”کیا تُو مُجھ سے محبّت رکھتا ہے؟“

تِبریاس کی جِھیل کِنارے پطرس اور جی اُٹھے خُداوند کے درمیان سبق آموز تبادلے میں، ہم ان طریقوں کے بارے میں سیکھتے ہیں جن سے ہم خُداوند کے لِیے اپنی محبّت ظاہر کر سکتے ہیں۔

”یِسُوعؔ نے شمعُوؔن پطرس سے کہا اَے شمعُوؔن یُوحنّا کے بیٹے کیا تُو اِن سے زِیادہ مُجھ سے محبّت رکھتا ہے؟ اُس نے اُس سے کہا، ہاں، خُداوند؛ تُو تو جانتا ہی ہے کہ مَیں تُجھے عزِیز رکھتا ہُوں۔“

خُداوند کی طرف سے اِس جانچ میں کلیدی سوال یہ ہے ”کیا تُو مُجھ سے اِن سے زیادہ محبّت رکھتا ہے؟“ ہم خُداوند سے اپنی محبّت کا اِظہار کرتے ہیں جب ہم اُسے ”اِن“ سے بالا رکھتے ہیں، اور ”یہ“ کوئی شخص ہوسکتا ہے، کوئی بھی سرگرمی، یا کوئی بھی چیز جو اُسے ہماری زِندگیوں میں سب سے اہم اثر و رسوخ رکھنے سے روکتی ہے۔

ایک دِن، ایک ہفتہ، ایک مہینہ، یا ایک سال میں کبھی بھی اِتنا وقت نہیں ہوگا کہ ہم وہ سب کُچھ حاصل کر لیں جِس کی ہمیں چاہ ہے۔ فانی زِندگی کے امتحان کا ایک حِصّہ یہ ہے کہ وقت کے قیمتی وسائل کو ہماری اَبَدی بھلائی کی سب سے اہم چیزوں کے لِیے اِستعمال کیا جائے اور اُن چیزوں کو چھوڑ دیا جائے جو کم اہم ہیں۔

صدر رسل ایم نیلسن نے فرمایا کہ: ”ہم میں سے ہر ایک کے لِیے سوال … ایک ہی ہے۔ … کیا آپ خُدا کو اپنی زِندگی پر سب سے زیادہ اثر پذیر ہونے دینے کے لِیے رضامند ہیں؟ کیا آپ اُس کے کلام، اُس کے اَحکام، اور اُس کے عہُود کو اپنے روزمرّہ کاموں پر اثر پذیر ہونے دیں گے؟ کیا آپ اُس کی آواز کو ہر کسی سے زیادہ ترجیح دیں گے؟ کیا آپ تمام دُوسرے عزائم سے بالاتر ہو کر وہ سب کُچھ کرنے کے مُشتاق ہیں جو وہ چاہتا ہے؟ کیا آپ اپنی مرضی کو اُس کی مرضی میں ضَم کرنے کے مُشتاق ہیں؟“ ہم خُدا سے اپنی شاگردی اور محبّت کا مظاہرہ تب کرتے ہیں جب ہم اُسے اپنی اوّلین ترجیح بناتے ہیں۔

پطرس اور نجات دہندہ کے درمیان اِسی گُفت گُو کی اگلی آیت میں، ہم ایک اور طریقہ کے بارے میں سیکھتے ہیں جِس سے خُداوند ہماری محبّت کے اِظہار کو پہچانتا ہے: ”[خُداوند] نے دُوسری بار پھر اُس سے کہا، شمعون، یُوحنّا كے بیٹے، کیا تُو مُجھ سے محبّت رکھتا ہے؟ اُس نے اُسے جواب دیا، ”ہاں خُداوند؛ تُو تو جانتا ہی ہے کہ مَیں تُجھے عزیز رکھتا ہُوں۔ اُس نے اُسے کہا، تو مَیری بھیڑوں کی گلّہ بانی کر۔“

جب ہم اُس کے بچّوں کی خِدمت کرتے، سُنتے، پیار کرتے، حوصلہ بڑھاتے یا خِدمت گُزاری کرتے ہیں تو ہم اپنے آسمانی باپ سے محبّت کا اِظہار کرتے ہیں۔ وہ خِدمت دُوسروں كو واقعی بے عیب دیکھنے جیسی سادہ ہو سکتی ہے۔ عقائد اور عہُود کی 76ویں فَصل میں ہمیں اُن لوگوں کے کردار کی ایک جَھلک ملتی ہے جو سیلیسٹیئل جلال کے وارث ہُوں گے: ”وہ اَیسے دیکھتے ہیں جیسے اُن کو دیکھا گیا، اور اَیسے جانتے ہیں جیسے اُن کو جانا گیا۔“ وہ دُوسروں کو اَیسے دیکھتے ہیں جیسے خُدا اُنھیں دیکھتا ہے، اور وہ اُنھیں اُس جلالی الہٰی صلاحیت کے ساتھ دیکھتا ہے جو وہ بن سکتے ہیں۔

اپنے مِشن سے گھر واپسی پر، مَیں نے مالیوں کے کاروبار کو سنبھالا جو مَیں نے اور میرے بھائی نے نوجوانی میں شرُوع کیا تھا۔ مَیں اپنی یونیورسٹی کی تعلیم میں بھی مصروف تھا۔ موسمِ بہار کے ایک ہفتے، بھاری بارشوں اور سر چَڑھتے ہُوئے سالانہ امتحانات نے مُجھے مغلوب کر دیا اور مَیں لان کے کام میں پیچھے رہ گیا۔

ہفتے کے دوران میں آسمان صاف ہو گیا، اور مَیں نے اپنی کلاسوں کے بعد کام مُکمل کرنے کی منصوبہ بندی کی۔ مگر جب مَیں گھر پُہنچا، تو میرا ٹرک اور سازو سامان غائب تھے۔ مُتجسس، مَیں نے طے شُدہ باغیچوں کا دورہ کِیا؛ ہر ایک کو پہلے ہی خوبصورتی سے تَراش دیا گیا تھا۔ طے شُدہ آخری باغیچے میں، مَیں نے اپنے چھوٹے بھائی کو گھاس کاٹنے کی مشین کے پیچھے چلتے ہُوئے دیکھا۔ اُس نے مُجھے دیکھا، مُسکرایا اور ہاتھ ہِلایا۔ شُکرگُزاری سے مغلوب، میَں نے اُسے گلے لگایا اور اُس کا شُکریہ ادا کِیا۔ اُس کے پُرمعنی خِدمتی عمل نے اُس کے ساتھ میرے پیار اور وفاداری کو گہرا کر دِیا۔ ایک دوسرے کی خِدمت خُدا اور اُس کے محبوب بیٹے کے لِیے ہماری محبّت کا واضح اِظہار ہے۔

ہم خُدا کے لِیے اپنی محبّت کا اِظہار شُکر گزار دل رکھتے ہُوئے بھی کرتے ہیں۔ خُداوند نے فرمایا ”اِنسان خُدا کو کسی بات پر غُصّہ نہیں دِلاتا، … سوائے اُن کے جو ہر کام میں اُس کے ہاتھ کا اِعتراف نہیں کرتے۔“ ہم اُسے اپنی زِندگی میں ہر اچھی چیز کا ذریعہ تسلیم کرتے ہُوئے خُدا سے اپنی محبّت کا اِظہار کرتے ہیں۔

کمپنی شرُوع کرنے کے ابتدائی دِنوں میں، مَیں اور میرا کاروباری ساتھی اہم ملاقاتوں سے پہلے، آسمانی باپ کی مدد کے طالب ہوتے ہُوئے، خلوصِ دِل سے دُعا مانگتے تھے۔ بار بار خُدا ہماری دُعاؤں کا جواب دیتا، اور ہماری میٹنگز اچھی جاتی رہیں۔ ایک میٹنگ کے بعد، مَیرے کاروباری ساتھی نے بتایا کہ ہم مدد طلب کرنے میں تیز مگر شُکرگزاری کرنے میں سُست تھے۔ اُس کے بعد سے، ہم نے اپنی کامیابی میں خُداوند کے ہاتھ کو پہچانتے ہُوئے شُکر گزاری کی مُخلصانہ دُعائیں کرنے کی عادت بنا لی۔ ہم خُدا کے لِیے اپنی محبّت کا اِظہار ”تشکرانہ رویے“ کے ساتھ کرتے ہیں۔

ایک اور طریقہ جِس سے ہم آسمانی باپ اور اُس کے پیارے بیٹے کے لِیے اپنی محبّت ظاہر کرتے ہیں وہ یہ ہے کہ ہم اُن کی اطاعت کرنے کا فیصلہ کریں۔ نجات دہندہ نے فرمایا، ”اگر تُم مُجھ سے محبّت رکھتے ہو، تو میرے حُکموں پر عمل کرو۔“ اِس قسم کی اطاعت نہ تو اندھی ہے اور نہ ہی جبری بلکہ محبّت کا مُخلصانہ اور رضامندانہ اِظہار ہے۔ آسمانی باپ چاہتا ہے کہ ہم چاہیں کہ فرماں بردار بنیں۔ سسٹر ٹیمرا ڈبلیو رُونیا نے اِسے ”پیار بھری اِطاعت“ کہا۔ اُس نے کہا، ”اگرچہ ہماری فرماں برداری ابھی تک کامِل نہیں ہے پھر بھی، ہم نے محبّت سے فرماں برداری کی اب، بار بار کوشش کو چُنتے ہیں، کیوں کہ ہم اُسے محبّت کرتے ہیں۔“

ہمارے دِل میں احساس پَیدا کرنے کے لِیے آسمانی باپ نے ہمیں اِرادت عطا کی ہے تاکہ ہمیں اُس کو چُننے کی خواہش ہو۔ اُس کا کام اور جلال نہ صرف ہماری اَبَدی زِندگی کا سبب پَیدا كرنا ہے بلکہ اِس میں یہ اُمید بھی شامل ہے کہ ہماری سب سے بڑی خواہش اُس کی طرف لوٹنا ہے۔ تاہم، وہ ہمیں کبھی بھی اطاعت کے لِیے مجبور نہیں کرے گا۔ گیت ”یہ جان لو، کہ ہر جان آزاد ہے“ میں ہم گاتے ہیں:

مِشن کے راہ نماؤں کی حیثیت سے، میری بیوی، کرسٹینا، اور مَیں بہت سے مِشنریوں سے مُتاثر ہُوئے جِنھوں نے فرمان بردار ہونے کا اِنتخاب کِیا، نہ صرف اس لِیے کہ یہ ایک مشنری معیار تھا بلکہ اس لِیے کہ وہ عاجزی کے ساتھ اُس کی نمایندگی کرنے کا اِنتخاب کرکے خُداوند کے لِیے اپنی محبّت ظاہر کرنا چاہتے تھے۔

ایلڈر ڈیل جی رینلنڈ نے کہا: ”ہمارے آسمانی باپ کے مقصد میں والدین ہونے کا مطلب اُس کے بچّوں سے راست کام کرانا نہیں؛ بلکہ اِس کا مطلب اُس کے بچّوں کو راست کام کا انتخاب کرنا سِکھانا اور آخرکار اُس کی مانند بننا ہے۔ اگر وہ محض ہمیں تابع فرمان بنانا چاہتا تو ہمارے رویوں پر اثر انداز ہونے کے لِیے وہ فوری جزائیں اور سزائیں نازِل کرتا۔“ جب ہم اُس کی اطاعت کرنے کا اِنتخاب کرتے ہیں تو ہم خُدا کے لِیے اپنی محبّت کا اِظہار کرتے ہیں۔

ہمارا آسمانی باپ اور ہمارا نجات دہندہ خُود کے لِیے ہماری محبّت کے اِظہار کو پہچانتے ہیں جب ہم اُنھیں اپنی زِندگی میں سب سے پہلے رکھتے ہیں، ایک دُوسرے کی خِدمت کرتے ہیں، شُکر گزاری کے ساتھ اُن کی ہر نعمت کا اعتراف کرتے ہیں، اور اُن کی اطاعت اور پیروی کرنے کا اِنتخاب کرتے ہیں۔

مَیں گواہی دیتا ہُوں، کہ ہم میں سے ہر ایک واقعی خُدا کی اولاد ہے، اور وہ ہم سے کامِل محبّت رکھتا ہے۔ مَیں گواہی دیتا ہُوں کہ وہ ہمارے لِیے شدید خواہش کرتا ہے کہ ہم اُس کی محبّت کا تجربہ ان طریقوں سے کریں جن کو ہم پہچانتے اور سمجھتے ہیں۔ اور خوبصورت خِلافِ عقل بات یہ ہے کہ ہم اپنے لیے اُس کی محبّت کا مزید گہرائی سے تجربہ کریں گے جب ہم اس سے اپنی محبّت کا اظہار کرتے ہیں۔ یِسُوع مسِیح کے نام پر، آمین۔