Ntsia Ntsoov Vajtswv Xwv Kom Muaj Txoj Sia Nyob

Xyoo no thaum lub Rau Hli Ntuj, twb raug xwm txheej phem heev nyob hauv lub teb chaws Lesotho nyob hauv Afikas sab qab teb. 20 tus ntxhais hluas thiab xya tus thawj coj ntawm Ceg Ntseeg Maputsoe ntawm lub Koom Txoos caij Ib lub npav me me mus rau lub tuam nroog, Maseru, kom cov ntxhais hluas ntawm lawv koog chaw koom ua ke. Thaum caij npav ntawm ib txoj kev uas muaj ib txoj mus ib txoj los thaum sawv ntxov, muaj lub tsheb los sab tod los txeeb lub tsheb ua ntej thiab tsoo lub npav. Tsis muaj sij hawm thiab tsis muaj chaw txav mus ces ib me pliag tom qab sib tsoo, lub npav ntxeev thiab dov, ces cia li tawg cig kub hnyiab.

Muaj 15 tug neeg uas tas sim neej, tsis hais kaum tus ntxhais hluas, ob tug thawj coj rau Koom Haum Ntxhais Hluas, thiab ceg ntseeg tus thawj tswj hwm thiab nws tus poj niam. Cov uas tsis tau tas sim neej, tsev neeg, thiab cov phooj ywg twb hais txog tej yam nyob hauv lawv lub siab, xws li kev chim siab, kev nyuaj siab, thiab kev muaj txim. Txawm yog lawv xav li ntawd thiab muaj tej lus nug uas tsis muaj kev teb, lawv ib leeg tau nplij ib leeg lub siab thiab lawv tig mus rau Vajtswv dhau los ntawm cov nkauj dawb huv, cov vaj lug kub, thiab kev thov Vajtswv, uas ua rau lawv txais kev kaj siab lug. Ib tug uas tsis xiam uas muaj kaum xya xyoo Setso’ana Selebeli ua tim khawv tias, “Yexus Khetos hlub peb thiab nrog peb nyob, txawm yog peb lub siab mob los yog.”

Ib tug ntxhais hluas thiab ib tug thawj coj uas nyob hauv tsev kho mob kom pab kho kev kub hnyiab tau kawm Phau Ntawv Maumoos ua ke. Ib tug hais tias, “Wb tab tom nyeem hauv phau Maulaunais, thiab Maulaunais hais raws nraim li kuv xav tam sim no. … Thaum nws hais lus, zoo li nws hais tias, ‘Koj yuav tsum kawm tej lus no vim kuv twb muab sau rau koj kom koj nyiaj dhau qhov no.’”

Nyob hauv lub ntees tuag rau txhua tus uas tso lub ntiaj teb no tseg, tus Xya Caum Coj Cheeb Tsam Txwj Laug Siyabonga Mkhize hais tias, “Lub sij hawm no peb txhua tus yuav tsum tig mus rau tus Tswv thiab thov Nws nplij peb lub siab thiab … tu peb kom daws siab.” Koom Haum Ntxhais Hluas tus thawj tswj hwm los ntawm Ceg Ntseeg Leribe uas nyob ze, Mampho Makura, hais tias: “Tig mus rau tus Tswv, thiaj li txais dag zog kom ywj rau Nws lub siab nyiam. Yexus Khetos yog ‘peb lub hauv paus kev ntseeg thiab ua kom peb kev ntseeg tiav’ [Henplais 12:2]. Tsis txhob ntsia sab tod tiam sis ntsia ntsoov Nws.”

Ntsia ntsoov Nws. Nws tej lus yeej zoo li Amas tej lus ntuas rau nws tus tub Hilamas: “Ntsia ntsoov Vajtswv xwv kom koj muaj sia nyob.” Amas tau hais txog qhov uas Lihais thiab nws cov neeg txoj kev siv lub Liyahaunas yog ib tug yam ntxwv: “Qhov uas koj mloog Khetos txoj lus, uas yuav taw ib txoj kev ncaj rau koj kom mus txog txoj kev zoo siab uas nyob mus ib txhis, kuj yooj yim ib yam li qhov uas peb cov yawg koob ua raws li lub koob taw kev, uas taw ib txoj kev ncaj rau lawv kom mus txog thaj av uas cog lus cia.” Amas hais tias: “Yog lawv ntsia ces lawv yuav muaj sia nyob. … Thiab yog peb yuav ntsia ces peb yuav muaj sia nyob mus ib txhis li.”

Lwm lub sij hawm, Amas tau hais txog thaum Mauxes tsa tus nab tooj thaum cov neeg Ixayees puag thaum ub raug cov nab muaj taug. Tus Tswv hais kom Mauxes muab tooj nchuav ua ib tug nab thiab muab mus ntsia rau ntawm ib tug ncej, thiab cog lus tias “yog nab tom leej twg, kom tus ntawd tsa qhov muag ntsia tus nab tooj ntawd nws thiaj tsis tuag.” Amas piav tias tus nab tooj yog ib lub cim los sis piv txwv txog Yexus Khetos, tus uas luag yuav muab ntsia saum tus ntoo khaub lig. Neeg coob twb ntsia thiab ciaj, tiam sis lwm tus mas, zoo li Amas hais, “tawv heev” lawv thiaj li tsis kam ntsia es lawv tuag mus.

Amas nug hais tias:

“Yog hais tias nej ib nyuag ntsia xwb es qhov ntawd muaj peev xwm kho tau nej zoo, nej puas yuav ntsia nrawm nroos, los sis nej xum ua nej lub siab tawv kom tsis ntseeg, thiab ua neeg tub nkeeg, es tsis kam tsa nej qhov muag mus ntsia, xwv kom nej yuav piam sij?

“… Ces cia li tsa nej qhov muag mus ntsia thiab pib ntseeg Vajtswv Leej Tub, ntseeg tias nws yuav los txhiv nws cov neeg dim, thiab ntseeg tias nws yuav los raug kev txom nyem thiab tuag theej rau lawv tej kev txhaum; thiab ntseeg tias nws yuav sawv hauv qhov tuag rov qab los, qhov uas yuav ua kom muaj tau txoj kev sawv rov los, kom tib neeg txhua tus yuav tau los sawv ntawm nws xub ntiag, kom raug txiav txim thaum txog hnub kawg thiab hnub txiav txim, raws li tej yam lawv ua.”

Muaj tseeb tiag, tej lus ntuas kom “ntsia Vajtswv xwv kom muaj sia nyob” yeej muaj ib lub ntsiab zoo rau peb tsis yog hais txog kev nyob mus ib txhis li xwb, tiam sis yeej ua rau peb lub neej hauv lub ntiaj teb no tau zoo. Cia li nco ntsoov tej lus ntawm Muam Selebeli nyob hauv Lesotho uas twb hais lawm—“Yexus Khetos hlub peb thiab nrog peb nyob, txawm yog peb lub siab mob los yog.”

Nyob hauv ib lub ntiaj teb uas poob lawm—tus dab phem chim thiab txhua tus tsis yog neeg zoo tag nrho—peb yeej ib txwm yuav muaj kev poob siab thiab kev tu siab, kev txom nyem thiab kev tu siab, kev poob siab thiab kev xiam, kev raug tsim txom thiab raug tsis ncaj ncees. Tsuas yog peb ntsia ntsoov Vajtswv xwb, tib neeg, tej tsev neeg, thiab tej teb chaws thiaj vam meej tau. Thawj Tswj Hwm Russell M. Nelson tau qhia hais tias: “Vim tus Cawm Seej, dhau los ntawm Nws txoj Kev Theej Txhoj, tau txhiv peb txhua tus dim tej kev qaug zog, kev ua yuam kev, thiab kev txhaum, thiab vim rau qhov Nws raug txhua tus mob, kev txhawj, thiab lub nra uas nej ib txwm tau ris [saib Amas 7:11–13], ces, thaum nej hloov siab lees txim thiab nrhiav Nws txoj kev pab, nej yuav muaj peev xwm nce siab dua lub ntiaj teb ntxhov hnyo no.”

Nyob hauv Phau Ntawv Maumoos tsis muaj ib txoj kev cog lus uas tus Tswv hais ntau dua li cov lus no: “Npaum li uas nej ua raws li kuv tej lus txib nej yuav vam meej nyob rau hauv thaj av; tiam sis npaum li uas nej tsis coj kuv tej lus txib nej yuav raug txiav tawm ntawm kuv xub ntiag mus.” Tib neeg hauv Phau Ntawv Maumoos lub neej nyob ob peb txhiab xyoo qhia tias tej lus no muaj tseeb. “Vam meej” txhais tias lawv muaj Vajtswv tej lus qhia thiab cov koob hmoov hauv lawv lub neej. “Vam meej” txhais tias lawv muaj nyiaj txiag txaus kom sib yuav, tu lawv tsev neeg, thiab muaj txaus txhawb pab lwm tus. “Vam meej” txhais tias lawv muaj peev xwm kov yeej tej yam nyuaj thiab tej kev sim siab. Nrog tus Tswv txoj kev tshav ntuj, Nws “ua kom tej ntawd muaj nqis rau [lawv],” pab lawv hloov ua dawb huv, thiab ua rau lawv nrog Nws sib raug zoo ntxiv.

Amas piav hais tias kev ntsia ntsoov Vajtswv yog kev ua raws li Nws cov lus txib, thov Nws tsis tu tsis tseg kom Nws txhawb nqa nej, sab laj nrog tus Tswv txog txhua yam, thiab cia nej lub siab ris Vajtswv txiaj puv npo. Vajtswv cov lus txib thiab tej lus qhia los muaj nyob hauv cov vaj lug kub thiab Nws cov tub qhe tej lus. Tej lub ntsiab cai thiab tej lus qhia nyob hauv “Tsev Neeg: Ib txoj Kev Tshaj Tawm rau lub Ntiaj Teb” yeej yog ib yam piv txwv txog qhov no. Muaj tej lus qhia ntxiv nyob hauv phau ntawv For the Strength of Youth. Xyoo no Koom Haum Tub Hluas thiab Koom Haum Ntxhais Hluas lub ntsiab lus yog “Ntsia ntsoov Khetos,” uas los ntawm tus Tswv tej lus qhia rau Joseph Smith thiab Oliver Cowdery: “Ntsia ntsoov kuv nrog txhua txoj kev xav; tsis txhob ua xyem xyav, tsis txhob ntshai.” For the Strength of Youth hais txog Vajtswv tej lus txib thiab tej kev cai tseem ceeb thiab qhia kom peb paub ntsia ntsoov tus Tswv thaum peb txiav txim ua tej yam zoo. Tsis yog ib phau ntawv qhia rau cov tub hluas ntxhais hluas xwb tiam sis qhia peb txhua tus.

Ib qho piv txwv tseem ceeb yog qhov uas phau For the Strength of Youth muaj tej lus qhia tseem ceeb nyob hauv tshooj hu ua “Koj lub Cev Dawb Ceev.” Tshooj no qhia tias: “Saib koj lub cev—thiab lwm tus lub cev—rau nqi. Thaum koj txiav txim txog koj ris tsho, plaub hau, thiab yam ntxwv, nug koj tus kheej, ‘Kuv puas saib kuv lub cev yog ib lub txiaj ntsim dawb ceev uas Vajtswv muab rau kuv?’”

For the Strength of Youth hais ntxiv hais tias: “Muab kev pw ua ke thiab tej kev xav txog tej ntawd ceev cia kom dawb huv. Yuav tsum tsis txhob tso dag tso luag los sis tsim kev lom zem txog tej no. Yog tsis tau muaj ib tug txiv neej thiab ib tug poj niam sib yuav, yeej yog kev txhaum kom kov tej qhov ntawm lwm tus neeg lub cev tsis hais muaj ris tsho npog los yog. Thaum koj xaiv ua, saib, nyeem, mloog, xav txog, sau ntawv, los sis ntaus ntawv txog dab tsi, tsis txhob ua ib yam dab tsi uas txhob txwm ua rau koj los sis lwm tus ntshaw kev plees kev yi.”

Qhov no ua rau peb nco txog Thawj Tswj Hwm Nelson tej lus ntuas:

“Tsis muaj ntau yam uas yuav ua rau nej lub neej nyuaj tshaj qhov uas nej ua txhaum txoj kev cai [coj dawb huv] no. Rau nej cov uas tau khi lus nrog Vajtswv, kev coj tsis tsim txiaj yeej yog ib txoj kev sai kom poob nej zaj lus tim khawv.

“… Lub hwj chim tsim neeg yog ib lub sam xeeb ntawm kev ua zoo li Vajtswv uas Leej Txiv Saum Ntuj Ceeb Tsheej cia Nws cov me nyuam hauv lub ntiaj teb siv. Yog li ntawd, Vajtswv tau tsim tej lus qhia meej kom siv lub hwj chim no. Kev pw ua ke yeej yog qhov uas pub ib tug txiv neej thiab ib tug poj niam uas tau sib yuav ua xwb.

“Neeg coob hauv lub ntiaj teb no tsis ntseeg qhov no, tiam sis cov pej xeem tej kev xav yeej tsis qhia peb tias qhov tseeb yog dab tsi. Tus Tswv tau qhia tias tsis muaj ib tug neeg uas tsis coj dawb huv yuav nkag hauv lub nceeg vaj xilethi-aus. … Yog tias nej tsis coj dawb huv, kuv thov kom nej hloov siab lees txim. Cia li los cuag Khetos thiab txais Nws tej lus cog tseg txog kev zam txim tag nrho thaum nej hloov siab lees txim rau nej tej kev txhaum [saib Yaxayas 1:16–18; Lus Qhuab Qhia thiab Kev Khi Lus 58:42–43].”

Cia li nco txog tej lus cog tseg hauv Phau Ntawv Maumoos, uas qhia tias qhov fab ntxwv ntawm kev vam meej tsis yog kev tsis muaj nyiaj—yeej yog kev raug txiav tawm ntawm tus Tswv lub xub ntiag mus. Nws lub xub ntiag hais txog qhov uas yus muaj Nws tus Ntsuj Plig nyob hauv yus lub neej. Txhua tus muaj Khetos txoj Kev Kaj thaum lawv yug los hauv lub ntiaj teb. Tsis tas li ntawd xwb, ib txhia ua kev cai raus dej thiab txais lub txiaj ntsim Vaj Ntsuj Plig Dawb Huv kom muaj txoj kev kaj ntxiv. Nws qhia thiab coj tib neeg, pab txhawb nqa tib neeg tej lub txiaj ntsim thiab rab peev xwm, thiab pab lawv txhob ua raws li tej yam phem, txiav txim ua tej yam tsis zoo, thiab kom txhob ua yuam kev.

Ib yam li nej, kuv paub ib txhia uas twb muaj lub txiaj ntsim Vaj Ntsuj Plig Dawb Huv tiam sis vim lawv tsis ua raws li Vajtswv cov lus txib ntxiv lawv thiaj li cia lub txiaj ntsim ntawd ploj mus. Ua rau kuv xav txog ib tug uas twb raug nws txoj kev ua mej zeej hauv lub Koom Txoos tshem mus vim nws ua txhaum. Nws hais tias thaum xub thawj nws tu siab heev. Nws xav tias cov thawj coj uas tsis zoo tag nrho tau txiav txim rau nws. Nws paub tias nws twb ua txhaum, tiam sis nws zam txim rau nws tus kheej vim nws pom lwm tus ua yuam kev thiab ua tsis zoo tag nrho. Tom qab ib ntus, nws pib txaus siab ua neej nyob lub Koom Txoos sab nraud vim tsis tas lav ris tej txoj kev hu, tsis tas mus rau kev sib ntsib teev ntuj thiab tsis tas txhawb pab lwm tus.

Nws ua li no rau ib ntus, tiam sis nws pib to taub meej zuj zus tias nws tsis muaj tus Vaj Ntsuj Plig Dawb Huv hauv nws lub neej—los yog hais tias nws tsis nyob hauv Vajtswv xub ntiag. Nws paub tias kev muaj tus Ntsuj Plig txoj kev coj, tej lus qhia thiab kev txhawb nqa txhua hnub zoo li cas, thiab nws xav rov qab muaj lub hwj huam ntawd. Thaum kawg, nws tau ua li nws yuav tsum ua kom hloov siab lees txim thiab rov qab tsim nyog ua kev cai raus dej thiab txais tus Ntsuj Plig.

Tej lub hauv paus uas tib neeg ntsia kom nrhiav lub ntsiab, kev zoo siab, thiab kev pab rau lawv lub neej los tsis muaj qhov kawg. Feem coob los “lawv ntsia dhau lub hom phiaj.” Tiam sis peb tsis tas “ua li tej me nyuam yaus uas mloog cov neeg dag tej lus, thiab raws luag qab rau ub rau no.” Yog peb ntsia ntsoov Vajtswv, peb yuav nyob kaj siab lug thaum raug tej yam nyuaj thiab peb txoj kev ntseeg yuav loj tuaj txawm yog peb muaj tej lub sij hawm uas peb ua xyem xyav thiab muaj teeb meem ntawm sab ntsuj plig. Peb yuav txais dag zog thaum neeg tawm tsam peb los sis peb kho siab. Peb yuav muab lub hom phiaj nrog qhov uas muaj tam sim no sib haum. Yeej tsis muaj lwm txoj kev tsuas muaj txoj kev uas Vajtswv tau tsa: “Txhua haiv neeg uas nyob hauv ntiaj teb, cia li tig los cuag kuv nej thiaj yuav dim! Kuv thiaj yog Vajtswv yeej tsis muaj dua lwm tus vaj tswv li.”

Kev ntsia ntsoov Vajtswv txhais tias Nws tsis yog ib lub hom phiaj xwb; tiam sis, nws yeej yog peb lub hom phiaj tseem ceeb tshaj plaws. Kuv rov qab hais txog lub npav kev sib tsoo nyob hauv Lesotho thaum lub Rau Hli Ntuj tas los. Thaum nws pw hauv ib lub txaj hauv tsev kho mob, ib tug thawj coj hauv Koom Haum Ntxhais Hluas uas tsis xiam, ib tug uas tsis ntseeg Vajtswv ua ntej nws koom lub Koom Txoos, nws hais tias nws lub hom phiaj tam sim no yog kom nrhiav seb vim li cas nws tsis tau tso lub ntiaj teb no tseg. Nws hais tias, “Kev ua hauj lwm rau Vajtswv tsis tu tsis tseg yog qhov uas yuav pab kuv txais lus teb, yog tias yuav muaj tej lus teb. “Kuv tau xav hais tias kuv yeej hlub Vajtswv, tiam sis tam sim no kuv yeej hlub Vajtswv kawg siab kawg ntsws kawg plab kawg plawv tiag tiag. Nws yog tus tseem ceeb tshaj plaws hauv kuv lub neej.”

Kuv ua tim khawv txog Leej Txiv, Leej Tub, thiab tus Vaj Ntsuj Plig Dawb Huv uas koom siab koom ntsws ntawm lawv tej lus, tej kev xav, lub hom phiaj, thiab tej yam lawv ua, lawv yog ib tug Vajtswv, uas peb ntsia ntsoov kom tau txhua yam zoo. Kuv ua tim khawv txog Yexus Khetos txoj Kev Theej Txhoj uas muaj hwj chim kom muaj raws li cov lus cog tseg zoo no: “Ntsia ntsoov kuv, thiab nyiaj mus kom txog thaum kawg, thiab nej yuav muaj txoj sia; vim kuv yuav muab txoj sia nyob mus ib txhis rau tus uas nyiaj mus kom txog thaum kawg.” Los ntawm Yexus Khetos lub npe, amees.