Muab Siab Npuab Yexus Khetos: Lub Txiaj Ntsim Dawb Ceev uas Yog tej Zaj Nkauj ntawm lub Koom Haum Me Nyuam Yaus
Tej zaj nkauj los ntawm lub Koom Haum Me Nyuam Yaus no yog tej lus qhia rau Yexus Khetos cov thwj tim, cov lus tim khawv txog qhov tseeb ntawm Nws txoj moo zoo, thiab tej lus thov Vajtswv uas peb hu nkauj.
Ib txoj koob hmov los ntawm kev ua hauj lwm hauv lub Koom Haum Me Nyuam Yaus yog qhov uas kuv tau kawm hlub lwm tus los ntawm ib yam lus uas kuv tsis txawj hais. Kuv zoo siab nrog kuv cov Neeg Ntseeg sib txuas lus los ntawm tib yam lus peb hais uas yog kev hu nkauj dawb ceev. Thiab qhov tseem ceeb yog los ntawm cov nkauj yooj yim hauv lub Koom Haum Me Nyuam Yaus, tus Vaj Ntsuj Plig Dawb Huv tau hais ib yam lus uas txhua tus to taub thiab ua rau kuv lub siab puv npo. Los ntawm cov me nyuam lub suab meej, lawv tshaj tawm txog Vajtswv thiab Nws Leej Tub, Yexus Khetos, txoj kev hlub uas muaj tseeb.
Txawm yog kuv tsis tau loj hlob tuaj nyob hauv lub Koom Haum Me Nyuam Yaus, tus Ntsuj Plig tau qhia kuv sai heev hais tias lawv tej zaj nkauj yeej dawb huv, thiab tej zaj no los pab kuv teev tiam Vajtswv. Cov nkauj hauv lub Koom Haum Me Nyuam Yaus twb hloov kuv lub neej kom dawb huv thaib txhawb nqa kuv lub siab, qhia kuv qhov tseeb uas kav ib txhis, thiab ua rau kuv nyob ze dua tus Cawm Seej thiab Nws txoj moo zoo.
Thawj Tswj Hwm Dallin H. Oaks tau qhia tias “kev hu nkauj qhuas Vajtswv yog ib txoj hauv kev zoo tshaj plaws uas pab kawm cov lus qhuab qhia ntawm txoj moo zoo.” Cov lus no yeej zoo rau peb txhua tus tiam sis haj yam muaj tseeb rau peb cov me nyuam. Tej zaj nkauj ntawm lub Koom Haum Me Nyuam Yaus yog Vajtswv ib lub cuab yeej kom tus Cawm Seej cov thwj tim yau tshaj plaws cog lub noob ntawm ib zaj lus tim khawv hauv lub siab. Cov niam tsev txiv tsev, cov thawj coj, thiab cov xib hwb pab kom tu lub noob ntawd thaum lawv ua tim khawv thiab caw cov me nyuam ua tim khawv txog txhua yam uas lawv kawm txog Leej Txiv Saum Ntuj Ceeb Tsheej; Nws Leej Tub, Yexus Khetos; thiab tus Vaj Ntsuj Plig Dawb Huv.
Ob peb xyoos uas kuv ua hauj lwm no, kuv tau siv sij hawm hu nkauj thiab kawm los ntawm tej zaj nkauj hauv lub Koom Haum Me Nyuam Yaus thaum kuv xav txog ob peb lo lus nug:
-
Ua li cas tej zaj nkauj uas peb kawm nyob hauv lub Koom Haum Me Nyuam Yaus yuav los pab cov me nyuam hais lus ntawm sab ntsuj plig kom ua tim khawv tas lawv lub neej?
-
Kev hu nkauj txog txoj moo zoo tseeb yuav pab cov me nyuam li cas kom lawv nco ntsoov tus Tswv raws li lawv tau khi lus ua thiab npaj lawv txais Nws cov kab ke?
-
Tej zaj nkauj hauv lub Koom Haum Me Nyuam Yaus yuav pab li cas kom muab Vajtswv txoj kev cai sau rau cov thwj tim hluas no lub siab?
Thaum lub Koom Haum Me Nyuam Yaus pib nyob rau xyoo 1878, thawj tus tuam thawj tswj hwm, Aurelia Spencer Rogers, hais tias “yuav tsum hu nkauj.” Cov nkauj yeej yog ib qho tseem ceeb ntawm kev qhia cov me nyuam txog txoj moo zoo. Cov nkauj hauv lub Koom Haum Me Nyuam Yaus yuav los ua ib tug me nyuam thawj yam lus ntawm sab ntsuj plig vim tej suab nkauj uas yooj yim hu nkauj ua rau lawv hais tau txog tej yam tseeb ntawm txoj moo zoo. Cov nkauj no muaj hwj chim vim cov me nyuam yuav nco ntsoov tas lawv lub neej, thiaj li yuav pab lawv ua ib tug thwj tim thiab hais lus tim khawv txog tus Cawm Seej.
Kev Qhia Yexus Khetos cov Lus Qhuab Qhia Los ntawm Kev Hu Nkauj
Tej zaj nkauj hauv lub Koom Haum Me Nyuam Yaus kuj muaj hwj chim qhia txog cov lus qhuab qhia. Tej zaj hais dab neeg los ntawm tus Cawm Seej lub neej thiab txoj hauj lwm. Lwm zaj qhia txog Nws tej cwj pwm, xws li kev ntseeg, Nws txoj kev cia siab, thiab Nws lub siab hlub. Thiab cov nkauj dawb ceev tshaj plaws ua tim khawv txog Nws txoj Kev Theej Txhoj mus ib txhis li thiab txoj kev hlub uas los ntawm txoj kev cawm seej ntawd.
Tus Tswv ib tug yaj saub, Thawj Tswj Hwm Russell M. Nelson, tau qhia tias: “[Cov nkauj] muaj hwj huam pab neeg ua zoo ntev dhau lub sij hawm uas cov me nyuam tseem hluas. … [Cov nkauj] muaj hwj chim txhawb nqa yus sab ntsuj plig. Muaj hwj chim kho mob. Muaj hwj chim pab yus pe hawm Vajtswv; ua rau peb xav txog [tus Cawm Seej] txoj Kev Theej Txhoj thiab txoj moo zoo tej ntsiab cai ntawm kev cawm seej thiab cov kab ke tsa nto. Cov nkauj muaj hwj chim pab peb hais tej lus thov Vajtswv thiab ua tim khawv txog tej yam tseeb dawb ceev.”
Peb cov uas yog niam tsev txiv tsev, cov thawj coj, thiab cov xib hwb, yuav tsum pab cov me nyuam txais tau cov koob hmoov thaum peb qhia lawv txog tej yam tseeb ntawm txoj moo zoo hauv cov nkauj no. Thawj Tswj Hwm Nelson kuj qhia tias “cov me nyuam kawm tau cov lus qhuab qhia thaum lawv kawm hu nkauj ntau npaum li lawv kawm cov lus qhuab qhia nyob hauv ib chav kawm.” Tej zaj nkauj no yog tej zaj lus qhia txog kev ntseeg uas pab cov me nyuam nrhiav tau tus Cawm Seej thiab pab lawv rau siab ua raws li Nws txoj moo zoo.
Cov vaj lug kub qhia tias tej zaj nkauj ntawm cov neeg ncaj ncees uas los ntawm lub siab los yeej ua rau tus Cawm Seej zoo siab. Ua rau kuv xav tsis thoob thaum kuv xav txog qhov uas tus Cawm Seej cov thwj tim hluas tshaj ua rau Nws zoo siab npaum li cas. Kuv paub lawv txoj kev hu nkauj mus cuag saum ntuj ceeb tsheej uas qhia tias lawv muaj kev ntseeg thiab caw tus Vaj Ntsuj Plig Dawb Huv kom pom zoo rau tej yam tseeb thiab caw lwm tus txais tus Cawm Seej txoj kev hu kom peb coj raws li Nws thiab los tsev. Ib yam li Txwj Laug Henry B. Eyring qhia peb tias, yeej yog thaum peb hnov tus Ntsuj Plig peb thiaj li muaj puav pheej tias tus Cawm Seej txoj Kev Theej Txhoj ua hauj lwm hauv peb lub neej.
Kev Muab Qhov Tseeb Sau rau hauv lub Siab
Cov nkauj ntawm lub Koom Haum Me Nyuam Yaus yog ib qho txuj ci tseem ceeb uas cov me nyuam siv tau tas lub sij hawm uas lawv kawm ua ib tug thwj tim tas lawv lub neej. Ib zaj nkauj uas peb hu thaum muaj rau xyoo muaj hwj huam nrog nraim peb—thiab yuav rov qab tuaj thaum muaj tej lub sij hawm uas peb ua xyem xyav, raug ntxias, tu siab, los sis muaj kev xyiv fab. Tej zaum thaum peb laus, cov lus ntawm zaj “Kuv Yuav Coj Raws Li Vajtswv txoj Hau Kev” yuav pab peb sab ntsuj plig nyob ruaj khov zoo li tus Thwj Tim Povlauj tej lus tim khawv txog qhov uas Vajtswv tej lus cog tseg muaj tseeb. Los sis ua rau peb nco txog qhov uas vim Vajtswv ua raws li Nws cog lus, Nws tej kev khi lus nplij peb lub siab thiab pov hwm peb thiab caw peb cia siab thiab rau siab ntseeg Yexus Khetos thiab Nws lub hwj chim theej txhoj.
Cov laus nyob thoob plaws lub ntiaj teb, thaum lawv raug tej yam nyuaj, nco ntsoov thiab hu tej zaj nkauj uas lawv kawm thaum lawv nyob hauv lub Koom Haum Me Nyuam Yaus. Tej zaj nkauj no tau txhawb nqa neeg coob txoj kev ntseeg Yexus Khetos thiab feem ntau yog thaum lawv pib hloov siab los ntseeg Nws txoj moo zoo. Cov niam tsev txiv tsev, cov thawj coj, thiab cov xib hwb tau tu txoj kev ntseeg ntawd ntau xyoo mus thaum lawv qhia, hu nkauj, thiab ua tim khawv rau cov me nyuam nrog kev hlub.
Muaj ib tug viv ncaus uas qhia kuv tias nws nyiam cov nkauj hauv lub Koom Haum Me Nyuam Yaus, thiab 20 xyoo tom qab ntawd nws hais tias tej zaj nkauj no tau pab nws hloov siab los ntseeg Yexus Khetos txoj moo zoo. Ib tug mej zeej ntxiv tau ua tim khawv tias lub Koom Haum Me Nyuam Yaus tau cog ib lub noob ntawm kev ntseeg nyob hauv nws lub siab thaum nws hluas thiab ua rau nws muaj peev xwm rov qab los rau tus Tswv lub Koom Txoos thaum nws muaj 30 xyoo tawm. Tus Cawm Seej cog lus tias, “Tus Pab … yuav qhia txhua yam rau nej, thiab pab kom nej nco txhua yam.” Cov nkauj ntawm lub Koom Haum Me Nyuam Yaus yog ib txoj kev kom muaj raws li cov lus cog tseg ntawd.
Ib zaj nkauj ntawm lub Koom Haum Me Nyuam Yaus qhia txog lub hwj chim uas los ntawm ib txoj kev ntseeg yooj yim thiab ib zaj lus tim khawv uas ruaj khov:
Thaum cov me nyuam hu nkauj, lawv hais tias lawv xav ua ib tug thwj tim thiab kawm tus txheej txheem ua neej raws li lawv tej kev khi lus. Tus Ntsuj Plig siv tau cov nkauj kom muab tej lus tseeb sau rau ntawm lawv lub siab mos siab muag. Thiab thaum sij hawm dhau mus, cov me nyuam xaiv tau kom muab lawv lub siab thiab lawv lub neej tig mus ua raws li Yexus Khetos thaum lawv nrog Nws khi lus thiab ua raws li tej kev khi lus ntawd.
Kev Nco txog Peb tej Kev Khi Lus thiab Kev Npaj rau cov Kab Ke
Cov nkauj dawb ceev yuav pab peb sab ntsuj plig nco txog Khetos cov lus qhuab qhia thiab npaj peb txais Nws cov kab ke. Ua rau peb cim ntsoov tus Cawm Seej tej lus qhuab qhia thiab nco qab peb yog Nws cov thwj tim.
Peb cov thawj coj hauv lub Koom Haum Me Nyuam Yaus, peb muaj cib fim thiab kev lav ris kom muaj kev xyiv fab, kev to taub cov lus qhuab qhia, thiab muaj tus Ntsuj Plig thaum peb qhia cov nkauj. Peb yuav tsum caw cov me nyuam kom to taub lawv xav li cas hauv lawv lub siab thaum lawv hu nkauj thiab pab lawv to taub tej kev xav ntawd yog los ntawm tus Vaj Ntsuj Plig Dawb Huv. Thaum peb ua li no peb npaj peb cov me nyuam txais cov kab ke dawb ceev xws li kev cai raus dej thiab kev cai pom zoo, thiab ua rau lawv nco txog lawv tej kev khi lus thaum lawv rov qab cog lus rau Vajtswv.
Nyob hauv Rooj Mov Kawg, tom qab tus Cawm Seej tau muab lub cim nco txog rau lawv, Mathais sau hais tias “Thaum lawv hu ib zaj nkauj tas, lawv txawm tawm mus rau pem Roob Txiv Ntoo Roj lawm.” Txhua lub lim tiam, cov mej zeej uas tau ua kev cai raus dej thiab ua kev cai pom zoo nyob hauv tus Tswv lub Koom Txoos, tsis hais cov me nyuam uas tau ua kev cai raus dej yau li yim xyoo, lawv npaj txais tus Tswv lub cim nco txog. Thaum lawv hu tej zaj nkauj dawb ceev, tej pawg ntseeg ntawm Vajtswv cov me nyuam muaj cib fim npaj lawv lub siab kom txais txoj kab ke dawb ceev ntawd kom ris Nws lub npe, nco ntsoov txog Nws, thiab coj raws li Nws tej lus txib.
Zaj Lus Tim Khawv Kaw
Cov phooj ywg zoo, kuv ua tim khawv tias tej zaj nkauj ntawm lub Koom Haum Me Nyuam Yaus qhia tej lus qhuab qhia tseeb uas coj peb mus rau Yexus Khetos thiab Nws txoj moo zoo. Kuv caw nej xav txog tej yam tseeb uas twb nkag hauv nej lub siab dhau los ntawm tej lus qhia hauv tej zaj nkauj no thiab ua tim khawv txog tej lus tseeb ntawd rau tus Cawm Seej cov thwj tim yau tshaj thaum nej qhia lawv txog txoj moo zoo thaum nej hu nkauj.
Kuv paub tias Vajtswv, peb Leej Txiv, hlub peb kawg li, Nws thiaj li txib Nws Leej Tub los rau hauv lub ntiaj teb qhia peb, qhia txoj kev rau peb, thiab txhiv peb dim dhau los ntawm Nws txoj Kev Theej Txhoj.
Kuv paub tias tus Cawm Seej lub neej thiab txoj hauj lwm qhuab qhia yeej muaj tseeb. Cov vaj lug kub hais dab neeg ntau txog Nws txoj kev kho mob, Nws txoj kev ua siab zoo, thiab Nws tej txuj ci tseem ceeb.
Kuv paub tias Leej Txiv Saum Ntuj Ceeb Tsheej hnov thiab teb Nws cov me nyuam tej lus thov Vajtswv, tsis hais lawv muaj hnub nyoog, xwm txheej, los hais yam lus dab tsi. Nws mloog tej lus thov ntawm peb lub siab.
Kuv ua tim khawv tias nyob hauv Khexemanes, Yexus Khetos tau ris peb tej kev txhaum, kev tu siab, thiab tej kev mob. Nws txaus siab raug txom nyem vim Nws hlub peb thiab tau qhib kev rau peb txais kev zam txim thiab rov qab mus tsev.
Kuv paub tias peb yog Vajtswv cov me nyuam tiag, uas Nws tsim kom muaj yam ntxwv zoo li Nws, peb tau txais Nws vaj txiaj ntsim kom muaj cib fim hloov ua neeg zoo li Nws, thiab Nws caw peb rov qab mus nrog Nws nyob yog peb yuav xaiv coj raws li Yexus Khetos.
Kuv paub tias Yexus Khetos yog tus uas coj yam ntxwv zoo tag nrho, thiab thaum peb coj raws li Nws los ntawm kev pab, zam txim, thiab kev hlub lwm tus, peb yuav hloov los ua neeg zoo li Nws zuj zus txhua hnub.
Thiab kuv paub tias tus Tswv cov tuam tsev dawb huv yog Nws cov tsev nyob hauv ntiaj teb no. Nyob haud, peb khi lus dawb ceev, txais cov koob hmoov mus ib txhis li, thiab kawm ntxiv txog Nws thiab hnov Nws lub hwj huam. Lub tuam tsev yog ib qho chaw rau peb kawm, nyob kaj siab lug, thiab npaj rau peb lub neej.
Kuv ua tim khawv tias peb txoj kev siv zog qhia thiab hu tej zaj nkauj ntawm lub Koom Haum Me Nyuam Yaus rau peb cov me nyuam los tsis yog ib yam zoo rau peb ua raws li kab lig kev cai xwb. Tej zaj nkauj no yog tej lus qhia rau Yexus Khetos cov thwj tim, cov lus tim khawv txog qhov tseeb ntawm Nws txoj moo zoo, thiab tej lus thov Vajtswv uas peb hu nkauj. Cov nkauj dawb ceev yuav ua rau Khetos txoj Kev Kaj ci rau tus uas mloog thiab ua rau tus uas hu nkauj muaj hauv nws lub siab. Cov phooj ywg zoo, Yexus tseem xav kom peb ib tug duab ci. Kuv ua tim khawv li no los ntawm Yexus Khetos lub npe dawb ceev, amees.