Kev Tshaj Tawm txog Tsev Neeg—Tej Lus uas Los ntawm Vajtswv Los

Lub tuam rooj sab laj thaum lub Kaum Hli Ntuj xyoo 2025 no yog 30 xyoo tom qab tau tshaj tawm txog “Tsev Neeg: Ib Zaj Lus Tshaj Tawm rau lub Ntiaj Teb.” Los ntawm Vajtswv txoj kev txib, zaj lus tshaj tawm no, uas hais tej lus tshwm sim, los peb tau tsim “kom yug thiab ntxiv dag zog rau tsev neeg kom tsev neeg thiaj ua tau lub sawm fem pawg neeg tseem ceeb tshaj plaws.”

Nej txhua leej txhua tus yeej nyob hauv ib tsev neeg, txawm yog nej yog leej niam, leej txiv, tus ntxhais, tus tub, tus xeeb ntxwv, pog yawg niam tais yawm txiv, phauj, dab laug, kwv tij, muam, los sis npawg los xij peem. Qhov tseem ceeb tshaj, peb txhua tus yog raws li zaj lus tshaj tawm hais tias, “leej niam leej txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas … muaj ib tug cwj pwm thiab txoj hmoov los saum ntuj los.”

Thaum lawv hu kuv ua ib tug thwj tim nyob rau xyoo 2015, muaj neeg qhia kuv tias, “Zaj lus tshaj tawm no yog koj li lawm. [Thaum taw tes rau tej lus ‘Pawg Kaum Ob tug Thwj Tim’ hauv zaj lus lub npe] koj lub npe yeej nyob ntawm no. Cia li paub thiab qhia zaj lus no zoo li yog koj li.”

Kuv nyiam zaj lus tshaj tawm txog tsev neeg kawg. Kuv twb mus thoob plaws lub ntiaj teb txij Afikas mus rau Audaliyas thiab txhua qhov txhia chaw ua tim khawv txog tsev neeg lub luag hauj lwm hauv Vajtswv txoj hau kev mus ib txhis li. Zaj lus tshaj tawm no yog los ntawm Vajtswv los, yog li ntawd peb yuav tsum hwm tej lus no zoo li yog los ntawm Nws.

Cov kwv tij thiab cov muam, zoo li kuv hais nyob hauv lub tuam rooj sab laj dhau los nyob ntawm lub sam thiaj no hais tias, cia li nco ntsoov “Yus cov lus yeej tseem ceeb.”

Cia kuv qhia nej me ntsis txog keeb kwm ntawm zaj lus tshaj tawm uas yog lub ntsiab lus txog tej yam uas peb ntseeg.

Nyob rau xyoo 1994, ib xyoo ua ntej tau hais zaj lus tshaj tawm, Pawg Kaum Ob tug Thwj Tim tau sib tham txog qhov uas tej lub sawm fem thiab tej lub tseem fwv tab tom txav mus deb ntawm Vajtswv tej kev cai rau tsev neeg, kev sib yuav, thiab qhov uas yus yog txiv neej los sis poj niam. Thawj Tswj Hwm Russell M. Nelson tau piav txog lub sij hawm no hais tias, “Tiam sis tej yam uas peb pom tsis tas li ntawd xwb. “Peb pom tau tej zej zog uas xav muab tag nrho tej kev cai thiab ciaj ciam rau kev plees kev yi tso tseg. Peb pom tias yuav tsis paub meej yog poj niam los txiv neej. Peb pom tau txhua yam no yuav los.”

Pawg Kaum Ob tug Thwj Tim tau txiav txim siab npaj ib daim ntawv, ib zaj lus tshaj tawm raug cai, uas hais ntsiab lus txog lub Koom Txoos tej lus qhia txog tsev neeg. Xyoo ntawd, cov Thwj Tim no, cov neeg pom tau uas Vajtswv hu, tau npaj ib zaj lus tshaj tawm txog tsev neeg. Thawj Tswj Hwm Dallin H. Oaks tau hais tias lawv thov tus Tswv seb “[lawv] yuav tsum hais dab tsi thiab [lawv] yuav tsum hais li cas.” Lawv tau muab rau Thawj Pawg Thawj Tswj Hwm—Thawj Tswj Hwm Howard W. Hunter, Gordon B. Hinckley, thiab Thomas S. Monson xav seb zoo li cas.

Ob peb hlis tom qab ntawd thaum lub Peb Hlis Ntuj xyoo 1995, Thawj Tswj Hwm Hunter tso lub ntiaj teb no tseg thiab Thawj Tswj Hwm Hinckley tau los ua tus Thawj Tswj Hwm thiab 15 ntawm lub Koom Txoos. Nws yog tus uas lav ris zaj lus tshaj tawm lawm. Thaum twg yog lub sij hawm yog kom tshaj tawm zaj lus no rau lub Koom Txoos? Lub sij hawm ntawd twb los rau lub hli tom qab ntawd.

Ob peb hnub ua ntej Koom Haum Niam Tsev txoj kev sib ntsib thaum lub Cuaj Hlis Ntuj hnub tim 23 uas muaj ua ntej lub tuam rooj sab laj, Thawj Tswj Hwm Hinckley thiab nws ob tug pab cuam sab laj ua ke nrog Koom Haum Niam Tsev Pawg Tuam Thawj Tswj Hwm. Cov muam, zoo li cov Thwj Tim, tab tom xav mus xav los txog tej kev txhawj xeeb txog cov poj niam thiab tsev neeg. Lawv twb txiav txim tsom ntsoov rau tsev neeg hauv kev sib ntsib yuav muaj tom ntej ntawd.

Thawj Tswj Hwm Hinckley twb yuav hais lus rau cov poj niam hauv kev sib ntsib ntawd. Nws tau xav xav seb nws yuav tsum hais li cas. Thaum lawv sib tham ntxiv, nws tau hais lub npe ntawm zaj lus uas twb tau sau lawm tiam sis tsis tau qhia rau cov pej xeem uas yog “Tsev Neeg: Ib zaj Lus Tshaj Tawm rau lub Ntiaj Teb.” Cov poj niam kev sib ntsib puas yog qhov chaw yog kom tshaj tawm zaj lus txog tsev neeg no?

Koom Haum Niam Tsev tus Tuam Thawj Tswj Hwm Elaine Jack tau piav hais tias: “Peb tsis tau paub tias zaj lus tshaj tawm txog tsev neeg yog dab tsi thaum ntawd. … [Peb] paub los ntawm lub npe xwb, tiam sis peb xav tias yog hais dab tsi txog tsev neeg; ces yeej yog ib yam zoo. … Kuv paub tseeb tias peb muaj cov mej zeej hauv Pawg Kaum Ob tug Thwj Tim uas txais kev tshwm sim.”

Kev sib ntsib rau Koom Haum Niam Tsev hnub Saturday ntawd los yeej tseem ceeb rau peb zaj keeb kwm. Thawj Tswj Hwm Hinckley tau hais tej lus no kom cev lus txog zaj lus tshaj tawm txog tsev neeg: “Vim muaj ntau txoj kev dag uas tib neeg muab ua qhov tseeb, vim muaj tej kev dag ntsuav hais txog tej kev cai zoo thiab tej yam saib muaj nqi zoo, vim muaj tej kev haub kev ntxias ntau kom txais lub ntiaj teb no txoj kev tsuas xim, peb tau xav tias tsim nyog yuav ceeb toom [nej] … txog tej kev cai, cov lus qhuab qhia, thiab tej xwm ntawm tsev neeg uas cov yaj saub, cov pom tau, thiab cov txais kev tshwm sim ntawm lub Koom Txoos no tau hais ntau zaus nyob hauv peb zaj liv xwm.”

Ces nws tau nyeem tag nrho zaj lus tshaj tawm. Tus Tswv tau hais tias, “Txawm yog los ntawm kuv lub suab los sis los ntawm kuv cov tub qhe lub suab, yeej zoo ib yam.”

Zaj lus tshaj tawm hais tias “Vajtswv yog tus uas tsa tsev neeg.” Kuv nyiam qhov uas tau hais meej txog qhov no. Zaj lus tshaj tawm yog kev hu kom peb nyob hauv lub ntiaj teb nco ntsoov txog qhov uas peb yog los ntawm Vajtswv los, thiab txog peb txoj sia nyob mus ib txhis thaum yav tom ntej. Thawj Tswj Hwm Nelson tau qhia tias: “Nej yeej yog Vajtswv cov me nyuam ntsuj plig. … Nej yuav tsum paub tseeb hais tias; Nej los saum ntuj ceeb tsheej los. Thaum nej mob siab nrhiav, Vajtswv yeej yuav qhia rau nej paub tias nej rais tau los mus ua neeg zoo li cas.”

Thaum hais zaj lus tshaj tawm, tej lus ntawd yeej tsis yog raws li neeg feem coob ntawm lub ntiaj teb. Tsis yog thaum ntawd. Tsis yog tam sim no. Muaj cov uas xav tias muaj teeb meem hauv zaj lus tshaj tawm txog tsev neeg, kev sib yuav, thiab qhov uas yus yog poj niam los txiv neej. Ib txhia xav tias lub Koom Txoos yuav tsum thim, kho, los yog tso zaj lus tshaj tawm tseg.

Cov kwv tij thiab cov muam, zaj lus tshaj tawm txog tsev neeg yeej yog raws li Thawj Tswj Hwm Hinckley hais tias, yog cov lus qhuab qhia. Cov ntsiab cai nyob haud yeej tsis tawm tsam tiam sis hais raws nraim li tus Tswv tej kev thiab Nws tej kev khi lus. Cov lus qhia txog zaj lus tshaj tawm los twb yog peb tus Tswv Yexus Khetos muab tshwm sim rau Nws cov Thwj Tim thaum ntawd thiab tam sim no. Nov yog Nws lub Koom Txoos; Nws yog tus uas qhia tej lus tseeb rau peb ua neej.

Tej zaum nej ib txhia yuav xav txog zaj lus tshaj tawm thiab hais tias, “Qhov no tsis pab kuv li.” “Zoo li saib tsis taus tib neeg tej kev xav.” “Kuv tsev neeg tsis zoo li ntawd.” “Kuv tsis sib haum.”

Rau nej cov uas txhawj txog tej no, cia li paub tias nej yog cov me nyuam ntawm leej niam leej txiv saum ntuj ceeb tsheej, nej yog ib feem ntawm Leej Txiv Saum Ntuj Ceeb Tsheej tsev neeg. Tsis muaj leej twg paub nej zoo dua los yog hlub nej ntau dua. Cia li tig mus rau Nws; thov Nws kawg siab kawg ntsws; tso siab rau Nws thiab Nws cov lus cog tseg. Nej muaj nej tus Cawm Seej, Yexus Khetos, tus uas hlub nej, hauv nej tsev neeg. Nws tau los rau hauv lub ntiaj teb kom theej peb lub txhoj thiab ris lub nra ntawm tej yam peb ua yuam kev thiab peb tej hnub phem. Nws to taub tej yam uas tawm tsam nej thiab nej tej kev xav. Tso siab rau Nws; tso siab tias Nws yuav xa tus Vaj Ntsuj Plig Dawb Huv los nrog nej nyob, txhawb nqa nej, thiab coj nej kev. Cia li paub tias Nkawd txoj kev hlub “nthuav kom dav rau txhua txhia qhov chaw nyob hauv noob neej lub siab … thiab yog yam uas neeg xav tau tshaj txhua txhia yam … thiab yog qhov uas xyiv fab tshaj plaws rau yus tus ntsuj plig.”

Tag nrho tus Tswv cov Thwj Tim hlub nej kawg. Peb thov Vajtswv pab nej thiab nrhiav tus Tswv tej lus qhia rau nej. Nrog nraim peb nyob. Nej nyob hauv ib lub caij nyoog nyuaj heev thaum tus yeeb ncuab xav kom nej ua nws li. Tsis txhob cia nws ntxias nej. Thiab yog nej twb mus, cia li rov qab los. Peb xyab tes thov nej los ib yam li txhua tus uas hlub nej yuav ua.

Zaj lus tshaj tawm hais tias, “Niam txiv muaj ib lub luag hauj lwm dawb ceev kom cob qhia nkawd cov me nyuam raws li kev hlub thiab kev ncaj ncees.” Phau Ntawv Maumoos yog ib zaj lus tim khawv thib ob txog qhov tseeb no. Nyob hauv nqe thib ib ntawm tshooj ib, peb nyeem hais tias, “Kuv, Nifais, vim tau yug los ntawm niam thiab txiv uas zoo.” Muaj pes tsawg tus neeg ntawm peb uas tau pib nyeem Phau Ntawv Maumoos—thiab rov qab pib dua—thiab yog li ntawd peb tau cim ntsoov tej lus no? Cia li cim ntsoov.

Ib nqe lus uas kuv nyiam heev nyob hauv zaj lus tshaj tawm yog li no: “Ib tse neeg twg haj yam yuav txais tau kev zoo siab hauv lawv lub neej no thaum … Yexus Khetos cov lus qhuab qhia yog lawv lub hauv paus.”

Leej twg tsis xav tau kev zoo siab?

Thiab Yexus Khetos tej lus qhia yog dab tsi? Zaj lus tshaj tawm hais tias: “Kev ntseeg, kev thov Vajtswv, kev hloov siab lees txim, kev zam txim, kev sib hwm, kev hlub, kev khuv leej, kev ua hauj lwm, thiab kev ua si uas tsim nyog ua.”

Leej twg lub neej yuav tsis zoo dua yog lawv ua raws li tej lub ntsiab cai tseem ceeb no? Tsis muaj leej twg uas yuav muaj peev xwm ua zoo tag nrho, tiam sis peb muaj peev xwm ua raws li Thawj Tswj Hwm Hinckley tej lus uas muaj tswv yim: “Ua zoo npaum li nej ua taus.”

Peb nyeem hauv zaj lus tshaj tawm tias, “Cov txiv tsev yuav tsum kav … los ntawm kev hlub thiab kev ncaj ncees,” thiab “cov niam tsev txoj kev lav ris thib ib yog tu lawv cov me nyuam.” Tswj hwm tsis txhais tias yuam thiab tu tsis yog ib lub luag hauj lwm tsis tseem ceeb. Vajtswv twb muab cov txiv neej thiab cov poj niam tej luag hauj lwm txawv uas tseem ceeb ib yam thiab yeej sib haum.

Cia kuv qhia nej txog ib zaug hauv kuv lub neej.

Kuv thiab kuv tus poj niam tau kawm ua hauj lwm ua ke koom sib txig zoo dua thaum muaj ib hnub kuv txiav txim ib qho tseem ceeb tiam sis tsis tau nrog nws tham. Nws xav tsis thoob thaum kuv ua li ntawd thiab ua rau nws raug ib qho xwm txheej uas nyuaj. Tom qab ntawd, nws tso tes rau kuv ob lub xub pwg thiab hais tias, “Ron, thov, tsis txhob ua li ntawd rau kuv ib zaug ntxiv.” Txij thaum ntawd los wb ob leeg yeej sib haum.

Zaj lus tshaj tawm txog tsev neeg hais tias: “Tej niam tsev txiv tsev yuav tsum sib pab xws li nkawd nyob sib txig.”

Sib txig yog ib lo lus uas muaj nqi. Ntau xyoo uas Muam Rasband thiab kuv tau ua hauj lwm ua ke kom ua raws li zaj tshaj tawm hais tias yog “tej kev lav ris tseem ceeb dawb ceev no,” wb tau tsim ib txoj kev sib yuav uas nyob sib txig. Thaum wb cov me nyuam tau yuav poj niam los yuav txiv, wb tseem ntuas lawv thiab lawv tus khub kom ua li cas thiaj li sib txig.

Thaum wb ua neej ntsia ntsoov rau Vajtswv lub yeeb koob, wb ib leeg txhawb nqa thiab saib taus ib leeg. Vajtswv tej txheej txheem ua ncaj ncees no ua rau peb tus kheej, peb tsev neeg, thiab lub sawm fem nyob khov kho.

Peb Leej Txiv Saum Ntuj Ceeb Tsheej tau muab zaj lus tshaj tawm txog tsev neeg kom pab coj peb rov qab mus tsev rau Nws, pab peb kawm thiab muaj kev hlub, lub zog, lub hom phiaj, thiab to taub mus ib txhis li. Kuv thov nej kawg siab kom nej ua neej muab siab npuab Nws thiab Nws Leej Tub uas Nws Hlub. Kuv cog lus rau nej tias yog nej ua li no, tus Ntsuj Plig yuav tshoov nej lub siab thiab coj nej kev thiab pab nej paub txog kev kaj siab lug uas “tsis muaj leej twg paub.” Los ntawm Yexus Khetos lub npe, amees.