Vajtswv cov Yaj Saub
Kom mloog thiab ua raws li tus yaj saub lub suab hais yog ib yam tseem ceeb kom thiaj tuav tau txhua yam zoo mus txog thaum peb tus Cawm Seej txoj Kev Los Zaum Ob.
Nej cov tub ntxhais hluas, peb tab tom muaj ib lub rooj sab laj zoo kawg nkaus! Peb twb hnov Yexus Khetos peb tug Thwj Tim uas muaj sia nyob hais lus rau peb lawm. Yog ib txoj koob hmoov zoo kawg! Thiab peb tseem yuav hnov ib tug ntxiv hais lus, Txwj Laug Henry B. Eyring. Peb sab ntsuj plig tseem yuav loj hlob zoo!
Xyoo tas los lawm thaum kuv hais lus, peb tau kawm seb peb yuav ua li cas tiv tau tej teeb meem hauv ntiaj teb no thaum xav txog Daviv txoj kev nrog Nkauli-am sib ntaus. Puas nco qab tsib lub pob zeb? Hnub no kuv yuav qhia ib zaj dab neeg hauv Phau Qub uas kuv tau nyeem thaum kuv hluas li nej uas ua rau kuv xav ua zoo li tus neeg no. Phau Vaj Lug Kub Npaivnpaum tsis qhia tus poj niam no lub npe, ces peb mam li hu nws ua tus poj niam hauv Sunees vim ntawd yog nws lub zos.
Muaj ib hnub uas tus yaj saub Elisas mus dhau lub zos Sunees, es peb nyeem hais tias nyob ntawd muaj “ib tug poj niam nplua nuj; [thiab nws caw] Elisas mus noj mov hauv nws tsev. Txij thaum ntawd los, txhua zaus uas Elisas dua kev tuaj …, nws pheej mus [noj mov].” Kuv xav tias tus yaj saub Elisas yeej zoo siab vim tau caw nws mus noj hauv hauv nws lub tsev! Nws twb mus ob peb zaug, ces muaj ib hnub uas tus poj niam ntawd hais rau nws tus txiv hais tias, “[Nim no], kuv paub hais tias tus txiv neej … no yog Vajtswv ib tug neeg uas ncaj ncees.”
Tus poj niam hais tias, “Nim no, kuv paub.” Zoo nkaus li nws twb caw Elisas los hauv nws tsev thaum nws tsis paub tseeb hais tias nws yog ib tug yaj saub; nws tau nws zaj lus tim khawv los ntawm tus Vaj Ntsuj Plig Dawb Huv thaum nws ua tib zoo mloog seb Elisas hais thiab qhia li cas. (Nco qab tias, lub sij hawm ntawd lawv tsis muaj duab li! Ces nyuaj ntsia ib tug neeg ntsej muag xwb yus mam li paub tias nws puas yog tus yaj saub.)
Tiam sis zaj dab neeg tsis xaus li ntawd. Muaj ib hnub, tus poj niam ntawd hais rau nws tus txiv, “Wb cia li txuas ib chav rau txheej tsev saum, muab txaj, rooj, tog thiab teeb mus tso rau hauv chav ntawd. thaum nws tuaj saib wb, nws thiaj tau chaw pw.”
Tus poj niam uas rau siab ntseeg kam ua ib chav tsev hauv nws lub tsev xwv kom tus yaj saub yuav muaj chaw nyob, thaum nws mus dhau plaws lawv lub zos!
Niaj hnub no peb kawm tau ib zaj lus qhia zoo los ntawm zaj dab neeg no.
Tus Tswv ua tim khawv rau tus poj niam hauv Sunees tias Elisas yog Vajtswv ib tug yaj saub, thiab nws ua siab dav qhib nws lub tsev tos txais nws.
Peb kuj txais tau ib zaj lus tim khawv txog Vajtswv cov yaj saub niaj hnub nim no thiab qhib peb lub siab lub ntsws—uas yog peb lub tsev—rau zaj xov uas peb Leej Txiv Saum Ntuj Ceeb Tsheej muaj rau peb hauv lub caij nyoog kawg no.
Cov me tub me ntxhais hluas, kuv xav caw nej los nug nej tus kheej hais tias: “Kuv puas muaj ib zaj lus tim khawv txog Vajtswv tus yaj saub uas muaj sia nyob no?”
Cia peb pib tom lub hauv paus mus.
Ib tug yaj saub yog dab tsi? Ib tug yaj saub yog ib tug txiv neej uas Vajtswv tau hu los ua tus hais lus sawv Nws cev. Niaj hnub no tseem muaj cov yaj saub hauv ntiaj teb no zoo ib yam li puag thaum ub.
Cov yaj saub yog cov neeg uas pom tau thiab qhia kev tshwm sim. Nov txhais tau hais tias lawv pom tau tej yam uas lwm tus neeg tsis pom, thiab lawv qhia tau txog tej yam uas yuav muaj los yav tom ntej. Lawv kuj pab peb npaj siab rau tej kev puas tsuaj uas yuav los. Cov yaj saub txais tej lus txib thiab kev tshwm sim los ntawm tus Tswv los. Nqe kev ntseeg thib cuaj hais txog kev tshwm sim uas tseem muaj hauv lub caij nyoog kawg no. Nws hais tias, “Peb ntseeg tag nrho txhua yam uas Vajtswv tau muab qhia tshwm sim los, txhua yam uas Nws qhia tshwm sim los ziag no, thiab peb ntseeg hais tias Nws tseem yuav muab ntau yam tseem ceeb thiab muaj nqis ntsig txog Vajtswv lub Nceeg Vaj qhia tshwm sim los.”
Txwj Laug Gary E. Stevenson hais tias, “Niaj hnub no tus Tswv tseem qhia Nws cov lus txib thiab Nws lub siab nyiam rau cov yaj saub vim Nws xav kom peb muaj kev zoo siab hauv lub neej no thiab mus rau lub yeeb koob xilethi-aus hauv lub neej tom qab.”
Cov yaj saub kuj tshaj tawm txoj moo zoo thiab yog Vajtswv cov xib hwb thiab cov tub txib rau txhua tus neeg hauv ntiaj teb no.
Txhua tus neeg hauv Thawj Pawg Thawj Tswj Hwm thiab Pawg Kaum Ob tug Thwj Tim yog ib tug yaj saub, neeg pom tau, thiab neeg qhia kev tshwm sim. Ua ib pawg sab laj raws li tus Tswv coj qhia, lawv muaj txoj cai tshaj tawm thiab piav txog cov lus qhuab qhia thiab txhim tsa tej kev cai coj rau Nws lub Koom Txoos. Lawv ua tib zoo thov Vajtswv thiab sib sab laj, es sawv daws yuav tsum pom zoo rau pawg pov thawj hwj tej kev txiav txim. Ua li no, tus Tswv qhia tseeb tias yeej yuav ua raws nraim li Nws lub siab nyiam.
Cov yaj saub ua tim khawv txog Khetos—Nws txoj kev ua neej nyob, Nws txoj hauj lwm qhuab qhia, thiab tias Nws los saum ntuj los.
Cia peb nyeem txog cov yaj saub tej zaj lus tim khawv hauv Phau Ntawv Maumoos.
Anpinadais tshaj tawm hais tias:
“Vajtswv tus kheej yuav nqis los nrog noob neej nyob, thiab yuav los txhiv nws cov neeg dim.
“Thiab vim nws nyob ua neej ntawm sab cev nqaij daim tawv ces yuav muab nws hu ua Vajtswv Leej Tub.”
Xamuyees tus Neeg Lamas hais lus tim khawv tias Yexus Khetos yog “Vajtswv Leej Tub, Leej Txiv ntawm lub ntuj thiab lub ntiaj teb, tus Tsim txhua yam txij thaum chiv keeb los.”
Thaib tus yaj saub Maulaunais hais tias, “Kuv tau pom Yexus, thiab … nws tau nrog kuv tham tim ntsej tim muag.”
Thaum Yexus tuaj xyuas cov Neeg Nifais, Nws xub hu Kaum Ob tug Thwj Tim. Thiab Nws hais rau cov neeg ntawd tias, “Nej tau koob hmoov yog nej yuav mob siab mloog rau tej lus ntawm kaum ob leeg no uas kuv tau xaiv.”
Nim no, cia kuv hais ob peb lo lus rau cov niam txiv los sis lwm cov neeg hauv tsev neeg uas tab tom tu me nyuam. Tus Tswv Kiag qhia Adas thiab Evas tej kev tseeb ntawm txoj kev cawm seej. Ces Nws thaij hais rau nkawd tias, “Kuv muab lus txib rau nej, kom muab tej yam no qhib lug qhia rau nej cov me nyuam.”
Lo lus qhib lug qhia txhais tau li cas? Nws yog kawm txoj moo zoo tej kev tseeb, muaj ib zaj lus tim khawv txog tej no, thiab qhia tej ntawd rau nej cov me tub me nyuam. Yeej yog ua tib zoo qhia thiab qhia thaum tsis tau npaj dab tsi. Yeej yog ua neej nyob raws li yus zaj lus tim khawv thiab kev paub tej no.
Phau Ntawv Maumoos piav tias 2,060 tus tub rog yog “neeg uas tseeb thiab mob siab tiag tiag, vim lawv niam thiab txiv tau qhia kom lawv ua raws li Vajtswv tej lus txib thiab kom taug kev ncaj ncees rau nws.” Cov txiv neej hluas no rau siab ntso ua raws li Hilamas hais, tus uas yog lawv cov tub rog tus thawj coj thiab lawv tus yaj saub, thiab nws paub hais tias lawv niam tau qhia lawv txog kev tseeb thiab kev ntseeg.
Cov niam txiv, nyob hauv lub ntiaj teb uas muaj kev kub kev ntxhov no uas muaj ntau lub suab thiab kev tsaus ntuj nti, Vajtswv Kiag tau txib kom peb yuav tu peb cov me nyuam los ntawm txoj kev kaj thiab kev tseeb. Nws tso siab rau peb kom peb qhia peb cov me nyuam txog tej kev tseeb hauv txoj moo zoo uas cawm tau neeg txoj sia. Yog peb tsis ua li ntawd, ces lub ntiaj teb yeej yuav tsis ua.
Cov phooj ywg hluas es, kuv xav thov caw nej los ua ib yam dab tsi: Hmo no, ua ntej nej tsaug zog, kuv caw nej los txhos caug, qhib nej lub siab, thiab muaj kev ntseeg thov Leej Txiv Saum Ntuj Ceeb Tsheej thiab nug Nws seb tus uas Nws xaiv los ua tus yaj saub thiab cov thwj tim puas yog Nws lub suab rau lub ntiaj teb niaj hnub no.
Tus poj niam hauv Sunees qhia peb tias peb muaj tau ib zaj lus tim khawv los ntawm tus Vaj Ntsuj Plig Dawb Huv. Kuv cog lus rau nej tias thaum twg peb paub tias lawv yog cov uas Vajtswv tau xaiv tseg, ces peb lub neej yuav yooj yim dua txawm peb muaj teeb meem uas tsim txom peb los xij, thaum uas peb tso siab, ntseeg thiab cia siab rau lawv lub suab. Kom mloog thiab ua raws li tus yaj saub lub suab hais yog ib yam tseem ceeb kom thiaj tuav tau txhua yam zoo mus txog thaum peb tus Cawm Seej txoj Kev Los Zaum Ob.
Lub ntiaj teb txoj kev ua phem ua qias tab tom loj hlob tuaj mus, tiam sis Yexus Khetos lub Koom Txoos thiab Nws lub Nceeg Vaj yeej muaj zog tshaj txhua lub sij hawm. Xi-oos tab tom muab khaub ncaws zoo nkauj los coj, thiab Khetos yeej yuav tsis swb li. Tus Tswv xav kom peb zaj lus tim khawv nyob ruaj khov, xav kom peb muaj kev ntseeg thiab niaj hnub hloov siab lees txim. Peb tus Cawm Seej Yexus Khetos tso siab rau peb kom pab khiav Nws tej hauj lwm.
Muaj ib zaug uas, tus Yaj Saub Joseph Smith tau hais tias, “Cov kwv tij es, peb yuav tsis mus lawm yav tom ntej nrog txoj hauj lwm tseem ceeb ua luaj no los?” Tiam sis, vim zaj xov no yog rau nej, cov tub thiab ntxhais hluas, kuv xav siv lo lus cov tub ntxhais hluas los pauv lo lus cov kwv tij chaw. Npaj siab los?
“[Cov tub ntxhais hluas], peb yuav tsis mus lawm yav tom ntej nrog txoj hauj lwm tseem ceeb ua luaj no los? Mus lawm tom ntej tsis txhob thaub qab. Ua siab loj, [cov tub ntxhais hluas]; thaib cia li mus, mus tsis tu ncua kom txog thaum yeej! Nej lub siab cia li xyiv fab, thiab cia li zoo siab heev.”
Kuv ris cov yaj saub uas muaj sia nyob txiaj vim lawv coj kav thiab ua hauj lwm pab peb. Kuv hais lus tim khawv tias Vajtswv hu lawv los nqa, txhim tsa, thiab coj kav Nws lub nceeg vaj niaj hnub no hauv lub ntiaj teb. Yeej yuav zoo li ntawd tas mus li. Tus Tswv yeej yuav xaiv Nws cov tub qhe. Los ntawm Yexus Khetos lub npe, amees.