اپنی اَصل پہچان کو جانیں

جب نجات دہندہ اپنی فانی خِدمت کا آغاز کر رہا تھا، تو اُسے بیابان میں لے جایا گیا کہ ”خدا کے ساتھ رہے۔“ شاید ہمیں اپنی سوچ کو یوں بدلنے کی ضرورت ہے کہ صرف دُعا کرنے کی بجائے ہم اتنا وقت نکالیں کہ ہر روز واقعی ”خُدا کے ساتھ رہ سکیں۔“

مَیں نے محسُوس کِیا ہے کہ جب مَیں دُعا کرنے سے پہلے چند منٹ باپ سے بات کرنے کی تیاری کرتا ہُوں تو میری دُعاؤں کا معیار بہتر ہو جاتا ہے۔ صحیفے ہمیں دِکھاتے ہیں کہ یہ ایک مؤثر طریقہ ہے۔ خواہ وہ جوزف سمِتھ ہو؛ یا ہیلیمَن کا بیٹا نیفی؛ یا انُوس، سب نے خُدا کے ساتھ اپنی درج شُدّہ دُعا سے پہلے کِسی نہ کِسی طرح غور و فکر کِیا۔ انُوس نے کہا کہ اُس کی جان کو بھُوک لگی جب اُس کے باپ کے الفاظ اُس کے دِل کی گہرائی تک پُہنچے۔ اِن مثالوں میں سے ہر ایک ہمیں یہ سِکھاتی ہے کہ ہمیں ہر روز ”خُدا کے ساتھ“ وقت کے لیے رُوحانی تیاری کی ضرورت ہے۔

نیفیوں کے لیے، نجات دہندہ نے ہدایت دی، ”بلکہ تُو، جب دُعا کرے، تو اپنی کوٹھری میں جا، اور دروازہ بند کر کے اپنے باپ سے جو پوشِیدگی میں ہے دُعا کر۔“

چاہے وہ کوٹھری میں ہو یا بیڈ رُوم میں، اُصُول یہ ہے کہ ایسی جگہ تلاش کی جائے جہاں آپ دُعا کرنے کے لیے اکیلے ہوں، اپنی جان کو ساکت ہونے کی اِجازت دیں، اور ”دبی ہُوئی دھیمی آواز“ کی ترغیبات کو محسُوس کریں۔ ہم اُن چیزوں پر غور کرنے سے تیار ہو سکتے ہیں جن کے لیے ہم شُکر گُزار ہیں اور وہ سوالات یا خدشات جو ہم اپنے باپ کے پاس لانا چاہیں گے۔ ہمیں کوشش کرنی چاہیے کہ ہماری دُعائیں محض رٹی رٹائی نہ ہوں بلکہ ہم اپنے باپ سے گُفتگُو کریں، اگر مُمکن ہو تو بلند آواز میں۔

مُجھے احساس ہے کہ ہماری زندگیوں کی افراتفری میں، جب ہم ننھے مُنّے بچّوں کے ساتھ نِمٹ رہے ہوتے ہیں یا ایک میٹنگ سے دُوسری کی طرف دوڑ رہے ہوتے ہیں، تو شاید ہمارے پاس پُرسکُون کوٹھریوں اور پُرفکر تیاری کا عیش و آرام میسر نہ ہو—لیکن وہ خاموش، مُختصر، اور فوری دُعائیں بُہت زیادہ معنی خیز ہو سکتی ہیں جب ہم نے دِن کے شُروع میں ”خدا کے ساتھ رہنے“ کی کوشش کی ہو۔

کُچھ ایسے لوگ بھی ہو سکتے ہیں جنھوں نے طویل عرصہ سے دُعا نہیں کی ہے یا دیگر جنھوں نے محسُوس کِیا ہے کہ اُن کی دُعائیں سنی نہیں جا رہی ہیں۔ مَیں آپ سے وعدہ کرتا ہُوں کہ آپ کا آسمانی باپ آپ کو جانتا ہے، آپ سے پیار کرتا ہے، اور آپ سے سُننا چاہتا ہے۔ وہ آپ کے ساتھ بات چیت کرنا چاہتا ہے۔ وہ چاہتا ہے کہ آپ یاد رکھیں کہ آپ کون ہیں۔

حال ہی میں ایلڈر جیفری آر ہالینڈ نے سِکھایا: ”آپ جتنی بھی زیادہ دُعا کر رہے ہیں، اُس سے بھی زیادہ دُعا کریں۔ آپ جتنی بھی زور و شور سے دُعا کر رہے ہوں، اور زیادہ زور و شور سے دُعا کریں۔

اپنی دُعاؤں کی تعداد اور جوش و خروش کو بڑھانے کے علاوہ، روزانہ مورمن کی کِتاب کا مُطالعہ کرنا اور ہَیکل میں عِبادت کرنا ہمارے ذہنوں کو مکاشفہ کے لیے تیار کرنے میں مدد دے گا۔ جب ہم اپنے آسمانی باپ کے ساتھ اپنے رابطے کو بہتر بنانے کی کوشِش کرتے ہیں، تو وہ ہمیں زیادہ گہرے طور پر محسُوس کرنے کی برکت دے گا کہ ہم اُس کے بچّے ہیں۔

آسمانی باپ کی اپنے بچّوں کی حیثیت سے ہمارے لیے محبّت کا سب سے بڑا ظہور یہ حقیقت ہے کہ اُس نے اپنے بیٹے کو، ہمارا شخصی نجات دہندہ بنا کر بھیجا، تاکہ گھر واپس آنے میں ہماری مدد کی جا سکے۔ پس، ہمیں اُس کو جاننے کی ضرورت ہے۔

برسوں پہلے، بطور صدرِ سٹیک خِدمت کرتے ہُوئے، مَیں نے ایک بھائی کو ہَیکل میں آرڈیننس ورکر کے طور پر خِدمت کرنے کے لیے نامزد کِیا۔ یہ وضاحت کرنے کے بعد کہ وہ کِس قدر ایک شان دار آرڈیننس ورکر ہوں گے، مَیں نے غلطی سے ”تائید نہ کریں،“ پر کِلک کر دیا اور نامزدگی بھیج دی۔ پیغام کو واپس لینے میں ناکامی کے بعد، مَیں نے ہَیکل کے صدر کو فون کِیا اور کہا: ”مَیں نے ایک خوفناک غلطی کر دِی ہے۔“ بغیر کسی ہچکچاہٹ کے ہَیکل کے اُس اچھے صدر نے کہا، ”صدر ائیر، کوئی ایسا کام نہیں جو آپ نے کِیا ہو جس کی مُعافی اور آخرکار تصحیح نہیں کی جا سکتی۔“ کیا زبردست سچ ہے۔ درحقیقت، یسوع مسیح ”بچانے میں قادِر“ ہے۔

2019 میں اِجازت نامہ برائے ہَیکل کے سوالات میں گہری تبدیلی آئی۔ پہلے، ایک سوال یہ پُوچھا جاتا تھا کہ کیا آپ یِسُوع مِسیح کی، بحیثیت نجات دہندہ اور مُخلصی دینے والے کی گواہی رکھتے ہیں۔ اب یہ پُوچھا جاتا ہے کہ کیا آپ یِسُوع مِسیح کی، بحیثیت اپنے نجات دہندہ اور مُخلصی دینے والے کی گواہی رکھتے ہیں۔ یِسُوع مسِیح کا کفّارہ نہ صرف دُوسروں کے لیے کام کرتا ہے؛ بلکہ یہ آپ کے اور میرے لیے بھی کام کرتا ہے۔ وہ میرا نجات دہندہ ہے۔ وہ آپ کا نجات دہندہ ہے۔ اِنفرادی طور پر۔ صرف اُس کے وسیلے سے آپ اور مَیں اپنے باپ کے ساتھ رہنے کے لیے واپس لوٹ سکتے ہیں۔

پس، بھائیو اور بہنو، آئیں ہم اُس کے طالب ہوں۔ آئیں ہم باپ اور ہم میں سے ہر ایک کے ساتھ اُس کے الہٰی تعلق کا مُطالعہ کریں۔ آئیے ہم مُخلصی بخش محبّت کے گیت کا تجربہ کریں جو اپنے مُخلصی دینے والے کے ذریعے ہم میں سے ہر ایک کو ذاتی طور پر ہوتا ہے جب ہم توبہ کرتے ہیں۔ جب ہم اُسے جانیں گے ”جو بچانے میں قادِر ہے،“ تو ہم یہ سمجھ پائیں گے کہ ہم، بحیثیت طفلِ خُدا، اُس کی خُوشی—اُس کی سب سے اہم ترجیح—اور درحقیقت ہم میں سے ہر ایک نجات پانے کے لائق ہے۔

مَیں گواہی دیتا ہُوں کہ ہمارے پاس ایک محبّت کرنے والا آسمانی باپ ہے۔ جب ہم بڑی دُعا، شخصی مُکاشفہ، اور یِسُوع مسِیح کے پاس آنے کے ذریعے اُس اَبَدی سچّائی کو جان پاتے ہیں، تو ہم اب اور ہمیشہ دلیری سے یہ اعلان کر سکتے ہیں کہ، ”مَیں ہُوں طفلِ خُدا۔“ یِسُوع مسِیح کے نام پر، آمین۔