Nco txog cov Yaj

Yexus Khetos yog tus Tswv Yug Yaj Zoo. Txhua tus hauv Nws pab yaj muaj nqis rau Nws. Nws tau coj yam ntxwv txog kev ua ib tug tswv yug yaj li cas thiab tau qhia peb tias ib tug tswv yug yaj zoo li cas, tsis hais qhov uas yus paub yus cov yaj lub npe, yus hlub lawv, nrhiav cov uas poob zoo, pub mov rau lawv noj, thiab thaum kawg, coj lawv rov qab los tsev. Nws xav kom peb ua ib yam li ntawd vim peb yog Nws cov neeg yug yaj.

Peb kawm tau ntau yam txog kev txhawb pab raws li tus Tswv txoj kev los ntawm tus yaj saub puag thaum ub—thiab ib tug neeg yug yaj zoo—Maulaunais. Nws nyob hauv ib lub caij nyuaj heev, thiab tsis muaj xov tooj ntawm tes, cov koospistawj, thiab internet. Tiam sis nws tseem muaj peev xwm suav cov yaj. Nws tau ua li cas? Peb paub tau txog nws tus txheej txheem no nyob hauv Maulaunais 6. Nyob hauv tshooj no peb nyeem hais tias “cov ntseeg yuav suav lawv nrog cov neeg ntawm Khetos lub koom txoos; thiab cov ntseeg muab lawv lub npe sau cia, xwv kom yuav nco qab lawv thiab Vajtswv txoj lus zoo yuav los yug lawv, kom ceev tau lawv taug txoj kev yog. … Cov ntseeg tuaj “sib ntsib ua ke tsis tu ncua, tuaj ua kev cai yoo mov thiab thov Vajtswv, thiab tuaj sib tham ib leeg nrog ib leeg ntsig txog txoj kev nyob zoo ntawm lawv tus ntsuj plig” (Maulaunais 6:4–5; ntxiv qhov uas ntawv qaij).

Maulaunais yeej xav tias tag nrho tej no yog kom pab tib neeg—suav lawv lub npe! Nws xyaum ua raws li lub ntsiab cai suav thiab teev npe kom yuav nco ntsoov txhua leej txhua tus. Twb pom cov neeg uas raug tej yam nyuaj los sis ua loj leeb, thiab cia Haiv Neeg Ntseeg sib tham txog lawv nyob hauv tej pawg sab laj. Ib yam li tus tswv yug yaj uas ncaim cuaj caum cuaj tus yaj (nyaj nws ua kom lawv nyob nyab xeeb ua ntej) thiab nrhiav ib tug yaj uas poob zoo lawm, (saib Lukas 15:4–7) tus Tswv twb hais kom peb saib xyuas peb cov yaj—pom lawv thiab nco qab lawv thiab mus ua ib yam li Nws tau ua.

Thaum kuv yog ib tug thawj coj rau ib qhov chaw tshaj tawm txoj moo zoo nyob hauv India, kuv tau nug ib ceg ntseeg tus thawj tswj hwm hluas txog nws tej hom phiaj rau xyoo tom ntej: “Koj yuav npaj pes tsawg tus neeg txais lub Pov Thawj Hwj Mekhixedes?” Nws teb kiag hais tias, “Xya tus!”

Kuv xav paub seb nws tau ua li cas thiaj li tsim tus najnpawb ntawd! Ua ntej kuv hais tau, nws tau rho ib daim ntawv tawm uas nws twb sau tus najnpawb ib txog xya rau ib sab. Thawj tsib tus najnpawb nyias muaj nyias lub npe uas sau rau lwm sab—tib neeg uas nws thiab nws pawg txwj laug yuav mus caw thiab txhawb nqa kom txais tau txoj koob hmoov ntawm lub pov thawj hwj hauv lawv lub neej. Muaj tseeb tiag, kuv yuav tsum nug txog tus najnpawb rau thiab xya. Nws hais tias, “Auj, Thawj Tswj Hwm, peb yeej yuav muab ob tug txiv neej ua kev cai raus dej thaum xyoo pib uas muab tau lub pov thawj hwj rau nkawd ua ntej txog xyoo kawg.” Tus thawj coj zoo kawg no to taub lub ntsiab cai ntawm kev suav thiab teev npe.

Yexus Khetos tau txhim tsa Nws lub Koom Txoos kom yuav yooj yim nco qab txog txhua tus neeg, vim txhua tus muaj nqis rau Nws. Txhua tus neeg nyob hauv ib pawg ntseeg, tsis hais nws muaj hnub nyoog li cas los sis nws yog poj niam los txiv neej, muaj cov neeg saib xyuas—cov neeg yug yaj—uas muaj hauj lwm saib xyuas lawv, nco qab txog lawv. Ua piv txwv hais tias, ib tug tub hluas muaj ib pawg npisov, cov kwv tij txhawb pab, cov laus uas pab cov tub hluas, cov xib hwb qhia seminary, tej pawg thawj tswj hwm, thiab ntxiv—txhua tus muaj hauj lwm saib xyuas nws, kom pab tau tus tub hluas yog nws poob. Txawm yog tsuas muaj ib tug neeg pab xwb, ces tus tub hluas ntawd yuav nyab xeeb, thiab muaj neeg nco qab txog nws. Tiam sis, ntau zaus peb pom tias tsis muaj ib tug neeg pab. Tib neeg ua loj leeb mus hauv qhov tsaus ntuj—thiab tsis muaj leej twg pom. Peb yuav ua li cas kom ua cov neeg yug yaj zoo dua? Peb txhua tus kawm tau kom paub suav thiab teev npe.

Lub Koom Txoos muab cov ntaub ntawv qhia thiab pab uas ua li ntawd—ua kom peb suav thiab teev npe. Daim Ntawv Qhia Txhua Peb lub Hlis yeej yog ib qho piv txwv. Daim ntawv qhia no pab peb suav thiab teev npe ntawm txhua tus mej zeej ob peb zaug thiab pom cov neeg uas tsis tau nco txog los sis xav tau peb txoj kev pab thiab peb txoj kev hlub. Daim Ntawv Qhia Yuav Xam Phaj Leej Twg hais txog cov neeg uas peb yuav tsum tsom ntsoov rau tam sim no, ib yam li Daim Ntawv Qhia Tib Neeg Puas Muaj Daim Ntawv Tso Cai Nkag Tuam Tsev thiab lwm daim ntawv qhia. Tej daim ntawv suav thiab teev npe pab peb tsom ntsoov rau tib neeg. Yuav tsum hu leej twg ua hauj lwm, muab pov thawj hwj rau leej twg los sis pab leej twg nqa lub npe ntawm ib tug hauv nws tsev neeg mus rau lub tuam tsev? Peb yuav tsum pab leej twg npaj ua ib tug tub txib? Leej twg tsis tuaj lub hli no? Tej daim ntawv no pab peb nco txog tib neeg.

Kuv paub ib tsev neeg los ntawm Teb Chaws Amelikas uas txais kev txib nyob hauv Afikas Teb. Thawj Hnub Caiv uas nkawd tuaj rau tib pawg Koom Txoos nyob hauv lub teb chaws ntawd, muaj neeg zoo siab tos txais nkawd. Thaum tav su lawm, twb hu tus poj niam los ua Koom Haum Niam Tsev tus thawj tswj hwm thiab hu tus txiv neej ua Koom Haum Tub Hluas tus thawj coj! Nws nug ceg ntseeg tus thawj tswj hwm seb muaj pes tsawg tus tub hluas. Tus thawj coj uas rau siab ntseeg taw tes rau sab nram qab ntawm chav txais lub cim nco txog thiab hais tias, “Ob tug nyob ntawd.” Tus txiv neej tsis tshua ntseeg tsuas muaj li ntawd, yog li ntawd nws thiaj li nqa ib daim ntawv teev npe rau ceg ntseeg ntawd, es pom hais tias muaj 20 tus tub hluas tiag. Nws rov qab mus rau ceg ntseeg tus thawj tswj hwm thiab thov kom muaj ob tug txiv neej hluas uas txawj hais ob yam lus los ua nws ob tug pab cuam ces nrog nkawd thiab nrog ob tug tub hluas sib tham txog cov tub hluas lub npe no.

Ces cov tub hluas rau siab no twb pib ua hauj lwm. Ob peb hlis tom qab ntawd lawv twb nrhiav tau txhua tus tub hluas. Ib tug dhau ib tug, cov phooj ywg no tau zoo siab tos txais txhua tus yaj uas poob zoo no thiab pub lawv sab ntsuj plig thiab sab cev nqaij daim tawv tau noj tau haus! Ua ntej dhau ib xyoo, txhua Hnub Caiv, muaj kwv yees li 21 tus tub hluas tuaj. Ua Vajtswv tsaug rau cov tub hluas uas lawv suav thiab teev npe.

Ib tug phooj ywg zoo, thaum nws yog ib tug tub kawm ntawv hluas, tau nrog nws tsev neeg tsiv mus rau ib lub nroog loj hauv Teb Chaws Amelikas kom kawm ntawv ntxiv. Lawv hu nws los ua pawg txwj laug tus thawj tswj hwm tam sim ntawd. Vim nws txhawj me ntsis txog thawj txoj kev xam phaj nrog ceg txheem ntseeg tus thawj tswj hwm, nws twb rau siab npaj ua ntej. Nws tau qhia ceg txheem ntseeg tus thawj tswj hwm hais tias nws muaj peb lub hom phiaj rau xyoo tom ntej: (1) 90 feem pua tus neeg uas txhawb pab lwm tus, (2) ib zaj lus qhia txog txoj moo zoo txhua lub lim tiam, thiab (3) ib yam ntxim ua txhua lub hli rau pawg txwj laug.

Ceg txheem ntseeg tus thawj tswj hwm uas muaj tswv yim no luag rau kuv tus phooj ywg, thiab nug hais tias, “Koj puas paub ib tug hauv koj pawg lub npe uas tsis tshua muab siab rau ntseeg, uas koj pab taus mus rau lub tuam tsev nrog nws tsev neeg xyoo no?” Ua rau kuv tus phooj ywg xav tsis thoob. Nws ua tib zoo xav ces qhia ib lub npe rau tus thawj tswj hwm. Ceg txheem ntseeg tus thawj tswj hwm tau hais tias “Cia li sau qhov no.” Ces tus thawj coj twb nug lo lus nug ntawd peb zaug ntxiv—thiab xam phaj twb tiav lawm. Tus tub hluas tau tawm kev xam phaj ntawd es nws twb kawm ib zaj lus tseem ceeb tshaj plaws txog kev ua ib tug thawj coj thiab kev txhawb pab. Nws twb npaj sib tham txog tej lub txheej xwm, tej zaj lus qhia, thiab tej yam ntxim saib ntxim ua. Tiam sis thaum kawg nws muaj tib neeg lub npe! Nws thiab nws pawg twb tsom ntsoov rau plaub lub npe no thaum lawv mus txhawb pab.

Thaum kuv yog qhov chaw tshaj tawm txoj moo zoo ib tug thawj coj, muaj ib Hnub Caiv sawv ntxov uas kuv tau mus xyuas ib ceg ntseeg. Kuv pom tias ceg ntseeg tus thawj tswj hwm pheej rho ib daim ntawv tawm nws hnab tsho uas muaj cov ntawv sau rau. Kuv txiav txim siab nug nws txog daim ntawv ntawd tom qab lawv thov Vajtswv kaw. Tom qab kev sib ntsib ntawd, thiab ua ntej kuv nug tau txog daim ntawd, ceg ntseeg tus tub txib khiav los rau lub sam thiaj, es twb muab daim ntawd rau nws. Kuv lawv tus thawj coj zoo no qab mus rau nws txoj kev sib ntsib koom tes pab cov tub txib txoj hauj lwm hauv nws ceg ntseeg. Ua ntej lawv pib, nws rho daim ntawv tawm hauv nws hnab tsho los. Nws twb sau cov mej zeej lub npe uas tsis tuaj rau kev sib ntsib txais lub cim nco txog. Ob peb feeb tom qab ntawd, txhua tus mej zeej ntawm lawv pawg tau xaiv ib ob lub npe, thiab cog lus tias lawv yuav mus xyuas tus ntawd hnub ntawd kom saib xyuas seb nws puas nyob zoo thiab qhia tias lawv twb pom tias lawv tsis nyob lawm. Nim no ua li ntawd yeej yog kev suav thiab teev npe tiag.

Kuv nco txog ib koog chaw, uas nyob deb deb heev ntawm ib lub tuam tsev, tiam sis lawv xav tias kev muaj ib daim ntawv tso cai nkag tuam tsev yog ib lub hom phiaj tseem ceeb, txawm yog feem ntau los ntshe siv tsis taus. Thawj Hnub Caiv txhua lub hlis, cov thawj coj tau siv lawv cov ntaub ntawv pab lawv suav kom teev npe ntawm cov mej zeej uas tau txais lawv qhov vaj txiaj ntsim. Yog tias lawv pom tias tsis ntev ces ib daim ntawv tso cai yuav dhau caij lawm, tus thawj tuav ntaub ntawv yuav teem sij hawm xam phaj kom rov qab tau. Tib neeg uas muaj ib daim ntawv tso cai uas dhau caij lawm los lawv sib tham txog lawv, ces nrhiav lawv kom pab lawv rov qab ua raws li lawv tej kev khi lus. Kuv nug seb pes tsawg tus mej zeej uas tau txais lawv vaj txiaj ntsim lawm muaj ib daim ntawv tso cai tam sim no. Nws teb tias yog 98.6 feem pua. Thaum kuv nug seb txog rau tus neeg uas lawv daim ntawv tso cai dhau caij lawm, cov thawj coj paub lawv lub npe thiab piav rau kuv tias lawv tab tom ua dab tsi kom coj lawv rov qab los!

Ob peb xyoos tas los lawm, kuv tsev neeg rov qab los nyob hauv Teb Chaws Amelikas. Peb zoo siab mus rau lub koom txoos nyob no tom qab peb tau siv 26 xyoo nyob hauv tej pawg me me uas nyob ub nyob no. Kuv tau txais kev hu ua pawg ntseeg tus tub txib. Peb muaj ib pawg ntseeg tus thawj coj zoo rau kev tshaj tawm txoj moo zoo thiab peb tab tom ua tej yam tseem ceeb thiab qhia tib neeg zoo kawg. Kuv nug seb puas kam kuv koom pawg ntseeg pawg sab laj kom pom seb zoo li cas thiab thov lawv pab cov phooj ywg uas peb tab tom qhia. Ua rau kuv xav tsis thoob thaum peb tsuas sib tham txog pawg ntseeg kev ua si uas tsis ntev yuav ua. Kuv nrog pawg ntseeg tus thawj coj rau kev tshaj tawm txoj moo zoo sib tham tom qab ntawd thiab yws yws hais tias nws tsis tau muaj sij hawm qhia txog cov neeg uas peb qhia. Es Nws teb li cas nev? “Auj, yeej tsis cia sij hawm rau kuv qhia txog tej no.”

Kuv muab qhov no piv rau ib ceg ntseeg pawg sab laj nyob hauv Lahore, Pakistan, uas kuv twb koom ob peb lub lim tiam ua ntej. Pawg me me no tau zaum ncig ib lub rooj me me, thiab lawv tsuas sib tham txog tib neeg xwb. Hais txog neeg lub npe xwb. Txhua tus thawj coj qhia tias lawv saib xyuas leej twg thiab tib neeg twg thiab tsev neeg uas lawv txhawj txog. Txhua tus muaj cib fim qhia tias lawv xav li cas txog tej yam zoo lawv ua tau kom foom koob hmoov rau cov neeg ntawd. Lawv twb npaj ua tej yam thiab txais kev txib ua tej ntawd. Yeej yog ib zaj lus qhia zoo txog kev suav thiab teev npe los ntawm peb cov kwv tij thiab cov muam uas ntseeg rau ib tiam neeg xwb.

Nyob hauv Yexus Khetos lub Koom Txoos, cov yaj saub thaum ub thiab cov yaj saub niaj hnub nim no tau qhia peb—thiab dhau los ntawm peb tus Cawm Seej tus yam ntxwv—kom paub txhawb pab lwm tus li cas. Peb teev npe, peb nco qab txog lawv, thiab peb sib sab laj txog tib neeg. Cov thawj coj uas ua li no yeej yuav muaj ntau yam sib tham txog nyob hauv lawv pawg sab laj tej kev sib ntsib! Lub ntsiab cai txog kev suav thiab kev teev npe los yeej zoo. Li no yog tus Tswv txoj kev. Tiam sis peb tseem ua tau zoo dua. Vajtswv, tus uas tau tsim ntuj tsim teb thiab kav txhua yam, txoj hauj lwm no—Nwstxoj hauj lwm thiab lub yeeb koob—yeej tseem ceeb rau Nws. Thiab yuav tsum yog ib qho tseem ceeb rau peb txhua tus thiab, vim peb yog cov cuab yeej hauv Nws txhais tes ua Nws txoj hauj lwm zoo kawg nkaus ntawm txoj kev cawm seej thiab kev tsa nto. Yuav muaj tej txuj ci tseem ceeb nyob hauv tib neeg lub neej tiag tiag. Los ntawm Yexus Khetos lub npe, amees.