Lus Cev
Tam sim no peb qhib lub tuam rooj sab laj no, raws li tau npaj lawm thiab muaj cov neeg hais lus thiab cov nkauj uas Thawj Tswj Hwm Nelson tau pom zoo tom qab tib neeg tau npaj rau ob peb lub hlis lawm.
Kuv cov kwv tij thiab cov muam, thaum peb sib ntsib ua ke peb yeej tu siab vim peb tus Thawj Tswj Hwm Russell M. Nelson tau tas sim neej no. Kuv hais lus rau nej vim kuv yog tus Thawj Tswj Hwm ntawm Pawg Kaum Ob tug Thwj Tim, ib lub luag hauj lwm uas nej tau txhawb nqa pom zoo rau kuv txhua lub rooj sab laj hauv pawg ntseeg, ceg txheem ntseeg, thiab lub tuam rooj sab laj rau xya xyoo thiab ib nrab lawm.
Peb yuav qhib lub tuam rooj sab laj no, raws li tau npaj lawm thiab muaj cov neeg hais lus thiab cov nkauj uas Thawj Tswj Hwm Nelson tau pom zoo tom qab tib neeg tau npaj rau ob peb lub hlis lawm. Tej uas tau hloov tsuas yog kuv zaj lus piav no, thiab kuv pauv Thawj Tswj Hwm Nelson chaw hais lus hauv tuas kawg thaum hnub Sunday tav su.
Nov yog thawj zaug txij thaum 75 xyoos los uas lub Koom Txoos tus Thawj Tswj Hwm tau tuag ob peb hnub ua ntej ib lub tuam rooj sab laj. Yog li ntawd peb yuav tau npaj seb yuav ua li cas kom muaj tej kev sib ntsib rau cov thawj coj uas muaj feem nrog lub tuam rooj sab laj no thiab tej tuas rooj sab laj, thiab teem sij hawm rau nws lub ntees tuag sai li sai tau. Thawj Tswj Hwm Nelson to taub tias lub tuam rooj sab laj tseem ceeb npaum li cas kom coj Haiv Neeg Ntseeg txoj kev thaum yav tom ntej. Peb hwm nws thaum peb ua rooj sab laj no raws li kev teem sij hawm uas nws pom zoo lawm.
Nyob hauv lub sij hawm uas peb tu siab heev, peb twb tau sib ntsib ua ke kom hwm Thawj Tswj Hwm Russell M. Nelson ua ntej tej kev sib ntsib rau lub tuam rooj sab laj no ces twb teem sij hawm rau nws lub ntees tuag tsis ntev tom qab lub rooj sab laj. Twb ua tag nrho tej no raws li Thawj Tswj Hwm Nelson tsev neeg thiab Pawg Kaum Ob tug Thwj Tim pom zoo.
Vim peb txhua tus uas txais kev txib hais lus hauv lub tuam rooj sab laj muaj siab xav siv peb lub sij hawm hais lus hwm Thawj Tswj Hwm Nelson, yog li ntawd peb tau thov kom txhua tus uas hais lus hauv rooj sab laj no yuav hais lus tsawg txog qhov ntawd, tos mus txog nws lub ntees tuag thaum yuav hais lus ntau, qhov uas peb twb pib npaj ua lawm.
Kuv tej lus tsawg—uas tsim nyog hais hauv lub rooj sab laj no thiab zoo li lwm tej lus uas twb tau hais lawm—yog li no: kuv hlub Russell M. Nelson thiab kuv twb tau kawm txog txoj moo zoo thiab kev ua ib tug thawj coj los ntawm kuv txoj kev ua phooj ywg nrog nws ntau dua li kuv tau kawm ntawm lwm tus neeg uas kuv paub lawm. Nws yog ib tug uas tau coj yam ntxwv rau peb vim nws yog tus Tswv Yexus Khetos ib tug tub qhe thiab nws coj raws li Yexus. Kuv ua tim khawv txog tej no, los ntawm Yexus Khetos lub npe, amees.