Tsis Txhob Tso Nej txoj Kev Hlub Tshua Tseg
Nej txais tau txoj kev pab los saum ntuj los thiab txais kev kho mob txawm tias nej yog tib neeg uas ua yuam kev qee zaum.
Muaj ib zaug ib tug kws qhia ntawv qhia tias ib tug ntses hiav txwv—txawm tias loj heev—nqos tsis tau ib tug tib neeg vim cov ntses hiav txwv no lub caj pas nqaim. Muaj ib tug ntxhais hluas uas keb hais tias, “Tiam sis muaj ib tug ntses hiav txwv nqos Yaunas ne.” Tus kws qhia teb hais tais, “Tsis tau hlo li.” Tus ntxhais hluas tsis txaus siab, nws hais tais, “Yog li ntawd, thaum kuv mus txog lub ntuj ceeb tsheej, kuv mam li nug Yaunas.” Tus kws qhia hnya hais tias, “Tsam Yaunas yog ib tug neeg txhaum thiab tsis tau mus txog lub ntuj ceeb tsheej ne?” Tus ntxhais hluas teb zoj hais tias, “Ces koj nug nws los tau.”
Peb luag, tiam sis tsim nyog peb nco txog lub hwj chim Yaunas zaj dab neeg muaj rau “tus txo hwj chim nrhiav kev zoo siab,” twb yog lawv cov uas nyiaj ntxeem.
Vajtswv txib kom Yaunas “mus tom Nineves” hais kom lawv hloov siab lees txim. Tiam sis Nineves yog haiv neeg Ixayees tus yeeb ncuab yav thaud—ces Yaunas txawm khiav mus caij nkoj mus rau Tarshish. Thaum nws caij nkoj khiav tawm ntawm nws lub luag hauj lwm, txawm muaj cua dab cua dub nplawm lub nkoj. Paub tseeb hais tias yog tim nws vim yog nws tsis mloog lus, Yaunas hais kom cov tsav nkoj muab nws pov hauv dej hiav txwv. Nov ua rau tus dej hiav txwv tus, es ua li ntawd cawm tau nws cov khub nkoj.
Yog ib qho txuj ci tseem ceeb uas Yaunas tsis tuag thaum ib tug “ntses loj” uas Tswv “npaj tseg” nqos nws. Nws nyob txom nyem hauv lub qhov chaw dub thiab tsw ntxhiab heev kam peb hnub mus txog thaum tus ntses loj nti nws tawm rau ntawm daim av nqhuab. Ces nws txiav txim siab mus tom Nineves. Txawm yog li ntawd, thaum lub nroog hloov siab lees txim thiab tsis raug puas tsuaj, Yaunas tsis txaus siab tias Vajtswv muaj kev hlub tshua rau Yaunas cov yeeb ncuab. Vajtswv rub siab ntev qhia Yaunas hais tias Nws hlub thiab xav cawm tag nrho Nws cov me nyuam dim.
Nim no nws dawm ob peb zaug ua nws lub luag hauj lwm, Yaunas yog ib qho piv txwv zoo hais tias nyob hauv lub neej no “txhua tus poob lawm.” Peb tsis tshua hais lus txog txoj Kev Poob. Tiam sis yog ib txoj koob hmoov yog tias peb to taub cov lus qhuab qhia zoo thiab tau ib zaj lus tim khawv ntawm sab ntsuj plig yog vim li cas peb txhua tus muaj kev cov nyom ntau txawm yog ntawm kev ncaj ncees, sab cev nqaij daim tawv, thiab qhov chaw puag ncig. Nyob saum lub ntiaj teb, tej nroj phem tuaj, tej pob txha khov khov lov, thiab peb txhua tus “puav leej ua txhaum thiab tu ncua Vajtswv lub yeeb koob lawm.”.” Tiam sis lub neej no—uas yog vim Adas thiab Evas txoj kev xaiv—yeej tseem ceeb rau peb txoj hau kev muaj sia nyob: “kom [peb] yuav muaj kev xyiv fab”! Ib yam li peb thawj niam txiv tau kawm, tsuas yog thaum peb saj qhov iab thiab hnov qhov mob ntawm ib lub ntiaj teb uas poob lawm, peb thiaj to taub zoo, thiab muaj kev xyiv fab, thaum peb muaj kev zoo siab tseeb.
Muaj ib zaj lus tim khawv txog Txoj Kev Poob tsis zam kev rau tej kev txhaum los sis cia yus lam tau lam ua yus lub luag hauj lwm hauv lub neej no, uas yeej los hais kom peb rau siab, coj ncaj ncees, thiab lav ris tej yam peb ua. Tiam sis qhov uas peb to taub txog txoj Kev Poob yuav pab peb daws peb tej kev nyuaj siab thaum muaj kev cov nyom ntau, los yog thaum peb pom tias ib tug neeg hauv peb tsev neeg, peb ib tug phooj ywg, los yog peb ib tug thawj coj yuam kev coj tsis ncaj. Feem ntau tej yam zoo li no ua rau peb tuav rawv kev tu siab thiab ua rau peb txoj kev ntseeg tsis muaj zog. Ib zaj lus tim khawv txog txoj Kev Poob yuav pab peb coj zoo li Vajtswv hauv phau Yaunas, muaj “siab hlub tshua, rub siab ntev, thiab ua siab zoo” rau txhua tus—suav peb tus kheej thiab—txawm tias peb tsis zoo tag nrho.
Qhov zoo tshaj qhia txog tej yam uas muaj los vim yog txoj Kev Poob, yog Yaunas zaj dab neeg no coj peb mus cuag Yexus tus uas cawm peb dim tau ntawm tej yam muaj los no. Qhov uas Yaunas kam muab nws tus kheej pov rau hauv dej hiav txwv kom thiaj cawm tau nws cov khub nkoj yeej zoo li tus Khetos tiag. Thiab muaj peb zaug thaum luag nug Yexus kom ua ib qho txuj ci tseem ceeb qhia tias Nws yog los saum ntuj los, Yexus teb tias “Kuv yuav tsis ua! Zaj txuj ci uas nej yuav pom tsuas yog Yaunas zaj xwb,” es hais tias ib yam li Yaunas nyob “hauv tus ntses loj loj lub plab tau peb hnub peb hmos li cas, Neeg Leej Tub yuav nyob hauv nruab av peb hnub peb hmos ib yam li ntawd.” Tej zaum tsis tshua yog lawm siv Yaunas ua ib lub cim txog tus Cawm Seej txoj kev txi tuag thiab txoj Kev Sawv Rov Los. Txawm yog li ntawd, twb yog vim li ntawd Yauhas zaj lus tim khawv thiab txoj kev muab siab npuab Yexus Khetos, uas nws qhia tawm hauv tus ntses loj lub plab, thiaj muaj zog thiab tshoov yus lub siab.
Yaunas txoj kev quaj thov yog txoj kev quaj thov ntawm ib tug neeg uas raug txom nyem, es twb yog tim nws tus kheej thiaj txom nyem. Rau ib tug neeg ntseeg, thaum raug txom nyem vim yog ib yam yus ua, hais, los sis xyaum ua, txawm tias yeej muaj lwm yam zoo uas yus ua, qhov uas raug txom nyem vim yog tej yam yus ua ntawd ua rau yus xav tias yus nyob yus ib leeg xwb tsis muaj leej twg pab tau. Tiam sis txawm tias qhov teeb meem zoo li cas los sis loj npaum li cas los, yeej muaj chaw cia siab, kho mob, thiab kev zoo siab. Cia Li Mloog Yaunas
“Tus Tswv, vim kuv txoj kev txom nyem, kuv thov koj … ; Kuv nyob hauv tub tuag teb quaj thov koj pab kuv. …
“Koj muab kuv pov rau hauv qab thu hiav txwv qhov uas tob tshaj plaws; …
“Kuv [thiaj] xav hais tias koj muab kuv xyeeb tawm ntawm koj lub xub ntiag mus, thiab kuv yuav tsis tau pom koj lub tuam tsev uas dawb huv ib zaug li lawm.
“Dej nphau nphwv los npog kuv thiab twb ua rau kuv ua tsis taus pa li lawm; hiav txwv nyab puag ncig kuv thiab tej ntxhuab hauv hiav txwv rig thoob plaws kuv lub taub hau.
“Kuv poob mus ti nkaus rau hauv tej qab taw roob; … tiam sis koj rub kuv tawm hauv tiv txwv dej los muaj txoj sia nyob. …
“Thaum uas kuv txoj sia yuav tu, kuv thov koj pab kuv; koj nyob hauv koj lub tuam tsev uas dawb huv hnov kuv tej lus thov.
“Cov neeg pe tej mlom uas tsis muaj nqis dab tsi yeej tso lawv txoj kev hlub tshua tseg.
“Tiam sis kuv yuav hu nkauj qhuas koj yuav tua tsiaj fij rau koj, thiab kuv yuav ua raws li uas kuv tau cog lus tseg rau koj lawm. Txoj kev cawm dim yog los ntawm tus Tswv los xwb.”
Txawm yog ntau xyoo dhau los lawm los, kuv tseem qhia nej tau kuv zaum qhov twg, thiab kuv hnov li cas hauv nruab siab, thaum kuv nyob hauv tub tuag teb vim yog muaj teeb meem loj, es kuv nrhiav tau nqe vaj lug kub no. Rau nej tus twg uas xav ib yam li kuv xav thaum ntawd—hais tias nej raug muab pov tseg, tog hauv qab thu dej, dej hiav txwv nyab puag ncig nej thiab tej ntxhuab hauv hiav txwv rig thoob plaws nej lub taub hau—kuv thov, vim yog Yaunas tus yam ntxwv no, yog li no hais tias: Tsis txhob tso nej txoj kev hlub tshua tseg Nej txais tau txoj kev pab los saum ntuj los thiab txais kev kho mob txawm tias nej yog tib neeg uas ua yuam kev qee zaum. Txoj kev hlub tshua uas hais no dhau los ntawm Yexus Khetos los. Vim Nws paub thiab hlub nej yam zoo tag nrho li, Nws muab txoj kev hlub tshua rau nej ua “nej tus kheej li,” uas txhais tau tias phim nej, yuav pab daws nej tej kev kub ntxhov thiab kho nej tej kev mob. Yog li ntawd, tsis txhob tig mus tawm ntawm txoj kev hlub tshua ntawd. Txais yuav txoj kev hlub tshua ntawd. Tsis txhob mloog tus yeeb ncuab “tej lus dag” uas yuav ntxias nej tias yuav tau kev daws thaum caij nkoj tawm ntawm nej lub luag hauj lwm ntawm sab ntsuj plig. Tsis txhob ua li ntawd, ua raws li Yaunas tus yam ntxwv thaum nws hloov siab lees txim. Quaj thov txog Vajtswv. Mus tom lub tuam tsev. Tuav rawv nej tej kev khi lus. Ua hauj lwm pab tus Tswv, Nws lub Koom Txoos, thiab lwm tus neeg muaj kev txi thiab kev ua Vajtswv tsaug.
Thaum peb ua li no peb yuav pom tau Vajtswv txoj kev hlub peb yam tshwj xeeb li—txoj kev hlub uas Phau Vaj Lug Kub Npaivnpaum Henplais hu ua hesed. Nej yuav pom thiab hnov lub hwj chim ntawm Vajtswv “tej kev hlub tshua” uas yuav ua rau nej “muaj hwj chim … mus txog … dim tau” ntawm ib txoj kev txhaum los sis txoj kev cov nyom twg. Tej zaum thaum xub thawj yuav pom tsis tau Vajtswv txoj kev hlub tshua vim yog tej kev nyuaj siab. Tiam sis thaum nej yeej meem “ua raws li uas [nej] tau cog lus tseg,” qhov uas pom tau ntawd yuav ci ntsa iab tuaj rau hauv nej sab ntsuj plig. Thiab los ntawm qhov kev pom ntawd nej yuav nrhiav tau kev cia siab thiab kev kho mob, thiab tsis yog li ntawd xwb, nej yuav txais txoj kev xyiv fab, twb yog thaum nej tseem tab tom ntsib kev kub ntxhov. Ib yam li Thawj Tswj Hwm Nelson tau qhia peb zoo hais tias, “Thaum peb tsom ntsoov rau Vajtswv txoj kev cawm seej thiab Yexus Khetos … txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej. Kev xyiv fab los vim yog Nws.”
Txawm tias nej raug txom nyem li Yaunas, los yog tej kev cov nyom niaj hnub nim no, txoj lus caw yog tib yam: Tsis txhob tso nej txoj kev hlub tshua tseg. Cia li tig mus saib Yaunas lub cim, tus Khetos uas muaj sia nyob, uas sawv hauv qhov tuag rov qab los thiab kov yeej txhua yam—rau nej. Tig mus cuag Nws. Ntseeg Nws. Ua hauj lwm rau Nws. Luag ntxhi. Vim nyob hauv tus Khetos, thiab hauv Nws ib leeg xwb, peb thiaj nrhiav tau tej kev kho mob ntawm txoj Kev Poob uas peb xav tau thiab xav nrhiav kom tau. Kuv ua tim khawv tias qhov no muaj tseeb. Los ntawm Yexus Khetos lub npe dawb ceev, amees.