جاؤ اور اَیسا ہی کرو

تقریباً 91 قبلِ مسِیح میں، مورمن کی کِتاب کے مُناد، عمون نے اپنا تعارف لمونی بادِشاہ سے یہ کہہ کر کرایا، ”میری خواہش ہے کہ ایک مُدّت تک اِن لوگوں میں قیام کرُوں؛ … [اور] مَیں تیرا خادِم رہنا چاہُوں گا۔“ بادِشاہ کی خِدمت کے باعث، عمون کو موقع دِیا گیا کہ ”دلیری سے بات کرے، … اور [لمونی بادِشاہ] کو بتائے … کِس قُوّت سے“ اُس نے اپنی خِدمت انجام دی تھی۔ بدلے میں، بادِشاہ نے وعدہ کِیا کہ ”جِس کی بھی آرزُو [عمون] کرے گا … [بادِشاہ] تُجھے دے گا۔“ عمون کی صِرف یہی درخواست تھی کہ بادِشاہ یِسُوع مسِیح کی اِنجِیل کا پیغام سُن لے۔ عمون کی خِدمت کے نتیجہ میں ”ہزاروں جانیں تَوبہ کی طرف [لائی گئیں]۔“

ہمارے دَور میں، خِدمت دُوسروں کو اِنجِیل کی طرف لے جانے کا سِلسِلہ ہے۔ سسٹر بیون مُعلم مُناد کی حیثیت سے خِدمت انجام دے رہی تھیں جب اُنھیں صحت کے مسائل کا سامنا کرنا پڑا، جِس کی وجہ سے اُنھیں عِلاج کے لیے گھر واپس جانا پڑا۔ فارغ ہونے کی بجائے، وہ گھر سے خِدمتی مُناد کے طور پر خِدمت جاری رکھنے کے قابِل تھی۔

پارک میں سیر کرتے وقت، سسٹر بیون اور ایک دوست کو چار چھوٹے بچّوں کے ساتھ کسی ماں سے بات کرنے کا اِشارہ کِیا گیا، لیکن وہ ہچکچاہٹ کا شِکار ہُوئیں اور خاندان وہاں سے چلا گیا۔ اَگلے دِن، وہ پارک میں واپس آئے، دُعا کر رہے تھے کہ یہ خاندان وہاں موجُود ہو۔ مُعجزانہ طور پر ماں بالُکل اُسی جگہ پر بیٹھی تھی جہاں کل تھی۔ اِس بار، سسٹر بیون اور اُس کی سہیلی نے اُس والدہ سے رابطہ کِیا، اُس سے واقفیت پَیدا کی، اور دریافت ہُوا کہ اُس کو وقتی طور پر مدد کی اَشد ضرُورت تھی۔ اُنھوں نے مدد فراہم کی اور پھر اُسے اِنجِیل کی بابت جاننے کے لیے دعوت دی۔

اُس خِدمت اور دعوت کی وجہ سے، ماں اور اُس کے سب سے بڑے بچّے نے بپتِسما لِیا، اُس کے بعد اگلے سب سے بڑے بچّے نے ایک سال بعد بپتِسما لِیا۔ وہ آج بھی فعال رُکن ہیں۔ سسٹر بیون جانتی تھیں کہ یہ اِحساس اِلہامی طور پر تھا اور اِس بات نے ”[اُس ] پر یہ ثابت کِیا کہ [وہ] بالکل وہیِں تھی جہاں خُدا چاہتا تھا کہ [وہ] ہو۔“

عمون اور سسٹر بیون کی طرح، جب ہم دُوسروں کی خِدمت کرتے ہیں، تو ہم ”اُن کے لیے اچھّا نمونہ بنتے ہیں“ اور اُن کی آرزُو ہوتی ہے کہ ”[ہماری] اُمِّید کی وجہ دریافت کریں۔“

یِسُوع ہمیں دعوت دیتا ہے کہ ”جاؤ، اور تُم بھی اَیسا ہی کرو۔“

صدر رسل ایم نیلسن نے ”ہر لائق، قابِل نوجوان کو فریضہِ مُنادی کی تیاری اور خِدمت انجام دینے کے لِیے“ بُلایا اور ہر قابل نوجوان بہن سے کہا کہ ”یہ جاننے کے لیے دُعا کریں کہ آیا خُداوند چاہتا ہے کہ آپ مُنادی کی خِدمت انجام دیں۔“ اُس نے وعدہ کِیا کہ ”مُنادی کی خِدمت کرنے کا آپ کا فیصلہ، چاہے مُنادی کا میدان ہو یا خِدمت گُزاری کا فریضہ، آپ کو اور بُہت سے دُوسروں کو برکت دے گا۔“ خِدمت گُزاری کے مشنز نے لفظ قابل کی تعریف بدل دی ہے۔ اب ہر قابِل نوجوان مرد اور نوجوان عورت جو خُداوند کے لِیے کُل وقتی مشن کی خِدمت کرنا چاہتی/چاہتا ہے، بُہت تھوڑی تبدیلیوں کے ساتھ اَیسا کر سکتی/سکتا ہے۔

ایلڈر ہولگاڈو ذاتی حالات سے قطع نظر خِدمت کرنے کے قابل ہونے کی ایک مثال ہے۔ وہ مُنفرد جینیاتی عارضہ کے ساتھ پَیدا ہُوا تھا، لہٰذا تدرِیسی مُناد کی حیثیت سے خِدمت کرنا مُمکن نہ رہا تھا۔ ایلڈر ہولگاڈو کو خِدمت گُزار مُناد کی بُلاہٹ دی گئی اور بشپ کے سٹور ہاؤس میں رضاکارانہ طور پر کام کِیا، جہاں اُس نے دُوسرے لوگوں کی مدد کی جِس کی اُنھیں ضرُورت تھی۔ وہ الماریوں پر سامان لگاتا، سبزیوں کو تھیلیوں میں ڈالتا، اور گتے کے ڈبوں کو پریس کرتا تھا۔

جب ایلڈر ہولگاڈو نے اپنے مشن کے بعد عِشائے ربانی کی عِبادت میں پیغام دِیا، اُس نے بتایا کہ ”خُدا کو خِدمت کرنے والے مُنادوں کی ضرُورت ہے۔ اُسے محبّت رکھنے اور خِدمت کرنے والے لوگوں کی ضرُورت ہے۔ اَیسے لوگ ٹوائلٹ پیپر لگاتے، سبزیوں کو تھیلی میں ڈالتے، فرنیچر بناتے ہیں، اور لوگوں سے حُسنِ اَخلاق سے پیش آتے ہیں۔“

نیکوکاری کے لیے آپ کو فریضہِ خِدمت لینے یا نام کا بَیج لگانے کی ضرُورت نہیں ہے۔ خِدمت کے ہر عمل کو نجات دہندہ پہچانتا ہے۔ ہم سب شفقت کے ساتھ خِدمت کر کے مسِیح کے پاس آنے میں دُوسروں کی مدد کرنے کے قابل ہوتے ہیں۔ ہم سب رُوحُ القُدس کی قُدرت کے وسِیلہ سے مسِیح کے نام پر کسی ایک کی خِدمت کر سکتے ہیں اور یِسُوع مسِیح پر اِیمان کی مثالیں بن کر زِندگی گُزار سکتے ہیں۔ خِدمت ہمیں اپنے آپ کو زِندہ اِیثار و قُربانی بننے کے قابِل بناتی ہے جو خُدا کی نظر میں مقبُول ہے۔

یِسُوع ہمیں دعوت دیتا ہے کہ ”جاؤ، اور تُم بھی اَیسا ہی کرو۔“

ایک نوجوان مشنری جِس کو فریضہِ تدریس سے فریضہِ خِدمت میں مُنتقل کیا گیا تھا، بعض ذاتی مسائل سے نبرد آزما تھا جِس کی وجہ سے اُسے مسِیح کی شِفا بخش قُدرت کی ضرُورت پڑ گئی۔ پاک خِدمت اِس قُدرت کو اُس کی زِندگی میں لے آئی۔ اُس نے کہا، ”مُجھے اِحساس ہُوا کہ جب مَیں پریشان تھا، تو مَیں محسُوس کر سکتا تھا کہ مسِیح مُجھے اُٹھا رہا ہے۔ خُوراک کے ذخیرہ خانہ سے، ہَیکل میں، اور اُس کی اِنجِیل کے وسِیلہ سے لوگوں کو برکت دیتے دیکھنا اِنتہائی خاص بات ہے۔“

یہ ایلڈر گہری خُوشی محسُوس کرنے لگا، اور اُس کے نئے جوش نے اُسے اور اُس کے پُورے خاندان کو برکت دی۔ رُوح اُن کے گھر میں زیادہ کثرت سے موجُود تھا، وہ زیادہ باقاعدگی سے ہَیکل میں جاتے تھے، اور مسِیح اُن کے خاندان میں زیادہ توجہ کا مرکز بن گیا تھا۔ اِس مُناد کا خیال ہے کہ مسِیح نے اُس کی جان بچائی اور خِدمت گُزاری کے ذریعہ سے اُس کے خاندان کو برکت دی۔

صدر نیلسن نے سِکھایا ہے، ”دُوسروں کی خِدمت کرنے اور سہارا دینے کی خواہش شِفا پانے کی تیاری کا اِشارہ ہے“ جو نجات دہندہ کی مُخلصی بخش قُدرت کے وسِیلہ سے ملتا ہے۔

یِسُوع ہمیں دعوت دیتا ہے کہ ”جاؤ، اور تُم بھی اَیسا ہی کرو۔“

جب آپ کو یا خاندان کے کسی فرد کو خِدمت گُزار مُناد کی بُلاہٹ عطا ہوتی ہے تو یہ جشن منانے کی گھڑی ہوتی ہے۔ آپ کے خاندان کے پاس اب آپ کے گھر میں خُداوند یِسُوع مسِیح کا مخصُوص کِیا ہُوا نمایندہ ہوگا۔ یہ آپ سب کو بھلائی کے لیے بدل دے گا۔ خِدمت کے لِیے کسی بھی بُلاہٹ میں مایوسی نہیں ہونی چاہیے۔ ہم گاتے ہیں کہ، ”مَیں جاؤں وہاں جہاں تو چاہے“ اور ”مَیں بنُوں وہی جو تُو چاہے۔“ اِس بات کو ظاہر کرنے کا موقع ہے کہ ہم جو کہتے ہیں اُس سے وہی مُراد ہے!

آپ سب کے لِیے جو خِدمت انجام دیتے ہیں، اور خاص طور پر 4,000 سے زیادہ نوجوان خِدمت گُزار مُنادوں کے لِیے، ہم آپ سے پیار کرتے ہیں! اگر تدریسی مُناد صاحبان خُداوند کا مُنہ ہیں، تو خِدمت گُزار مُناد صاحبان خُداوند کے ہاتھ ہیں، اور آپ دُوسرے درجہ کے مُناد نہیں ہیں۔ آپ میں سے ہر ایک اِسرائِیل کو اِکٹھا کرنے کے لِیے نہایت اہم ہے۔ صدر نیلسن نے سِکھایا کہ: ”کسی بھی کام میں کسی بھی وقت کسی کی بھی…خُدا کے ساتھ عہُود باندھنے اور قائم رکھنے میں جب ہم مدد کرتے ہیں، تو ہم اِسرائِیل کو اِکٹھا کرنے میں مدد کر رہے ہوتے ہیں۔“

آپ خِدمت گُزار مُناد صاحبان بُہت سے طریقوں سے اِسرائِیل کو جمع کرتے ہیں، اور آپ کی خِدمت زِندگی بدل دیتی ہے۔ اکثر آپ یہ نہیں جانتے کہ آپ کی خِدمت سے برکت پانے والا کون ہے، لیکن خُدا جانتا ہے۔ ہمیشہ یاد رکھیں کہ ”جب تُم اِن سب سے چھوٹے بھائِیوں میں سے کِسی ایک کی [خِدمت] کرتے ہو، …تو تُم [اُس کی خِدمت] کرتے ہو۔“ جب آپ چرچ کال سینٹرز میں رضاکارانہ طور پر کام کرتے ہیں تو ہم آپ کی آوازیں سُنتے ہیں؛ جب آپ کمیونٹی تنظیموں میں مدد کرتے ہیں تو ہم آپ کی مُسکراہٹیں دیکھتے ہیں؛ اور ہم آپ کی رَوشنی محسُوس کرتے ہیں جب آپ دُنیا بھر کی ہَیکلوں میں خِدمت کرتے ہیں۔ آپ بھوکوں کو کھانا کھلاتے ہو، ننگوں کو کپڑے پہناتے ہو اور پیاسوں کو پانی پِلاتے ہو۔

ہم سب کو جانے اور اِسی طرح کرنے کی ضرُورت ہے۔

خِدمت گُزاری اِنجِیل کے لیے دِلوں کو کھولنے کی قُدرت رکھتی ہے اور ہم سب کو اپنی ساری جان مسِیح کو دینے کے لائق بناتی ہے۔ یہ ہمارے دِلوں کو مزید اُس کی مانِند بننے کے لیے بدلتی ہے، اور اِس عمل میں، ہم دُوسروں کو سہارا دیتے ہیں۔ صدر نیلسن نے ایک بار پُوچھا، ”رُوحانی زوال کی شِکار اِس دُنیا میں، کیا اَفراد … تبدیلی لا سکتے ہیں؟“ اُن کا جواب، ”جی ہاں! … ’خُداوند کے عہد کے لوگ، … خُدا کی قُدرت سے ذوالجلال کے ساتھ‘ … مسلح … کُل بنی نوع اِنسان کی زِندگیوں کو سہارا دے سکتے ہیں۔“ خِدمت کے ذریعہ سے ہم دِل اور دُنیا—بدلتے ہیں۔

مسِیح ”بھلائی کرتا پھِرا۔“ اُس نے بِیماروں کو اچھّا کِیا، اندھوں کو بِینائی دی، کُچلے ہُوئے کو تسلّی دی۔ اُس نے کھانا پکایا، شادی کی ضیافت میں مدد کی، اور ہزاروں بھُوکوں کو کھانا کھِلایا۔ جب ہم مسِیح کے نام پر کسی ایک کی خِدمت کرتے ہیں، تو ہم زیادہ سے زیادہ برگُزیدہ اور حیاتِ اَبَدی کی نعمت کے لائق بنتے ہیں۔ یِسُوع مسِیح زِندہ ہے۔ وہ میرا اور آپ کا نجات دہندہ ہے۔ وہ ہمارا مُخلصی دینے والا ہے۔ وہ خِدمت گُزاری کا ہمارے واسطے بےمثال نمُونہ ہے۔ مَیں ہر ایک کو جانے اور اِسی طرح کرنے کی دعوت دیتا ہُوں۔ یِسُوع مسِیح کے نام پر، آمین۔