm Nws txoj moo zoo thiab npaj ib qho chaw kawm Nws txoj lus qhuab qhia thiab hnov Nws lub suab. Peb tshawb nrhiav hauv cov vaj lug kub kom to taub tej dab neeg zoo, tej ntsiab cai uas tej no qhia, thiab saib yuav tsum nruab tej qhov tseeb no hauv peb lub neej li cas. Yog ib txoj koob hmoov muaj cov vaj lug kub rau ntawm peb txhais tes. Xav saib Adas thiab Evas, Anpinadais, los yog tus Xib Hwb Zoo Kawg Yexus Khetos tuaj xyuas peb tej tsev los sis tej hoob kawm kom thiaj qhia peb. Lawv yeej los qhia peb thaum peb mloog ntsoov Vajtswv txoj lus. Thaum peb rau rau siab, peb yuav kawm kom to taub thiab nyiam tau cov vaj lug kub thiab tso siab hais tias cov vaj lug kub yuav teb tau peb sab ntsuj plig cov lus nug.

Muaj ib lub sij hawm uas ntej wb sib yuav uas nyuaj heev rau kuv poj niam, Kristi, hnov tau Leej Txiv Saum Ntuj Ceeb Tsheej txoj kev hlub nws thiab nyuaj rau nws to taub Vajtswv txoj hau kev rau nws. Thaum nws thov kom tau lub tswv yim, kev tshoov siab los qhia nws tias nws yuav tsum mus koom tej hoob kawm vaj lug kub qib siab, ces nws sau npe kawm ib hoob kawm cov vaj lug kub Phau Tshiab. Nws tus kws qhia tom tsev kawm ntawv vaj lug kub qhia zoo kawg nkaus, twb yog nws saib cov vaj lug kub los yog Vajtswv txoj lus rau nqi heev. Thaum kuv poj niam kawm hoob ntawd, tus Vaj Ntsuj Plig Dawb Huv ntxhi rau nws hais tias muaj dab tsi hauv cov vaj lug kub uas nws yuav tsum kawm. Qhov uas nws tus kws qhia nyiam cov vaj lug kub thiab tej kev tshoov siab ntawm tus Vaj Ntsuj Plig Dawb Huv ua rau kuv poj niam xav kawm Vajtswv txoj lus ntau dua—uas ua rau nws hloov siab los ntseeg tiag tiag thiab muaj lub siab xav pab coob leej ntau tus.

Thaum kawg, ib yam li Kev Qhia Raws Li tus Cawm Seej txoj Kev hais, peb tej kev qhia yuav tsum tsom ntsoov rau Yexus Khetos. Peb hais tau lus ntau dua txog Nws thiab hwm Nws zoo dua thiab nrhiav cib fim ua tim khawv txog Nws, ris Nws txiaj, thiab hlub Nws. Txawm peb nyob qhov twg los xij, thaum peb nco txog Nws, Peb yuav muaj tau “nws tus Ntsuj Plig nrog [peb] nyob ua ke.”

Ib txoj kev rau peb tsom ntsoov rau Yexus Khetos thaum peb qhia yog qhia hais tias Nws yog tus yam ntxwv zoo tshaj plaws, Nws ua raws li tag nrho tej ntsiab cai ntawm txoj moo zoo yam zoo tag nrho li. Txawm tias nqes vaj lug kub tsis hais kiag txog Yexus, peb tseem tsa Nws ua tus yam ntxwv zoo kawg txog txoj ntsiab cia uas peb qhia txog. Peb nug tau, “Nej puas paub txog ib lub sij hawm thaum Yexus Khetos ua tau yam ntxwv txog txoj ntsiab cai no?”

Peb kuj tsom ntsoov txog Nws thaum peb kawm txog Nws lub npe, lub luag hauj lwm, thiab tej cwj pwm, to taub thiab kawm tej yam Nws tau ua thiab saib Nws yog leej twg tiag thiab. Piv txwv hais tias, thaum kawm txog txoj ntsiab cai hloov siab lees txim, yeej tseem ceeb to tau saib yuav tsum ua li cas thiaj hloov siab lees txim tau. Tiam sis kuj tseem ceeb nco qab ntsoov saib Yexus Khetos tau ua kom thiaj muaj kev hloov siab lees txim thiab kom to taub saib kev hloov siab lees txim qhia dab tsi txog Nws, txog Nws tus xeeb ceem thiab Nws tus cwj pwm. Peb lub cib fim hloov siab lees txim qhia peb li cas txog Nws txoj kev hlub, kev siab ntev, thiab kev siab hlub, qhov uas Nws ntseeg txog peb txoj hmoov mus ib txhis li, qhov uas Nws kam theej peb lub txhoj, thiab Nws txoj kev xyiv fab thaum Nws zam txim pub rau peb? Thiab qhov uas to taub Nws tej npe—xws li Vajtswv tus Yaj, tus Txhiv Dim, thiab tus Kws Kho Mob—pab peb pom tias kev hloov siab lees txim yog Nws txoj kev caw rau peb los ntxuav, hloov, thiab kho peb. Tsom ntsoov rau tej yam Nws ua rau peb thiab saib Nws yog leej twg tiag yuav pab peb “muaj siab ntseeg los hloov siab lees txim.”

Qee zaum, peb yuav tsis pom tus Cawm Seej tej cwj pwm hauv ib zaj dab neeg vaj lug kub. Piv txwv hais tias, thaum peb nyeem txog Nifais ua ib lub nkoj, tej zaum peb tsom ntsoov rau Nifais xwb. Tiam sis thaum peb tsom ntsoov rau tus Cawm Seej peb yuav pom tias phau ceev xwm txheej no yog tshwj tseg kom thiaj qhia peb txog Vajtswv lub hwj chim tsis yog Nifais xwb—ua Vajtswv muab dag zog rau peb ceev Nws tej kev txib thiab cawm peb dim thaum peb xav tau kev pab.

Peb kuj tsom ntsoov tau rau Yexus Khetos lub luag hauj lwm tseem ceeb hauv Leej Txiv Saum Ntuj Ceeb Tsheej txoj hau kev zoo siab. Peb lub neej hloov tau thaum peb to taub Vajtswv npaj dab tsi rau peb raws li nws lub tswv yim nyob mus ib txhis li es tsis xav txog tej yam uas muaj los rau peb tam sim no xwb. Txoj moo zoo tsis yog ib co kev txib xwb; yog txoj moo zoo hais tias Yexus Khetos kov yeej txoj kev txhaum thiab kev tuag. Twb yog thaum peb txais Nws txoj kev siab hlub dhau ntawm txoj kev ceev peb tej kev khi lus nrog Vajtswv uas peb thiaj muaj kev zoo siab niaj hnub nim no thiab npaj nrog Leej Txiv Nyob Saum Ntuj Ceeb Tsheej nyob ua ke mus ib txhis li. Thaum peb kawm pom Leej Txiv Saum Ntuj Ceeb Tsheej thiab tus Cawm Seej hauv cov vaj lug kub, peb yuav paub Nkawd zoo dua thiab peb yuav pom Nkawd txoj kev hlub thiab txoj kev pab ntau dua thiab yam muaj hwj chim heev hauv peb lub neej.

Kuv yeej yuav nco qab ntsoov tus Ntsuj Plig uas kuv hnov thaum kuv tseem hluas thaum peb tus kws qhia qhia txog thaum tus Cawm Seej lub neej yuav xaus. Tus kws qhia ntawd pab peb pom saib txoj kev sib ntsib noj lub nco txog, lub Vaj Khexemanes, lub Roob Khauj Khaum Taub Hau, thiab lub qhov ntxa uas tsis muaj dab tsi nyob haud tseem ceeb npaum li cas. Nws ris tus Cawm Seej txiaj heev thiab Nws xav ua raws li tus Cawm Seej hais. Nws cov lus qhia ntawd pab kom tus Vaj Ntsuj Plig Dawb Huv ua tim khawv txog Yexus Khetos. Tus Ntsuj Plig uas kuv hnov hauv hoob ntawd ua rau kuv txoj kev ntseeg tob dua tuaj thiab ua rau kuv hlub thiab ris tus Cawm Seej txiaj heev. Kuv cim ntsoov tus kws qhia qhov kev pab ntawd mus tas kuv lub neej. Ib yam li hais txog lwm tus kws qhia, “Peb muab tau peb cov tes nte tej taws ntawm nws txoj kev ntseeg.”

Nyob hauv peb tej tsev thiab tej kev sib ntsib tom lub Koom Txoos, thaum peb tsom ntsoov rau Yexus Khetos, qhia Nws tej lus qhuab qhia, thiab rau rau siab kawm cov vaj lug kub, peb caw tus Vaj Ntsuj Plig Dawb Huv los ua rau peb txoj kev ntseeg rau ntawm Yexus Khetos tob dua thiab pab peb rais los mus zoo nkaus li Nws, uas yog lub hom phiaj ntawm tag nrho tej kev qhia thiab kev kawm txoj moo zoo.

Kuv ua Vajtswv tsaug rau cov kws qhia hauv kuv lub neej, txawm yog kuv niam txiv thiab cov thawj coj thiab kws qhia uas qhia kuv yav tas los los mus rau cov txiv neej thiab cov poj niam uas raug hu los qhia thiab ua tim khawv los ntawm lub sam thiaj no, uas pab peb paub thiab ua raws li Yexus Khetos. Thiab kuv ua Vajtswv tsaug rau tus Vaj Ntsuj Plig Dawb Huv, tus pab qhia zoo tshaj plaws. Twb yog dhau ntawm tus Vaj Ntsuj Plig Dawb Huv uas kuv paub hais tias Leej Txiv Saum Ntuj Ceeb Tsheej hlub peb thiab muaj ib txoj hau kev zoo tag nrho rau peb, hais tias Yexus yog tus Khetos, tus Cawm Seej thiab tus Txhiv Dim ntawm lub ntiaj teb; thiab hais tias Nws txoj moo zoo thiab lub Koom Txoos twb txum tim rov qab los lawm. Kuv ua Vajtswv tsaug ua tim khawv txog tej no los ntawm Yexus Khetos lub npe dawb ceev, amees.