Yexus Khetos Txoj Moo Zoo uas Tsom Ntsoov rau Tsev Neeg

Cov lus qhuab qhia ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tsom ntsoov rau peb tsev neeg. Lub tuam tsev yog ib yam tseem ceeb ntawm cov lus qhuab qhia txog peb tsev neeg. Cov kab ke ua peb txais nyob ntawd ua rau peb nyob tau ua ke nrog peb tsev neeg mus ib txhis li nyob hauv peb Leej Txiv Saum Ntuj Ceeb Tsheej lub xub ntiag.

Txij thaum yav tas los txog lub tuam rooj sab laj thaum lub Plaub Hlis Ntuj xyoo 2025 no, Thawj Tswj Hwm Russell M. Nelson tau tshaj tawm tias yuav ua 200 lub tuam tsev tshiab. Nws nyiam tshaj tawm txog cov tuam tsev tshiab thaum yuav kaw txhua lub tuam tsev rooj sab laj, thiab peb sawv daws kuj zoo siab. Tiam sis, vim muaj ntau lub tuam tsev uas tab tom npaj thiab ua tam sim no, yeej tsim nyog uas peb tsis tshaj tawm txog cov tuam tsev tshiab ntau pes tsawg. Yog li ntawd, nrog rau Pawg Kaum Ob tug Thwj Tim txoj kev pom zoo, peb yuav tsis tshaj tawm txog cov tuam tsev tshiab hauv lub rooj sab laj no. Txij no mus peb yuav ua hauj lwm kom muab cov kab ke ntawm lub tuam tsev rau cov mej zeej hauv lub Koom Txoos nyob thoob plaws lub ntiaj teb, tsis hais yuav txiav txim seb thaum twg peb tshaj tawm txog qhov uas yuav ua cov tuam tsev tshiab nyob qhov twg.

Qhov uas kuv nyuam qhuav hais no los twb sau tom qab peb tus Thawj Tswj Hwm Russell M. Nelson tau tas sim neej lawm. Txij no mus tej uas kuv hais los twb sau thiab pom zoo ob peb lim tiam ua ntej, tiam sis tseem yog kuv tej lus qhia, uas tus Tswv tshoov kuv lub siab kom kuv hais.

Kev tshaj tawm txog tsev neeg, uas tau tshaj tawm 30 xyoo tas los lawm, qhia hais tias, “Vajtswv yog tus uas tsa tsev neeg” thiab “tsev neeg yog lub ntsiab ntawm Leej Tsim txoj hau kev rau Nws cov me nyuam txoj hmoov nyob mus ib txhis li.” Zaj lus no kuj tshaj tawm tias “Vajtswv txoj lus txib uas hais kom nws cov me nyuam huaj vam mus puv tas lub ntiaj teb tseem muaj ceem li qhov qub.” Thiab “peb tshaj tawm ntxiv hais tias Vajtswv tau txib kom tej hwj chim dawb ceev ntawm txoj kev muaj tub muaj ki yuav tsum siv tsuas yog ntawm ib tug txiv neej thiab ib tug poj niam xwb, uas tau sib yuav raws li kev cai lij choj ua niam ua txiv.” Ces zoo li Txwj Laug Russell M. Nelson tau qhia ib pawg neeg hauv Brigham Young University tias tsev neeg “yeej tseem ceeb rau Vajtswv txoj hau kev. … Muaj tseeb tiag, ib lub hom phiaj ntawm Nws txoj hau kev yog kom muab tsev neeg tsa nto.”

Neeg coob xav tias Yexus Khetos lub Koom Txoos yog ib lub koom txoos uas saib tsev neeg rau nqi heev. Yeej yog li ntawd! Peb hais txog tsev neeg thaum peb piav txog peb txoj kev txheeb ze Vajtswv thiab lub hom phiaj ntawm peb lub neej hauv ntiaj teb no. Yexus Khetos txoj moo zoo yog peb Leej Txiv Saum Ntuj Ceeb Tsheej txoj hau kev kom pab Nws cov me nyuam ntsuj plig. Peb hais tau tseeb hais tias Vajtswv xub qhia txoj moo zoo rau peb thaum peb tsev neeg mus ib txhis tau sib sab laj, twb muaj raws li Nws txoj hau kev nyob hauv peb tsev neeg hauv lub ntiaj teb no, thiab peb txoj hmoov yog kom muab Vajtswv cov me nyuam tsa nto nrog lawv tsev neeg mus ib txhis li.

Txawm yog peb muaj cov lus qhuab qhia no, yeej muaj kev tawm tsam tej no. Nyob hauv Teb Chaws Amelikas peb raug txom nyem vim kev sib yuav thiab kev muaj me nyuam ploj zuj zus. Rau ib puas xyoo tej tsev neeg uas muaj ib tug niam tsev thiab txiv tsev uas sib yuav los twb poob mus, nrog rau kev muaj me nyuam. Kev sib yuav thiab kev muaj me nyuam ntawm peb lub Koom Txoos cov mej zeej los zoo dua, tiam sis kuj tau nqig mus ntau thiab. Yeej tseem ceeb uas Tsoom Haiv Neeg Ntseeg hauv Hnub Nyoog Kawg tsis txhob cia lawv txoj kev to taub vim li cas peb sib yuav thiab cov me nyuam muaj nqis npaum li cas poob mus. Peb siv zog ua kom muaj yav tom ntej zoo li ntawd. Thawj Tswj Hwm Nelson tau qhia peb tias, “Kev tsa nto yeej yog qhov xwm ntawm ib tse neeg. Tsuas yog dhau los ntawm Yexus Khetos txoj moo zoo cov kab ke cawm seej xwb yuav muab ib tse neeg tsa nto.”

Qhov uas tib neeg tsis sib yuav thiab muaj me nyuam ntau pes tsawg ntxiv los peb yeej to taub vim keeb kwm zoo li ntawd, tiam sis Tsoom Haiv Neeg Ntseeg hauv Hnub Nyoog Kawg tej ntsiab cai thiab tej yam lawv ua los yuav tsum pab txhawb nqa tej yam no—tsis txhob coj raws li luag.

Thaum kuv yog ib tug tub hluas 80 xyoo tas los, kuv ua hauj lwm hauv kuv niam tais thiab yawm txiv liaj teb nyob hauv ib qho chaw uas txhua yam uas peb ua txhua hnub yog raws li kuv tsev neeg coj. Tsis tau muaj TV los sis lwm yam lub tshuab kom tsis txhob ua tej yam nrog kuv tsev neeg. Piv rau niaj hnub nim no mas, nyob hauv peb lub sawm fem ntshe tsis tshua muaj neeg coob uas koom nrog lawv tsev neeg ua tej yam. Qhov uas niaj hnub nim no peb nyob hauv nroog thiab muaj kev thauj mus ub mus no, kev lom zem ntau, thiab kev sib txuas lus sai twb ua rau cov tub hluas ntxhais hluas xav tias lawv lub tsev yog lub tsev pw xwb thiab noj ob peb pluas mov tiam sis tsis muaj niam thiab txiv txoj kev coj lawv lub neej.

Cov niam tsev txiv tsev lub hwj huam kuj nqig zuj zus los ntawm cov mej zeej ntawm lub Koom Txoos txoj kev khwv nyiaj. Thaum yav tas los, ib yam uas pab tej tsev neeg koom siab koom ntsws yog qhov uas lawv yuav tsum khwv ua ke kom ua raws li ib lub hom phiaj—xws li nyob hauv hav zoov los sis tau noj tau haus. Ib tse neeg yog ib pawg uas koom ua ke kom tsim tej yam khoom tawm. Niaj hnub nim no, tej tsev neeg feem ntau tsuas siv tej yam khoom xwb, thiaj li tsis tas koom tes pab ua ke nyob hauv yus tsev neeg.

Txawm cov niam tsev txiv tsev lub hwj huam nqig zuj zus, Vajtswv tseem muab kev lav ris rau Tsoom Haiv Neeg Ntseeg hauv Hnub Nyoog Kawg kom peb qhia peb cov me nyuam npaj rau peb tsev neeg txoj hmoov mus ib txhis li (saib Lus Qhuab Qhia thiab Kev Khi Lus 68:25). Peb feem coob yuav tsum ua li no txawm yog peb tsev neeg tsis zoo li qub los xij. Yeej muaj kev sib nrauj, kev tuag, thiab kev sib cais niaj hnub nim no. Kuv twb raug tej no nyob hauv kuv tsev neeg thaum kuv loj hlob tuaj.

Kuv txiv tas sim neej thaum kuv muaj xya xyoo, yog li ntawd kuv niam tau tu kuv tus kwv thiab tus muam thiab kuv. Txawm nws raug tej yam nyuaj tshaj plaws, nws tau nyiaj mus tom ntej. Nws kho siab thiab tu siab heev, tiam sis nrog tus Tswv txoj kev pab, nws tej lus qhia uas muaj hwj chim txog cov lus qhuab qhia ntawm lub Koom Txoos tau coj peb kev. Nws yeej tau thov ntuj los pab tu nws cov me nyuam, thiab nws tau koob hmoov! Nws tu peb nyob hauv ib tse neeg zoo siab uas yeej nco ntsoov txog peb leej txiv uas tau tas sim neej. Nws qhia peb tias peb yeej muaj ib leej txiv thiab nws muaj ib tug txiv thiab peb yeej yuav ua ib tse neeg mus ib txhis li vim nkawd tau sib yuav hauv lub tuam tsev. Peb leej txiv tsis nyob rau ib ntus xwb vim tus Tswv tau hu nws ua ib txoj hauj lwm txawv xwb.

Kuv paub tias muaj lwm tsev neeg uas tsis zoo siab li no, tiam sis txhua tus niam tsev uas tsis muaj tus txiv qhia tau cov me nyuam txog Leej Txiv Saum Ntuj Ceeb Tsheej txoj kev hlub thiab cov koob hmoov ntawm kev sib yuav hauv lub tuam tsev. Nej kuj muaj peev xwm ua! Leej Txiv Saum Ntuj Ceeb Tsheej txoj hau kev qhia tias txhua tus muaj cib fim ua tau. Peb sawv daws zoo siab vim muaj kev sib yuav hauv lub tuam tsev thiab cov koob hmoov yav tom ntej thaum sib khi ua ke ua ib tse neeg mus ib txhis li. Zoo li kuv niam, peb nyiam hais txog Lihais txoj kev cog lus rau nws tus tub Yakhauj hais tias Vajtswv “yuav fij [nej] tej kev txom nyem los ua tej yam uas pab tau [nej]” (2 Nifais 2:2). Kev cog lus no los hais rau txhua tsev neeg uas yog Tsoom Haiv Neeg Ntseeg hauv Hnub Nyoog Kawg, tsis hais cov uas muaj txhua tus los sis tsis muaj txhua tus tam sim no. Peb yog ib lub koom txoos rau tsev neeg.

Peb cov lus qhuab qhia thiab kev ntseeg tias tsev neeg nyob tau ua ke mus ib txhis li yeej txhawb peb lub zog thiab muab peb sib khi ua ke. Kuv yeej yuav nco ntsoov kuv Yawm Txiv Harris txoj kev cog lus, thaum peb cov me nyuam nyob hauv nws liaj teb nyob ze Payson, Utah. Nws yog tus uas qhia xov xwm uas kuv txiv tau tso lub ntiaj teb no tseg nyob deb heev hauv Denver, Colorado. Kuv khiav rau hauv kuv chav pw thiab txhos caug rau ntawm lub txaj, quaj ntsuag tas li. Yawm txiv lawv kuv qab thiab nrog kuv txhos caug thiab hais tias, “Kuv yuav ua koj txiv.” Txoj kev cog lus ntawd yeej coj yam ntxwv txog tej yam uas cov pog yawg thiab niam tais yawm txiv txawj ua kom pab thaum ib tse neeg xiam ib tug.

Cov niam tsev txiv tsev, nyob ib leeg los sis tau sib yuav—thiab lwm tus, zoo li tej pog yawg los niam tais yawm txiv uas ua lub luag hauj lwm ntawd rau cov me nyuam—yog cov kws qhia zoo. Txoj kev qhia zoo tshaj plaws yog kev coj yam ntxwv zoo. Yus tsev neeg yeej yog qhov chaw zoo tshaj plaws kom qhia thiab kawm txog tej yam uas muaj nqi mus ib txhis li xws li qhov uas kev sib yuav thiab cov me nyuam tseem ceeb npaum li cas, lub hom phiaj ntawm lub neej no, thiab lub hauv paus ntawm kev xyiv fab tiag. Yeej yog qhov chaw zoo tshaj plaws kom kawm tej yam tseem ceeb txog lub neej no thiab, xws li kev ua siab zoo, kev zam txim, kev tswj tus kheej, thiab qhov uas kev kawm ntawv thiab kev ua hauj lwm ncaj ncees muaj nqi npaum li cas.

Muaj tseeb tiag, cov mej zeej hauv lub Koom Txoos feem ntau muaj ib txhia hauv lawv tsev neeg uas tsis ua raws li tej kev cai ntawm txoj moo zoo. Cov no los peb yuav tsum hlub lawv thiab ua siab ntev rau lawv. Hais txog ib leeg txoj kev sib raug zoo nrog ib leeg, peb yuav tsum nco ntsoov tias txoj kev hloov los ua neeg zoo tag nrho tsis yog ib yam uas ua yuav ua hauv lub neej nyuaj siab txhawj xeeb no xwb. Tej lus qhia zoo nyob hauv Lus Qhuab Qhia thiab Kev Khi Lus 138:57–59 qhia peb tias kev hloov siab lees txim thiab kev loj hlob ntawm sab ntsuj plig los yuav muaj ntxiv nyob hauv lub ntuj ntsuj plig tom qab lub neej no. Qhov tseem ceeb ntxiv, thaum peb tsev neeg koom siab ua ke kom ib leeg txhawb ib leeg lub dag zog, peb yuav tsum nco qab tias kev txhaum thiab tej yam peb ua yuam kev hauv lub neej no los txais tau kev zam txim dhau los ntawm kev hloov siab lees txim thiab Yexus Khetos txoj Kev Theej Txhoj uas cawm neeg txoj sia.

Peb tus Cawm Seej Yexus Khetos yog tus uas coj yam ntxwv zoo tshaj plaws. Peb yuav tau koob hmoov yog peb ua peb lub neej raws li Nws tej lus qhia thiab Nws txoj kev txi Nws tus kheej. Kev coj raws li Yexus Khetos thiab ib leeg ua hauj lwm pab ib leeg yeej yog txoj kev zoo tshaj plaws kom kho kev qia dub thiab kev cuaj khaum uas tib neeg coob muaj niaj hnub no.

Cov niam tsev txiv tsev kuj muaj ib lub luag hauj lwm qhia lawv cov me nyuam txog tej txuj ci ntawm lub ntiaj teb. Tej tsev neeg koom siab koom ntsws thaum lawv ua tej yam uas muaj nqi ua ke. Tsev neeg tej lub vaj ua rau tsev neeg sib raug zoo. Kev ua tej yam zoo siab nrog yus tsev neeg ua rau yus tsev neeg sib raug zoo ntxiv. Pw nraum zoov, saib kev sib tw, thiab lwm yam kev lom zem los yeej muaj nqi rau kev koom siab nrog yus tsev neeg. Tsev neeg yuav tau npaj muaj tej kev sib ntsib kom nco txog lawv cov poj koob yawm txwv, thiaj li yuav mus rau lub tuam tsev.

Cov niam tsev txiv tsev yuav tau qhia cov me nyuam kom paub tej txuj ci ua neej, xws li ua hauj lwm hauv vaj nyom thiab hauv tsev. Kev kawm tej yam lus tshiab yog ib txoj kev npaj zoo rau kev ua tub txib thiab lub neej hauv ntiaj teb no. Tus uas qhia tej yam no los cov niam tsev txiv tsev los sis cov pog thiab yawg los sis cov txheeb ze ua tau. Tej tsev neeg huaj vam thaum lawv kawm ua ke thiab sab laj ua ke txog txhua yam xwm txheej ntawm lawv tsev neeg.

Ib txhia yuav hais tias, “Peb tsis muaj sij hawm ua tej ntawd hlo li.” Kom nrhiav sij hawm ua tej yam uas tsim nyog ua, cov niam tsev txiv tsev feem ntau yuav kawm tias lawv qhib tau lawv tsev neeg yog tias lawv muab tag nrho tej lub tshuab tua. Thiab, cov niam tsev txiv tsev, cia li nco nco ntsoov tias, qhov uas cov me nyuam xav tau tiag tiag yog kev siv sij hawm nrog nej.

Cov koob hmoov zoo kawg yuav los rau tej tsev neeg yog lawv thov Vajtswv ua ke, txhos caug ua ke txhua hnub txhua hmo kom ua Vajtswv tsaug thiab thov kom pab lawv rau tej yam uas lawv txhawj txog. Tsev neeg kuj tau koob hmoov thaum lawv pe hawm Vajtswv ua ke nyob hauv lub Koom Txoos tej kev sib ntsib thiab lwm yam kev sib ntsib hawm Vajtswv. Tej dab neeg txog tsev neeg, kev tsim kab lig kev cai hauv tsev neeg, thiab kev hais txog tej yam dawb ceev yeej ua rau ib tse neeg sib raug zoo. Thawj Tswj Hwm Spencer W. Kimball tau hais kom peb nco qab tias “tej zaj dab neeg ntawm peb lub neej thiab peb cov poj koob yawm txwv … yeej muaj hwj chim qhia neeg.” Feem ntau yog tej yam zoo kom tshoov peb thiab peb cov me nyuam thiab xeeb ntxwv lub siab.

Kuv ua tim khawv txog tus Tswv Yexus Khetos tus uas yog peb Leej txiv uas Nyob Mus Ib Txhis Li Tib Leeg Tub. Nws caw peb coj raws li peb tej kev khi lus kom mus rau peb tsev neeg txoj kev koom ua ke saum ntuj ceeb tsheej. $m lub pov thawj hwj, raws li coj los ntawm cov yawm sij uas tau muab txim tim rov qab los hauv lub Tuam Tsev Kirtland, coj tej tsev neeg koom ua ke mus ib txhis li (saib Lus Qhuab Qhia thiab Kev Khi Lus 110:13–16). Tam sim no peb siv cov yawm sij no nyob hauv tus Tswv ntau lub tuam tsev nyob thoob plaws lub ntiaj teb no. Qhov no muaj tseeb. Thov peb los koom ua txoj hauj lwm no, kuv thov, los ntawm Yexus Khetos lub npe, amees.